Published:Updated:

“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

ஒட்டுமொத்த விகடனுக்கும் ஒரே ஷார்ட்கட்

Use App
“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...
“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

பிரீமியம் ஸ்டோரி

வீதிக்கு வீதி கார்ப்பரேட் மருத்துவமனைகள் முளைத்துக்கொண்டிருந்தாலும், தமிழ்நாட்டில் இன்றும் லட்சக்கணக்கான ஏழை மக்கள் அரசு மருத்துவமனைகளையே நம்பியுள்ளனர். அத்தகைய அரசு மருத்துவமனைகளில் கடந்த சில வாரங்களாக, அத்தியாவசிய மருந்துகளுக்கு கடும் தட்டுப்பாடு ஏற்பட்டுள்ளதாக மருத்துவமனை ஊழியர்களே குமுறுகிறார்கள்.

இங்குள்ள பொதுத்துறை நிறுவனங்கள், மருந்து உற்பத்தியைக் கிட்டத்தட்ட நிறுத்தி விட்டன. தனியார் நிறுவனங்களிடமிருந்தே மருந்துகளை அரசு கொள்முதல் செய்கிறது. மருந்துகளுக்கான மூலப்பொருள்கள் பெரும்பாலும் சீனாவிலிருந்தே வாங்கப்படுகின்றன. சமீபகாலமாக, அங்கிருந்து மூலப்பொருள்கள் வருவது குறைந்ததே, தட்டுப்பாட்டுக்குக் காரணம் என்கிறார்கள் மருத்துவர்கள். தவிர, செயற்கையானத் தட்டுப்பாட்டை உருவாக்கி, மருந்துகளின் விலையை உயர்த்த மருந்து உற்பத்தி நிறுவனங்கள் திட்டமிட்டிருப்பதாக மருத்துவச் செயற்பாட்டாளர்கள் குற்றம்சாட்டுகிறார்கள். 

“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

இதுகுறித்து சமூக சமத்துவத்திற்கான டாக்டர்கள் சங்கத்தின் பொதுச்செயலாளரான ஜி.ஆர்.ரவீந்திரநாத் கூறுகையில், “தமிழ்நாடு முழுக்கவே பெரும்பாலான அரசு மருத்துவமனைகளில் நெஞ்சுச் சளி, தொண்டை வலி, இதய நோய் மற்றும் புற்றுநோய்களுக்கான மருந்துகள், ஆன்டிபயாடிக் மருந்துகள், சர்க்கரை நோயாளிகளுக்கான இன்சுலின், நோய்த் தடுப்பு மருந்துகள் ஆகியவற்றுக்கு தட்டுப்பாடு நிலவுகிறது. பல மருந்துகள் ஸ்டாக் இல்லை. காரணம், போதிய அளவுக்கு சப்ளை இல்லை. அரசுத் தரப்பிலோ, ‘சீனாவில் மருந்துகளுக்கான மூலப்பொருள் உற்பத்தி குறைந்துள்ளது. அதனால்தான் மருந்து தட்டுப்பாடு’ என்கிறார்கள். இது தவறான தகவல். தனியார் மருந்தகங்களிலும், தனியார் மருத்துவமனைகளிலும் மருந்துகள் தாராளமாகக் கிடைக்கின்றன. அரசு மருத்துவமனைகளில் மட்டும் தட்டுப்பாடு ஏன்? 

அரசுக்கு மருந்துகளை சப்ளை செய்யும் நிறுவனங்கள், செயற்கைத் தட்டுப்பாட்டை உருவாக்கி, விலையை ஏற்றிய பிறகு சப்ளை செய்யத் திட்டமிட்டுள்ளன. இதற்கு அதிகாரிகள் சிலரும் உடந்தையாக இருக்கிறார்களோ என்கிற சந்தேகம் உள்ளது. ஏனென்றால், கம்பெனிகள் விலையை ஏற்றுவதால் சிலருக்கு கமிஷன் கிடைக்க வாய்ப்பு உண்டு. எனவே, அரசு இதுகுறித்து விசாரித்து நடவடிக்கை எடுக்க வேண்டும். உண்மையிலேயே மூலப்பொருள்கள் தட்டுப்பாடு என்றால், இந்தியாவிலேயே மருந்துகளுக்கான மூலப்பொருள்களைத் தயாரிக்கலாம். 80 சதவிகித மூலப்பொருள்களை சீனாவிலிருந்து இறக்குமதி செய்வதாக அரசுத் தரப்பில் சொல்லப்படுகிறது. ஒருவேளை சீனா - இந்தியா உறவு பாதிக்கப்பட்டால், நமது நிலை என்னவாகும்? அப்படியொரு மோசமான சூழ்நிலை உருவானால் என்ன மாற்றுத்திட்டம் வைத்திருக்கிறார்கள்?

“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

மருந்து உற்பத்திக்கு, தனியார் நிறுவனங்களையே அரசு நம்பியிருப்பது பெரும் தவறு. மத்திய, மாநில அரசுகள் பொதுத்துறை நிறுவனங்களை ஊக்கப்படுத்துவதில்லை. இருக்கும் பொதுத்துறை நிறுவனங்களையும் மூடுகின்றனர். புதிதாகப் பொதுத்துறை நிறுவனங்களையும் உருவாக்குவதில்லை. தமிழ்நாடு மெடிக்கல் சர்வீஸ் கார்ப்பரேஷன், கொள்முதல் செய்யும் அமைப்பாக மட்டுமே இருக்கிறது. பொதுத்துறை நிறுவனமாக, அந்த அமைப்பை மாற்றவேண்டும். இதன்மூலம் அடிப்படை மருந்துகளான ஆன்டிபயாட்டிக், பாராசிட்டாமல், இருமல் மருந்து உள்ளிட்ட அடிப்படை மருந்துகளை உற்பத்திசெய்து, குறைந்த விலைக்கு விற்பனை செய்யலாம். மருத்துவ உபகரணங்களையும் உற்பத்தி செய்யலாம். வெளியிலும் மருந்துகளை விற்கலாம். இதனால், சந்தையில் மருந்துகளின் விலையேற்றத்தையும் கட்டுப்படுத்தலாம்” என்றவர், இங்கிருக்கும் குளறுபடிகளையும் விவரித்தார்.

“இங்கு நிலைமை தலைகீழாக உள்ளது. ஊசி மூலமாகச் செலுத்தக்கூடிய போலியோ மருந்தின் விலை, ஒரே ஆண்டில் 61 ரூபாயிலிருந்து 164 ரூபாயாக உயர்ந்துள்ளது. கூடுதல் விலை கொடுத்து வாங்க முடியாமல் போலியோ சொட்டு மருந்து முகாமையே தள்ளிவைக்கிறார்கள். 100 கோடி ரூபாய் இருந்தாலே, அனைத்து குழந்தைகளுக்கும் போலியோ சொட்டு மருந்து கொடுக்க முடியும். அதைச் செய்ய  முன்வரவில்லை. மூவாயிரம் கோடி ரூபாய்க்குச் சிலை வைக்கிறார்கள். நான்காயிரம் கோடி ரூபாயில் கும்பமேளா நடத்துகிறார்கள். குழந்தைகளுக்கான போலியோ மருந்து வாங்குவதற்கு மட்டும் பன்னாட்டு அமைப்புகளிடம் கையேந்தி நிற்கிறார்கள்’’ என்று குமுறினார்.  

“அரசு மருத்துவமனைகளில் மருந்து இல்லை!” - அல்லாடும் ஏழை நோயாளிகள்...

மருந்துத் தட்டுப்பாடு குறித்து தமிழ்நாடு மருத்துவச் சேவைகள் கழகத்தின் மேலாண்மை இயக்குநர் டாக்டர் உமாநாத்திடம் பேசினோம்.

``காற்று மாசால் சில வேதிப்பொருள்களைத் தயாரிப்பதை சீனா நிறுத்தியுள்ளது. இதனால், சில மூலக்கூறு மருந்துகளுக்குத் தட்டுப்பாடு ஏற்பட்டுள்ளது. அது நம்மையும் பாதிக்கிறது. தற்போது, புதிய ஒப்பந்தங்கள் செய்யப்பட்டுள்ளன. கொள்முதல் ஆணைகளும் வழங்கப்பட்டுவிட்டன. விற்பனையாளர்களும் மருந்துகளை விநியோகம் செய்யத் தொடங்கிவிட்டனர். 314 மருந்துகளில் 12 மருந்துகள் மட்டுமே பற்றாக்குறையாக உள்ளன. அவற்றை வெளியில் வாங்கிக்கொள்ள பரிந்துரைத்துள்ளோம். இன்னும் இரண்டு அல்லது மூன்று வாரங்களில் நிலைமை சரியாகிவிடும்” என்றார்.

ஏழை மக்களின் உயிருடன் விளையாடுவது அரசுக்கு அழகல்ல!

- கிராபியென் ப்ளாக்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு