Published:Updated:

ராசி பலன்கள்

ஜூலை 2-ம் தேதி முதல் 15-ம் தேதி வரைஜோதிட ரத்னா கே.பி.வித்யாதரன்

ராசி பலன்கள்

ஜூலை 2-ம் தேதி முதல் 15-ம் தேதி வரைஜோதிட ரத்னா கே.பி.வித்யாதரன்

Published:Updated:

இல்லறம் இனிக்கும்!

மேஷம்: மன்னிக்கும் குணம் கொண்டவர்களே! சூரியனும், புதனும் 3-ம் வீட்டில் வலுவாக அமர்ந்திருப்பதால், தைரியமாக சில முக்கிய முடிவுகள் எடுப்பீர்கள். சொந்த வீடு வாங்கும் யோகம் உண்டு. ராகு உங்கள் ராசிக்கு 6-ம் வீட்டில் வலுவாக அமர்ந்திருப்பதால், வாழ்க்கைத் துணைவர் உங்களை நேசிப்பார். என்றாலும், கண்டகச் சனி தொடர்வதால்... அவ்வப்போது விவாதங்களும் வந்து போகும். ராகுவுடன் உங்கள் ராசிநாதன் செவ்வாய் 14-ம் தேதி வரை நிற்பதால், உடல் உபாதை ஏற்படலாம். வியாபாரத்தில் பழைய சரக்குகளை விற்றுத் தீர்ப்பீர்கள். உத்யோகத்தில் சில சூட்சுமங்களை அறிந்துகொள்வீர்கள்.

ஆன்மிகம் ஆறுதல் தரும்!

ஒட்டுமொத்த விகடனுக்கும் ஒரே ஷார்ட்கட்!

ரிஷபம்: மற்றவர்களுக்கு முன்னுதாரணமாக வாழ்பவர்களே! கேது லாப வீட்டில் அமர்ந்திருப்பதால், புண்ணிய தலங்களுக்குச் சென்று வருவீர்கள். செவ்வாய் ராசிக்கு 5-ம் வீட்டில் நிற்பதுடன் ராகுவும் சேர்ந்திருப்பதால், சகோதர வகையில் பிரச்னைகள் வரும். சூரியன் 2-ல் நிற்பதால், பேச்சால் சச்சரவு ஏற்படலாம். குரு 3-ம் வீட்டில் மறைந்திருப்பதால், காரியத் தடங்கல் ஏற்படும். என்றாலும், சனி உங்கள் ராசிக்கு 6-ம் வீட்டில் நீடிப்பதால், சவால்களை சமாளிக்கும் சக்தி கிடைக்கும். வியாபாரத்தில்  நெளிவு சுளிவுகளைக் கற்றுக்கொள்வீர்கள். உத்யோகத்தில் மற்றவர்களின் சொந்த விஷயங்களில் தலையிட வேண்டாம்.

அறிவுக்கூர்மை அரங்கேறும்!

மிதுனம்: மாற்றி யோசிப்பதில் வல்லவர்களே! சுக்கிரனும், புதனும் சாதகமான நட்சத்திரங்களில் செல்வதால், உங்களின் புத்திசாலித்தனம் வெளிப்படும். வீட்டு உபயோக சாதனங்களைப் புதிதாக வாங்குவீர்கள். உங்கள் ராசிக்குள் சூரியன் நிற்பதால், உடல்நலக் கோளாறு வந்து செல்லும்.  ராகுவும், செவ்வாயும் ராசிக்கு 4-ம் வீட்டில் நிற்பதால்... வீடு, வாகனப் பராமரிப்புச் செலவுகள் அதிகரிக்கும். குரு ராசிக்கு 2-ம் வீட்டில் தொடர்வதால், திடீர் பணவரவு உண்டு. வியாபாரத்தில் எதிர்பார்த்ததைவிட லாபம் கிடைக்கும். உத்யோகத்தில் உயரதிகாரிகள் உங்கள் ஆலோசனையை ஏற்றுக்கொள்வார்கள்.

உள்ளத்தில்  உவகை!

கடகம்: வெளிப்படையாக பேசும் குணமுள்ளவர்களே! ராகுவும், செவ்வாயும் உங்கள் ராசிக்கு 3-ம் வீட்டில் வலுவாக அமர்ந்திருப்பதால், மனோபலம் கூடும். சுக்கிரனும், புதனும் உங்களுக்குச் சாதகமான வீடுகளில் செல்வதால், சுப நிகழ்ச்சிகளில் கலந்துகொண்டு மனம் மகிழ்வீர்கள். ஜென்ம குரு தொடர்வதால், நெருக்கமாக பழகியவர்கள்கூட சில சமயம் உங்களைக் குறை கூறுவார்கள். ராசிக்கு 12-ல் சூரியனும், 4-ம் வீட்டில் சனியும் நிற்பதால், திடீர் பயணங்கள், செலவுகளால் திணறுவீர்கள். வியாபாரத்தில், முன்ஜாக்கிரதை தேவை. உத்யோகத்தில் உங்கள் நிலையைத் தக்கவைக்க போராட வேண்டியிருக்கும்.

வார்த்தைகளை அளந்து பேசுங்கள்!

சிம்மம்: தன்னம்பிக்கை அதிகமுள்ளவர்களே! சனிபகவான் 3-ம் வீட்டில் வலுவாக அமர்ந்திருப்பதால், பணப்புழக்கம் கணிசமாக உயரும். ராசிநாதன் சூரியன் வலுவாக லாப வீட்டில் அமர்ந்திருப்பதால், அரசால் அனுகூலம் உண்டு. வேலை தேடுபவர்களுக்கு, நல்ல நிறுவனத்திலிருந்து அழைப்பு வரும். குருவும், சர்ப்ப கிரகங்களும் உங்களுக்கு சாதகமாக இல்லாததால், கோபத்துடன் பேசி... சொற்குற்றம், பொருள் குற்றத்தில் சிக்கிக்கொள்ளாதீர்கள். வியாபார பாக்கிகளைப் போராடி வசூலிப்பீர்கள். உத்யோகத் தில் வேலைச்சுமை இருந்தாலும், பணிகளை விரைந்து முடிப்பீர்கள்.

ஆபரண யோகம்!

கன்னி: நீதியின் பக்கம் நிற்பவர்களே! சூரியனும், புதனும் 10-ம் வீட்டில் நிற்பதால், உங்களின் ஆளுமைத் திறன் அதிகரிக்கும். வீடு கட்ட வங்கிக் கடனுதவி கிட்டும். புது பொறுப்புகளும், வாய்ப்புகளும் தேடி வரும். குருபகவான் லாப வீட்டில் நிற்பதால், விலை உயர்ந்த ஆபரணம் வாங்குவீர்கள். சுப நிகழ்ச்சிகளை முன்னின்று நடத்துவீர்கள். செவ்வாயும், ராகுவும் ராசிக்குள் நிற்பதால்... பதற்றம், உடல் உபாதை வந்து செல்லும். எதிர்பாராத செலவுகளால் தர்மசங்கடத்தில் மூழ்குவீர்கள். வியாபாரத்தில் தெளிவு பிறக்கும். உத்யோகத்தில் உயரதிகாரி உங்களை மதிப்பார்.

மனப்போராட்டங்கள் குறையும்!

துலாம்: கலை உணர்வு அதிகமுள்ளவர்களே! கேது 6-ம் வீட்டில் வலுவாக நிற்பதால், மனப்போராட்டங்கள் குறையும். கேட்ட இடத்தில் உதவி கிடைக்கும். சுக்கிரனும், புதனும் சாதகமான வீடுகளில் செல்வதால், வாழ்க்கைத் துணைவருக்கு அலைச்சலுடன் ஆதாயமும் உண்டாகும். சூரியன் 9-ம் வீட்டில் நிற்பதால், சேமிப்புகள் கரையும். ராகுவும், செவ்வாயும் ராசிக்கு 12-ல் மறைந்திருப்பதால், சகோதர வகையில் செலவுகள் இருக்கும். தொலைதூரப் பயணங்களைத் தவிர்ப்பது நல்லது. வியாபாரத்தில் போட்டிகளைச் சமாளிப்பீர்கள். உத்யோகத்தில் சக ஊழியர்களைக் குறைக்கூறிக் கொண்டிருக்க வேண்டாம்.

செவ்வாய், ராகுவால் சிறப்பான முன்னேற்றம்!

விருச்சிகம்: 'வாய்மையே வெல்லும்’ என்பதை உணர்ந்தவர்களே! செவ்வாயும், ராகுவும் லாப வீட்டில் நிற்பதால், தாமதமான விஷயங்கள் உடனே முடியும். பிள்ளைகள் படிப்பில் முன்னேறுவார்கள். சுக்கிரனும், புதனும் சாதகமான நட்சத்திரங்களில் செல்வதால்.. நவீன மின்னணு, மின்சார சாதனங்கள் வாங்குவீர்கள். ஏழரைச் சனி நடைபெறுவதால், குடும்ப அந்தரங்க விஷயங்களை மற்றவர்களிடம் பகிர்ந்துகொள்ள வேண்டாம். வியாபாரத்தில் வாடிக்கையாளர்களின் எண்ணிக்கை அதிகரிக்கும். உத்யோகத்தில் அதிகாரிகள் நினைப்பதை முடித்துக்காட்டுவீர்கள்.

சாமர்த்தியம் கைகொடுக்கும்!

தனுசு: தன்மானம் அதிகமுள்ளவர்களே! புதன் சாதகமான நட்சத்திரத்தில் செல்வதால், சவாலான விஷயங்களையும் சாமர்த்தியமாகப் பேசி முடிப்பீர்கள். சூரியன் 7-ல் நிற்பதாலும், 13-ம் தேதி வரை 6-ல் சுக்கிரன் மறைந்திருப்பதாலும், அரசு காரியங்கள் இழுபறியாகும். குரு 8-ல் மறைந்திருப்பதால், தன்னம்பிக்கை குறையும். சொத்து வாங்கும்போது தாய்பத்திரத்தை சரிபார்க்கத் தவறாதீர்கள். சனி சாதகமாக இருப்பதால், அனைத்துப் பிரச்னைகளிலிருந்தும் நூலிழையில் தப்பிப்பீர்கள். வியாபாரத்தில் போராடி லாபம் ஈட்டுவீர்கள். உத்யோகத்தில் உயரதிகாரிகளைப் பகைத்துக்கொள்ள வேண்டாம்.

வருமானம் உயரும்!

மகரம்: மனிதநேயம் அதிகமுள்ளவர்களே! சூரியன் 6-ம் வீட்டில் வலுவாக அமர்ந்திருப்பதால், மறைமுக எதிரிகளை இனங்கண்டறிந்து ஒதுக்குவீர்கள். வருமானம் உயரும். சிலருக்கு வெளிநாடு செல்லும் வாய்ப்பு வரும். 14-ம் தேதி முதல் சுக்கிரன் 6-ல் மறைவதால், உடல்நலக் கோளாறு வந்து செல்லும். புதன் 6-ல் மறைந்திருப்பதால், வீண் செலவுகள் ஏற்படும். 2 மற்றும் 3 ஆகிய தேதிகளில் எதிலும் மிகவும் நிதானித்து செயல்படப் பாருங்கள். வியாபாரத்தில் பாக்கிகள் வசூலாகும். லாபம் பெருகும். உத்யோகத்தில் அதிகாரிகள் உங்களுக்கு முக்கியத்துவம் தருவார்கள்.

மனப்பக்குவம் தேவைப்படும் நேரம்!

கும்பம்: 'பொறுத்தார் பூமி ஆள்வார்’ என்பதை உணர்ந்தவர்களே! முக்கிய கிரகங்கள் உங்களுக்கு சாதகமாக இல்லாததால், நிம்மதியற்ற போக்கு நிலவும். பணப்பற்றாக்குறை ஏற்படும். குரு 6-ல் தொடர்வதால், விலை உயர்ந்த நகைகளைக் கவனமாகக் கையாளுங்கள்.  உங்களின் யோகாதிபதியான சுக்கிரனும், புதனும் சாதகமான வீடுகளில் செல்வதால், இழுபறியாக இருந்த வேலைகளை விரைந்து முடிப்பீர்கள். உறவினர், நண்பர்களிடம் எதிர்பார்த்த உதவிகள் கிடைக்கும். வியாபாரத்தில் கொஞ்சம் இழப்புகளும், ஏமாற்றங்களும் இருக்கும். உத்யோகத்தில் உயரதிகாரிகள் பாரபட்சமாக நடந்துகொள்வார்கள்.  

மதிப்பு... மரியாதை உயரும்!

மீனம்: கற்பனைத் திறன் அதிகமுள்ளவர்களே! சூரியனும், புதனும் சாதகமான வீடுகளில் செல்வதால், உங்கள் ரசனைக்கேற்ப வீடு அமையும். வாகனத்தை சீர்செய்வீர்கள். சுப நிகழ்ச்சிகளில் உங்களுக்கு முதல் மரியாதை கிடைக்கும். வாழ்க்கைத் துணைவர் உங்களின் நிர்வாகத் திறமையை மதிப்பார். சர்ப்ப கிரகங்களின் சஞ்சாரமும், சனியின் போக்கும் சரியில்லாததால்... மற்றவர்களை நம்பி பெரிய முயற்சிகளில் ஈடுபட வேண்டாம். வியாபாரத்தில் தேங்கிக் கிடந்த சரக்குகள் விற்றுத் தீரும். உத்யோகத்தில் கடினமான வேலைகளையும் நீங்கள் எளிதாக முடிப்பீர்கள்.