Published:Updated:

மனநிம்மதி தேடி வந்தவர்... மயக்கத்தில் சந்தித்த கொடூரம்!

ஒட்டுமொத்த விகடனுக்கும் ஒரே ஷார்ட்கட்

Use App
மனநிம்மதி தேடி வந்தவர்... மயக்கத்தில் சந்தித்த கொடூரம்!
மனநிம்மதி தேடி வந்தவர்... மயக்கத்தில் சந்தித்த கொடூரம்!

மனநிம்மதி தேடி வந்தவர்... மயக்கத்தில் சந்தித்த கொடூரம்!

பிரீமியம் ஸ்டோரி

சென்னையில் 11 வயது சிறுமி பாலியல் வன்கொடுமைக்கு ஆளாக்கப்பட்ட சம்பவம், தமிழகத்துக்குத் தலைகுனிவை ஏற்படுத்தியுள்ளது என்றால், திருவண்ணாமலையில் ரஷ்ய நாட்டு இளம்பெண் வல்லுறவுக்கு ஆளாக்கப்பட்ட சம்பவம், இந்தியாவுக்கே தலைகுனிவை ஏற்படுத்தியுள்ளது. வெளிநாடுகளிலிருந்து இந்தியாவுக்கு சுற்றுலா வருகிறவர்களுக்கு, இந்தச் சம்பவம் அச்சத்தை ஏற்படுத்தியுள்ளது.

இந்தியாவின் ஆன்மிகத்தால் ஈர்க்கப்பட்டுப் பல்வேறு நாடுகளையும் சேர்ந்தவர்கள் இந்தியாவில் உள்ள ஆன்மிகத்தலங்களுக்கு மனநிம்மதி தேடி வருகை தருகின்றனர். இந்த வகையில், திருவண்ணாமலைக்கு ஏராளமான வெளிநாட்டினர் வருகின்றனர். அவர்கள், திருவண்ணாமலையில் பல்வேறு அமைப்புகள் நடத்தும் ஆசிரமங்களில் மாதக்கணக்கில் தங்கியிருந்து யோகா, தியானம் போன்றவற்றில் ஈடுபடுகின்றனர். இப்படி, திருவண்ணாமலைக்கு வந்தவர்தான், ரஷ்யாவைச் சேர்ந்த ஒரு பெண். ஜூலை 12-ம் தேதி திருவண்ணாமலைக்கு வந்த அவர், விசிறி சாமியார் என்றழைக்கப்படும் யோகி ராம்சுரத்குமார் ஆசிரமத்துக்கு அருகில் கஸ்தூரி நகரில் உள்ள ஒரு சர்வீஸ்  அப்பார்ட்மென்டில் தங்கியிருந்தார். அப்போதுதான், அவர் பாலியல் வன்கொடுமைக்கு ஆளாக்கப்பட்டார்.

மனநிம்மதி தேடி வந்தவர்... மயக்கத்தில் சந்தித்த கொடூரம்!

என்ன நடந்தது என்பதை போலீஸ் அதிகாரி ஒருவரிடம் கேட்டோம். “பேரடைஸ் என்ற அப்பார்ட்மென்ட்டை பாரதி என்பவரும், அவரின் அண்ணன் நீலகண்டனும் லீஸுக்கு எடுத்து நடத்துகின்றனர். அங்கு ஜூலை 12-ம் தேதி முதல் அந்த ரஷ்யப் பெண் தங்கியிருந்தார். அங்கே அந்தப் பெண் தங்கியிருந்த நேரத்தில், மற்றோர் அறையில் ஜூலை 14-ம் தேதி இரவு, பாரதியின் நண்பர் மணிகண்டன் என்பவரின் பிறந்தநாளை பாரதி, நீலகண்டன், வெங்கடேசன் ஆகியோர் கொண்டாடியுள்ளனர். அப்போது அவர்கள் மது அருந்தியுள்ளனர். போதை மருந்துகளையும் பயன்படுத்தியுள்ளனர். அன்றைக்கு, அந்த ரஷ்யப் பெண்ணைப் பாலியல் பலாத்காரம் செய்யும் திட்டத்துடன், அந்தப் பெண்ணுக்கு உணவில் மயக்க மருந்தையும் போதை மருந்தையும் கலந்து கொடுத்துள்ளனர். அந்த உணவைச் சாப்பிட்ட பிறகு, அவர் மயங்கிச் சாய்ந்துவிட்டார்.

அப்போது, மாற்று சாவி மூலம் அந்த அறையைத் திறந்து, அந்தப் பெண்ணை நான்கு பேரும் பாலியல் பலாத்காரம் செய்துள்ளனர். காலையில் அவருக்கு மயக்கம் தெளிந்துள்ளது. மீண்டும் அவருக்குப் போதை ஊசி போட்டு மயக்கத்தில் ஆழ்த்தி, மீண்டும் பலாத்காரம் செய்துள்ளனர். பிறகு அந்தப் பெண்ணுக்கு மயக்கம் தெளிய வைக்க, அவரைக் குளிப்பாட்டியுள்ளனர். அப்படியும் மயக்கம் தெளிய வில்லை. ஏதோ ஆகிவிட்டது என்று பயந்துபோன நால்வரும், அந்தப் பெண்ணை ஒரு தனியார் மருத்துவமனையில் சேர்த்துள்ளனர். அவர் பாலியல் பலாத்காரம் செய்யப்பட்டுள்ளார் என்பதைச் சோதனை மூலம் அறிந்துகொண்ட மருத்துவர்கள், போலீஸுக்குத் தகவல் கொடுத்தனர். அந்த நால்வரிடமும் விசாரணை நடைபெற்றுவருகிறது” என்றார். அந்தப் பெண்ணுக்கு மயக்கம் தெளிந்தவுடன் நடைபெற்ற விசாரணையில், அவர்கள் நால்வரும் பாலியல் பலாத்காரம் செய்தது உறுதியானது.

மனநிம்மதி தேடி வந்தவர்... மயக்கத்தில் சந்தித்த கொடூரம்!

இந்தச் சம்பவத்துக்குப் பிறகு, ‘திருவண்ணாமலையில் பதிவுசெய்யாத விடுதிகள் மற்றும் வெளிநாட்டினருக்கு வாடகைக்கு வீடுகள் கொடுப்போர் குறித்த விவரங்களைப் பட்டியலிட்டு விசாரிக்க வேண்டும். விசா முடிந்தும் நாடு திரும்பாத வெளிநாட்டினர் குறித்துக் கணக்கெடுத்து நடவடிக்கை எடுக்க வேண்டும்’ என மாவட்ட நீதிபதி மகிழேந்தி உத்தரவிட்டுள்ளார்.

திருவண்ணாமலை வந்திருந்த வெளிநாட்டுப் பெண் ஒருவரிடம் பேசினோம். “நாங்கள் தமிழகம் வருவதற்கு ஆன்மிகமும், தமிழக மக்களின் பண்பாடும்தான் முக்கியக் காரணம். அமைதியான முறையில் தியானம் செய்யவே திருவண்ணாமலை வருகிறோம். தியானத்தினால் மனநிம்மதி கிடைக்கிறது. இந்த மனநிம்மதியைக் குலைக்கும் வகையில் சிலர் செயல்படுகின்றனர். வீதியில் நடந்துசெல்லும்போது, எங்களை வேறுவிதமாகப் பார்ப்பது, பாலியல்ரீதியாகத் துன்புறுத்துவது, எங்களை மடக்கித் தோளில் கைபோட்டு செல்ஃபி எடுப்பது போன்ற அநாகரிகமான செயல்களில் ஈடுபடுகின்றனர்” என்றார் வேதனையுடன்.

மனநிம்மதி தேடி வந்தவர்... மயக்கத்தில் சந்தித்த கொடூரம்!

இந்து முன்னணி மாவட்டச் செயலாளர் சங்கர், “இதுபோன்ற சம்பவம் 20 வருடங்களுக்கு முன்பு நடந்தது. ஆட்டோ டிரைவர், அவருடன் இரண்டுபேர் சேர்ந்து ஜெர்மன் நாட்டு இளம்பெண் ஒருவரைக் கிரிவலப் பாதையில் பலாத்காரம் செய்தனர். ஆறு வருடங்களுக்கு முன் வெளிநாட்டுப் பெண் ஒருவர், இங்கு பாலியல் வல்லுறவுக்கு ஆளாக்கப்பட்டார். போலீஸின் கவனத்துக்கு வராமல் பல வெளிநாட்டுப் பெண்கள் பாலியல் சீண்டல்களால் பாதிக்கப்பட்டுள்ளனர். 

ஆன்மிகத்தைத் தேடி இங்கு வரும் வெளிநாட்டினர், நம்பிக்கைக்குரிய சில ஆசிரமங்களில் தங்குகின்றனர். திருவண்ணாமலை நகரைச் சுற்றிலும், கிரிவலப்பாதையைச் சுற்றிலும், அனுமதியின்றி பல ஆசிரமங்கள் உள்ளன. அவற்றை போலீஸார் கண்டுகொள்வதில்லை. இங்கே இடங்களை வாங்கி கெஸ்ட் ஹவுஸ் கட்டி நடத்துபவர்கள் பலரும், போதைப்பொருள்களை அதிக அளவில் பயன்படுத்துகின்றனர். சர்க்கரை குளம் அருகில் கஞ்சா, அபின் போன்ற போதைப்பொருள்கள் விற்பனை செய்யப்படுகின்றன. போலீஸிடம் சொன்னாலும் நடவடிக்கை இல்லை” என்றார்.

திருவண்ணாமலை மாவட்ட எஸ்.பி-யான பொன்னியிடம் பேசினோம். “அந்த நான்கு பேர்மீதும் பாலியல் வன்கொடுமை உள்ளிட்ட பிரிவுகளின்கீழ் வழக்குப்பதிவு செய்துள்ளோம். அவர்கள், நீதிமன்றக் காவலில் உள்ளனர். அவர்களுக்குக் கடுமையான தண்டனை வாங்கிக் கொடுப்போம்” என்றார் உறுதியுடன்.

இப்படி ஒரு சம்பவம் இனி நிகழாதபடி நடவடிக்கை எடுக்க வேண்டும்.

- கா.முரளி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு