Published:Updated:

15 ஆண்டுகளில் 19,000 கருக்கலைப்பு! - திருவண்ணாமலை திடுக்!

15 ஆண்டுகளில் 19,000 கருக்கலைப்பு! - திருவண்ணாமலை திடுக்!
பிரீமியம் ஸ்டோரி
News
15 ஆண்டுகளில் 19,000 கருக்கலைப்பு! - திருவண்ணாமலை திடுக்!

15 ஆண்டுகளில் 19,000 கருக்கலைப்பு! - திருவண்ணாமலை திடுக்!

ருவில் இருக்கும் சிசு ஆணா, பெண்ணா என்று ஸ்கேன் செய்து கண்டுபிடிப்பதும், சட்டவிரோதக் கருக்கலைப்புச் செய்வதும் குற்றம். இந்த டிஜிட்டல் யுகத்திலும்கூட ஆண், பெண் பாகுபாட்டு உணர்வில் ஊறிக்கிடப்பவர்கள் நிறைய இருக்கிறார்கள். இதனால், சட்டவிரோத ஸ்கேன் மையங்களும், கருக்கலைப்பு மையங்களும் ரகசியமாகச் செயல்பட்டு வருகின்றன. 

திருவண்ணாமலையில் பள்ளிப் படிப்பையே தாண்டாத ஆனந்தி என்ற பெண், தன் வீட்டில் நடத்திவந்த சட்டவிரோதக் கருக்கலைப்பு மையத்தில், 15 ஆண்டுகளில் சுமார் 19,000 சிசுக்களை அழித்திருப்பது, ஆன்மிகபூமியை அதிர்ச்சி பூமியாக்கியிருக்கிறது. இவர் ஏற்கெனவே இரண்டு முறை கைது செய்யப்பட்டு வெளியில் வந்தவர். அதன் பிறகும், அந்தச் சட்டவிரோத நடவடிக்கையை அவர் நிறுத்தவில்லை. மீண்டும் கருக்கலைப்பு மையம் நடத்தி ஆரம்பித்து, இப்போது மீண்டும் அவர் கைது செய்யப்பட்டிருக்கிறார். இது பற்றி ஏற்கெனவே பல முறை ஜூ.வி-யில் எழுதியிருக்கிறோம். 

15 ஆண்டுகளில் 19,000 கருக்கலைப்பு! - திருவண்ணாமலை திடுக்!

திருவண்ணாமலையில் உள்ள செங்குட்டுவன் தெருவைச் சேர்ந்தவர் ஆனந்தி. கலெக்டர் அலுவலகம் அருகே பொன்னுசாமி நகரில் புதிய மூன்று அடுக்குமாடி வீடு ஒன்றில் சட்டவிரோதக் கருக்கலைப்பு மையத்தை நடத்திவந்தார். இரவு நேரத்தில் கர்ப்பிணி பெண்கள் வந்துசெல்வதைப் பார்த்து, அக்கம்பக்கத்தில் உள்ளவர்கள் மாவட்ட ஆட்சியர் மற்றும் மருத்துவக் கண்காணிப்புக் குழுவுக்கு புகார் கூறியுள்ளனர். அதனால், இந்த விவகாரம் வெளிச்சத்துக்கு வந்துள்ளது. 

இதுகுறித்து மாவட்ட ஆட்சியர் கந்தசாமியிடம் கேட்டோம். “ஆனந்தி, கருக்கலைப்பு செய்கிறாரா என்பதை உறுதிசெய்ய மருத்துவக் கண்காணிப்புக் குழு மூலம் ஐந்து மாதக் கர்ப்பிணிப் பெண் ஒருவரை, ஆனந்தியின் வீட்டுக்கு அனுப்பிவைத்தோம். அங்கே இருந்தவர்கள், ஆட்டோ ஓட்டுநர் சிவக்குமார் என்பவரின் போன் நம்பரைக் கொடுத்துப் பேசச் சொல்லியுள்ளனர். அந்தப் பெண், ஆட்டோ ஓட்டுநரிடம் பேசினார். அதன் பின்னர், ஆட்டோ ஓட்டுநர் அந்தப் பெண்ணை அழைத்துக்கொண்டு பொன்னுசாமி நகரில் உள்ள ஆனந்தியின் கருக்கலைப்பு மையத்துக்குச் சென்றார். அந்தக் கர்ப்பிணியின் கருவில் பெண் சிசு இருப்பதை ஸ்கேன் மூலம் ஆனந்தி உறுதி செய்தார். அதற்கு 6,000 ரூபாய் பெற்றுள்ளார். ‘பெண் சிசுவைக் கலைக்க வேண்டும் என்றால், 20 ஆயிரம் ரூபாயுடன், இரண்டு நாள்கள் கழித்து வா’ என்று சொல்லி அனுப்பியுள்ளார் ஆனந்தி.

இப்படி, அவர் சட்டவிரோதக் கருக்கலைப்புச் செய்வதை உறுதிசெய்தோம். ஆனந்தியின் வீட்டில் இருந்து ஸ்கேன் கருவி, கருக்கலைப்புக்குப் பயன்படுத்தப்பட்ட ஊசிகள், மருந்து மாத்திரைகள் ஆகியவற்றை மருத்துவக் குழுவினர் பறிமுதல் செய்தனர்.

ஒரு நாளைக்கு 10 முதல் 20 கர்ப்பிணிப் பெண்கள், கருவைக் கலைக்க ஆனந்தியிடம் வந்துள்ளனர். அவரிடமிருந்து இப்போது கைப்பற்றப்பட்ட ஆவணங்களையும், 2012, 2016 ஆண்டுகளில் அவரிடமிருந்து பறிமுதல் செய்யப்பட்ட ஆவணங்களையும் வைத்துப் பார்க்கும்போது 15 ஆண்டுகளில் 19,000 சிசுக்களைக் கருக்கலைப்புச் செய்தது உறுதியாகியுள்ளது. ஆனந்தி, அவரின் கணவர் தமிழ்செல்வன், ஆட்டோ ஓட்டுநர் சிவக்குமார் ஆகிய மூவரையும் கைது செய்துள்ளோம். அவர்களின் மீது குண்டர் சட்டத்தின்கீழ் வழக்குப்பதிவு செய்ய நடவடிக்கை எடுக்கப்பட்டுவருகிறது” என்றார்.

பெண் சிசுவைக் கருவிலேயே அழிக்க நினைப்பவர்கள் இன்னமும்கூட வாழ்கிறார்கள் என்றால், இந்த ஜெகத்தினையே  அழித்துவிட்டாலும் தவறில்லை என்றே தோன்றுகிறது.

- கா.முரளி

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz