Published:Updated:

பித்ரு தோஷத்துக்குப் பரிகாரம் என்ன?

பித்ரு தோஷம்
பிரீமியம் ஸ்டோரி
பித்ரு தோஷம்

பித்ரு தோஷம் இருப்பதைப் பல கிரக அமைப்புகளின் மூலமும் தெரிந்துகொள்ளலாம்.

பித்ரு தோஷத்துக்குப் பரிகாரம் என்ன?

பித்ரு தோஷம் இருப்பதைப் பல கிரக அமைப்புகளின் மூலமும் தெரிந்துகொள்ளலாம்.

Published:Updated:
பித்ரு தோஷம்
பிரீமியம் ஸ்டோரி
பித்ரு தோஷம்

? எனக்கு ஜாதகம் கணிக்கவில்லை. பிறந்த தேதி, நேரமும் சரியாகத் தெரியாது. பிறந்ததில் இருந்தே வாழ்க்கை போராட்டமாகவே இருக்கிறது. என் எதிர் காலத்தை கணிப்பது எப்படி?

- எஸ்.ராமகிருஷ்ணன், சென்னை - 24

! ஜாதகம் இல்லாதவர்களின் எதிர்காலம் குறித்து அறிந்துகொள்ள கைரேகையை பார்த்துச் சொல்லலாம். ஆனால், பிரச்னம் பார்த்துச் சொல்வதே மிகவும் சரியாக இருக்கும். பிறந்ததில் இருந்தே வாழ்க்கை போராட்டமாக இருக்கிறது என்று கூறுகிறீர்கள். அதற்கு பூர்வபுண்ணியஸ்தானம் வலுக்குன்றி இருப்பதும்கூட ஒரு காரணமாக இருக்கலாம். அஷ்டமங்கல்ய பிரச்னத்தின் மூலம் உங்கள் பிரச்னைக்கான காரணத்தைத் தெரிந்து கொண்டு, அதற்குரிய பரிகாரம் செய்யவேண்டும். தினசரி ஆத்மார்த்தமாகவும் நம்பிக்கையுடனும் கடவுளை வழிபட்டு வருவது நல்லது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

? பித்ரு தோஷம் எதனால் ஏற்படுகிறது? அதற்குரிய பரிகாரம் என்ன?

- எம்.முகுந்தன், சென்னை - 94

! ஒருவருக்கு பித்ரு தோஷம் ஏற்படுவதற்குப் பல காரணங்கள் இருக்கின்றன. தாய் தந்தைக்கு துக்கத்தைத் தருவது, முன்னோருக்கான சிராத்தம் செய்யாமல் விட்டது, அமாவாசையன்று உரிய நியமங்களைக் கடைப்பிடிக்காமல் இருப்பது போன்ற காரணங்களால் ஒருவருக்கு பித்ரு தோஷம் ஏற்படக்கூடும்.

பித்ரு தோஷம் இருப்பதைப் பல கிரக அமைப்புகளின் மூலமும் தெரிந்துகொள்ளலாம். ஒருவர் ராகுகாலத்தில் பிறந்திருந்தால் அவருக்கு பித்ரு தோஷம் ஏற்படும். அதேபோல், சுபகிரகங்கள் மறைவு ஸ்தானங்களில் அமைந்திருத்தல், சூரியன் பகை நீச்சம் பெற்றிருத்தல் போன்றவையும் பித்ரு தோஷத்தைக் குறிப்பிடும். ஒருவருக்கு பித்ரு தோஷம் இருந்தால், அவருடைய வாழ்க்கை போராட்டமாகவே இருக்கும். திருமணத்தடை, புத்திரபாக்கியம் பெறுவதில் தடை, பொருளாதார ரீதியில் பிற்போக்கான நிலை போன்ற பிரச்னைகள் ஏற்படும். ஜாதகத்தில் பித்ரு தோஷம் இருப்பவர்கள் காசி, கயா, பிரயாகை, ராமேஸ்வரம் போன்ற தலங்களுக்குச் சென்று முன்னோருக்குத் தர்ப்பணம் கொடுக்கவேண்டும். கோயில்களில் விருட்சங்கள் வளர்க்கலாம். தினசரி காகத்துக்கு அன்னம் வைப்பது சிறந்த பரிகாரமாகும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

? என் ஜாதகத்தில் காளசர்ப்ப தோஷம் இருப்பதாகச் சொல்கிறார்கள். காளசர்ப்ப தோஷம் என்றால் என்ன, உரிய பரிகாரங்கள் என்ன?

- ஆர்.ராம்குமார், திருச்சி - 1

! ராகுவுக்கும் கேதுவுக்கும் இடையில் மற்ற கிரகங்கள் அமைந்திருந்தால் காளசர்ப்ப தோஷம் என்று சொல்வது உண்டு. மேஷத்திலிருந்து மீனம் வரையுள்ள ராசிக்கட்டத்தில் முதலில் ராகுவும் கடைசியில் கேதுவும் அமையப் பெற்று இடையில் மற்ற கிரகங்கள் இருந்தால் காளசர்ப்பதோஷம் என்ற அமைப்பு ஏற்படும். மாறாக கேது முதலிலும் ராகு கடைசியிலும் இருந்து இடையில் மற்ற கிரகங்கள் அமைந்திருந்தால், அது காளசர்ப்ப யோகம் என்ற அமைப்பைக் குறிக்கும். காளசர்ப்ப தோஷம் இருந்தால், திருமணம் நடைபெறுவதில் சிக்கல்கள் ஏற்படும். காளஹஸ்தி, திருநாகேஸ்வரம் போன்ற தலங்களுக்குச் சென்று உரிய பரிகாரம் செய்து தோஷநிவர்த்தி பெறலாம்.

? எனக்கு எப்போது திருமணம் நடைபெறும். ஏதேனும் பரிகாரம் செய்ய வேண்டுமா?

- எஸ்.சந்திரசேகரன், மும்பை

! நீங்கள் சிம்ம லக்னத்தில் பிறந்திருக்கிறீர்கள். களத்திரஸ்தானாதிபதி சனி மூன்றிலும், களத்திரகாரகர் சுக்கிரன் எட்டிலும் உச்சம் பெற்றிருக் கின்றனர். ஆனால், அவை மறைவு ஸ்தானங்கள் என்பதால் சில தடைகள் ஏற்படுமே தவிர, தோஷம் எதுவும் இல்லை. எனவே, பரிகாரம் எதுவும் தேவையில்லை. திருமணம் நடைபெறுவதில் தடைகள் ஏற்படுவதற்கு ஒரு வகையில் நீங்களே காரணமாக இருக்கிறீர்கள் என்றும் தெரியவருகிறது. எனவே, திருமணத்தைப் பொறுத்தவரை சில விஷயங்களில் நீங்கள் அனுசரித்துச்செல்வதுதான் நல்லது.

பித்ரு தோஷம்
பித்ரு தோஷம்

? எனக்குக் களத்திர தோஷம் இருப்பதாகச் சொல்கிறார்கள். இதற்கு என்ன பரிகாரம் செய்யவேண்டும்?

- எம்.கிருஷ்ணமூர்த்தி, பெங்களூரு

! தேய்பிறை சந்திரன் பூர்வபுண்ணியஸ்தானத்தில் இருந்து, லக்னம் ஏழு, பன்னிரண்டு ஆகிய வீடுகளில் அசுபகிரகங்கள் இருப்பது, கன்னியில் சூரியனும் 7-ல் சனியும் இருப்பது, மீன லக்னத்துக்கு 4-ல் அசுபரும், 7-ல் குருவும் இருப்பது, சூரியன், சுக்கிரன் இருவரும் 5, 7, 9 ஆகிய வீடுகளில் இருப்பது போன்ற பல கிரக அமைப்புகள் களத்திர தோஷத்தை ஏற்படுத்துகின்றன. உங்கள் ஜாதகத்தில் சூரியனும் சுக்கிரனும் களத்திரஸ்தானத்தில் சேர்க்கை பெற்றிருக்கின்றனர். கோயில்களுக்குச் செப்புப் பாத்திரங்கள் வழங்குவதும், வெள்ளிக்கிழமைகளில் சிறிது பசும்பால் கலந்த தண்ணீரில் நீராடுவதும் நற்பலன் ஏற்படுத்தும்.

- பதில்கள் தொடரும்...

வாசகர்களே... ஜோதிடம் தொடர்பான கேள்விகளுக்குப் பதில் தருகிறார், வித்யாவாரிதி சுப்ரமணிய சாஸ்திரிகள்.

கேள்விகள் அனுப்பவேண்டிய முகவரி: சக்தி ஜோதிடம் கேள்வி-பதில், சக்தி விகடன் 757,அண்ணாசாலை, சென்னை-600 002 Email: sakthi@vikatan.com

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism