Published:Updated:

அனைத்து பரிசோதனை மையங்களையும் ஏன் பயன்படுத்தவில்லை?

நீதிமன்ற படியேறிய பொன்ராஜ்

பிரீமியம் ஸ்டோரி
“தமிழகத்தில் கொரோனா பரிசோதனைகள் அதிகளவில் நடக்கின்றன. சென்னையில் நாள் ஒன்றுக்கு 3,600 பேருக்கு பரிசோதனை செய்யப்படுகிறது’’ என்று சமீபத்தில் கொரோனா தடுப்பு சிறப்பு அதிகாரி டாக்டர் ராதாகிருஷ்ணன் தெரிவித்திருந்தார்.

இந்த நிலையில்தான் ‘தமிழகத்தில் மருத்துவப் பரிசோதனை மையங்கள் அதிகம் இருந்தும், குறைந்த அளவிலான மையங்களில் மட்டும் கொரோனா பரிசோதனை நடத்துவது ஏன்? அனைத்து பரிசோதனை மையங்களையும் பயன்படுத்த வேண்டும்’ என்று முன்னாள் குடியரசுத் தலைவர் அப்துல் கலாமுடன் இணைந்து பணியாற்றிய பொன்ராஜ், உயர் நீதிமன்றத்தில் வழக்கு தொடர்ந்துள்ளார்.

பொன்ராஜ்
பொன்ராஜ்

அவரது மனுவில், ‘தமிழகத்தில் கொரோனா தொற்றைப் பரிசோதிக்க, 126 சோதனை மையங்கள் உள்ளன. மருத்துவ ஆராய்ச்சி கவுன்சிலுக்குச் சொந்தமான மையங்களையும் சேர்த்தால் மொத்தம் 167 உள்ளன. ஏப்ரல் 26-ம் தேதி வரை 41 சோதனை மையங்களில் 87,000 பேருக்கு பரிசோதனை செய்யப்பட்டுள்ளது. தமிழகத்தில் உள்ள 126 பரிசோதனை மையங்களையும் முழுமையாகச் செயல்படுத்தினால்

30 நாள்களில் 14 லட்சம் பேருக்கு பரிசோதனை செய்திருக்கலாம். ஆனால், 41 பரிசோதனை மையங்கள் மட்டுமே இயங்கிவருகின்றன. நாடு முழுவதும் பல்கலைக் கழகங்கள், மருத்துவ ஆராய்ச்சி நிறுவனங்களில் எத்தனை பி.சி.ஆர் பரிசோதனைக் கருவிகள் உள்ளன என்பது பற்றி விரிவான அறிக்கையை மத்திய-மாநில அரசுகள் தெரிவித்து, அவற்றை பரிசோதனைக்குப் பயன்படுத்த உத்தரவிட வேண்டும்’ எனக் குறிப்பிடப்பட்டுள்ளது.

இதற்கு அரசு தரப்பில் ஒரு வாரத்துக்குள் பதில் அளிக்கும்படி உத்தரவிட்ட நீதிபதிகள், மே 12-ம் தேதி விசாரணையை தள்ளிவைத்துள்ளனர்.

அனைத்து பரிசோதனை மையங்களையும் ஏன் பயன்படுத்தவில்லை?

பொன்ராஜிடம் பேசினோம். “ஆரம்பம் முதலே கொரோனா தடுப்பு நடவடிக்கைகளில் மாநில அரசு அலட்சியம் காட்டுகிறது. மக்கள்தொகைக்கு ஏற்ப அதிகளவில் பரிசோதனைகள் நடத்தப்படவில்லை. இத்தனை பரிசோதனை மையங்கள் இருக்கும்போது, 41 மையங்களில் மட்டும் சோதனை செய்வது ஏன்? சமீபநாள்களாக சென்னையில் மட்டும் கூடுதலாக பரிசோதனை நடத்துகிறார்கள். தற்போது ஊரடங்கு தளர்த்தப் பட்டுள்ளதால், அனைத்து மாவட்டங்களிலும் கொரோனா பரிசோதனைகளை அதிகப்படுத்த வேண்டும். இப்போது தமிழகத்தை சிவப்பு, ஆரஞ்சு, பச்சை மண்டலங்களாகப் பிரித்து வைத்திருக்கி றார்கள். அதிலும் குளறுபடி. பாதிப்பு குறைவாக உள்ள விருதுநகர் மாவட்டத்தை சிவப்பு மண்டலத்திலும், பாதிப்பு அதிகமுள்ள கோவையை ஆரஞ்சு மண்டலத்திலும் வைத்திருக்கிறார்கள். மொத்தத்தில் கொரோனா தடுப்பு நடவடிக்கைகளில் அரசின் செயல்பாடு மிக மோசமாக உள்ளது. அதனால்தான் நீதிமன்றத்தை நாடினேன்’’ என்றார்.

மே 12-ம் தேதி, அரசு என்ன பதில் சொல்லப்போகிறது?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு