வைரஸை எதிர்க்க வயசு எதற்கு?

இரண்டாம் உலகப்போரில் இந்தியாவிலும் பர்மாவிலும் போர்வீரராக வலம் வந்த பிரிட்டனின் டாம் மூர் என்ற தாத்தாதான் இந்த வாரத்தின் வைரல். . முன்னாள் ராணுவ வீரரான மூர், ஏப்ரல் ஆறாம் தேதி தன் தோட்டத்தில் கொரோனா விழிப்புணர்வுக்காக நன்கொடை வேண்டி வாக்கர் உதவியுடன் நடக்க ஆரம்பிக்கிறார். ஏப்ரல் 30ம் தேதி தன்னுடைய நூறாவது பிறந்தநாளின்போது ஆயிரம் பவுண்டு சேகரிக்க வேண்டும் என்பதுதான் அந்தப் பெரிய மனிதரின் சிறிய ஆசை. ஆனால், அதன்பின் நடந்தவையெல்லாம் நம்ப முடியாத சாத்தியங்கள்.

. இதுவரை 15 லட்சம் நன்கொடையாளர்கள் மூருக்கு உலகெங்கிலும் உதவி செய்திருக்கிறார்கள். இவர் நடப்பதை மையப்படுத்தி You’ll Never Walk Alone என வெளியான பாடல் 80,000 காப்பிகள் விற்று இங்கிலாந்தின் நம்பர் ஒன் இடத்தைப் பிடித்துள்ளது. நூறு வயது வாழ்ந்த ஒருவரின் பாடல் நம்பர் ஒன் இடம்பிடிப்பது உலகளவில் இதுவே முதல் முறை. அவருக்கென விக்கிப்பீடியாவில் தனிப்பக்கம் உருவாக்கியிருக்கிறார்கள். பெட்ஃபோர்டுஷைரில் இருக்கும் அவர் வீட்டின் மேல் பிரிட்டன் ராணுவம் அவரைக் கௌரவிக்கும் விதமாக போர் விமானங்களைப் பறக்கவிட்டது. 1.5 லட்சம் பிறந்தநாள் வாழ்த்து அட்டைகளை அவர் வீட்டில் குவித்து அன்பில் மூழ்கச்செய்திருக்கிறார்கள் உலக மக்கள். இரண்டு கின்னஸ் சாதனைகளைச் சொந்தமாக்கியிருக்கிறார். கேப்டன் டாம் மூருக்கு தற்போது கௌரவ கர்னல் பட்டம் வழங்கியிருக்கிறார்கள். இங்கிலாந்து கிரிக்கெட் அணியின் கேப்டன் ஜோ ரூட், மூர் தங்கள் அணியினருடன் பேச வேண்டும் என அழைப்பு விடுத்திருக்கிறார். 94 வயதான இங்கிலாந்து ராணியும் டாம் மூருக்குப் பிறந்தநாள் வாழ்த்து சொல்லி, இவ்வரலாற்றில் தன்னையும் இணைத்துக்கொண்டுள்ளார்.

. டாம் மூரைப் பார்த்துத் தற்போது பலர் இப்படியான விழிப்புணர்வு நடைப்பயணத்தைத் தொடங்கியிருக்கிறார்கள். மூர் உலகுக்குச் சொல்லும் செய்தி இதுதான் , “இப்படியெல்லாம் நடக்கும் என நினைத்து நான் இதை ஆரம்பிக்கவில்லை. மருத்துவப்பணியாளர்களுக்கு நாம் முடிந்த உதவிகளைச் செய்ய வேண்டும். அவர்கள் தங்கள் வேலையை இன்னும் பாதுகாப்புடன் செய்ய நமது உதவி அவசியம்.”

. அவரது 100வது பிறந்தநாளான ஏப்ரல் 30ம் தேதி மாலை வரை நன்கொடையாக வந்திருந்த தொகை 32.79 மில்லியன் பவுண்டு (இந்திய மதிப்பில் 300 கோடி ரூபாய்!). அவர் முதலில் வைத்திருந்த இலக்கு ஆயிரம் பவுண்டுகள். இந்தத் தொகை அனைத்தும் பிரிட்டனின் தேசிய சுகாதார அமைப்புக்குச் செல்லவிருக்கிறது.

அடுத்த நொடி வாழ்க்கை ஒளித்து வைத்திருக்கும் ஆச்சர்யங்கள் அலாதியானவை. உங்களின் நூறாவது பிறந்தநாளிலும்கூட புதிய அனுபவத்தை, ஆச்சர்யத்தை உங்களுக்கு அது பரிசளிக்கலாம் என உலகுக்கு அழகிய பாடத்தைச் சொல்லியிருக்கிறார் மூர் தாத்தா.

வைரஸை எதிர்க்க வயசு எதற்கு?

கார்த்திFollow

கார்த்தி Follow