அனுமதியின்றி தடுப்பூசி முகாம்... அதிர்ச்சியில் அதிகாரிகள்... ஆக்‌ஷனில் ஜூ.வி!

‘த டுப்பூசி போட்டதால் குழந்தை மரணம்’ என மனத்தைப் பதைபதைக்கச் செய்கிற சம்பவங்கள் நடைபெறுவது தொடர்கதையாக இருக்கிறது. இந்நிலையில், அரசின் அனுமதி பெறாமல் மதுரையில் ஒரு தனியார் மருத்துவமனையில் தடுப்பூசி முகாமை தொண்டு நிறுவனம் ஒன்று நடத்த இருப்பதாக அதிர்ச்சித் தகவல் நமக்குக் கிடைத்தது. உடனடியாகக் களமிறங்கினோம். சம்பந்தப்பட்ட அதிகாரிகள் அனைவரிடமும் பேசினோம். பல கட்ட முயற்சிகளின் விளைவாக முகாம் நிறுத்தப்பட்டது.

அது பற்றிய ஒரு பரபர ரிப்போர்ட் இது...

. மஞ்சள்காமாலை (Hepatitis B) தடுப்பூசி போடுவதாக மதுரை ரிசர்வ் லைன் பகுதியில் கடந்த வாரம் வீடு வீடாகச் சிலர் பிரசாரம் செய்துள்ளனர். அவர்கள், ‘பாங்க் காலனில் உள்ள பொன்னி மருத்துவமனையில் முகாம் நடக்குது’ என்று சொல்லி டோக்கனுக்கு 20 ரூபாய், தடுப்பூசிக்கு 50 ரூபாய் என்று பலரிடம் வசூலித்துள்ளனர்.

அவர்கள்மீது அப்பகுதியினர் சிலருக்குச் சந்தேகம் வரவே, இந்த விஷயத்தை நமக்குத் தெரிவித்தனர். அதைத் தொடர்ந்து, பொன்னி மருத்துவமனைக்குச் சென்று ரிசப்ஷனில் விசாரித்தோம். ‘‘ஆமாங்க... ஞாயிற்றுக்கிழமை முகாம் நடக்குது. மஞ்சள்காமாலை ஊசி போடுறோம். ஒரு ட்ரஸ்ட்ல இருந்து வர்றாங்க’’ என்றனர். அந்த ட்ரஸ்ட்டின் பெயர், தடுப்பூசியின் விவரம் போன்றவை குறித்து அவர்களிடம் கேட்டதற்கு, ‘‘ட்ரஸ்ட் பெயர் தெரியலை. மதுரை ராஜாஜி அரசு மருத்துவமனை ஸ்டாஃப்ஸ்தான் வர்றாங்க’’ என்றனர்.

உடனே மதுரை ராஜாஜி அரசு மருத்துவமனை டீன் மருதுபாண்டியனைத் தொடர்புகொண்டு இந்த முகாம் பற்றிக் கேட்டோம். அவர், ‘‘எங்களுடன் சேர்ந்து தடுப்பூசி முகாம் நடத்த யாரும் எங்களிடம் அனுமதி பெறவில்லை. ஒருவேளை சுகாதாரத் துறையில் பேசியிருக்கலாம். மதுரை சுகாதாரத் துறை துணை இயக்குநர் அர்ஜுனிடம் கேளுங்கள்’’ என்றார். அதையடுத்து அர்ஜுனைத் தொடர்புகொண்டோம். அவர், “பொன்னி மருத்துவமனையிலிருந்தோ, எந்தவொரு ட்ரஸ்ட்டிலும் இருந்தோ, தடுப்பூசி முகாம் நடத்த இதுவரை யாரும் என்னிடம் அனுமதி வாங்கவில்லை. அப்படி யாராவது கேட்டாலும், ஊசி போட நாங்கள் அனுமதி கொடுப்பதில்லை. எதற்கும் மதுரை மாநகராட்சி சுகாதார அதிகாரி சதீஷ் ராகவனைத் தொடர்புகொள்ளுங்கள். அரசு அனுமதியின்றித் தடுப்பூசி முகாம் நடப்பது உறுதியானால், நிச்சயம் நடவடிக்கை எடுப்போம்” என்றார். அடுத்து, மாநகராட்சி சுகாதார அதிகாரி சதீஷ் ராகவனைத் தொடர்புகொண்டோம். அவர், “அப்படியொரு முகாம் நடப்பது தொடர்பாக எந்தத் தகவலும் இல்லை” என்றார்.

. அந்தத் தடுப்பூசி முகாம் தொடர்பாக மக்களிடம் கொடுக்கப்பட்டிருந்த அட்டையில், ‘Rural Educational Charitable Trust’ என்று இருந்தது. அதில், பொன்னி மருத்துவமனையின் முதன்மை மருத்துவர் யாழினி செல்வராஜின் பெயர் குறிப்பிடப்பட்டிருந்தது. இந்த விவரங்களை அதிகாரிகளிடம் தெரிவித்தோம். உடனே, சுகாதாரத்துறை துணை இயக்குநர் அர்ஜுன் ஆக்ஷனில் இறங்கினார். அவர் தலைமையிலான நான்கு பேர் கொண்ட குழு ஒன்று, முகாம் நடைபெறுவதாக அறிவிக்கப்பட்டிருந்த தேதியில் பொன்னி மருத்துவமனைக்குத் திடீர் விசிட் அடித்தது. மருத்துவமனை நிர்வாகத்தினர், ‘இங்கு முகாம் நடக்கவில்லை’ என்று கூறியுள்ளனர். ஆதாரங்களை அதிகாரிகள் காட்டவும், மருத்துவமனை நிர்வாகத்தினரால் பதில் பேச முடியவில்லை. மேலும், மாநகராட்சி சுகாதார அதிகாரி சதீஷ் ராகவன் எச்சரித்ததால், முகாமை நிறுத்திவிட்டதாக அவர்கள் தெரிவித்துள்ளனர். மருத்துவமனையிலிருந்து வெளியே வந்த சுகாதாரத் துறை துணை இயக்குநர் அர்ஜுன், “அந்தத் தொண்டு நிறுவனத்தின் பின்னணியை விசாரிக்காமல், முகாம் நடத்த பொன்னி மருத்துவமனை இடம் அளித்தது தவறு. இதற்காக அவர்கள்மீது நிச்சயம் நடவடிக்கை எடுக்கப்படும்” என்று அங்கிருந்த மக்களிடம் கூறியிருக்கிறார்.

. பொன்னி மருத்துவமனையின் முதன்மை மருத்துவர் யாழினி செல்வராஜைத் தொடர்பு கொண்டு இதுபற்றிக் கேட்டோம். ‘‘முகாம் நடப்பது பற்றி எனக்கு எதுவுமே தெரியாது. அதை நாங்கள் நடத்தவில்லை. சுகாதாரத்துறையினர் விசாரிக்க வந்தபோதுதான், எங்களுக்கு அந்த விஷயமே தெரியும். உடனே, முகாமை நிறுத்திவிட்டோம்” என்றார் அவர். “மக்களிடம் பணம் வசூலித்துள்ளனரே?” என்று அவரிடம் கேட்டபோது, “அது பற்றி அந்த ட்ரஸ்ட் நிர்வாகத்தினரிடம் கேளுங்கள். அதற்கும் எங்களுக்கும் சம்பந்தமில்லை” என்றார்.

Rural Educational Charitable Trust என்கிற அந்த ட்ரஸ்ட்டைத் தொடர்புகொண்டோம். “நாங்கள் நிச்சயம் முகாம் நடத்தத்தான் போகிறோம். பிறகு ஏன் பணத்தைத் திருப்பிக்கொடுக்க வேண்டும்? வேறொரு தேதியில் முகாம் நடத்துமாறு மருத்துவமனை சார்பில் சொல்லியிருக்கிறார்கள். சென்னையில் உள்ள பொதுச் சுகாதாரத் துறை இயக்குநர் அலுவலகத்தில் அனுமதி வாங்கிவிட்டோம். 50 ரூபாய்க்கு மஞ்சள்காமாலை தடுப்பூசியை யார் போடுவார்கள்? ஆனால், நாங்கள் போடுகிறோம். நிச்சயம் நாங்கள் ஒரு மாதத்தில் முகாமை நடத்திக்காட்டுவோம்” என்று சவால் விட்டார்கள் அவர்கள். மஞ்சள்காமாலை தடுப்பூசி இப்போது தமிழக அரசின் சுகாதாரத் துறை சார்பில் போடப்படும் தடுப்பூசிகள் பட்டியலில் இணைக்கப்பட்டுவிட்டது. அதனால், இதைச் செலவின்றியே போட்டுக்கொள்ளலாம். இதைத் தாண்டி இப்படி ஏன் முகாம் நடத்த வேண்டும்? அவர்கள் தரமான தடுப்பூசிகளையே பாதுகாப்பாகப் போடுகிறார்கள் என்பதற்கு என்ன உத்தரவாதம்?

அதிகாரிகளே உஷார்!

- பூ.பவித்ரா படங்கள்: ஈ.ஜெ.நந்தகுமார்

அனுமதியின்றி தடுப்பூசி முகாம்... அதிர்ச்சியில் அதிகாரிகள்... ஆக்‌ஷனில் ஜூ.வி!

பவித்ரா பூ