Published:Updated:

முகராசி பலன் சொல்லுமா?

முகராசி பலன்
பிரீமியம் ஸ்டோரி
News
முகராசி பலன்

நிலவுபோன்று மிக அழகிய முகத்தைக்கொண்ட பெண் லட்சியவாதியாகத் திகழ்வாள்

? சமீபத்தில் நண்பர் ஒருவரைச் சந்தித்தேன். ஜோதிடத்தில் ஆர்வம் உள்ள அவர், என்னுடைய குணாதிசயங்களைப் பட்டியலிட்டார். அவர் சொன்னதில் பெரும்பாலும் பொருத்தமாக இருந்தன. என் ஜாதகம், கைரேகை என எதையும் பார்க்காமல் எப்படிச் சொல்ல முடிந்தது என்று கேட்டேன். அதற்கு அவர், `உங்களின் முகராசியைக் கவனித்து பலன் சொன்னேன்’ என்றார். முக அமைப்பைக்கொண்டு பலன் சொல்ல முடியுமா?

- கே.எல்.ராமமூர்த்தி, கடலூர்

! முடியும் என்கிறது சாமுத்ரிகா லட்சண சாஸ்திரம். வருண தேவனின் மைந்தர் பிருகு முனிவர். இவர், மனிதவள மேன்மையைக் கருதி தன் தந்தையிடம் இருந்து சாமுத்ரிகா லட்சண சாஸ்திரத்தைக் கேட்டறிந்து, உரிய முறையில் இந்த உலகுக்கும் அளித்தார் என்கின்றன புராணங்கள். மனித அங்க லட்சணத்தை விவரிக்கும் மிக அற்புதமான சாஸ்திர நூல் இது.

நிலவுபோன்று மிக அழகிய முகத்தைக்கொண்ட பெண் லட்சியவாதியாகத் திகழ்வாள், விசாலமான நெற்றி ஞானத்தின் சின்னம், ஆழ்ந்த கண்களைக் கொண்டவர்கள் லட்சுமி கடாட்சம் மிகுந்தவர்களாகத் திகழ்வார்கள், நாக்கில் மச்சத்துடன் திகழும் அன்பர்கள் பெரும் ஞானிகளாகவும், அறிஞர்களாகவும் புகழ் பெறுவார்கள், கைகளில் நக அமைப்பு நீளமாக அமையப் பெற்றவர்கள், நிதானத்துடன் திகழ்வார்கள். இப்படி, முகம் முதல் நகம் வரையிலும் சாமுத்ரிகா அங்க லட்சண சாஸ்திரம் கூறும் விளக்கங்கள், விழிவிரிய வைக்கும்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

நீங்கள் கேட்டுக்கொண்டபடி, குறிப்பிட்ட சில முக அமைப்புக்கான பலன்களையும் அறிவோம்.உருண்டை வடிவ முக அமைப்பு பெற்றிருந்தால், ஆழ்ந்த கடவுள் நம்பிக்கை இருக்கும். பூஜை, விரதங்களில் அதீத ஈடுபாடு இருக்கும். பெண் ணுக்கு இதுபோன்ற முக அமைப்பு இருந்தால், அவள் லட்சியவாதியாகத் திகழ்வாள்.

முகராசி பலன்
முகராசி பலன்

சதுர வடிவ முகம் எனில், வீரம் உள்ளவர்களாகத் திகழ்வார்கள். எந்த விதமான பிரச்னைகளையும் உடல் வலிமையைக் கொண்டு தீர்க்க முற்படுவார்கள். இசைத் துறையில் புகழ் பெற வாய்ப்பு கிடைக்கும்.

நீள் சதுர முகம் எனில், அடக்கமும் அமைதியும் நிறைந்தவர்களாகத் திகழ்வார்கள். எனினும் செயல்களில் வேகம் இருக்காது. எந்த விஷயத்தையும் பலமுறை யோசித்துக் கையாள்வார்கள்.

முக்கோண வடிவ முக அமைப்பு பெற்றிருந்தால், மிகவும் தந்திரசாலியாக இருப்பார்கள். அனுபவ அறிவு மிகுந்தவர்களாகத் திகழ்வார்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

? ஜாதகப்படி எனக்கு நிலையான வேலை எப்போது அமையும்? திருமண யோகம் எப்படி?

- வி.சுந்தர், காரைக்கால்

! நீங்கள் மீன லக்னத்தில் பிறந்திருக்கிறீர்கள். லக்னத்துக்கு 10-ல் சூரியன், செவ்வாய், சுக்கிரன், புதன் ஆகியோர் உள்ளனர். 10-ம் காரகர் சூரியன் 10-ல் இருந்தால் அரசாங்க உத்தியோகம் கிடைப்பதற்கு வாய்ப்பு பிரகாசமாக உள்ளது. 10-ல் சூரியன் இருப்பது அனுகூல யோகமாகும். மேலும், தனஸ்தானாதிபதி செவ்வாய் 10-ல் இருப்பதும் மேலும் யோகங்களைத் தரும்.

தற்போது, உங்களுக்குக் குரு தசையில் புதன் புக்தி நடைபெறுவதாலும், குரு 8-ல் மறைந்திருப்பதாலும் சில தடைகள் ஏற்படுகின்றன. குரு தசையின் முதல் எட்டு வருடங்களில் கஷ்டங்கள் ஏற்பட்டாலும், பிற்பகுதி நன்றாகவே இருக்கும். தற்போது குரு பகவானுக்கு உரிய பரிகார ஹோமம் செய்வதன் மூலம், வேலை கிடைப்பதில் ஏற்படக்கூடிய தடைகள் நீங்கும். திருமணத்தைப் பொறுத்தவரை 7-ம் பாவ காரகரும் 7-ம் பாவ அதிபதியும் 10-ம் வீட்டில் இருப்பதால், திருமணம் நல்லபடி நடைபெறுவதில் தடைகள் எதுவும் இல்லை. அதற்கான முயற்சிகளில் ஈடுபடலாம்.

? என் ஜாதகப்படி எனக்குத் தனயோகம் எப்படி உள்ளது, பார்க்கும் வேலையில் உயர்வு உண்டா?

- எம்.குமாரவேலு, களக்காடு

! லக்னத்துக்கு 10-ம் வீட்டுக்கு உரியவரான செவ்வாய் 3-ல் இருந்தாலும், அவர் 10-ம் வீடாகிய தன் வீட்டைப் பார்க்கிறார். ஆகவே, நீங்கள் எத்தகைய வேலையையும் எளிதில் முடிக்கும் வலிமை பெற்றவர்களாக இருப்பீர்கள். எனினும், தற்போது சனி தசை நடைபெற்று வருவதால், எந்த விஷயத்திலும் சற்று மந்தமான போக்கு தென்படும். செல்வந்த நிலைக்குக் காரகராகிய வியாழன் 5-ல் இருந்துகொண்டு, 7-ம் பார்வையாக 11-ம் வீட்டைப் பார்க்கிறார். எனவே, செல்வந்த யோகம் அமைந்துள்ளது. இந்த ஆண்டுக்குள் பதவி உயர்வு, ஊதிய உயர்வு கிடைப்பதற்கான வாய்ப்பு உள்ளது.

நீங்கள் வெள்ளிக்கிழமைதோறும் மகாலட்சுமி தேவியை நன்றாகப் பிரார்த்தித்துக்கொண்டு வெள்ளைப் பூக்களால் அந்தத் தேவிக்கு அலங்காரம் செய்து, மாதுளைக்கனி நைவேத்தியம் செய்து, லட்சுமி அஷ்டோத்திர சத நாமாவளிகளால் அர்ச்சனை செய்து வழிபடவும்.

- பதில்கள் தொடரும்...

வாசகர்களே... ஜோதிடம் தொடர்பான கேள்விகளுக்குப் பதில் தருகிறார்,

வித்யாவாரிதி சுப்ரமணிய சாஸ்திரிகள். கேள்விகள் அனுப்பவேண்டிய முகவரி:

சக்தி ஜோதிடம் கேள்வி-பதில், சக்தி விகடன்,

757, அண்ணாசாலை, சென்னை-600 002 Email: sakthi@vikatan.com