Published:Updated:

உங்கள் ராசிக்கு... நட்பு நன்மை தருமா?

காந்தி முருகேஷ்வர்

உங்கள் ராசிக்கு... நட்பு நன்மை தருமா?

காந்தி முருகேஷ்வர்

Published:Updated:

யார் என்ன உறவு முறை, எந்தவிதத்தில் அந்த உறவு அமைந்தது, சித்தப்பா என்பதா அல்லது மாமன் உறவா என்றுகூட தெரியாத அளவுக்கு குடும்ப உறவுமுறைகள் சுருங்கிவிட்ட காலம் இது. எல்லாவற்றையும் எல்லாரிடமும் பகிர்ந்துகொள்ள முடியாமல் தவிக்கும் நிலை. இப்படியிருக்க உரிமையோடும் நம்பிக்கையோடும் எந்த விஷயத்தையும் பகிர்ந்துகொள்ளும் சொந்தம் நட்பு மட்டும்தான். அந்த நட்பும்கூட எல்லோருக் கும் நல்லபடியாக அமைந்துவிடுவது இல்லை. 

சொந்தங்கள் தராத அன்பு, உதவி, அக்கறை, பாதுகாப்பு ஆகியவற்றை நட்பு பெற்றுத் தருமா, இந்த நட்பால் நன்மை யாருக்கு, தீமை யாருக்கு... இவை எல்லாவற்றுக்குமான பதிலை ஜோதிட அடிப்படையில் அறிவோமா?

நட்பைச் சொல்லும் லாப ஸ்தானம்!

லக்னத்துக்கு 11ம் இடமான லாப ஸ்தானமே, நண்பர்களைக் குறிப்பிடும் ஸ்தானமும் ஆகும். முக்கியத்துவம் வாய்ந்த லாப ஸ்தானம், அதில் உள்ள கிரகங்கள், இந்த ஸ்தானத்துக்கு அதிபதியான கிரகம் நிற்கும் இடங்கள், இந்த கிரகத்துடன் இணையும் மற்ற கிரகங்கள், லாபஸ்தானமான 11ம் இடத்தைப் பார்க்கும் கிரகங்கள் ஆகியவற்றின் நிலையைப் பொறுத்து நண்பர்களைப் பற்றியும், நண்பர்களால் ஏற்படும் நன்மை தீமைகளைப் பற்றியும் தெரிந்துகொள்ளலாம்.

சிலரைப் பார்த்ததும் பிடிக்கும். சிலரை பார்க்கவே வெறுப்பாக இருக்கும். அதற்குக் காரணம் ராசிகளின் ஈர்ப்புத்தன்மையே. ராசி  லக்னத்துக்கு கேந்திரம் (1, 4, 7, 10), திரிகோணம் (1, 5, 9) ஆகியவற்றில் அமைந்திருக்கும் ராசிகளை ஜென்ம ராசியாகக் கொண்ட அன்பர்களிடம் எளிதில் நட்பு ஏற்படும்.

ராசி  லக்னத்துக்கு 3, 6, 8 மற்றும் 12ம் இடங்களுக்கு உரிய ராசியை ஜென்ம ராசியாகவும், லக்னமாகவும் கொண்டவர்களுடன் நட்பு ஏற்படுவதும் நிலைப்பதும் கடினம். அதேபோல், ராசியாதி பதி, லக்னாதிபதிகளுடன் பகை பெற்ற கிரகம் இடம்பெற்றிருக்கும் ராசியை ஜென்மராசியாகவோ, லக்னமாகவோ கொண்ட அன்பர்களுடனும் நட்பு ஏற்பட வாய்ப்பு இல்லை.

உங்கள் ராசிக்கு... நட்பு நன்மை தருமா?

நண்பர்களால் நன்மை யாருக்கு?

திறமை, இனம், மதம், கல்வித் தகுதி, பொருளாதார நிலை போன்றவற்றுக்கு அப்பாற்பட்டது நட்பு. எவரிடமும் வலுக் கட்டாயமாக அன்பைப் பெற முடியாது. பணப் பரிமாற்றமும், சுப காரியங்களின்போது விலையுயர்ந்த பொருட்களை பரிசளிப்பதும் மட்டுமே நல்ல நட்பாகிவிடாது. எந்த எதிர்பார்ப்பும் இல்லாமல், தன்னிடம் பழகிய நபர் எங்கிருந்தாலும் நலமுடன் இருக்க வேண்டும் என்ற எண்ணம் கொள்வதே நல்ல நட்பு!

11ஆம் அதிபதி 2ஆம் இடத்தில் இருந்தால் நண்பர்களால் குடும்பத்துக்கு எல்லாவித நன்மைகளும் ஏற்படும்.

11ஆம் அதிபதி 5ல் இருந்தால், பூர்வ புண்ணியத்தின் காரணமாக நல்ல நண்பர்கள் அமைவார்கள். அந்த நண்பர்களால் ஜாதகரின் குழந்தைகள் நன்மை அடைவார்கள்.

11ஆம் அதிபதி 9ல் இருந்தால், நண்பர்களால் பலவித நன்மைகளையும், அவர்கள் மூலம் பல்வேறு பாக்கியங்களையும்  பெறுவார்கள்.

11ஆம் அதிபதி 11ல் இருந்தால் நண்பர்களால் அதீத லாபம் கிடைக்கும். லக்னத்தில் 11ஆம் அதிபதி இருந்தால், அந்த ஜாதகர் எப்போதும் நண்பர்கள் பட்டாளத்துடனேயே இருப்பார்.

11ஆம் வீட்டில் குரு, சந்திரன், சுக்கிரன், புதன் போன்ற சுபக் கிரகங்கள் இருந்தால், நட்பால் ஆதாயம் உண்டு. 11ஆம் வீட்டில் உச்சம் பெற்ற கிரகங்கள் இருந்தாலும் அதிக நண்பர்களைப் பெற்றிருப்பர். 11ஆம் அதிபதி பரிவர்த்தனை பெற்று பலம் பெறுவதும், சுபக்கிரகப் பார்வை பெறுவதும், நட்பின் மூலம் சிறப்பான யோகத்தைத் தரும்.

11ஆம் அதிபதி 3ல் இருந்தால், ஜாதகரின் நண்பர்களால் அவருடைய உடன்பிறந்தவர்களுக்கு நன்மை ஏற்படும்.

நட்பு தீமை பயக்கும் ஜாதக நிலைகள்...

11ஆம் அதிபதி 6ஆம் இடத்தில் இருந்தால், நண்பர்களும் எதிரிகள் ஆவார்கள். அவர்கள் மூலம் பல்வேறு தொல்லைகளுக்கு ஆளாக நேரிடும். நன்றி மறக்கும் நண்பர்கள், பிரச்னைகளில் சிக்க வைப்பவர்களாக அமைவர்.

11ஆம் அதிபதி 8ல் இருந்தால் நண்பர்களால் நஷ்டமும், உயிருக்கு ஆபத்தும் ஏற்படும்.

11ஆம் அதிபதி 12ல் இருந்தால் நண்பர்களால் வீண் விரயமும் கஷ்டங்களும் ஏற்படும். 11ஆம் இடத்தில் உள்ள கிரகங்கள் நீசம் பெற்றோ, 11ஆம் அதிபதி நீசம் பெற்றோ, பல கிரகங்களின் பார்வையில் இருந்தாலோ நண்பர்களால் மனக்கஷ்டம் தொல்லைகள் அதிகம் ஏற்படும். இத்தகைய அமைப்பு கொண்டவர்களின் நட்பு சிறப்படையாது.

சூரியன், சனி, செவ்வாய், ராகு, கேது ஆகியவை 11ல் இருந் தால் நண்பர்களுக்குத் தீமையான பலன்களே ஏற்படும். இந்த ஜாதகருடன் எவரும் எளிதில் நட்புறவாட மாட்டார்கள்.

கூட்டுத்தொழில் நன்மை தருமா?

நல்ல நண்பர்களாக இருப்பவர்கள் இணைந்து சுயதொழில் செய்ய முயற்சி செய்வார்கள். அதீத லாபம் வரும் நிலையில் நண்பன் தனக்கு உரிய பங்கைத் தராமல் ஏமாற்றுகிறான் என்றோ, தொழில் நலிவடையும்போது நண்பனே காரணம் என்றோ இருவரும் பிரிய நேரிடுவது உண்டு. உயர்வுதாழ்விலும், லாபநஷ்டத்திலும் சரிசமமாகப் பங்கேற்று பரஸ்பரம் நண்பர்கள் தோள்கொடுத்து பக்கபலமாகத் திகழும் அமைப்பு அபூர்வம்தான்.

11ஆம் அதிபதி 4ஆம் இடத்தில் இருந்தால் நண்பர்களோடு சேர்ந்து தொழில் செய்து வெற்றி பெறலாம். 11ஆம் அதிபதி 10ல் இருந்தால் நண்பரால் தொழில் அமைந்து லாபம் சேர்ப்பார்கள். 11ஆம் அதிபதி 4 மற்றும் 10ல் உச்ச பலம் பெற்று, சுபக் கிரகத்தின் பார்வையையும் பெற்றிருந்தால் நண்பர்கள் நட்பில் மட்டுமல்ல, தொழில் கூட்டாளிகளாகவும் வெற்றி பெறுவர்.

11ஆம் அதிபர் 6ல் இருந்தால் நண்பர்கள் தொழில் எதிரியாக உருவெடுப்பார்கள். 11ஆம் அதிபதி 6, 8, 12 ம் அதிபர்களின் இணைவுடன் 10ல் இருந்தால், கூட்டுத் தொழில் வெற்றி பெறாது.

10, 11ஆம் அதிபதிகள் இணைந்து, 6 மற்றும் 8ஆம் இடத்தில் பாவக் கிரகத்தின் பார்வையோ சேர்க்கையோ பெற்றால், தொழிலில் பிரச்னை ஏற்பட்டு, நீதிமன்றம் செல்லநேரிடும். தண்டனை அடையவும் நேரலாம். கூட்டுத் தொழிலால் நஷ்டமே மிஞ்சும்.

ஆகவே, நண்பர்களின் ராசிப் பொருத்தம், 11ம் அதிபதி கிரகத்தின் நிலை. கோசார நிலை, தசாபுக்திகளின் தன்மை ஆகியவற்றை அறிந்து கூட்டுத்தொழிலைத் தொடங்க வேண்டும். முகஸ்துதி பாடும் நண்பர்களைத் தவிர்த்து, தொழில் முன்னேற்றம் பெற அறிவுரைகள் கூறும் நண்பர்களுடன் இணைந்து தொழில் செய்வதே வெற்றிக்கான வழி!