சமூகம்
Published:Updated:

கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!

தனியாளாக தவிக்கும் தலைமை ஆசிரியர்
பிரீமியம் ஸ்டோரி
News
தனியாளாக தவிக்கும் தலைமை ஆசிரியர்

தனியாளாக தவிக்கும் தலைமை ஆசிரியர்

துரை மாவட்டம் சோழவந்தானை அடுத்த சித்தாதிபுரம் என்ற கிராமத்தில், அரசு துவக்கப் பள்ளி உள்ளது. ``இங்கு, பல ஆண்டுகளாக மாணவர்களே இல்லாமல் தலைமை ஆசிரியர் மட்டுமே வந்து போகிறார்’’ என அதிர்ச்சியூட்டுகிறார்கள் கிராம மக்கள்.

கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!
கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!

சித்தாதிபுரத்தைத் தேடிச் சென்றோம். அங்கு உள்ள துவக்கப் பள்ளிக்குள் தலைமை ஆசிரியர் மகேஷ்வரி மட்டும் தனியாக அமர்ந்திருந்தார். கரும்பலகையில் பாடங்கள் எழுதப்பட்டிருந்தன. தலைமை ஆசிரியருக்கு ஒரு டேபிள் மற்றும் நாற்காலியைத் தவிர்த்து, மற்ற பொருள்கள் உடைந்து கிடந்தன. சிறுவர்களின் சலசலப்பு கேட்கவேண்டிய பள்ளியில், குண்டூசி போட்டால் கேட்கும் அளவுக்கு அமைதி.

கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!

தலைமை ஆசிரியர் மகேஷ்வரி, ஆரம்பத்தில் பள்ளியைப் புகைப்படம் எடுக்கவே மறுப்பு தெரிவித்தார். அவரை சமாதானப்படுத்திப் பேசினோம். ‘‘நான் தலைமை ஆசிரியராகப் பதவி உயர்வு பெற்று, 12 ஆண்டுகளாக இந்தப் பள்ளியில் வேலை செய்கிறேன். பேருந்து வசதிகள் இல்லாத இந்தப் பள்ளிக்கு, மிகவும் கஷ்டப்பட்டுதான் வந்து செல்கிறேன். செங்கல்சூளையில் வேலை செய்பவர்களுடன் வேனிலும், சில நேரம் ஆட்டோவிலும் வந்து செல்கிறேன். அதிக மாணவர்கள் படித்த இந்தப் பள்ளியில், கடந்த ஐந்து ஆண்டுகளாக நான்கைந்து குழந்தைகள்தான் படித்தனர். தற்போது இரண்டு குழந்தைகள் மட்டுமே படிக்கின்றனர். அவர்களும் உறவினரின் ஊருக்கு இப்போது சென்றுள்ளனர். சில நாள்களில் வந்துவிடுவார்கள்.

அந்த இரண்டு மாணவர்களும் கஷ்டப்படும் குடும்பத்தைச் சேர்ந்தவர்கள். அவர்களுக்கு என் சொந்த செலவில் உணவு வாங்கிக் கொடுக்கிறேன். நல்லபடியாகச் சொல்லிக்கொடுக்கிறேன். ஆனால், இந்தக் கிராமத்தில் உள்ளவர்கள், தங்கள் குழந்தைகளை இந்தப் பள்ளியில் படிக்கவைக்காமல் வெளியூர்களிலும் ஆங்கிலப் பள்ளியிலும் படிக்கவைக்கின்றனர். இதனால் சேர்க்கை வெகுவாகக் குறைந்துவிட்டது. மாணவர்கள் இல்லையென்பதால், இங்கே இருந்த ஆசிரியரும் பணியிட மாற்றம் செய்யப்பட்டுள்ளார். ஆறு வருடங்களாக தனி ஆளாகப் பள்ளியில் வேலை செய்கிறேன். மிகவும் கஷ்டமாக உள்ளது. கிராமத் தில் எனக்கு ஒத்துழைப்பில்லை. என்னையும் பணியிட மாற்றம் செய்யக் கேட்டுக் கொண்டிருக் கிறேன்’’ என்றார்.

கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!

சித்தாதிபுரம் கிராமத்தைச் சேர்ந்த பூப்பாண்டி, ‘‘எங்கள் கிராமத்தில் உள்ள பள்ளி, காமராஜர் காலத்தில் கட்டப்பட்டது. நான் படிக்கும்போது கட்டடம் இல்லை. தென்னந் தோப்பில் கரும்பலகையைக் கட்டித்தான் படித்தோம். பிறகுதான், பள்ளிக் கட்டடம் எழுப்பப்பட்டது. எங்கள் பகுதியில் கல்வி என்பது அரிதான விஷயமாகத்தான் இருந்தது. மதிய சாப்பாட்டுக்காகத்தான் பள்ளிக்குச் செல்வோம்.

கடந்த 13 வருடமாக மாணவர்கள் யாரும் இந்தப் பள்ளிக்கு முறையாக வருவதில்லை. ஒற்றை இலக்கத்தில்தான் மாணவர்களின் எண்ணிக்கை இருக்கிறது. ஏற்கெனவே இருந்த ஆசிரியர் மந்திரமூர்த்தி, மாணவர்களுக்கு முறையாக பாடம் நடத்தினார். அதனால், அதிக எண்ணிக்கையில் மாணவர்கள் பயின்றனர். தற்போது சொல்லிக்கொடுக்க முறையான ஆசிரியர் இல்லை என்பதால், பெற்றோர் யாரும் குழந்தைகளை பள்ளியில் சேர்ப்பதில்லை.

கஷ்டத்தில் காமராஜர் காலத்துப் பள்ளி! - இரண்டே மாணவர்கள்... அவர்களையும் காணோம்!

தற்போது உள்ள தலைமை ஆசிரியர், தன் வேலை பறிபோகக்கூடாது என்பதற்காக நாடோடிக் குழந்தைகள் சிலரை அழைத்துவந்து அவ்வப்போது பாடம் நடத்து வார். அவர்களும் ஒரு வாரத்துக்கு மேல் வருவதில்லை’’ என்று வருத்தப்பட்டார்.

மதுரை சி.இ.ஓ சுவாமிநாதனின் கவனத்துக்கு இந்த விஷயத்தைக் கொண்டுசென்றோம். ‘‘நான் தற்போது புதிதாக பதவி ஏற்றுள்ளேன். வாடிபட்டியை அடுத்த பள்ளியில் மாணவர்கள் சேர்க்கை இல்லை என்பது தெரியவந்தது. பள்ளியின் தரத்தை உயர்த்தி மாணவர் சேர்க்கையை அதிகப்படுத்த முயற்சி செய்கிறோம்’’ என்று நம்பிக்கை தெரிவித்தார்.

அரசுப் பள்ளிகள் சிலவற்றில் ஆசிரியர்கள் சிறப்பாகச் செயல்பட்டு பள்ளிகளை முன்னேற்று கின்றனர். ஆனால், ஆசிரியர் பற்றாக்குறை மற்றும் மாணவர்களுக்கு முறையாகக் கற்பிக்காததைக் காரணம் காட்டி, பெற்றோர் பலரும் தங்கள் குழந்தைகளை தனியார் பள்ளிகளில் சேர்த்து விடுகின்றனர். கிராமங்களில் அரசுப் பள்ளிகள் இல்லாமல்போனால் ஏழைகளுக்குக் கல்வி என்பது, குதிரைக்கொம்பாக மாறிவிடும். எனவே, சித்தாதிபுரம் துவக்கப் பள்ளியில் போதுமான ஆசிரியர்களை நியமித்து, பள்ளிக்கு மீண்டும் உயிர் அளிக்க வேண்டியது அரசின் கடமை!