Published:Updated:

சிக்காத ராட்சசன்களுக்கு வலை எப்போது?

சிக்காத ராட்சசன்களுக்கு வலை எப்போது?
பிரீமியம் ஸ்டோரி
News
சிக்காத ராட்சசன்களுக்கு வலை எப்போது?

இரவு நேர அழைப்புகள்... ஆபாச மெசேஜ்கள்... மாட்டிக்கொண்ட ராஜகோபாலன்!

சென்னை கே.கே.நகர் பத்ம சேஷாத்ரி பள்ளி ஆசிரியர் மீதான பாலியல் புகாரைத் தொடர்ந்து, தமிழகம் முழுவதும் பள்ளிகளில் நடந்த பாலியல் தொடர்பான புகார்கள் காவல்துறையில் குவிந்துவருகின்றன. பி.எஸ்.பி.பி பள்ளியின் முன்னாள், இந்நாள் மாணவிகள் சுமார் 35 பேர் ஆசிரியர் ராஜகோபாலன்மீது காவல்துறையின் வாட்ஸ் அப்பில் புகார் அளித்திருக்கும் நிலையில், தமிழகம் முழுவதும் பல்வேறு பள்ளிகளிலிருந்து 30-க்கும் மேற்பட்ட மாணவிகள் இதேரீதியிலான புகார்களைக் காவல்துறைக்கு அனுப்பிவருகின்றனர். தவிர, வெவ்வேறு பள்ளிகளில் பாதிக்கப்பட்ட பலரும் சமூக வலைதளங்களில் தங்களுக்கு இழைக்கப்பட்ட பாலியல்ரீதியான கொடுமைகள் குறித்துப் பதிவிட்டு வருவதால், இந்த விவகாரம் மேலும் விஸ்வரூபம் எடுக்கும் என்று தெரிகிறது.

சிக்காத ராட்சசன்களுக்கு வலை எப்போது?

சென்னை கே.கே.நகர் பி.எஸ்.பி.பி பள்ளி ஆசிரியர் ராஜகோபாலன், ஆன் லைன் வகுப்பில் மாணவிகள் முன்பாக டவல் மட்டுமே கட்டியபடி வந்தது குறித்து அந்தப் பள்ளியின் மாணவிகள் சிலர் தங்களது வாட்ஸ்அப் குரூப்களில் பகிர்ந்ததுடன், அவரைப் பற்றிய கமென்ட்களையும் பதிவு செய்தனர். இதையடுத்தே, ராஜாகோபாலனின் பாலியல் விவகாரம் அம்பலமாகியிருக்கிறது. இதுகுறித்து நம்மிடம் பேசிய பாதிக்கப்பட்ட மாணவிகளின் தரப்பினர் சிலர், “பாடத்தில் சந்தேகம் கேட்கும் மாணவிகளை இரவில் வாட்ஸ்அப் காலில் அழைக்கும் ராஜகோபாலன் பாலியல் உணர்வைத் தூண்டும் வகையில் பேசியிருக்கிறார். எதிர்ப்பு தெரிவிக்காத மாணவிகளுக்கு வாட்ஸ்அப்பில் இரட்டை அர்த்தங்கள் கொண்ட மெசேஜ்களையும் அனுப்பியிருக்கிறார்.

சில மாணவிகளிடம் ‘நீ அழகாக இருக்கிறாய், சினிமாவுக்குப் போகலாமா?’ என்றும் தூண்டில் போட்டிருக்கிறார். அப்படி ராஜகோபாலனின் வலையில் வீழ்ந்த சில மாணவிகளை வெளியில் அழைத்துச் சென்று செல்ஃபி எடுத்ததுடன், நெருக்கமாகவும் போட்டோக்களை எடுத்து ரசித்திருக்கிறார். பிறகு அதைக் காட்டி மிரட்டியே, மாணவிகளின் அந்தரங்க போட்டோக்களை அனுப்பும்படி கட்டாயப்படுத்தியிருக்கிறார். அப்படி வாங்கிய போட்டோக்களை அதே பள்ளியைச் சேர்ந்த மூன்று ஆசிரியர்களுக்கும் அனுப்பியிருக்கிறார். அவர்களும் இதேபோல சில மாணவிகளை மிரட்டியிருக்கிறார்கள். மாதா, பிதா, குரு, தெய்வம் என்பார்கள்... குருவுக்குப் பிறகுதான் தெய்வம் என்று இவர்களை நம்பிதான் குழந்தைகளைப் பள்ளிக்கு அனுப்புகிறோம். ஆனால், அந்தக் குழந்தைகளுக்குத் தந்தை வயதுடையவர், வக்கிரபுத்தியுடன் நடந்துக்கொண்டதைத் தாங்க முடியவில்லை. பெற்ற வயிறு பற்றியெரிகிறது... ஆசிரியர் ராஜகோபாலன் மட்டுமன்றி, இதில் தொடர்புடையவர்கள் அனைவர்மீதும் கடும் நடவடிக்கை எடுக்க வேண்டும்” என்றார்கள் கண்ணீருடன்!

சிக்காத ராட்சசன்களுக்கு வலை எப்போது?

“புடவையில் அழகாக இருக்கிறாய்!”

இந்த விவகாரம் சமூக வலைதளங்களில் வைரல் ஆகவே மே 24-ம் தேதியன்று ராஜகோபாலனை சஸ்பெண்ட் செய்தது பள்ளி நிர்வாகம். ராஜகோபாலனின் செல்போன் மற்றும் லேப்டாப்பைக் கைப்பற்றிய போலீஸார், அவற்றிலிருந்து அழிக்கப்பட்டவற்றை ரெக்கவரி செய்தபோது, ‘நீ புடவையில் அழகாக இருக்கிறாய், சேலை அணியாமல் இருந்தால் அதைவிட அழகாக இருப்பாய்’ என்று ஒரு மாணவிக்கு அவர் அனுப்பிய மெசேஜும், அதற்கு அந்த மாணவி கோபமடைந்து கண்டித்த பதிலும் இருந்திருக்கிறது. உடனே அந்த மாணவியிடம் மன்னிப்பு கேட்கும் ராஜகோபாலன், ‘ஃப்ரீயா இருந்தா போனில் பேசு’ என மீண்டும் மெசேஜ் அனுப்பியிருக்கிறார். இதைவிட அச்சில் ஏற்ற முடியாத அளவுக்குச் சில மெசேஜ்களை அவர் மாணவிகளுக்கு அனுப்பியிருப்பதாகவும் போலீஸார் தெரிவித்தனர். அவரது செல்போனிலிருந்து ஆபாசப் புகைப்படங்கள், வீடியோக்களும் ரெக்கவரி செய்யப்பட்டிருக்கின்றன. இதையடுத்து, ராஜகோபாலனைக் கைது செய்த போலீஸார் போக்சோ சட்டப் பிரிவுகள், பெண்களைப் பாலியல்ரீதியாகத் துன்புறுத்துதல், சைகை மூலம் பெண்களை அவமதித்தல், தகவல் தொழில்நுட்பத்தைத் தவறாகப் பயன்படுத்துதல் உள்ளிட்ட ஐந்து பிரிவுகளின்கீழ் வழக்கு பதிவு செய்துள்ளனர்.

நம்மிடம் பேசிய போலீஸ் உயரதிகாரி ஒருவர், ``ராஜகோபாலன், 29 ஆண்டுகளாக இந்தப் பள்ளியில் வணிகவியல் ஆசிரியராகப் பணியாற்றி வந்திருக்கிறார். கடந்த ஐந்தாண்டுகளாக பிளஸ் ஒன், பிளஸ் டூ மாணவ, மாணவிகளுக்குப் பாடம் எடுத்திருக்கிறார். உடற்கல்வி வகுப்புகளையும் கூடுதலாக கவனித்துவந்த ராஜகோபாலன், மாணவிகளின் உருவத் தோற்றத்தைப் பாலியல்ரீதியாகக் கிண்டலடித்துள்ளார். கே.கே.நகர் பள்ளிக் கிளையில் ராஜகோபாலனுக்கு ஆதரவாகச் சில ஆசிரியர்கள் செயல்பட்டு வந்திருக்கின்றனர். இதுவரை காவல்துறையின் வாட்ஸ்அப் எண்ணுக்கு அந்தப் பள்ளியின் மாணவிகள், முன்னாள் மாணவிகள் என 35 பேர் ராஜகோபாலன் மீதும் பள்ளி நிர்வாகத்தின் மீதும் புகார்களை அனுப்பியிருக்கிறார்கள். அவர்களிடம் தனித்தனியாக விசாரணை நடத்த முடிவு செய்துள்ளோம். ராஜகோபாலனைக் காவலில் எடுத்து விசாரிக்கும்போது கூடுதல் தகவல்கள் கிடைக்கும்” என்றார்.

இதற்கிடையே, பள்ளிக்கல்வித்துறை சார்பில் சென்னை மாவட்ட முதன்மைக் கல்வி அலுவலர் அனிதா, பள்ளி நிர்வாகிகளிடம் விசாரணை நடத்தி அறிக்கை ஒன்றைச் சமர்ப்பித்திருக்கிறார். பி.எஸ்.பி.பி. பள்ளியின் தாளாளர், முதல்வர், ராஜகோபாலன், முதன்மைக் கல்வி அலுவலர், முதன் முதலில் இந்தப் பிரச்னையை சமூகவலைதளத்தில் பதிவு செய்தவர் ஆகியோரை மே 31-ம் தேதி ஆஜராகும்படி குழந்தைகள் நல பாதுகாப்பு ஆணையம் சம்மன் அனுப்பியிருக்கிறது.

சிக்காத ராட்சசன்களுக்கு வலை எப்போது?

தொடரும் பாலியல் குற்றச்சாட்டுகள்

மேற்கண்ட விவகாரத்தைத் தொடர்ந்து, தமிழகம் முழுவதும் 30-க்கும் மேற்பட்ட மாணவிகள், பள்ளிகளில் தங்களுக்கு நேர்ந்த பாலியல் தொல்லைகள் தொடர்பாக துணை கமிஷனர் ஜெயலட்சுமியின் வாட்ஸ்அப் எண்ணுக்குப் புகாராக அனுப்பியிருக்கிறார்கள். இதில் சென்னையில் மட்டுமே 10 பள்ளிகள்மீது இதே ரீதியிலான புகார்கள் வந்திருக்கின்றன. ஆனால், கடந்த காலங்களில் பல்வேறு பள்ளிகளில் எழுந்த பாலியல் புகார்கள் தொடர்பாக பெரிதாக எந்த நடவடிக்கையும் எடுக்கப்படவில்லை என்று பலரும் குமுறுகிறார்கள்.

இதுபற்றியும் நம்மிடம் பேசியவர்கள், “சென்னை செஷனாய் நகரில் செயல்படும் அரசு உதவி பெறும் செயின்ட் ஜார்ஜ் பள்ளியின் உடற்கல்வி ஆசிரியர் எபி ஜார்ஜ் மீது 2017-ல் பாலியல் குற்றச்சாட்டு எழுந்தது. பாதிக்கப்பட்ட மாணவிக்கு நிவாரணத் தொகையை வழங்கி வேறு பள்ளிக்கு மாற்றியவர்கள், சம்பந்தப்பட்ட ஆசிரியரிடம் மன்னிப்புக்கடிதம் எழுதி வாங்கிக்கொண்டு அதே பள்ளியில் பணியாற்ற அனுமதித்திருக்கிறார்கள். திரைப்படம் ஒன்றில் வரும் ‘மைனர் குஞ்சு’ காட்சிக்கும் இதற்கும் பெரிய வித்தியாசம் இருப்பதாகத் தெரியவில்லை. ஆசிரியர் எபி ஜார்ஜ் மீது நடவடிக்கை எடுக்கக்கோரி கீழ்ப்பாக்கம் அனைத்து மகளிர் காவல் நிலையத்தில் புகார் அளித்தும் எந்த நடவடிக்கையும் எடுக்கப்படவில்லை” என்றார்கள்.

விசாரணைக்கு ஆஜரான பள்ளி நிர்வாகிகள்
விசாரணைக்கு ஆஜரான பள்ளி நிர்வாகிகள்

இதற்கிடையே பல்வேறு தரப்பினரும் தங்களுக்கு நேர்ந்த பாலியல் கொடுமைகள் குறித்து சமூக வலைதளங்களில் பகிரத் தொடங்கியிருக்கிறார்கள். ‘96’ படத்தில் நடித்த நடிகை கெளரி கிஷன் வெளியிட்டுள்ள பதிவில், ‘அடையாறில் நான் படித்த பள்ளியிலும் மோசமான அனுபவங்கள் ஏற்பட்டன. சாதியைச் சொல்லியும் உடல்தோற்றத்தை வைத்தும் கேலி செய்தனர்’ என்று குறிப்பிட்டிருக்கிறார். தஞ்சாவூர் தனியார் பல்கலைக்கழகத்தைச் சேர்ந்த மாணவி ஒருவர், ‘நான் படித்த கல்லூரியில் சாதிரீதியாகவும், பாலினரீதியாகவும் தொடர்ந்து பாகுபாடு காட்டினார்கள்’ எனப் பதிவு செய்திருக்கிறார். சேத்துப்பட்டுப் பகுதியில் தனியார் பள்ளியில் படித்த முன்னாள் மாணவி ஒருவர் தனது இன்ஸ்ட்ராகிராம் பக்கத்தில், ‘மாணவிகளைத் தொடக்கூடாத இடங்களில் ஒரு ஆசிரியர் டச் செய்வார். அவரால் நான் மட்டுமல்லாமல் என்னுடன் படித்த மாணவிகளும் பாதிக்கப்பட்டிருக்கிறோம்’ என்று குறிப்பிட்டுள்ளார். சென்னை மயிலாப்பூரிலிருக்கும் தனியார் பள்ளியில் படித்த மாணவி ஒருவர் தனது ட்விட்டர் பக்கத்தில், ‘நான் படித்த பள்ளியில் பணியாற்றிய ஆசிரியர் ஒருவர், சக மாணவிகள் முன்னிலையில் கெட்ட வார்த்தைகளால் பேசுவார். என் அம்மாவையும் பள்ளிக்கு வரவழைத்து அவமானப்படுத்தினார்’ என்று குறிப்பிட்டிருக்கிறார். சென்னை மயிலாப்பூரிலிருக்கும் தனியார் பள்ளியின் ஆசிரியர் ஒருவர், மாணவிகளை அழைத்துப் பாடம் சம்பந்தமாகப் பேசும்போது, வேட்டியைச் சரிசெய்வதுபோல தன் அந்தரங்க உறுப்பைக் காட்டியதாக முன்னாள் மாணவி ஒருவர், பாடகி சின்மயிக்கு ட்விட்டரில் தெரிவித்திருக்கிறார். பத்திரிகையாளரான டி.என்.ரகு தனது ட்விட்டர் பதிவில், தடகளப் பயிற்சியாளர் ஒருவர் தன்னிடம் பயிற்சி எடுத்துவரும் பெண்களிடம் பாலியல் அத்துமீறல்களில் ஈடுபட்டதைக் குறிப்பிட்டிருக்கிறார்.

பாதிக்கப்பட்டவர்களின் நியாயம் கேட்கும் குரல்கள் சமூகவலைதளங்களில் அதிகரித்தபடி இருக்கின்றன. இது இன்னொரு ‘மீ டூ’ இயக்கமானாலும் ஆச்சர்யப்படுவதற்கில்லை!