சி.சி.டி.வி பதிவுகள்... புகைப்படங்கள்... ஆதாரங்களைத் தேடி அரெஸ்ட் செய்யும் போலீஸ்!

தூ த்துக்குடி வீதியெங்கும் பாதுகாப்புக்காக நிறுத்தி வைக்கப் பட்டுள்ள போலீஸாரின் எண்ணிக் கையில் ஒருவர் கூடக் குறைக்கப்பட வில்லை. ஆட்சியர் அலுவலக வளாகத்திலும், காவல் நிலையங்கள் முன்பும் நிறுத்தப்பட்டிருந்த வஜ்ரா வாகனங்களும் அங்கிருந்து நகரவில்லை. வீடுகளுக்குள் போலீஸார் திபுதிபுவென புகுந்து எந்தக் காரணமும் சொல்லாமல் மக்களைக் கைது செய்யும் நடவடிக்கைகளும் தொடர்கின்றன. எனவே, இன்னும் அச்சத்தின் உச்சத்தில் உள்ளது தூத்துக்குடி.

ஸ்டெர்லைட் ஆலைக்கு எதிரான மக்கள் போராட்டத்தில் தீவிரமாகப் பங்கேற்ற மகேஷை அவரது குமரெட்டியாபுரம் வீட்டுக்குள் புகுந்து கைது செய்துள்ளது காவல்துறை. மகேஷின் அம்மா மாரியம்மாளிடம் பேசினோம், “ஒரு வாரத்துக்கு முன்னால ஒரு வேன் நிறைய போலீஸ்காரங்க வீட்டுக்கு வந்தாங்க. ‘உன் மகனை எங்க..’ன்னு கேட்டாங்க. ‘அவன் ஊருல இல்லைய்யா’ன்னு சொன்னேன். ‘அவன் இருக்குற இடம் உனக்குத் தெரியும், சொல்லு..’ன்னு மிரட்டினாங்க. வீடு முழுவதும் தேடிப் பார்த்துட்டு கிளம்பிப் போயிட்டாங்க. தினமும் ஊருக்குள்ள திடீர் திடீர்னு போலீஸ் வண்டி வருது. கார் சத்தம் கேட்டாலே பயம்மா இருக்கு.

. திரும்பவும் 10-ம் தேதி காலையில எட்டரை மணிக்கு திடீர்னு பத்து பேரு கலர் டிரெஸ்ல வந்தாங்க. என் மகன் அவனோட மூணு மாச குழந்தைய மடியில வச்சிக்கிட்டு இருந்தான். அவனை எழுப்பி, ‘சட்டையைப் போட்டுட்டுக் கிளம்பு’ன்னு சொனாங்க. ‘எங்க கூப்பிடுறீங்க சார்’னு கேட்டதுக்கு, ‘எங்கன்னு சொன்னாத்தான்

. வருவியா..? வாலே..’ன்னு கையப் பிடிச்சி இழுத்துட்டுப் போயிட்டாங்க. இதே போல, பால்ராஜுங்குற பையனையும் கூட்டிட்டுப் போயிட்டாங்க. எங்க வச்சிருக்காங்கன்னு தெரியலை. என்னென்ன சித்ரவதை செய்யப் போறாங்கன்னு தெரியலை. சிப்காட் ஸ்டேஷன்ல கேட்டா, ‘எங்களுக்கும் இதுக்கும் சம்மந்தமில்ல..’ன்னு சொல்றாங்க. மக்களுக்காகப் போராடுனதுக்கா எங்களுக்கு இந்த கெதி..?” என்று கண்ணீருடன் பேசியவர், சில நொடிகள் மௌனத்துக்குப் பிறகு கண்ணீரைத் துடைத்துவிட்டு, “இன்னும் எத்தனை பேரை வேணும்னாலும் கைது செய்யட்டும், இந்த ஆலையை தூத்துக்குடி மண்ணுல இருந்து அகற்றுவது வரை போராட்டம் தொடரும்” என்றார் உறுதியாக.

துப்பாக்கிச் சூட்டுக்கு பிறகும் மாவட்டத்தின் பல பகுதிகளில் வன்முறைச் சம்பவங்கள் தொடர்ந்தன. மே 24-ம் தேதி பிரையண்ட் நகரில் டாஸ்மாக் கடைமீது பெட்ரோல் குண்டு வீசப்பட்ட சம்பவம் குறித்து நாளிதழில் வந்த புகைப்படங்களை வைத்து பொன்ராஜ் என்பவரை போலீஸார் இப்போது கைது செய்துள்ளனர். பொன்ராஜின் மனைவி பொன்லட்சுமியிடம் பேசினோம். “ஜூன் 10-ம் தேதி அதிகாலையில் வீட்டுக் கதவை வேகமா இடிக்கிற சத்தம் கேட்டுச்சு. கதவுப்பக்கம் போய் நின்னு ‘யாரு’ன்னு கேட்டேன். ‘கதவைத் திறக்குறியா. இல்ல, கதவை உடைச்சுட்டு உள்ளே வரட்டா’ன்னு சொல்லிக்கிட்டே கதவை வேகமா உடைக்க ஆரம்பிச்சாங்க. தூங்கிக்கிட்டிருந்த ரெண்டு குழந்தைகளும் முழிச்சு அழ ஆரம்பிச் சுட்டாங்க. கதவைத் திறந்தேன். வீட்டுக்குள்ள வந்த போலீஸ்காரங்க என் கணவரைப் பிடிச்சு இழுத்துட்டுப் போய், ‘வண்டியில ஏறு’ன்னு சொல்லி அடிக்க கையை ஓங்கினாங்க. ‘எதுக்கு சார் அரெஸ்ட் பண்ணுறீங்க’ன்னு கேட்டேன். டாஸ்மாக் கடைக்கு தீ வச்சதுக்காக அரெஸ்ட் பண்ணுறோம்’னு சொன்னாங்க.

டாஸ்மாக் கடையில தீப்பிடிச்சபோது, கடையைத் திறக்க என் கணவரின் அண்ணன் இசக்கிமுத்து, கடை சூப்பர்வைசரிடம் சாவியை வாங்குற மாதிரியும், பக்கத்துல என் கணவர் நிக்குற மாதிரியும் போட்டோ வந்திருக்கு. ‘பொன்ராஜ் எந்தப் பிரச்னையும் செய்யலை’ன்னு கடை சூப்பர்வைசரே போலீஸ்கிட்ட சொல்லிருக்கார். சம்பவம் நடந்தப்போ போலீஸும் இருந்துச்சு. ஆனாலும், இவரைக் கைது செய்தாங்க. ‘ஏன்

. இப்படிப் பண்றீங்க’ன்னு கேட்டதுக்கு, ‘உன் புருஷனோட அண்ணன் இசக்கிமுத்துவுக்கு பைபாஸ் ஆபரேஷன் செஞ்சுருக்கு. அவருக்கு ஸ்டேஷன்ல ஏதும் ஆயிட்டா நாங்க பொறுப்பாக முடியுமா? அதனாலதான் உன் புருஷனை அரெஸ்ட் பண்றோம்’னு சொன்னாங்க. போலீஸ் அடிச்சா அடி தாங்கணும்ங்கறதுக்காக என் வீட்டுக்காரரைக் கூப்பிட்டுட்டுப் போயிருக்காங்க” என்றார் கண்ணீருடன்.

போலீஸ் வட்டாரத்தில் பேசினோம். “தூத்துக்குடியில் நடந்த வன்முறைச் சம்பவங்களின்போது எடுக்கப்பட்ட புகைப்படங்கள், சில சி.சி.டி.வி பதிவுகள் எங்களுக்குக் கிடைத்துள்ளன. கலவரத்தில் யார் யார் ஈடுபட்டார்கள் என்பதை, அதையெல்லாம் வைத்து நாங்கள் கண்டுபிடித்துள்ளோம். அதன் அடிப்படையில்தான் கைது நடவடிக்கைகள் தொடர்கின்றன” என்றனர்.

ஏற்கெனவே, நாம் தமிழர் கட்சியின் மாநில ஒருங்கிணைப்பாளர் வியனரசு கைது செய்யப்பட்டு சிறையில் உள்ளார். அந்தக் கட்சியின் மண்டல நிர்வாகிகள் இசக்கிதுரை, பாக்கியராஜ் ஆகியோரும், பண்டாரம்பட்டியைச் சேர்ந்த பாண்டி உள்ளிட்ட எட்டுப் பேரும், மக்கள் அதிகாரம் அமைப்பினர் பலரும் கைதுசெய்யப்பட்டுள்ளனர். மடத்தூர் உள்பட பல கிராமங்களிலும் நள்ளிரவில் வீடுபுகுந்து பலரையும் கைது செய்கிறது போலீஸ். இதனால் ஆண்கள் ஊருக்குள் வருவதைத் தவிர்க்க, பெண்கள் வீடுகளைப் பூட்டிக்கொண்டு கூட்டமாக பொது இடங்களில் தூங்குகின்றனர்.

‘இயல்புநிலை திரும்பிவிட்டது’ என்று மாவட்ட ஆட்சியர் சந்தீப் நந்தூரி சொல்கிறார். தெருவுக்குத் தெரு நடக்கும் கைதுகளால், தூத்துக்குடி இயல்புக்கு அப்பால் உள்ளது என்பதுதான் இன்றைய நிஜம்! - இ.கார்த்திகேயன் படங்கள்: ஏ.சிதம்பரம்