கொலம்பஸுக்கு விட்டாச்சு லீவு!

‘கொலம்பஸ்... கொலம்பஸ்... விட்டாச்சு லீவு... கொண்டாடக் கண்டுபிடிச்சு கொண்டா ஒரு தீவு...’ - ‘ஜீன்ஸ்’ திரைப்படத்தில் இடம்பெற்ற இந்தப் பாடல் விடுமுறை தினத்தின் சந்தோஷத்தைச் சொல்லும். பள்ளித் தேர்வில் `கொலம்பஸ் யார்?’ என்று மாணவர்களிடம் கேட்டால், `அமெரிக்காவைக் கண்டுபிடித்தவர்’ என்பார்கள். அப்படி எழுதினால்தான் அவர்களுக்கு மதிப்பெண்ணும் கிடைக்கும். அது சரியானதா? . கொலம்பஸ் 1492-ம் ஆண்டுதான் அமெரிக்காவைச் சென்றடைந்தார். அவர் அங்கு செல்வதற்கு முன்னரே அந்த கண்டத்தில் மக்கள் வாழ்ந்துவந்தனர். அப்படியிருக்கும்போது, `கொலம்பஸ்தான் அந்தக் கண்டத்தைக் கண்டுபிடித்தார்’ என்று சொல்வது சரியா? ஆனால், நமக்கு பூகோள, வரலாற்றுப் பாடங்களில் அப்படித்தான் தவறாகச் சொல்லிக் கொடுக்கப்பட்டுவருகிறது.

. அமெரிக்காவில் கறுப்பினத்தைச் சேர்ந்த ஜார்ஜ் ஃப்ளாயிடு என்பவரின் கழுத்தை மிதித்து காவல்துறையினர் கொலை செய்த சம்பவத்தின் அனல் இன்னும் அங்கு தணியவில்லை. அந்த நிறவெறிச் சம்பவத்துக்கு எதிரான கண்டனப் போராட்டங்கள் உலகம் முழுவதும் நடைபெற்றுவருகின்றன. அதையொட்டி பல்வேறு வரலாற்றுச் சம்பவங்களையும் அமெரிக்கர்கள் கேள்விக்குள்ளாக்கிவருகின்றனர். ‘இனவெறி, நிறவெறி, காலனியாதிக்கவாதிகளைப் பெருமைப்படுத்திச் சொல்லிக் கொடுக்கப்பட்ட வரலாற்றுப் பாடங்களை மாற்றியமைக்க வேண்டும்’ என்று அங்கு குரல்கள் உரத்து ஒலிக்கின்றன. அதோடு, அத்தகைய நபர்களைப் பெருமைப்படுத்தி பொதுவெளிகளில் வைக்கப்பட்டிருந்த சிலைகளை அவமானச் சின்னங்களாகக் கருதி அகற்றியும் வருகின்றனர்.

அவற்றில் ஒன்றுதான் கொலம்பஸுக்கு வைக்கப்பட்ட சிலை. அமெரிக்காவில் பால்டிமோர், மினசோட்டா, மாஸாசூசெட்ஸ், மியாமி மற்றும் பாஸ்டன் நகரங்களிலுள்ள கொலம்பஸ் சிலைகள் உடைக்கப்பட்டு, அங்குள்ள நீர்வழிகளில் தள்ளப்பட்டுவருகின்றன.

. அமெரிக்காவைக் கண்டுபிடித்ததாகப் பாடங்களில் பெருமையாகக் குறிப்பிடப்படும் கொலம்பஸ் யார் தெரியுமா? 1451-ல் போர்ச்சுகலில் பிறந்தவர். முழுப் பெயர் `கிறிஸ்டோபர் கொலம்பஸ்.’ புதிய உலகத்தைக் கண்டுபிடிக்கும் ஆர்வத்தில் அங்குள்ள மன்னரின் ஆதரவுடன் தெற்கு நோக்கி அட்லான்டிக் கடலில் சாகசப் பயணம் மேற்கொண்டார். அவர் முதலில் அடைந்தது பஹாமாஸ் மற்றும் கரீபியன் தீவுகள். `அங்கு வாழ்பவர்கள் இந்தியர்கள்’ என்று கொலம்பஸ் தவறாக நினைத்தார். அதன் விளைவாகவே, அந்தத் தீவுகளுக்கு பின்னாளில் `மேற்கிந்தியத் தீவுகள்’ என்று பெயரிடப்பட்டது.

மேற்கிந்தியத் தீவுகளையும் தாண்டி, வட அமெரிக்காவில் கரையிறங்கிய கொலம்பஸ் மற்றும் அவரின் வழித்தோன்றல்கள் அங்கு இன ஒழிப்பு மற்றும் காலனியாதிக்கத்தை நிலைநாட்டினர். எனவேதான், அவரை `முதல் நிறவெறியர்’ என்று அமெரிக்க மக்கள் வெறுக்க ஆரம்பித்துள்ளனர். இதன் விளைவாகத்தான் அவரின் சிலைகள் தடம்புரளுகின்றன.

. காலம் கடந்தாவது அமெரிக்கர்கள் விழித்துக் கொண்டனர். ஆனால், நாம் விழித்துக் கொண்டோமா? இப்போது வரை, ஐரோப்பாவைச் சுற்றிப் புனையப் பட்டவற்றையே மாணவர்களுக்கு வரலாறாகச் சொல்லிக் கொடுத்துக்கொண்டிருக் கிறோம். போர்ச்சுகலிலிருந்து இந்தியாவின் மேற்குக் கடற்கரையில் திரவியம் மற்றும் மசாலா பொருள் களின் வணிக நிலவரத்தைத் தெரிந்துகொள்வதற்காக 15-ம் நூற்றாண்டில் வந்த சாகசக் கடல் வீரரான வாஸ்கோ ட காமா என்பவர்தான் இந்தியாவுக்கு வழி கண்டுபிடித்தார் என்று சொன்னால் அதைவிட ஓர் அபத்தம் இருக்க முடியாது.

. வாஸ்கோ ட காமா வருவதற்குப் பல நூறாண்டுகளுக்கு முன்னரே நாகரிக உலகமாக இந்தியா விளங்கியதை அனைவரும் அறிவோம். பல காலகட்டங்களில் வெளிநாட்டிலிருந்து யாத்ரீகர்களாக இந்தியத் துணைக்கண்டத்தின் வழியாகப் பயணித்தவர்கள் பலர். 13-ம் நூற்றாண்டில் இந்த வழியாகச் சென்ற மார்கோ போலோ என்ற இத்தாலிய வணிகர் இங்கு கண்ட பல காட்சிகளைத் தனது பயணக் குறிப்பில் பதிவு செய்துவைத்துள்ளார். அதைப் படிக்கும்போது, `எட்டு நூற்றாண்டுகளுக்கு முன்னர் நாம் இப்படித்தான் இருந்தோமா என்று ஆச்சர்யமாக இருக்கிறது.

இன்றைய தமிழகப் பகுதி வழியாக மேற்கு நோக்கிச் சென்ற மார்கோ போலோ இங்குள்ள மக்களைப் பற்றி என்ன சொல்லியிருக்கிறார் தெரியுமா? “இந்தப் பகுதி மக்கள் மிகவும் கறுப்பாக உள்ளனர். அதில் அவர்கள் பெருமைப்படுகிறார்கள். தங்களது குழந்தைகளை மேலும் கரிய நிறத்தவராக மாற்றுவதற்கு அவர்களுக்கு எண்ணெய் தடவி, வெயிலில் உலவவிடுகின்றனர். அவர்களின் கடவுளர்களின் சிலைகளையும் கறுப்பு கல்லிலேயே படைத்துள்ளனர். ஆனால், அவர்கள் கெட்ட ஆவியாகக் கருதுபவற்றை வெள்ளை நிறத்தில் படைத்துள்ளனர்” என்று வர்ணிக்கிறார்.

கரிய நிறத்தை, `பெருமை’ என்று நினைத்த நமக்குள் இந்த ஆறு நூற்றாண்டுகளில் உளவியல் மாற்றங்கள் எப்படி உருவாகின? ‘வெண்மையே தூய்மை...’, ‘வெள்ளைக்காரன் பொய் பேச மாட்டான்’ என்று சொல்லும் அளவுக்கு நாம் எப்படி மாறிப்போனோம்? யோசித்துப் பார்த்தால், வணிகம் செய்ய வந்து அரசியல் ஆதிக்கத்தை நிலைநாட்டிய பிரிட்டிஷ் ஏகாதிபத்தியத்தின் விளைவு அது. நமக்குள்ளேயே ஒரு தாழ்வு மனப்பான்மையை உருவாக்கிய ஆங்கிலேயர்கள் நமது கலாசாரம், மொழி, கல்வி, உடை மற்றும் இதர பழக்க வழக்கங்களில் பெரும் மாற்றத்தை உண்டாக்கினர்.

. மக்கள் கறுப்பு நிறமாக இருந்தாலும், அவர்களிடம் ஆங்கிலேயர்களின் சிந்தனைப் போக்கை உருவாக்க வேண்டும் என்று புதிய கல்வித் திட்டத்தை உருவாக்கினர். அதன் விளைவு, கறுப்பு / பழுப்பு நிறத் தோலுடன் பிறந்தவர்கள் `எப்படியாவது நம்முடைய தோலின் நிறத்தை மாற்றிவிட முடியாதா...’ என ஏங்கினர். அதன் காரணமாக, சிவப்பழகு க்ரீமை கோடிக்கணக்கில் வாங்கினர். தற்போது இனவெறிக்கு எதிராக உலகெங்கும் நடைபெறும் போராட்டங்களில் வீச்சைத் தாங்க முடியாத க்ரீம் நிறுவனமொன்று, தன்னுடைய தயாரிப்பின் பெயரையே மாற்றிக்கொண்டிருக்கிறது. இது நிறவெறிக்கெதிரான இயக்கத்தின் வெற்றி. ஆனால், `நாம் எப்போது மார்கோ போலோ காலத்துக்கு மனதளவில் செல்வோம்?’ என்ற கேள்வி எழுந்துள்ளது.

. நமது சுதந்திரப் போராட்டத்தைக்கூட புரிந்துகொள்ளாமல் ஆங்கிலேய பிரபுக்களின் பிரதாபங்களைத்தான் வரலாறாக இன்னும் இங்கே கற்றுக் கொடுத்துக்கொண்டிருக்கிறோம். இன்றைய வரலாற்றுப் பாடத்தை சொல்லித்தரும் ஆசிரியர்களில் பலருக்கும் வரலாற்றின் வீச்சு புரியவில்லை. கற்றுக்கொள்ளும் மாணவர்களில் பலரும், வேறு எந்தப் படிப்புக்கும் இடம் கிடைக்காத காரணத்தால், வரலாற்று பாடப்பிரிவைத் தேர்ந்தெடுக்கும் பரிதாபமான நிலையில் தான் இருக்கிறது நம் வரலாற்றுத்துறை.

காலனியாதிக்கத்தின் விளைவுகளைப் புரிந்துகொள்ளும் வகையில் நமது வரலாற்றுப் பாடங்கள் இல்லை. அதோடு, நமது சுதந்திரப் போராட்டத்தைப் பற்றியும் சரியான தரவுகள் இல்லை. வரலாற்றை ஒரு மக்கள் இயக்கமாக அறிந்து கொள்வதற்குப் பதிலாக, வரலாற்றுப் பாடம் ஒரு சுமையாகக் காட்டப்படுகிறது. ஏற்கெனவே இருக்கிற குளறுபடிகள் போதாதென்று, சமீபத்தில் மத்திய பள்ளித் தேர்வாணையம் இன்னொரு விஷயத்தையும் செய்திருக்கிறது. 9-ம் வகுப்பு முதல் 12-ம் வகுப்பு வரையுள்ள வரலாற்றுப் பாடத்திட்டத்திலிருந்து தேசியம், குடியுரிமை, மதச்சார்பின்மை, உள்ளாட்சி மற்றும் சமஷ்டி குடியரசு போன்ற தலைப்புகளையெல்லாம் பெரும்பாலும் வெட்டி எடுத்துவிட்டது.

வரலாற்றைப் புரிந்துகொள்ளாமல் புதிய வரலாறு படைக்க முடியாது. மாணவர்கள் வரலாற்றைப் புரிந்துகொள்ளக் கூடாது என்று மேலும் பின்னுக்குத் தள்ளும் முயற்சியைத்தான் இன்றைய மத்திய அரசு செய்துவருகிறது. உலகமே ஒரு திசையில் சென்றுகொண்டிருக்கும்போது, நாம் `அமெரிக்காவைக் கண்டுபிடித்தது கொலம்பஸ்’ என்றுதான் சொல்லிக் கொடுத்துக்கொண்டிருக்கப் போகிறோமா?

கொலம்பஸுக்கு விட்டாச்சு லீவு!

கே.சந்துரு