Published:Updated:

“சேலத்தில் பழங்குடிகள்... ஈரோட்டில் நாங்கள் யார்?”

“சேலத்தில் பழங்குடிகள்... ஈரோட்டில் நாங்கள் யார்?”
பிரீமியம் ஸ்டோரி
News
“சேலத்தில் பழங்குடிகள்... ஈரோட்டில் நாங்கள் யார்?”

மலையாளிப் பழங்குடிகளின் சோகம்

து அட்மிஷன் சீஸன். ஆனால், ஈரோடு மாவட்ட மலையாளிப் பழங்குடியினப் பிள்ளைகள் ஏக்கத்துடன் வேடிக்கை மட்டுமே பார்க்கின்றனர். மலையாளி பழங்குடிகள்தான், தமிழ்நாட்டில் அதிகளவில் இருக்கும் பழங்குடி சமூகத்தினர். தர்மபுரி, வேலூர், புதுக்கோட்டை, சேலம், நாமக்கல், கடலூர், திருச்சி, கரூர், பெரம்பலூர் ஆகிய பகுதிகளில் இவர்கள் வசிப்பதாக தமிழக அரசின் பழங்குடியினர் பட்டியல் காட்டுகிறது. ஆனால், ஈரோடு மாவட்டம் பர்கூர் மற்றும் கடம்பூர் மலைப் பகுதிகளில் வசிக்கும் சுமார் 30 ஆயிரம் மலையாளிப் பழங்குடி மக்கள், இந்தப் பட்டியலில் இடம்பிடிக்க முடியாமல் தவிக்கின்றனர். பழங்குடி என்ற சான்றிதழ் கிடைக்காததால், கல்லூரியில் சேர்ந்து படிக்க முடியாமலும், அரசு வேலைவாய்ப்புகளை அடைய முடியாமலும் அவர்கள் அவதிப்படுகின்றனர்.

“சேலத்தில் பழங்குடிகள்... ஈரோட்டில் நாங்கள் யார்?”

இதுகுறித்து தமிழ்நாடு பழங்குடி மக்கள் சங்கத்தின் மாநிலப் பொருளாளர் ராமசாமியிடம் பேசினோம். ‘‘அரசிடம் பலமுறை முறையிட்டும் நடவடிக்கையே இல்லை. இந்த 30 ஆயிரம் மலையாளப் பழங்குடியினரை எந்த வகைப்பாட்டுக்குள் அரசு வைத்துள்ளது? மலைப் பகுதிகளில் வாழும் பழங்குடியினரான இந்த மக்களின் முதல் தலைமுறை, இப்போதுதான் கல்வி பயில ஆரம்பித்துள்ளது. மற்றவர்களுடன் போட்டி போட்டு வாழ்வில் உயர்வதற்கு, கல்வியிலும், வேலைவாய்ப்புகளிலும் அரசு வழங்கும் இடஒதுக்கீடு முறையை மட்டுமே நம்பி இந்த மக்கள் உள்ளனர். எனவே, இவர்களுக்கு எஸ்.டி சான்றிதழ் உடனடியாக வழங்கப்பட வேண்டும்” என்றார். 

பவானிசாகர் தொகுதி முன்னாள் எம்.எல்.ஏ-வும், இந்திய கம்யூனிஸ்ட் கட்சியின் மாநிலப் பொதுக்குழு உறுப்பினருமான பி.எல்.சுந்தரம், ‘‘ஈரோட்டில் வசிக்கும் மலையாளிப் பழங்குடி மக்களுக்கும், அருகில் இருக்கும் சேலம், நாமக்கல், தர்மபுரி மாவட்டங்களின் மலையாளிப் பழங்குடி மக்களுக்கும் இடையே கலாசார ஒற்றுமை உள்ளது. திருமணங்கள், சடங்கு முறைகள், திருவிழாக்கள், வணங்கக்கூடிய கடவுள்கள் என அனைத்தும் ஒன்றாக இருப்பதை ஊட்டியில் உள்ள பழங்குடியின ஆராய்ச்சி மையமும், சென்னைப் பல்கலைக்கழக மானுடவியல் துறையும் ஆய்வுசெய்து, ‘ஈரோட்டில் வசிப்பவர்கள் மலையாளிப் பழங்குடிகள்தான்’ என உறுதிசெய்துள்ளது. சேலம் மாவட்டத்தில் மலையாளிப் பழங்குடியினத்தைச் சேர்ந்த ஒருவர் எம்.எல்.ஏ-வாக ஆகியிருக்கிறார். ஆனால், ஈரோட்டில் வசிக்கும் மலையாளிப் பழங்குடிகளால் கல்வியைக்கூட பெறமுடியவில்லை. பள்ளிப் படிப்பை முடித்தவர்கள் பலரும், எஸ்.டி சான்றிதழ் இல்லாததால், கல்லூரிப் படிப்பைத் தொடர முடியாமல் உள்ளனர். இந்த மலைப் பகுதிகளில் வசிக்கும் ஒருவர்கூட அரசு வேலையில் இல்லை. அவர்களுக்கென ஒதுக்கப்பட்ட ஒதுக்கீடுகளும் பயன்படுத்தப்படாமல் கிடக்கின்றன” என்றார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
“சேலத்தில் பழங்குடிகள்... ஈரோட்டில் நாங்கள் யார்?”

இதுகுறித்து ஈரோடு மாவட்ட ஆட்சியர் பிரபாகரிடம் பேசினோம். “கடம்பூர், பர்கூர் மலைப்பகுதிகளில் வசிக்கும் மக்கள், தங்களுக்கு ‘மலையாளிப் பழங்குடி’ எனச் சான்றிதழ் வழங்க வேண்டுமெனக் கேட்டார்கள். அந்தப் பகுதியைச் சேர்ந்த பெரியவர்களில் பலர், தங்களை ‘மலையாளி கவுண்டர்’ என ஆர்.டி.ஓ விசாரணையின்போது கூறினர். அதனால் குழப்பம் ஏற்பட்டது. இதுகுறித்து ஆய்வுசெய்த ஊட்டி பழங்குடியின ஆராய்ச்சி மையம் கொடுத்த ஆய்வு அறிக்கையைப் பெற்று, இரு மாதங்களுக்கு முன்பு அரசுச் செயலருக்கு அனுப்பினோம். அந்தக் கோப்புகளை ஆய்வுசெய்து, விரைவில் சான்றிதழ் கிடைப்பதற்கான வேலைகள் நடைபெற்றுவருகின்றன” என்றார்.

குரலற்ற மக்களை ஆட்சியாளர்கள் வஞ்சிக் கூடாது!

- நவீன் இளங்கோவன்
படங்கள்: ரமேஷ் கந்தசாமி