Published:Updated:

‘‘நீதிமன்றத்தில் தமிழக அரசு பொய் சொல்லிவிட்டது!’’

வேதனையில் விவசாயிகள்
பிரீமியம் ஸ்டோரி
News
வேதனையில் விவசாயிகள்

வேதனையில் விவசாயிகள்

ஊரடங்கு காலத்தில் விளைபொருள்களை விற்பனை செய்ய விவசாயிகள் பெரும்பாடு பட்டுக்கொண்டிருந்த நிலையில், அரசு சில ஏற்பாடுகளைச் செய்தது. ஆனால், அதனால் விவசாயிகளுக்கு எந்தப் பலனும் இல்லை. இதனால், திடீரென்று முளைத்த கொள்ளைக்கார வியாபாரிகளிடம் உற்பத்தி செய்த பொருள்களை அடிமாட்டு விலைக்குக் கொடுக்க வேண்டிய நிர்பந்தம் உருவானது. இது, விவசாயிகளுக்குப் பெரும் நஷ்டத்தைக் கொடுத்திருக்கிறது.

இந்த நிலையில் விவசாயிகளின் பாதிப்பை ராஜேஷ் என்ற வழக்கறிஞர் சென்னை உயர் நீதிமன்றத்தின் கவனத்துக்கு எடுத்துச் சென்றார். ‘ஊரடங்கால் பாதிக்கப்பட்டிருக்கும் விவசாயிகளின் விளைபொருள்களை அரசே நேரடியாகக் கொள்முதல் செய்ய உத்தரவிட வேண்டும்’ என்று வழக்கு தாக்கல் செய்தார். வழக்கு விசாரணைக்கு வந்தபோது, தமிழக அரசு சார்பில், ‘ஊரடங்கு காலத்தில் விவசாயிகள் பாதிக்கப்படாத வகையில் விவசாயிகளிடமிருந்து காய்கறிகள், பழங்கள் கொள்முதல் செய்யப் பட்டுள்ளன. தமிழகம் முழுவதுமுள்ள 138 குளிர்சாதனக் கிடங்குகளில் விளைபொருள்களைக் கட்டணம் இல்லாமல் வைத்துக்கொள்ள ஏற்பாடு செய்யப்பட்டுள்ளது. உழவன் செயலியை ஆறு லட்சத்துக்கும் மேற்பட்ட விவசாயிகள் பயன்படுத்துகின்றனர். உணவுப் பொருள் வழங்கல்துறை மூலம் 37,635 விவசாயிகளிடம் 2.75 லட்சம் மெட்ரிக் டன் நெல் கொள்முதல் செய்யப் பட்டுள்ளது. இதற்காக விவசாயிகளுக்கு 522 கோடி ரூபாய் வழங்கப்பட்டுள்ளது. கால் சென்டர் மூலம் 11,550 அழைப்புகளுக்குத் தீர்வு அளிக்கப்பட்டுள்ளது’ என்று தெரிவிக்கப்பட்டது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

‘அரசு எடுத்த நடவடிக்கைகள் மூலம் விளைபொருள்களை விற்பனை செய்ய முடிந்ததா?’ என்ற கேள்வியை, தமிழகம் முழுவதும் பரவலாக விவசாயிகளிடம் கேட்டது விகடன் செய்தியாளர்கள் குழு. அவற்றில் சிலரது கருத்துகள் இங்கே இடம் பிடிக்கின்றன...

விவசாயச் சங்க கூட்டி யக்கத்தின் மாநிலத் தலைவர் கோபாலகிருஷ்ணன், ‘‘ஊரடங்கால் விவசாய விளைபொருள்களைச் சந்தைப் படுத்த முடியாமல் பெரிய இழப்பு ஏற்பட்டிருக்கிறது. விளைபொருள்களைச் சந்தைப்படுத்துவதற்காக அரசு ஒவ்வொரு மாவட்டத்துக்கும் தோட்டக் கலைத்துறையின் தகவல் தொடர்பு எண் கொடுத்தாலும், அதனால் பிரயோஜனம் இல்லை. சேலம் மாவட்டத்தில் பல விவசாயிகள், ‘விவசாய விளைபொருள்களைச் சந்தைப்படுத்த முடியவில்லை’ என்று என்னிடம் தகவல் தெரிவித்தார்கள். அதையடுத்து அரசு கொடுத்த மாவட்டத் தோட்டக்கலைத்துறை எண்ணைத் தொடர்புகொண்டு தகவல் தெரிவித்தேன். அவர்கள் கலெக்டரிடம் சொல்லிப் பிரச்னைகளைத் தீர்ப்பதாகச் சொன்னார்கள். ஆனால், அவர்கள் கொடுத்த வாக்குறுதிகளை நிறைவேற்றவில்லை’’ என்றார்.

கோபாலகிருஷ்ணன் - வாகை தமிழரசு - வரதராஜன்
கோபாலகிருஷ்ணன் - வாகை தமிழரசு - வரதராஜன்

ஈரோடு மாவட்டம், அரச்சலூரைச் சேர்ந்த விவசாயி வாகை தமிழரசு, ‘‘மொடக்குறிச்சி யூனியன் தோட்டக்கலைத்துறை உதவி இயக்குநர் மேகலாவைத் தொடர்புகொண்டு பேசினேன். ‘தோட்டக்கலைத்துறை சார்பாக நாங்கள் எந்தக் கொள்முதலும் செய்வதில்லை. பொருளை விற்பனை செய்ய வியாபாரிகளின் நம்பரைக் கொடுத்துத் தொடர்பு ஏற்படுத்தித் தருகிறோம். அவர்களைத் தொடர்புகொண்டால் உங்கள் விளைபொருள்களைக் கொள்முதல் செய்து கொள்வார்கள்’ என்றார். இதனால், நானே மற்ற விவசாயிகளிடமிருந்து காய்கறிகளை மொத்தமாக வாங்கி, தற்காலிகமாக விற்பனை மையம் ஒன்றை அமைத்து, விற்பனை செய்து வருகிறேன்’’ என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தூத்துக்குடி மாவட்டம் அயன்வடமலாபுரத்தைச் சேர்ந்த விவசாயியான வரதராஜன், ‘‘சோளம் விற்பனைக்காக வேளாண் விற்பனை மற்றும் வணிகத்துறை துணை இயக்குநர் சாந்தியிடம் பேசினேன். ‘உங்கள் விளை பொருளைக் கொள்முதல் செய்வது எங்கள் வேலை கிடையாது. விற்பனை செய்யத் தயாராக இருக்கும் விளைபொருள், எடை அளவு போன்ற விவரங் களைச் சொல்லுங்கள். மொத்த வியாபாரிகள் யாராவது கேட்டால், அவர்களுக்கு உங்கள் எண்ணைத் தருகிறோம். விற்பனை விவரங்களை அவர்களிடம் பேசிக்கொள்ளுங்கள். ஒழுங்குமுறை விற்பனைக்கூடத்தில் வேண்டுமானால் மூட்டை களைக் கட்டணமில்லாமல் இருப்பு வைத்துக் கொள்ளலாம். வெளியூர்களில் போய் விற்பனை செய்ய வேண்டுமென்றால், வண்டிக்கு பாஸ் தருகிறோம். எங்களால் அதுதான் செய்ய முடியும்’ என்று சொன்னார். உண்மை நிலவரம் இப்படி இருக்கும்போது, ‘விளைபொருள்களை அரசே கொள்முதல் செய்வதால், விவசாயிகள் மகிழ்ச்சியாக இருக்கிறார்கள்’ என்று நீதிமன்றத்தில் அரசு பதில் சொன்னது வருத்தமளிக்கிறது. ஒரு விவசாயியாக இருந்துகொண்டு முதல்வர் இப்படி உண்மைக்குப் புறம்பாகப் பேசலாமா?’’ என்றார்.

‘‘நீதிமன்றத்தில் தமிழக அரசு 
பொய் சொல்லிவிட்டது!’’

இதுதொடர்பாக வேளாண்மைத்துறை அமைச்சர் துரைகண்ணுவிடம் பேசினோம்.

‘‘ `விவசாயிகள் பாதிக்கப்படக் கூடாது. அவர்கள் விளைவித்த பொருள்கள் வீணாகாமல் நல்ல விலை கிடைக்க வேண்டும்’ என்பதற்காகத் தொடக்கத் திலேயே விவசாயிகளையும், கொள்முதல் செய்யும் வியாபாரிகளையும் இணைத்து விளை பொருள்களை விற்பதற்கு நடவடிக்கை எடுக்கப் பட்டது. நடமாடும் காய்கறி வாகனங்களுக்கும் ஏற்பாடு செய்து கொடுக்கப்பட்டது. `விவசாயிகள் தாங்கள் விளைவித்த பொருள்களை அடிமாட்டு விலைக்கு விற்பனை செய்தனர்’ எனச் சொல்வது தவறு” என்றார்.