கொரோனா காலத்தில் ஹெச்.ஐ.வி நோயாளிகளின் நிலை என்ன?

கொரோனா வைரஸ் தாக்கத்தால் இந்தியாவில் பாதிக்கப்பட்டவர்களின் எண்ணிக்கை ஆயிரத்தைக் கடந்திருக்கிறது. ஏப்ரல் 2-ம் தேதி நிலவரப்படி உயிர்பலி எண்ணிக்கை 50-யைத் தொட்டிருக்கிறது. வீடு இல்லாத மக்கள், சமூகத்தின் விளிம்புநிலை மக்கள், ஒடுக்கப்பட்டவர்கள், புலம்பெயர் தொழிலாளர்கள் எனப் பல்வேறு தரப்பினரின் பாதுகாப்பு குறித்து கேள்வி எழத் தொடங்கியுள்ளது. இவர்களுக்கு இடையே கொரோனா பதற்றத்தில் கண்டுகொள்ளாமல் விடப்பட்ட ஒரு பிரிவினர், ஹெச்.ஐ.வி நோய்த்தாக்கம் கொண்டவர்கள். கொரோனா தாக்கத்தால், இவர்களுக்கு நோய் எதிர்ப்பு சக்தி மருந்துகள் கிடைப்பதில் சிக்கல் ஏற்பட்டுள்ளது. . 2017-ம் ஆண்டு கணக்கீட்டின்படி தமிழகத்தில் 1.42 லட்சம் பேர் ஹெச்.ஐ.வி-யால் பாதிக்கப் பட்டுள்ளனர் என, தேசிய எய்ட்ஸ் கட்டுப்பாடு வாரியம் பதிவுசெய்துள்ளது. இவர்களுக்கு உடலில் எதிர்ப்பு சக்தி குறைவாக இருக்கும். எனவே கொரோனா வைரஸ், எய்ட்ஸ் நோயாளிகளை அதிகம் பாதிக்க வாய்ப்பு உண்டு. இவர்களுக்கான மருந்துகள் அரசின் ஏ.ஆர்.சி மையங்கள் வழியாகத் தரப்பட வேண்டும். இதுகுறித்து அரசு உத்தரவும் பிறப்பிக்கப் பட்டுள்ளது. ஆனாலும், தற்போதைய சூழலில் இவர்களுக்கான மாத்திரைகள் கிடைப்பதில்லை என்கின்றனர் நோய் பாதிப்பு ஏற்பட்ட சிலர்.

கோவில்பட்டியில் இருக்கும் பெயர் வெளியிட விரும்பாத திருநங்கை ஒருவர் இதுகுறித்துப் பேசுகையில், “நான் ஹெச்.ஐ.வி பாசிட்டிவ் நபர். பல வருடங்களாக அதற்கான மருந்து எடுத்து வருகிறேன். எங்களுக்கான மருந்துகளை ஒவ்வோர் ஊரிலும் இருக்கும் ஏ.ஆர்.சி மையத்தில்தான் பெற வேண்டும். பெரும்பாலும் அரசு மருத்துவ மனைகளில்தான் இந்த ஏ.ஆர்.சி மையங்களும் இருக்கும். அங்கு எங்கள் உடல்நிலையைப் பரிசோதித்துவிட்டு அதற்கு ஏற்றபடி மருந்து தருவார்கள். ஆனால், கொரோனா பாதிப்பைத் தவிர்க்க 144 தடைச்சட்டம் நாடு முழுவதும் போடப்பட்டிருக் கிறது. இந்தச் சூழலில் நாங்கள் வெளியில் செல்வது மிகவும் ஆபத்தானது. அப்படியே சென்றாலும் திருநங்கைகள் வெளியே சுற்றித்திரிவதை காவல்துறை தவறான கண்ணோட்டத்துடன்தான் பார்க்கும். இதனால் எங்களால் மையங்களுக்குச் சென்று மருந்து வாங்க முடியவில்லை. அப்படியே பல இடர்ப்பாடுகளைத் தாண்டி மையங்களை அடைந்தாலும், அங்கு மருந்து ஸ்டாக் இல்லை என்றே பதில் வருகிறது.

. எங்களில் சிலர் தங்களுக்கு ஹெச்.ஐ.வி பாதிப்பு இருப்பதையே குடும்பத்தினரிடம் மறைத்துவிட்டுதான் மருந்து சாப்பிட்டு வருகிறார்கள். இந்த ஊரடங்கு நாள்களில் அவர்கள் வெளிப்படையாகச் சென்று மருந்து வாங்கவும் முடியாது. ஊரடங்கு காலத்தில் எங்களுக்கு உணவுச்சிக்கல் ஒருபக்கம் இருந்தாலும், இதுபோன்ற மருந்து தட்டுப்பாடு உயிர் வாழ்வதையே கேள்விக்குறியாக்குகிறது” என்றார்.

. இப்படிச் சொல்லும் மேற்கண்ட திருநங்கையின் கைவசம் தற்போது இரண்டு மாத்திரைகள் மட்டுமே இருக்கின்றன. ``மாத்திரைகள் கிடைக்கப்பெறாத நிலையில் உடலில் எதிர்ப்பு சக்தி கொஞ்சம் கொஞ்சமாகக் குறைந்துவிடும். இடைவெளிவிட்டு மருந்துகளைச் சாப்பிட்டால் மாத்திரையின் அளவை அதிகப்படுத்தித் தருவார்கள். ஒரு மாத்திரை சாப்பிட்டாலே உடல் முழுவதும் ஊசிபோல் குத்தும். ஐந்து மாத்திரைகள் எடுத்துக்கொண்டால் சித்ரவதையாகிவிடும்’’ என்கிறார்.

இதுகுறித்து பொதுமருத்துவர் தீபிகா கூறுகையில், “ஹெச்.ஐ.வி மருந்துகளை திடீரென நிறுத்தினால் உடலில் பல்வேறு உபாதைகள் ஏற்படும். கைவசம் மருந்து வைத்திருப்பவர்கள் வாரத்துக்கு மூன்று மாத்திரைகள், அதற்கடுத்த வாரத்துக்கு இரண்டு மாத்திரைகள் என மாத்திரைகள் கையிருப்பு இருக்கும் வரை படிப்படியாக அளவைக் குறைத்து இந்தச் சூழலைச் சமாளிக்கலாம். ஆனால், வெகுநாள்களுக்கு இப்படிச் சமாளிக்க முடியாது. ஹெச்.ஐ.வி பாதிப்புள்ளவர்களுக்கான அத்தியாவசியங்களில் அதிமுக்கியமானது மருந்து. அதைத் தவிர்க்கவே கூடாது” என்றார்.

. தமிழ்நாடு எய்ட்ஸ் கட்டுப்பாடு நிறுவனத்தின் மருந்து விநியோகத்துக்கான ஒருங்கிணைப்பாளராக இருக்கும் நூரியிடம் இதுகுறித்துக் கேட்டோம். “மருந்து பற்றாக்குறை இல்லை. தமிழகத்தில் ஹெச்.ஐ.வி நோயாளிகளுக்கும் திருநங்கை ஹெச்.ஐ.வி நோயாளிகளுக்கும் தனித்தனியே வாட்ஸப் குழுக்கள் இருக்கின்றன. கொரோனா அவசரகாலத்தில் வாட்ஸப் வழியாக அவர்களின் மருந்து தேவைகளைக் கண்டறிந்து, அவர்கள் கேட்கும் பகுதிகளுக்குச் சென்று கொடுத்து வர ஏற்பாடு செய்யப்பட்டுள்ளது. மருந்து எடுத்துச் செல்பவர்களின் வாகனங்களில் அடையாளம் இடப்பட்டிருக்கும். அதனால் காவல்துறை தடுக்க மாட்டார்கள்” என்கிறார்.

ஆனால், இதுபோன்று வாட்ஸப் குழுக்கள் இருப்பதே தங்களுக்குத் தெரியாது என்று ஒரு பகுதியினரும், குழுக்கள் இயங்கினாலும் மாத்திரைகள் தங்களுக்கு வந்து சேர்வதில்லை என்று மற்றொரு பகுதியினரும் புகார் தெரிவிக்கிறார்கள். தமிழக அரசு வரிசையாக திட்டங்களை அறிவித்தாலும் அவை முறையாகச் சென்றடைகின்றனவா என்பதையும் கண்காணிக்க வேண்டும்.

கொரோனா காலத்தில் ஹெச்.ஐ.வி நோயாளிகளின் நிலை என்ன?

ஐஷ்வர்யாFollow

ஐஷ்வர்யா Follow