ஆகஸ்ட் 1... திறந்திடு சீஸேம்! - எடப்பாடி தயார்... மக்கள் தயாரா?

கொரோனா வைரஸ் பரவலைக் கட்டுப்படுத்தும் பொருட்டு, மார்ச் 24-ம் தேதி மாலை 6 மணிக்கு அமலான ஊரடங்கு, ஜூலை 31-ம் தேதி வரையில் நீட்டிக்கப்பட்டுள்ளது. . இடையில் சில தளர்வுகள், சில கட்டுப்பாடுகள் என ஏற்ற இறக்கத்துடன் தமிழகம் பயணித்தாலும், இன்னும் முழு சுதந்திரக் காற்றைச் சுவாசிக்க முடியவில்லை. எல்லாத் தொழில்களும் இழப்பைச் சந்தித்துள்ளன. முடி திருத்தகத்தில் ஆரம்பித்து கார் தொழிற்சாலை வரை ஊரடங்கின் கெடுபிடியால் வருமானத்தை இழந்து தவிப்பவர்கள் ஏராளம். பேராசிரியர்களாகப் பணிபுரிந்தவர்களையெல்லாம் முறுக்கு சுட்டு விற்கும் நிலைக்கு கொரோனா கொண்டுவந்துவிட்டது.

தொழில் நசுங்கிவிடும்!

தீபாவளியை முன்னிட்டு இந்நேரமெல்லாம் சிவகாசியில் பட்டாசு உற்பத்தி தூள் பறக்கும். ஆர்டர் கொடுக்க ஆளில்லாமல், அந்தத் தொழில் நசிந்து போயுள்ளது. நிலைமை இப்படியே நீடித்தால் அடுத்த வருட காலண்டர், டைரி ஆர்டர் கொடுக்கக்கூட ஆள் இருக்க மாட்டார்கள் என்று பயத்திலிருக்கின்றன சிவகாசி பிரின்ட்டிங் பிரஸ்கள்.

. தமிழ்நாடு வியாபாரிகள் பேரவையின் மாநில துணைப் பொதுச் செயலாளர் கே.எஸ்.எம்.கார்த்திகேயனிடம் பேசினோம். ‘‘இந்த ஊரடங்கால் பொதுமக்களும் வியாபாரிகளும்தான் பெரிதும் பாதிக்கப்பட்டுள்ளனர். கறிக்கடைகளிலும் மீன் கடைகளிலும் கூட்டம் கூடுவதாகக் குற்றம்சாட்டுகிறார்கள். கூட்டம் கூட வைப்பது யார்... அரசாங்கம்தானே? `எல்லா நாள்களிலும் தேவையான பொருள்கள் கிடைக்கும்’ என்ற நம்பிக்கையை மக்களிடம் ஏற்படுத்தி, போதிய சமூக இடைவெளி, முகக்கவசம் உள்ளிட்டவற்றைக் கட்டாயம் பின்பற்றுமாறு அரசு அறிவுறுத்தினால், இந்தப் பதற்றம் ஏன் வரப்போகிறது?

நாமக்கல்லிருந்து கோழி கொண்டுவர அனுமதித்துவிட்டு, ஞாயிற்றுக்கிழமை முழு ஊரடங்கு என்றால், இது என்ன பித்தலாட்டம்? கூட்டுறவு வங்கிகளில் கடன் தரத் தயாராக இருப்பதாக அமைச்சர் செல்லூர் ராஜூ கூறியுள்ளார். இதுவரை எத்தனை பேருக்குக் கொடுத்துள்ளனர்? வெறும் அறிவிப்பு இனிப்புகளை நாக்கில் தடவுவது எந்தப் பலனும் அளிக்காது. பொதுப் போக்குவரத்தை மீண்டும் தொடங்கினால் மட்டுமே நிலைமை சீராகும். மக்கள் இயல்பான வாழ்க்கைக்கு வரத் தயாராகிவிட்டார்கள். அவர்களைப் பாதுகாப்புடன் இருக்க அறிவுறுத்துவதுதான் அரசின் பணி. இனிமேலும் பூட்டிவைத்தால் தொழிலும் மக்களும்தான் நசுங்குவார்கள்’’ என்றார்.

வாடகை நெருக்கடி

‘திருமண வைபவங்களில் ஐம்பது பேருக்கு மேல் கலந்துகொள்ளக் கூடாது’ என்று அரசு கட்டுப்பாடு விதித்திருக்கிறது. இதனால், மிக எளிமையான முறையிலேயே திருமணங்கள், பெரும்பாலும் வீடுகளில் நடத்தப்படுகின்றன. திருமண மண்டபங்களுக்கு அட்வான்ஸ் கொடுத்திருந்தவர்கள் பணத்தை திருப்பிக் கேட்டால், மண்டப நிர்வாகங்கள் தர மறுக்கின்றன. ‘ஒன்று, உங்கள் திருமணத் தேதியை தள்ளிவைத்துக் கொள்ளுங்கள். இல்லையென்றால் புதிய வாடிக்கையாளர்களை நீங்களே அழைத்து வாருங்கள். இரண்டும் முடியாதபட்சத்தில் பணத்தைச் சிறிது சிறிதாகத்தான் திருப்பித் தர முடியும். அதுவும் முழுப் பணத்தையும் தர முடியாது’ என்று முரண்டுபிடிக்கின்றனர்.

. `வாடகைக்குக் குடியிருப்போரிடம் வாடகை கேட்டுத் தொந்தரவு செய்யக் கூடாது’ என்று அரசு கூறியிருந்தது. எத்தனை மாதங்களுக்கு இதை வீட்டு உரிமையாளர்களால் கடைப்பிடிக்க முடியும்? பல குடும்பங்கள் தங்கள் அட்வான்ஸ் பணத்திலிருந்து வாடகையைக் கழிக்க ஆரம்பித்துள்ளனர். ஊரடங்கு தொடர்ச்சியாக நீட்டிக்கப்பட்டால், அவர்கள் தெருவில் நிற்க வேண்டிய சூழலும் உருவாகும்.

ஸ்கூல் ஃபீஸுக்கு என்ன வழி?

சென்னை, மயிலாப்பூரைச் சேர்ந்த இல்லத்தரசி ஜானகிராணி, ‘‘இயல்பாகவே மே, ஜூன், ஜூலை மாதங்களில் ஸ்கூல் ஃபீஸ், புதிய உடைகள், நோட்டுப் புத்தகங்கள் என பிள்ளைகளின் கல்விச் செலவுக்கு என ஒரு சராசரிக் குடும்பம் திக்கித் திணறிவிடும். கொரோனா நேரத்தில் பலருக்கும் சம்பளக் குறைப்பு செய்யப்பட்டுள்ளது. தொழில்கள் முடங்கிப் போயுள்ளன. இந்தச் சூழலில், பள்ளிக் கட்டணத்தை எங்கேயிருந்து எங்களால் செலுத்த முடியும்? இனியும் ஊரடங்கை நீட்டிப்பதால் எந்தப் பலனும் இல்லை. தமிழகத்தில் கொரோனாவால் பாதிக்கப்பட்டோரின் எண்ணிக்கை

1.65 லட்சம். இதில் இறப்பு சதவிகிதம் 1.3 சதவிகிதம்தான். மக்கள் கொரோனாவோடு வாழப் பழகிவிட்டனர். போதிய விழிப்புணர்வு செய்து அரசுதான் இயல்புநிலையை உருவாக்க வேண்டும்’’ என்றார்.

தியேட்டர்களின் நிலை என்ன?

சீனா, கொரியா, யூ.ஏ.இ என கொரோனா பாதிப்புக்குள்ளான பல நாடுகளில் சினிமா தியேட்டர்கள் திறக்கப்பட்டுவிட்டதால், இந்தியாவிலும் தியேட்டர்கள் திறக்கப்படும் என்கிற எதிர்பார்ப்பு அதிகம் இருக்கிறது. ஆனால், மால்கள், திரையரங்குகள் அதிகமுள்ள டெல்லி, மும்பை, சென்னை, பெங்களூரு, ஹைதராபாத் உள்ளிட்ட முக்கிய நகரங்களில் கொரோனாவின் பரவல் இன்னும் தீவிரமாக இருப்பதால் மத்திய அரசு தியேட்டர் திறப்பு குறித்து ஆழ்ந்த யோசனையிலிருக்கிறது.

`மத்திய அரசு அனுமதி கொடுத்துவிட்டால், நிச்சயம் தமிழ்நாட்டிலும் எடப்பாடி அரசு பச்சைக்கொடி காட்டிவிடும்’ என்கிற நம்பிக்கையோடு இருக்கிறார்கள் தமிழ்நாடு திரையரங்க உரிமையாளர்கள். ‘‘பெரிய படங்களைத் தவிர்த்து எல்லாப் படங்களுக்குமே திரையரங்கம் நிறைவதில்லை. வழக்கமாகவே 100, 200 பேர்தான் வருகிறார்கள். அதனால் சமூக இடைவெளியைக் கடைப்பிடிப்பதில் பிரச்னை இருக்காது, கழிவறைகளை மட்டும் சுத்தமாகப் பராமரித்துவிட்டால் போதும்’’ என்கிறார்கள் தியேட்டர்காரர்கள். அதேபோல, `தியேட்டர்களை முதலில் திறந்துவிட்டால் புதுப்படங்கள் தானாக ரிலீஸாக ஆரம்பித்துவிடும்’ என்பது தியேட்டர் அதிபர்களின் கருத்தாக இருக்கிறது.

. சினிமா ஷூட்டிங் சாத்தியமா?

சினிமா படப்பிடிப்பைப் பொறுத்தவரை `சீரியல் ஷூட்டிங்கைப்போலவே 60 பேருடன் இண்டோரில் நடத்தலாம்’ என அரசின் அனுமதி கிடைத்தாலும், ஷூட்டிங்குகளை நடத்த முடியுமா என்பதில் சிக்கல் நிலவுகிறது. ‘‘சின்ன பட்ஜெட்டில் எடுக்கும் படங்களுக்கு எந்தப் பிரச்னையும் இல்லை. நடிகர்கள் வந்துவிடுவார்கள். ஆனால் ரஜினி, கமல், விஜய், அஜித், சூர்யா என முக்கிய நடிகர்கள் பலருமே கொரோனாவுக்கு மருந்து கண்டுபிடித்த பிறகுதான் ஷூட்டிங் நடத்த வேண்டும் என்று சொல்லிவிட்டனர். பிறகு, எப்படி ஷூட்டிங்கைத் தொடங்க முடியும்?’’ என்கிறார்கள் தயாரிப்பாளர்கள்.

டி.வி இண்டஸ்ட்ரியைப் பொறுத்தவரை சீரியல் ஷூட்டிங்குகள் தொடங்கிவிட்டதால், ஆகஸ்ட்டிலிருந்து புது எபிசோடுகள் எல்லா சேனல்களிலும் ஒளிபரப்பாக ஆரம்பித்துவிடும். அதேபோல ரியாலிட்டி ஷோக்களையும், விவாத நிகழ்ச்சிகளையும் குறைந்த பங்கேற்பாளர்கள் மற்றும் பார்வையாளர்களைக் கொண்டு டி.வி சேனல்கள் நடத்தத் தொடங்கிவிட்டன. கமல்ஹாசன் நடத்தும் `பிக் பாஸ்’ நிகழ்ச்சியும் செப்டம்பரில் தொடங்கவிருக்கிறது.

பொதுப் போக்குவரத்து சாத்தியமா?

கொரோனா பரவல் மிகுதியாக இல்லாத மாவட்டங்களில் 50 சதவிகிதம் அளவுக்கு பேருந்துகளை இயக்க அரசு அனுமதித்திருந்தது. இதற்காக, தமிழகம் எட்டு மண்டலங்களாகப் பிரிக்கப்பட்டு, மண்டலத்துக்குள் மட்டும் போக்குவரத்து அனுமதிக்கப்பட்டது. கொரோனா பரவல் மீண்டும் வேகமெடுத்த நிலையில், இந்த அனுமதியை அரசு ரத்து செய்தது. தனியார் ஆம்னி பேருந்துகளைப் பொறுத்தவரையில் சென்னைக்கு வண்டி ஓட்டினால்தான் லாபம். நான்கு மாதங்களாக வாகனம் எடுக்காத நிலையில், அதற்குண்டான கடன் தவணை, வரி போன்றவற்றை மிகச் சிரமத்துக்கு இடையில் பேருந்து உரிமையாளர்கள் செலுத்துகின்றனர். ஏற்கெனவே அதலபாதாளத்திலிருந்த தமிழ்நாடு அரசுப் போக்குவரத்துக் கழகமும் கொரோனாவால் ஏகப்பட்ட நிதி இழப்பைச் சந்தித்துள்ளது. `பாதுகாப்பான பொதுப் போக்குவரத்துக்கு அனுமதித்தால் மட்டுமே இயல்புநிலை திரும்பும்’ என்பது பொதுமக்களின் கருத்தாக இருக்கிறது.

தளர்வுக்கு தயங்கும் அதிகாரிகள்!

`ஊரடங்கை மேலும் தளர்த்த வேண்டும்’ என்று பலதரப்பிலும் அரசுக்குக் கோரிக்கைகள் வைக்கப்பட்டாலும், தளர்வை அனுமதிக்க சுகாதாரத்துறையினர் தரப்பிலிருந்து கிரீன் சிக்னல் கொடுக்கத் தயக்கம் காட்டுகிறார்கள். ‘‘இப்போது சில தளர்வுகள் இருக்கும்போதே முழுமையாக கொரோனாவைக் கட்டுப்பாட்டுக்குள் கொண்டு வர முடியாதபோது முழுத் தளர்வு என்பதை இப்போது அறிவிக்க வேண்டாம். தமிழகத்தில் கிட்டத்தட்ட சமூகப் பரவல் கட்டத்தில் கொரோனா இருக்கிறது” என்று அரசிடம் சொல்லியிருக்கிறார்கள். சென்னையில் ஓரளவு கட்டுப்பாடு வந்துவிட்டாலும், பிற மாவட்டங்களில் கொரோனா எண்ணிக்கை தொடர்ந்து அதிகரித்து வருவதை அதிகாரிகள் சுட்டிக்காட்டியுள்ளனர். `இப்போதுள்ள ஊரடங்கை வரும் ஆகஸ்ட் 15-ம் தேதி வரை நீட்டிக்க வேண்டும்’ என்பது அதிகாரிகளின் கருத்தாக இருக்கிறது. மாவட்டரீதியாக ஒவ்வொரு மாவட்டத்திலும் ஊரடங்கு தளர்வுகள் குறித்து அந்தந்த மாவட்ட நிர்வாகத்தில் முடிவெடுத்துக்கொள்ளவும் முடிவு செய்யப்பட்டுள்ளது.

. என்ன நினைக்கிறார் எடப்பாடி?

ஈரோடு மாவட்டத்தில் பெரும்பாலான மக்கள் நம்பியிருப்பது ஜவுளித் தொழிலையும் விவசாயத் தொழிலையும்தான். ஊரடங்கால் இவை இரண்டுமே முடங்கிப்போயுள்ள சூழலில், ஜூலை 17-ம் தேதி ஈரோடு மாவட்டத்திலுள்ள ஜவுளித்துறை தொழிலதிபர்களுடன் எடப்பாடி பழனிசாமி ஆலோசனை நடத்தினார். அப்போது பேசிய அவர், ‘‘ஏற்கெனவே கடுமையான நிதிச்சுமையில் அரசு இருக்கிறது. நீங்கள் வைத்த கோரிக்கைகளையும் மனதில் ஏற்று, அதற்கேற்ப அரசு நடவடிக்கை எடுக்கும்’’ என்று சொல்லியிருக்கிறார். எடப்பாடியை பொறுத்தவரையில், இனிமேலும் கொரோனாவை காரணம் காட்டித் தொழில்களைக் கட்டுப்படுத்தினால் எல்லோரும் கற்காலத்துக்குச் சென்றுவிட நேரிடும் எனக் கருதுகிறாராம்.

இனிமேலும் மக்களைப் பூட்டி வைக்காமல், ‘‘அரசு எல்லா வகையிலும் உதவி செய்யும். இனி மக்கள்தான் தங்கள் உடல்நலனை காத்துக்கொள்ள வேண்டும்’’ என்று அறிவித்துவிட்டு, தளர்வை பகுதிப் பகுதியாக அறிவிக்கலாம் என்பது எடப்பாடியின் எண்ணமாக இருக்கிறது.

இதற்கு அரசியல் காரணத்தையும் ஆளுங்கட்சியினர் கூறுகிறார்கள். ஆகஸ்ட் மாதத்தில் வரைவு வாக்காளர் பட்டியல் சரிபார்ப்பு பணி தொடங்கப்பெறும். இப்போதுவரை அதற்கான அறிவிப்பு வரவில்லை. இந்தப் பணியில் ஈடுபடக்கூடிய வருவாய்த்துறையினர், ஆசிரியர்கள் கொரோனா தடுப்புப் பணியில் ஈடுபட்டுள்ளனர். வாக்காளர் பட்டியல் சரிபார்ப்பு பணி நடைபெறாவிட்டால், இதையே காரணமாக வைத்து தேர்தலைத் தள்ளிப்போடவும் வாய்ப்பு இருக்கிறது. அந்தச் சூழலை உருவாக்கிவிடக் கூடாது என்று எடப்பாடி நினைக்கிறாராம்.

மேலும், பொதுப்பணித்துறை, நெடுஞ்சாலைத்துறை ஒப்பந்ததாரர்களிடம் பணியாற்றிய பெரும்பாலான வட மாநில தொழிலாளர்கள் சொந்த ஊர் சென்றுவிட்டனர். அவர்களை மீண்டும் தமிழகம் அழைத்து வந்து தொழிலை இயக்க வேண்டுமானால், தமிழகத்தில் தளர்வு ஏற்பட்டால் மட்டுமே சாத்தியம். இதற்காகவும் ஒரு லாபி முதல்வரை நெருக்குகிறது. தமிழக அரசு என்ன முடிவெடுத்தாலும், மத்திய அரசின் கட்டுப்பாட்டுக்கும் கட்டுப்பட்டாக வேண்டும். ஆக, தளர்வைப் படிப்படியாக அமல்படுத்துவது குறித்து மத்திய அரசிடமும் பேச்சுவார்த்தையை ஆரம்பித்திருக்கிறது தமிழக அரசு.

முடங்கியிருக்கும் தமிழகத்தை மீண்டும் இயக்கிட, சில தைரிய முடிவுகளை எடுக்கத் தயாராகிறார் எடப்பாடி. மக்களும் அதற்குப் போதிய ஒத்துழைப்பு அளித்து இயங்கினால் மட்டுமே அது கொரோனாவையும் வென்று பொருளாதாரம் சீரடைய வழிவகுக்கும்!

. *‘‘ஊரடங்கால் கடுமையான இழப்பைச் சந்தித்து வருகிறோம். தற்போது, உணவகங்களைத் திறக்க அனுமதி இருந்தாலும், முன்பிருந்ததில் 10 சதவிகித வியாபாரம் மட்டும்தான் நடக்கிறது. 300 உணவகங்கள் உள்ள ஊட்டியில் 20 உணவகங்கள் மட்டும்தான் செயல்படுகின்றன. `ஆகஸ்ட் 1-ம் தேதிக்கு மேல் தளர்வுகள் அளிக்கப்படும்’ என எதிர்பார்க்கிறோம். ஆனாலும், சுற்றுலாப் பயணிகள் வருகைக்கு அனுமதி கொடுத்தால்தான் இங்கு பல தொழில்கள் நடக்கும்.”

- முகமது ஜாஃபர், தலைவர், நீலகிரி மாவட்ட உணவக உரிமையாளர்கள் சங்கம்

*‘‘தற்போதுள்ள தளர்வுகளுடனான ஊரடங்கு கொரோனாவையும் குறைக்கவில்லை; தொழில் நிறுவனங்களின் முன்னேற்றத்துக்கும் உதவவில்லை. அதனால், ஊரடங்கை முழுமையாக நீக்க வேண்டும்.”

- ஜேம்ஸ், தலைவர், கோவை மாவட்ட தமிழ்நாடு கைத்தொழில் மற்றும் குறுந்தொழில்முனைவோர் சங்கம்

*“நோய்த் தொற்று குறைவாக உள்ள பகுதிகளில் சூழலுக்கு ஏற்றவாறு 144-ஐ தளர்த்தலாம்.”

- பாண்டியன், தலைவர், தஞ்சாவூர் மாவட்ட தமிழ்நாடு வணிகர் சங்க பேரமைப்பு

*“ஊரடங்கால் பெரிய அளவில் வியாபாரிகள் பாதிக்கப்பட்டுள்ளனர். ஹோட்டல்களில் 50 சதவிகித இருக்கைகளில் சாப்பிட அனுமதிக்க வேண்டும்.”

- எஸ்.கண்ணதாசன், தலைவர், தேனி நகர ஹோட்டல்கள் சங்கம்

*“முழு ஊரடங்கை நீட்டிக்காமல், கொஞ்சம் தளர்வு கொடுத்ததுதான் சிக்கலுக்குக் காரணம். கொரோனா முழுமையாகக் குறையும் வரை ஊரடங்கைத் தொடர வேண்டும்.”

- சாமி திராவிட மணி, தலைவர், காரைக்குடி தொழில் வணிகம்

*“கரூர் வர்த்தகர்கள், விரைவில் லாக்டௌனைத் தளர்த்த வேண்டும் என்றுதான் விரும்புகிறார்கள். அதேநேரம் மக்களுக்கும் பாதுகாப்பு கொடுக்க வேண்டும்.”

- வழக்கறிஞர் ராஜூ, தலைவர், கரூர் மாவட்ட அனைத்து வர்த்தகர்கள் சங்கக் கூட்டமைப்பு

*“இனிமேலும் ஊரங்கை நீட்டிக்கத் தேவையில்லை. ஒட்டுமொத்த வணிகர்களும் பாதிக்கப்பட்டுள்ளோம்.”

- செந்தில்வேல், தலைவர், மயிலாடுதுறை வணிகர் நலச்சங்கம்

. ஊரடங்கு தளர்வு குறித்து தலைமைச் செயலாளர் சண்முகத்திடம் பேசினோம். “மக்கள் தரும் ஒத்துழைப்பைப் பொறுத்துத்தான் செயல்படுத்த முடியும். அரசிடம் பல்வேறு தளர்வு கோரிக்கைகளை வைத்திருக்கிறார்கள் மக்கள். மாவட்டங்களுக்குள் பொதுப் போக்குவரத்து கேட்கிறார்கள். பிற மாவட்டங்களுக்குச் செல்லவும் பொதுப் போக்குவரத்து கேட்கிறார்கள். தமிழகம் முழுக்க இ-பாஸ் இல்லாமல் பயணிப்பது பற்றியும் கேட்கிறார்கள். மூன்றும் ஒவ்வொன்றுடன் தொடர்புடையவை. அரசு சொல்லும் விதிமுறைகளைத் தவறாமல் கடைப்பிடித்தால், அனைத்துத் தரப்பினரின் ஆலோசனையைப் பெற்று மக்களுக்குத் தேவையானவற்றை நிச்சயமாக அரசு நிறைவேற்றும். மக்கள் முழு ஒத்துழைப்பு நல்க வேண்டியது மிக மிக அவசியம்” என்றார்.

ஆகஸ்ட் 1... திறந்திடு சீஸேம்! - எடப்பாடி தயார்... மக்கள் தயாரா?

ஜூனியர் விகடன் டீம்

HASSIFKHAN K P M