2K Kids

புதுக்கோட்டை மாவட்டத்தில் உள்ள ஒரு சிறிய கிராமம், எங்கள் ஊர். அப்பாவை பறிகொடுத்த குடும்பம் அது. அம்மா, இரண்டு மகள்கள், ஒரு மகன் என எளிய குடும்பம். மகள் மூளைவளர்ச்சி குன்றிய சிறப்புக் குழந்தை. வேலைக்குச் சென்று குடும்பத்தைக் காப்பாற்றிய அந்த அம்மா, வேலைக்குச் செல்லும்போது தன் பிள்ளைகளை பாட்டி வீட்டில் விட்டுச் செல்வார்.

அந்தச் சிறப்புக் குழந்தைக்கு அவ்வப் போது வலிப்பு ஏற்படும் என்பதால், மாதம் ஒருமுறை மருத்துவரை அணுக வேண்டியிருந்தது. இந்த நிலையில் 13 வயதில் அவள் பருவமடைந்த பின்னர், அந்தக் குழந்தைக்கு அதிக கவனம் தேவைப்பட்டது. இப்படி பல இன்னல்களுக்கு நடுவில் நகர்ந்து வந்த அந்தக் குடும்பத்தை, ஒரு சூறாவளி புரட்டிப் போட்டது.

17 வயதான அந்தச் சிறப்புக் குழந்தைக்கு, அடிக்கடி உடல்நிலை சரியில்லாமல் போனது. மருத்துவமனைக்குச் சென்றபோது, அவள் கர்ப்பமாக இருப்பதாக அதிர்ச்சி செய்தியைச் சொன்னார் மருத்துவர். அந்தக் குடும்பம் உடைந்து போனது. தனக்கு என்ன நடந்தது, ஏன் வீட்டில் அனைவரும் தன்னை திட்டுகிறார்கள், அழுகிறார்கள்... எதுவுமே அந்தச் சிறுமிக்குத் தெரியவில்லை. மீண்டும் மீண்டும் அவளிடம் விசாரிக்கப்பட, குற்றவாளியை அறிந்துகொள்ள முடிந்தது.

அதே கிராமத்தைச் சேர்ந்த 47 வயதான ஒருவர், இந்தச் சிறுமிக்கு திண்பண்டங்களை வாங்கிக்கொடுத்து சிறார் வதை செய்திருக்கிறார். அவரிடம் சென்று விசாரித்தபோது, முற்றிலுமாக மறுத்து விட்டார். போலீஸில் புகார் செய்யப்பட, விசாரணைகள், சட்ட நடவடிக்கைகளைத் தொடர்ந்து கைது செய்யப்பட்டார்.

பொதுவாக, எல்லா பாலியல் வன்கொடுமை சம்பவங்களையும் பற்றி இதுவரைதான் நாம் செய்திகளில் அறிவோம். அதற்குப் பின்னான பாதிக்கப்பட்டவரின் நிலை, குடும்பத்தின் சூழல் பற்றி நாம் அறிய மாட்டோம்.

மாதங்கள் கடந்துவிட்டதால் கருக் கலைப்புக்கான மருத்துவ சாத்தியம் கடந்து போனது. அந்தச் சிறப்புக் குழந்தையின் வயிறு பெரிதாக ஆக, கிராமத்தின் வாயும் பெரிதானது. வயிற்றில் ஒரு குழந்தையை வளர்த்து வந்த தன் குழந்தையைப் பார்த்து, அவள் அம்மா அழாத நாள் இல்லை. பிரசவ நேரம் வந்தது. ஏற்கெனவே, அவளுக்கு வலிப்பு நோய் பிரச்னை இருப்பதால் மருத்துவர்களும் அஞ்சினார்கள். விதி அந்தக் குடும்பத்துக்குக் கொடுத்த ஒரே நிம்மதி... நல்லபடியாக ஒரு பெண் குழந்தை பிறந்தது. ஆனால், வாழ்க்கை இன்னும் துயரமானது.

சம்பந்தப்பட்ட குற்றவாளிக்கு தண்டனை கிடைத்தது. ஆனால், அதைவிட பல மடங்கு தண்டனையை அனுபவிப்பது அந்தப் பெண்ணும் அவள் குடும்பமும்தான். அந்தப் பச்சிளம் குழந்தை, தன் பாட்டி, அம்மாச்சி, பெரியம்மா, மாமா எனத் தன் உறவுகளின் கண்ணீர் பிசுபிசுத்த கரங்களில் தவழ்ந்து வளர்ந்தது. தன் அம்மாவுக்கு நேர்ந்ததும், தான் வந்து சேர்ந்ததும் தாலாட்டில் அதற்குச் சொல்லப்பட்டது. அந்தக் குடும்பத்தைப் பழித்த வார்த்தைகளோ, அதன் மேல் பாவப்பட்ட வார்த்தைகளோ நாள் தவறாமல் அந்த வீட்டில் கொட்டப்பட்டன.

மனவளர்ச்சி குன்றிய பெண்ணின் அக்காவுக்கு, இந்தப் பிரச்னையாலேயே திருமணம் தடைபட்டது. பள்ளி, கடைத்தெரு, உறவுகள் என எங்கு சென்றாலும் விரட்டிக்கொண்டே வந்த வார்த்தைகளால், அவள் தம்பியின் சமூக வாழ்க்கையும் சிக்கலுக்கு உள்ளானது.

அரசாங்கம், அந்தக் குழந்தையை வளர்க்க ஒரு தொகையைக் கொடுத்தது.இப்போது அந்தக் குழந்தைக்கு வயது இரண்டு. அந்தக் குடும்பத்தின் துயரத்துக்கு வயது மூன்று.

இதே புதுக்கோட்டை மாவட்டத்தில், இந்த இரண்டு ஆண்டுகளில் நடந்த இரண்டு பாலியல் வன்கொடுமைகளில், சம்பந்தப்பட்ட இரண்டு பெண்களின் உயிர்களும் பலியாகிவிட்டன.

அந்தக் குடும்பங்களின் கதைகளில் உறைந்திருக்கும் ரணத்தை அறிந்தவர்கள் யார்? அப்படியே அறிந்தாலும் அதைப் புரிந்துகொள்பவர்கள் யார்? அறிந்தவர்களாலும் புரிந்தவர்களாலும்கூட அந்தக் குடும்பங்களுக்கு வெளிச்சம் கிடைக்கச் செய்ய முடியுமா என்ன?