Published:Updated:

தமிழ்நாட்டை ‘தமிழகம்’ என்பது உள்நோக்கம் கொண்டது!

பழ.நெடுமாறன்
பிரீமியம் ஸ்டோரி
பழ.நெடுமாறன்

பழ.நெடுமாறன் பதிலடி

தமிழ்நாட்டை ‘தமிழகம்’ என்பது உள்நோக்கம் கொண்டது!

பழ.நெடுமாறன் பதிலடி

Published:Updated:
பழ.நெடுமாறன்
பிரீமியம் ஸ்டோரி
பழ.நெடுமாறன்
மத்திய பா.ஜ.க அரசின் ‘ஒரே தேசம்’ அரசியலை விமர்சிக்கும் வகையில், ‘ஒன்றிய அரசு’ என்கிற சொல்லாடலை முன்வைத்து முதல்வர் மு.க.ஸ்டாலின் பற்றவைத்த நெருப்பு, இன்றைக்கு ‘தமிழ்நாடா, தமிழகமா?’ என்ற விறுவிறு விவாதமாகப் பற்றி எரிந்து கொண்டிருக்கிறது. இந்தநிலையில், மூத்த தமிழ்த் தேசியவாதியும், தமிழர் தேசிய முன்னணியின் தலைவருமான பழ.நெடுமாறனிடம் பேசினோம்...

“இந்தியாவை, ‘ஒன்றிய அரசு’ என்று தி.மு.க-வினர் அழைப்பது, ‘இந்திய இறையாண்மையைக் கொச்சைப்படுத்துகிறது’ என்கிறார்களே?’’

“இந்திய அரசியல் சட்டத்தின் பகுதி 1, பிரிவு 1-ல், ‘India, that is Bharat, will be a Union of States’ என்று குறிப்பிடப்பட்டிருக்கிறது. அதாவது, ‘இந்தியா எனும் பாரதம், மாநிலங்களின் ஒன்றியமாக இருக்கும்’ என்று தெளிவாக சொல்லப்பட்டுள்ளது. `பிரிட்டன்’ என்பது நாம் சொல் வழக்கில் பயன்படுத்துகிற பெயர். ஆனால், அதன் சட்டபூர்வமான பெயர் ‘யுனைடட் கிங்டம்.’ அதேபோல், அமெரிக்கா என்ற பெயரை ‘யுனைடட் ஸ்டேட்ஸ் ஆஃப் அமெரிக்கா’ என்றுதான் சொல்ல வேண்டும். இந்த வரிசையில் பல்வேறு மாநிலங்களும் ஒன்றிணைந்ததுதான் இந்தியா. எனவே, ‘இந்திய ஒன்றியம்’ அல்லது ‘ஒன்றிய அரசு’ என்று சொல்வதுதான் அரசியல் சட்டப்படி சரி. இதற்கு மாறாக, நாம் பேச்சுவழக்கில் சொல்லிவருகிற ‘மத்திய அரசு’, ‘தில்லி அரசு’ என்பவையெல்லாம் சரியானதல்ல.’’

“ஆனால், ‘இந்திய தேசம் ஒன்றியம் எனில், தமிழ்நாடு என்ன ஊராட்சியா?’ என்று புதிய தமிழகம் கட்சித் தலைவர் டாக்டர் கிருஷ்ணசாமி கேட்கிறாரே?’’

“சட்டமன்ற உறுப்பினராக இருந்த ஒருவர் இவ்வாறு கேட்பது வியப்புக்குரியது. அரசியல் சட்டத்தில் எந்தச் சொல் பயன்படுத்தப் பட்டிருக்கிறதோ அதைத்தான் சொல்ல வேண்டும். அதைவிடுத்து, ‘தமிழ்நாடு என்ன ஊராட்சியா?’ என்றெல்லாம் கேட்பது தவறு.’’

தமிழ்நாட்டை ‘தமிழகம்’ என்பது உள்நோக்கம் கொண்டது!

“மூத்த பத்திரிகையாளர் மாலனும், ‘தமிழ்நாடு அல்ல, தமிழகம்’ என்றொரு புதிய கருத்தை முன்வைத்திருக்கிறாரே?’’

“மாலன் உள்நோக்கத்துடன் சொல்கிறார். அதாவது, ‘இந்தியா என்பது ஒரு நாடு. அதில் ஒரு பகுதியை மட்டும் தமிழ்நாடு என்று குறிப்பிட்டால், தனி நாடு என்ற எண்ணம் வந்துவிடும்; எனவே, தமிழகம் என்றுதான் சொல்ல வேண்டும்’ என்கிறார். ‘தமிழகம்’ என்றாலே என்ன பொருள்? தமிழ் மொழி பேசுகிற மக்கள் வசிக்கிற நிலப்பகுதி என்பதுதானே. ஆக, தமிழ் மக்கள் வசிக்கிற நிலப்பகுதியை ‘தமிழ்நாடு’ என்று சொல்வதில் தவறு என்ன? திருக்குறளில் ‘நாடு’ என்ற அதிகாரத்தில் வள்ளுவர் இது குறித்து விரிவாகவும் விளக்கமாகவும் கூறியிருக்கிறார். அதைப் படித்தால் இத்தகைய கேள்விகளுக்கே இடம் இருக்காது. எனவே, மாலன் சொல்ல வருவதன் நோக்கம் வேறு. அதாவது, ஆந்திர மாநிலத்துக்கு ஆந்திரப்பிரதேஷ், இந்தி பேசுகிற மாநிலங்களுக்கு உத்தரப்பிரதேஷ், மத்தியப்பிரதேஷ் என்றிருப்பதைப்போல ‘தமிழ் பிரதேஷ்’ என்று கொண்டுவருவதற்கான நோக்கத்தில்தான் இது போன்ற கருத்துகள் சொல்லப்படுகின்றன.

‘இந்தியா’ என்ற பெயரையே ‘இந்துஸ்தான்’ என்று மாற்ற வேண்டும் என்பதுதான் ஆர்.எஸ்.எஸ் அமைப்பின் நோக்கம். 1993-ம் ஆண்டு ஜனவரியில் அந்த அமைப்பின் தலைவராக இருந்த ராசேந்திர சிங், ‘இந்தியா எனப்படும் பாரத் என்பதற்கு பதிலாக, பாரத் எனப்படும் இந்துஸ்தான் என்று குறிப்பிட்டிருக்க வேண்டும்’ என்று திட்டவட்டமாகத் தெளிவுபடுத்தியுள்ளார். இந்துஸ்தான் என்று கூறினால், அது ‘ராஜஸ்தான்’ என்ற பெயரில் எதிரொலிக்கும்தானே... அப்படியென்றால், ராஜஸ்தான் என்ற பெயரையும் மாற்றச் சொல்வார்களா? ஏனெனில், ‘ஸ்தான்’ என்ற பெயர் நாட்டையே குறிக்கிறது. உதாரணமாக பாகிஸ்தான், ஆப்கானிஸ்தான் போன்றவற்றைச் சொல்லலாம்!’’

“சென்னை மாகாணப் பெயர் மாற்றக் கோரிக்கை எழுந்த காலகட்டத்தில், ‘தமிழகம்’ என்ற பெயரும் சிபாரிசு செய்யப்பட்டதா?’’

“ஓரிருவர் கூறியிருக்கலாம். 1956-ல் மொழிவழி மாநிலங்கள் பிரிக்கப்பட்ட பிறகு, ‘சென்னை மாகாணத்துக்கு தமிழ்நாடு எனப் பெயர்மாற்றம் செய்யப்பட வேண்டும்’ என்பது மட்டும்தான் கோரிக்கையாக எழுந்தது. அப்போது, சென்னை மாகாண ஆட்சிப் பொறுப்பில் இருந்த காங்கிரஸ் கட்சி சார்பில் பேசிய அமைச்சர் சி.சுப்பிரமணியம், ‘தமிழில் நாம் ‘தமிழ்நாடு’ என்றும் ஆங்கிலத்தில் ‘சென்னை மாகாணம்’ என்றும் குறிப்பிட்டுக்கொள்ளலாம்’ என்றார். பெயர் மாற்றம் விஷயத்தில், காங்கிரஸ் கட்சி இப்படி பிடிவாதமாக இருந்தது பெரும்தவறு.’’

“1922-லேயே ‘தமிழ்நாடு காங்கிரஸ் கமிட்டி’ என்று தங்கள் கட்சிக்குப் பெயர் வைத்துக்கொண்ட காங்கிரஸ் கட்சி, சென்னை மாகாணப் பெயரை மாற்றுவதில் மட்டும் மறுப்பு தெரிவித்தது ஏன்?’’

‘’1920-ஆம் ஆண்டு நாகபுரியில் கூடிய காங்கிரஸ் மாநாட்டில்தான் ‘சுதந்திர இந்தியா மொழிவழி மாநிலங்களாகப் பிரிக்கப்பட வேண்டும்’ எனத் தீர்மானம் நிறைவேற்றப்பட்டது. அதற்கு முன்னதாக ‘சுதந்திர இந்தியாவில் மொழிவழி மாநிலங்களைப் பிரிப்பதற்கு முன்னோடியாக, நமது காங்கிரஸ் கட்சியை மொழிவழியாக நாமே பிரித்துக்கொள்ளலாம். இதற்கான அதிகாரம் நம் கையில்தானே இருக்கிறது’ என்று காந்தியடிகள் கூறிய அறிவுரையை அனைவரும் ஏற்றுக்கொண்டனர். இதையடுத்தே ‘தமிழ்நாடு காங்கிரஸ் கமிட்டி, ஆந்திர காங்கிரஸ் கமிட்டி’ என்றெல்லாம் பிரிக்கப்பட்டன. இப்படி மொழிவழிப் பிரிப்புக்கு முக்கியத்துவம் கொடுத்த காங்கிரஸ் கட்சி, பின்னாளில் மொழிவழியாகப் பிரிக்கப்பட்டுவிட்ட சென்னை மாகாணத்துக்கு ‘தமிழ்நாடு’ என்று பெயர்சூட்ட மறுத்தது, காங்கிரஸ் கட்சிக்கு அவப்பெயரைத் தேடிக் கொடுத்தது!’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism