தேவேந்திர குல வேளாளர்! - பெயர் மாற்றம்... சட்டத்தின் சாத்தியங்கள் என்ன?

ஒ டுக்கப்பட்ட மக்களின் நலனுக்காக அரசியலில் சாதி பேசப்படாமல், சாதிக்காக அரசியல் பேசப்படும் காலம் இது. சாதியக் கட்டுடைப்பு என்பதை முன்னெடுக்காமல், சாதியப் பாதுகாப்பை முன்னிறுத்தும் அரசியல் சூழ்நிலையே இன்று நிலவுகிறது. ‘ஆதிதிராவிடர் இனப்பிரிவுகளில் உள்ள குடும்பன், பண்ணாடி, காலாடி, கடையன், தேவேந்திர குலத்தான், பள்ளன் ஆகிய ஆறு பிரிவுகளையும் ஒன்றாக இணைத்து தேவேந்திர குல வேளாளர் என்று பெயர் மாற்றம் செய்ய வேண்டும்’ என்ற கோரிக்கை நீண்டகாலமாக முன்வைக்கப்பட்டது. இந்தக் கோரிக்கை குறித்து ஆய்வு செய்து அரசுக்கு அறிக்கை அளிக்க ஊரக வளர்ச்சி மற்றும் ஊராட்சித்துறையின் கூடுதல் தலைமைச் செயலாளர் ஹன்ஸ்ராஜ் வர்மா தலைமையில் நிபுணர் குழு அமைத்திருப்பதாகத் தெரிவித்துள்ளார் தமிழக முதல்வர் எடப்பாடி பழனிச்சாமி. இது சாத்தியமா, அப்படி மாற்றப்பட்டால் எஸ்.சி பிரிவிலிருந்து பி.சி பிரிவுக்கு உடனே மாற்றப்படுவார்களா, இதனைச் சட்டரீதியாகச் செயல்படுத்தும் முறைகள் என்ன, இதனால் இடஒதுக்கீட்டில் மாற்றம் வருமா? என்று பல கேள்விகள் எழுகின்றன.

. இதுகுறித்து நம்மிடம் பேசிய புதிய தமிழகம் கட்சித்தலைவர் கிருஷ்ணசாமி, ‘‘அரசின் நடவடிக்கை வரவேற்கத்தக்கது. எங்கள் கோரிக்கை அரசாணையாகவும் வரவேண்டும். சாதியில்லா தேசத்தைக் கட்டமைப்பதன் முதல்கட்டம்தான் இது. பெயர் மாற்றிவிட்டால், சாதிகளுக்குள் இருக்கும் சண்டைகள் போகும். உயர்வு, தாழ்வு என்பது பட்டியலை வைத்துத்தான் உருவாகும். அதுபோன்ற உயர்வு தாழ்வு வேண்டாம் என்பதே எங்களது நிலைப்பாடு” என்றவரிடம், “இந்த மாற்றத்தைச் சம்பந்தப்பட்ட மக்கள் விரும்புகிறார்களா, அப்பிரிவைச் சேர்ந்த தலைவர்கள் சிலரே இதை எதிர்க்கிறார்களே?’’ என்று கேட்டோம். ‘‘சலுகைக்காகச் சிலர் விரும்பலாம். சலுகையே வேண்டாம் என்று சொல்லும் மக்களே அதிகம். அடையாள மீட்பை விரும்பாத சிலர்தான் எதிர்ப்புத் தெரிவிப்பார்கள்” என்றார்.

இதே கோரிக்கையை வலியுறுத்திவரும் தமிழக மக்கள் முன்னேற்றக் கழகத்தின் ஜான் பாண்டியன், “இது தேர்தல் நேரத்தில் கூட்டணிக்காகப் போடப்படும் ஸ்டண்ட். இதுகுறித்து ஏற்கெனவே பலர் ஆய்வு நடத்தி, அதன் அறிக்கைகளையும் அரசிடம் ஒப்படைத்து இருக்கிறார்கள். அந்த ஆய்வுகள் என்னவாயிற்று, இப்போது ஏன் இந்தத் திடீர் ஆய்வுக்குழு என்பதெல்லாம் முதலமைச்சர் எடப்பாடி பழனிச்சாமிக்கே வெளிச்சம். இதை அவர் கையெழுத்திடும் ஒரு அரசாணை மூலமாகவே நிறைவேற்றலாம். ஆனால், அதை அவர் செய்யத் தயங்குவது வருத்தம் அளிக்கிறது. தமிழக மக்கள் வாழ்வியல் வரலாற்றை அறியாத வடநாட்டு அதிகாரிகள் அடங்கிய குழு, ஆய்வு செய்வது பலன் அளிக்காது. இது வெறும் கண்துடைப்பு’’ என்றார்.

. ஒடுக்கப்பட்ட மக்கள் நலனுக்காகத் தொடர்ந்து குரல்கொடுத்துவரும் பேராசிரியர் அ.மார்க்ஸ், “பெயர் மாற்றம் என்பது, அந்தச் சமூகத்தைச் சார்ந்த பெருவாரியான மக்களின் விருப்பமாகத்தான் இருக்கிறது. ஆனால், எஸ்.சி பிரிவிலிருந்து பி.சி பிரிவுக்கு மாற்றப்படுவதை அந்தச் சமூக மக்கள் விரும்பமாட்டார்கள், அப்படி நடந்தால் பல காலமாக அவர்களுக்கு இழைக்கப்பட்ட அநீதியிலிருந்து மீண்டெழும் வாய்ப்பை அவர்கள் இழப்பார்கள். தென்மாவட்டங்களில் இன்னும் சாதியக் கலவரங்கள் நடக்கின்றன. அங்கு தீண்டாமை ஒழியவில்லை. ஒருவேளை அவர்களைப் பட்டியலினப் பிரிவுகளில் இருந்து நீக்கிவிட்டால், இந்த சாதியக்கொடுமை குறையும் என்ற எதிர்பார்ப்பிலேயே இந்த மாற்றத்துக்குச் சிலர் கோரிக்கைவைக்கிறார்கள். ஆனால், இது ஏற்றுக்கொள்ள முடியாதது. இது சாதிய ஒழிப்புக்கான தீர்வும் கிடையாது” என்றார்.

. இந்தப் பெயர் மாற்றத்துக்கான சட்ட நடைமுறை சாத்தியங்கள் குறித்து, சட்டநிபுணர்கள் சிலரிடம் பேசினோம். “ஆறு பட்டியலினச் சமூகத்தினரை ஒன்றிணைத்து அவர்களுக்கு ஒரு பொதுவான பெயரை வழங்குவதற்குத் தமிழக அரசின் அரசாணை மட்டுமே போதுமானது அல்ல. ஒரு சாதியப் பிரிவினரை பட்டியலினச் சமூகத்திலிருந்து நீக்கி, மிகவும் பிற்படுத்தப்பட்ட பிரிவினராக மாற்றுவது அல்லது சில சாதிய உட்பிரிவினரை ஒன்றுசேர்த்து அவர்களுக்கு ஒரு பொதுவான பெயரை மாற்றுவது இரண்டுக்குமே சட்டமன்றம், நாடாளுமன்றம் ஆகியவற்றில் தீர்மானம் நிறைவேற்றி, ஜனாதிபதியின் ஒப்புதல் பெற வேண்டும். அரசியலமைப்புச் சாசனமே, இந்தியா முழுவதும் உள்ள பட்டியலினச் சாதிகளை வரையறுக்கிறது. சில சாதிய உட்பிரிவுகளை இணைத்துப் புதிய பெயர் அளிப்பதற்கு, அரசியலமைப்புச் சாசனத்தில் திருத்தம் கொண்டு வரவேண்டும். இதற்கான சட்ட நடைமுறைகள் முடிய சில வருடங்களாவது ஆகும்.

அவ்வாறு மாற்றும்பட்சத்தில், அது தொடர்புடைய பிரிவினருக்கான இடஒதுக்கீட்டிலிருந்து அனைத்துச் சமூகப் படிநிலைகளிலும் மாற்றம் வரும். அவர்கள் பட்டியலினச் சமூகத்திலிருந்து நீக்கப்பட்டு, மிகவும் பிற்படுத்தப்பட்ட சமூகத்தினராக மாற்றப்பட்டால் தேசிய எஸ்.சி - எஸ்.டி ஆணையம், வருவாய்த்துறை போன்ற அனைத்து அரசு அங்கங்களிலும் மாற்றம் கொண்டு வரவேண்டும். இது அந்த மக்களுக்கு உகந்ததா என்று அந்த மக்களிடம் கேட்டுத் தீர்மானிக்கும் அவசியமும் இருக்கிறது. இது எளிதில் நிறைவேற்றப்படக்கூடியது அல்ல” என்றார்கள்.

சாதிகளின் பெயர்களை மாற்றலாம்... அது சமூக மாற்றத்துக்கு நிச்சயம் உதவுவதாக இருந்தால்!

– ஜெனிஃபர் ம.ஆ.

தேவேந்திர குல வேளாளர்! - பெயர் மாற்றம்... சட்டத்தின் சாத்தியங்கள் என்ன?

ஜெனிஃபர்.ம.ஆ