Published:Updated:

நீட் வைரஸ் - 19: சுரண்டப்படும் சூப்பர் ஸ்பெஷாலிட்டி இடங்கள்!

நீட் வைரஸ்
பிரீமியம் ஸ்டோரி
நீட் வைரஸ்

#KnowNeetNoNeet

நீட் வைரஸ் - 19: சுரண்டப்படும் சூப்பர் ஸ்பெஷாலிட்டி இடங்கள்!

#KnowNeetNoNeet

Published:Updated:
நீட் வைரஸ்
பிரீமியம் ஸ்டோரி
நீட் வைரஸ்
சென்னை ராஜீவ் காந்தி அரசு மருத்துவ மனையில், உணவுக்குழாய், குடல் புற்று நோய்களால் பாதிக்கப்பட்டு மீண்டவர்கள் தங்கள் கதையைப் பகிர்ந்துகொள்ளும் கலந்துரையாடல், வருடந்தோறும் நடக்கும். அப்படியொரு கூட்டத்தில் 95 வயது மதிக்கத்தக்க முதியவர் தன் கதையைப் பகிர்ந்துகொண்டார்.

ஏற்கெனவே இரண்டு முறை இதயத்தில் பைபாஸ் அறுவைசிகிச்சை செய்து கொண்டவருக்கு உணவுக்குழாயில் புற்றுநோய் இருப்பது உறுதியானது. அப்போது அவருக்கு வயது 80. ஏற்கெனவே இரண்டு அறுவைசிகிச்சைகள் செய்து கொண்டவருக்கு மேலும் ஓர் அறுவைசிகிச்சையை அந்த வயதில் உடல் ஏற்றுக்கொள்ளுமா என்பது சந்தேகம். ராஜீவ் காந்தி அரசு மருத்துவமனையின் இரைப்பை குடல் அறுவைசிகிச்சைப் பிரிவு மருத்துவர்கள், அவருக்கு வெற்றிகரமாக அறுவை சிகிச்சை செய்து மீட்டார்கள். தனியார் மருத்துவமனை களில் லட்சங்கள் கொட்டிக் கொடுத்துச் செய்திருக்க வேண்டிய ஓர் அறுவைசிகிச்சையை, தமிழக அரசின் மருத்துவக் காப்பீட்டுத் திட்ட உதவியுடன் அரசு மருத்துவமனையிலேயே உலகத் தரத்தில் செய்ய முடிந்தது. தமிழக அரசு மருத்துவ மனைகளின் சூப்பர் ஸ்பெஷாலிட்டி மருத்துவத்துக்கான சான்று, இந்த நிகழ்வு.

2017-ம் ஆண்டில் எம்.பி.பி.எஸ், எம்.டி மற்றும் எம்.எஸ் உள்ளிட்ட படிப்புகளுக்கு கட்டாயமாக்கப்பட்ட நீட் தேர்வு, அதற்கும் மேற்படிப்பான சூப்பர் ஸ்பெஷாலிட்டி படிப்புகளுக்கும் `NEET SS’ என்ற பெயரில் அறிமுகப்படுத்தப்பட்டது. சூப்பர் ஸ்பெஷா லிட்டி என்பது ஒரு குறிப்பிட்ட துறையில் நுண்நிபுணத்துவம் சார்ந்தது. தமிழக மருத்துவக் கல்லூரிகளில் டி.எம் அல்லது எம்.சி.ஹெச் பட்டத்துக்கான இந்தப் படிப்பு, மெடிக்கல் ஆன்காலஜி, கார்டியாலஜி, நெப்ராலஜி, நியூராலஜி, பிளாஸ்டிக் சர்ஜரி என 17 பிரிவுகளில் வழங்கப்படுகிறது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

நீட் வருவதற்கு முன்பு தமிழகத்தில் இந்த சூப்பர் ஸ்பெஷாலிட்டி படிப்புகளுக்கான மாணவர் சேர்க்கை எப்படி நடந்தது?

தமிழகத்தில் ஆரம்ப சுகாதார நிலையத்தில் தொடங்கும் பொதுசுகாதாரக் கட்டமைப்பு நிறைவடைவது அதன் சூப்பர் ஸ்பெஷாலிட்டி மருத்துவத்தில்தான். கிராமத்திலிருந்து வரும் நோயாளிக்கு அவரது இதய வால்வில் அடைப்பு ஏற்பட்டிருப்பதற்கான அறிகுறிகள் தெரியவரும் சூழலில், ஆரம்ப சுகாதார மைய மருத்துவர் அவரை மாவட்ட மருத்துவமனைக்குப் பரிந்துரைப்பார். அங்கே முழு பரிசோதனையும் மேற்கொள்ளப்பட்டு அவருக்கு வால்வில் அடைப்பு நீக்குவதற்கான ‘ஆஞ்ஜியோபிளாஸ்டி’ சிகிச்சை, ஒரு சூப்பர் ஸ்பெஷாலிட்டி மருத்துவரால் வழங்கப்படும். இன்றைய தேதியில் அரசின் அத்தனை மாவட்ட மருத்துவமனைகளிலுமே இந்த ‘ஆஞ்ஜியோபிளாஸ்டி’ சிகிச்சை இருக்கிறது. இதுபோன்ற, செலவு அதிகம் பிடிக்கும் சிகிச்சைகளை காப்பீட்டுத் திட்டம் வழியாக தமிழக அரசு வழங்குகிறது. தமிழகத்தை முன்மாதிரி யாகக்கொண்டு டெல்லி, குஜராத் உள்ளிட்ட மாநிலங்கள் தற்போதுதான் இதை நடைமுறைப்படுத்தத் தொடங்கியிருக்கின்றன.

2019-ம் ஆண்டு நீட் சூப்பர் ஸ்பெஷாலிட்டி இடங்கள்!

(மாநிலவாரியான விவரம்)

2019-ம் ஆண்டு நீட் சூப்பர் ஸ்பெஷாலிட்டி இடங்கள்!
2019-ம் ஆண்டு நீட் சூப்பர் ஸ்பெஷாலிட்டி இடங்கள்!

2015-ம் ஆண்டுக்கு முன்புவரை இந்த சூப்பர் ஸ்பெஷாலிட்டி படிப்புகளில் எம்.டி அல்லது எம்.எஸ் படித்து அரசு மருத்துவமனைகளில் பணியாற்றும் மருத்துவர்களுக்கு 50 சதவிகித ஒதுக்கீடு தரப்பட்டது. இந்தப் படிப்புக்கென தமிழக அரசு ஒரு நுழைவுத்தேர்வை நடத்திவந்தது. அதில் தேர்ச்சி பெறுபவர்கள், 2 கோடி ரூபாய்க்கான ஒப்பந்தப் பத்திரத்தில் அரசுக்கு கையெழுத்திட்டுத் தர வேண்டும். அரசு மருத்துவருக்கான இடஒதுக்கீட்டில் இடம் பெற்றவர் என்றால், மூன்று ஆண்டுக்காலப் படிப்புக்குப் பிறகு அவரின் பணி ஓய்வுக்காலம் வரை அரசு மருத்துவமனையில் பணியாற்ற வேண்டும். அரசுப் பணியில் இல்லாதவர் என்றால், படிப்பு முடித்து இரண்டு ஆண்டுகள் அரசு மருத்துவமனைகளில் பணியாற்ற வேண்டும். இதுதான் ஒப்பந்தம். இந்த ஒப்பந்தத்தை மீறினால், அபராதத்தொகையைச் செலுத்த வேண்டும். இதன்படிதான் மொத்தம் இருந்த 186 சூப்பர் ஸ்பெஷாலிட்டி இடங்களும் நிரப்பப்பட்டன.

தனியார் நிகர்நிலைப் பல்கலைக்கழகங்களிலும் சூப்பர் ஸ்பெஷாலிட்டி படிப்புகளுக்கான இடங்கள் உண்டு. அவற்றை நிகர்நிலைப் பல்கலைக்கழகங்களே நிரப்பிக்கொண்டன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

2015-ம் ஆண்டில் ஒரு வழக்கை விசாரித்த உச்ச நீதிமன்றம், இந்தியா முழுவதும் சூப்பர் ஸ்பெஷாலிட்டி படிப்புகளில் இருந்த அரசு மருத்துவர்களுக்கான ஒதுக்கீட்டை முற்றிலும் நீக்கியது. தேசிய தேர்வு வாரியத்தால் இந்தப் படிப்புகளுக்கான பொது மருத்துவ நுழைவுத்தேர்வு நடத்தப்பட்டு, அதன் அடிப்படையில் இடங்கள் நிரப்பப்படும் என அறிவிக்கப்பட்டது. இந்த இடத்திலேயே தமிழகத்துக்கான உரிமை முற்றிலும் பறிபோனது. அரசு மருத்துவக் கல்லூரிகளில் சூப்பர் ஸ்பெஷாலிட்டி படிப்பில் இருந்த 186 இடங்களும் மத்திய அரசின் கைகளுக்குச் சென்றுவிட்டன. அதற்கடுத்த ஆண்டில் சூப்பர் ஸ்பெஷாலிட்டி மருத்துவப் படிப்புகளுக்கும் நீட் தேர்வு நடத்தப்படும் என அறிவிக்கப்பட்டு, நடைமுறைக்கு வந்துவிட்டது.

மாநிலங்களுக்கான ஒதுக்கீட்டு உரிமை ரத்துசெய்யப்பட்ட பிறகு, தமிழக அரசு கூடுதலாக 155 சூப்பர் ஸ்பெஷாலிட்டி படிப்புக்கான இடங்களை உருவாக்கியது. 2019-ம் ஆண்டு கணக்குப்படி, இந்தியாவில் உள்ள மொத்த சூப்பர் ஸ்பெஷாலிட்டி படிப்புகளுக்கான இடங்கள் 2,441. அவற்றில் தமிழகத்தில் உள்ள இடங்கள் மட்டும் 509. தமிழக அரசு மருத்துவக் கல்லூரிகளில் உள்ள இடங்கள் 341.

இந்தியாவில் வேறு எந்த மாநிலத்திலும் இந்த எண்ணிக்கையில் சூப்பர் ஸ்பெஷாலிட்டி இடங்கள் இல்லை. இவை முழுமையாக தமிழக மருத்துவர்களுக்குப் பயன்படவில்லை என்பதுதான் வேதனை. மணிப்பூரில் இருந்தோ உத்தரப்பிரதேசத்தில் இருந்தோ மருத்துவர்கள் வந்து இந்த இடங்களில் சேர்கிறார்கள்.

நீட் வைரஸ் - 19: சுரண்டப்படும் சூப்பர் ஸ்பெஷாலிட்டி இடங்கள்!

இதுகுறித்து தமிழ்நாடு அரசு மருத்துவர்கள் கழகத்தின் மாநிலத் தலைவர் செந்தில், “நீட் சூப்பர் ஸ்பெஷாலிட்டி தேர்வு வந்த பிறகு, ஒவ்வோர் ஆண்டும் தமிழக மருத்துவர்களுக்கு அரசு மருத்துவக் கல்லூரிகளில் 10 முதல் 20 சதவிகித இடம்தான் கிடைக்கிறது. மீதம் உள்ள இடங்கள் அனைத்தையும் வேறு மாநிலத்தைச் சேர்ந்தவர்களே பெறுகின்றனர். அரசு மருத்துவக் கல்லூரியை உருவாக்க, குறைந்தது 150 கோடி ரூபாய் செலவாகும். தமிழக மக்களின் வரிப்பணத்தில் செலவுசெய்து உருவாக்கப்படும் ஒரு மருத்துவக் கல்லூரியில் தமிழக மருத்துவர்களுக்கு முன்னுரிமை இல்லை என்பது அநீதி. மாநில சுகாதாரத் துறை மீது மத்திய அரசு நிகழ்த்தும் உழைப்புச் சுரண்டல். இந்த இடஒதுக்கீட்டை கேட்டுப் பெறுவது தமிழக அரசின் கடமை. ஆனால், அவர்கள் அதைச் செய்யவில்லை’’ என்றார் வருத்தத்துடன்.

சூப்பர் ஸ்பெஷாலிட்டி படிப்புகளுக்கு நீட் தேர்வு கொண்டுவரப்பட்ட பிறகும் ஒப்பந்த நடைமுறையை நீக்காமல் வைத்திருக்கிறது தமிழக அரசு. அது சிறியதோர் ஆறுதல்.

அரசு மருத்துவக் கல்லூரியில் சேரும் வெளிமாநில மருத்துவர்கள், படிப்பு முடித்த பிறகு இரண்டு வருடங்கள் தமிழக அரசு மருத்துவமனைகளில் பணியாற்ற வேண்டும். தமிழகத்தைச் சேர்ந்த ஒரு மருத்துவருக்கு இந்த வாய்ப்பு கிடைத்தால், அவர் காலம் முழுவதும் அரசு மருத்துவமனையிலேயே பணியாற்ற வாய்ப்புண்டு. ஆனால் வெளிமாநில மாணவர்கள், இந்த ஒப்பந்தம் முடிந்த பிறகு வேகவேகமாக தங்கள் மாநிலத்துக்குச் சென்றுவிடுவார்கள். இப்படி முடித்துவிட்டு வருபவர்கள், அந்தந்த மாநிலங்களிலேனும் அரசு மருத்துவமனைகளில் பணியாற்ற வேண்டும் என்றாவது விதிகள் உருவாக்கப்பட்டிருக்க வேண்டும். அப்படிச் செய்யாததால், பெரும் பாலானோர் கார்ப்பரேட் மருத்துவமனைகளுக்குள் நுழைந்துவிடுகிறார்கள்.

பெரும்பாலான மாநிலங்களில் சூப்பர் ஸ்பெஷாலிட்டி படிப்புகள் ஒன்றோ இரண்டோ தான் இருக்கின்றன. உத்தரப்பிரதேசத்தில் சூப்பர் ஸ்பெஷாலிட்டி படிப்புகளுக்கான மொத்த இடங்கள் 193. ஆனால், இவற்றில் 30 சதவிகிதம் தனியார் மருத்துவக் கல்லூரிகளில் உள்ளன. குழந்தைகள் அறுவைசிகிச்சைக்கு என்றே அங்கே அரசால் தனியாகத் தொடங்கப்பட்டிருக்கும் சூப்பர் ஸ்பெஷாலிட்டி பீடியாட்ரிக் மையத்தில் சூப்பர் ஸ்பெஷாலிட்டி படிப்புக்காக ஒரே ஓர் இடம்தான் இருக்கிறது.

மேகாலயா, மணிப்பூர் இரண்டு மாநிலங்களுக்கும் சேர்த்து மொத்தமே 7 சூப்பர் ஸ்பெஷாலிட்டி படிப்புக்கான இடங்கள்தான் இருக்கின்றன. ஒரு கோடிக்கும் மேற்பட்டோர் வசிக்கும் மாநிலமான உத்தரகாண்ட்டில் ஒரே ஒரு சூப்பர் ஸ்பெஷாலிட்டி மருத்துவ இடம்தான் உள்ளது. (முழு விவரம்: இன்ஃபோகிராபில்)

அந்தந்த மாநிலங்களுக்கான மருத்துவத் தேவையை பூர்த்திசெய்வது, மத்திய அரசு மற்றும் அந்தந்த மாநில அரசுகளின் கடமை. அதைச் செய்யாமல் `நீட்’ என்ற பெயரில் பிற மாநிலங்களைச் சுரண்டுவது எந்த வகையில் நியாயம்?

(அடுத்த இதழில் நிறைவடையும்)

‘நீட்’ தொடர்பான உங்கள் கருத்துகள், அனுபவங்களைப் பகிர்ந்துகொள்ள neetvirus@vikatan.com

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism