வாக்கு சாதுர்யத்தால் வாதங்களில் வெல்லும் நீங்கள், வந்த சண்டையைவிட மாட்டீர்கள். இதுவரை உங்களின் ராசிக்கு சுகவீடான 4-ம் வீட்டில் அமர்ந்து வீண் விரயத்தையும், ஏமாற்றங்களையும், இனம்புரியாத பயத்தையும், தாயாருடன் பகைமையையும் ஏற்படுத்திய குருபகவான், தற்போது 14.4.22 முதல் 22.4.23 வரை ராசிக்கு 5-ம் வீட்டில் அமர்கிறார். ஆகவே, உங்களைப் புதிய பாதையில் பயணிக்க வைப்பார். வாழ்வில் எதிர்பாராத அதிரடி மாற்றங்கள் உண்டாகும்.

அடிப்படை வசதி, வாய்ப்புகள் உயரும். தயக்கம், தடுமாற்றம் நீங்கும். குழப்பங்களிலிருந்து விடுபட்டு தெளிவாக சில முக்கிய முடிவுகளை எடுப்பீர்கள். கல்யாணம், கச்சேரி என்று வீடு களைகட்டும். குடும்பத்தில் கலகமூட்டியவர்களை இனம் கண்டறிந்து ஒதுக்கித் தள்ளுவீர்கள். வீண் சந்தேகத்தாலும், சச்சரவு களாலும் பேசாமல் இருந்த கணவன்-மனைவிக்குள் இனி அந்நியோன்யம் பிறக்கும். மகளின் திருமணத்தைக் கோலாகலமாக நடத்துவீர்கள். மகனுக்கு நல்ல இடத்தில் மணப்பெண் அமையும். அவருக்கு அயல்நாடு செல்லும் வாய்ப்பு வரும். குழந்தை இல்லாதவர்களுக்குக் குழந்தைப் பாக்கியம் உண்டாகும். பூர்வீகச் சொத்துப் பங்கு கைக்கு வரும். தாயாருக்கு இருந்த நோய் விலகும். அவருடனான மோதல்களும் நீங்கும். தாய்வழி உறவினர்கள் உங்களைப் புரிந்துகொள்வார்கள்.

வீடு, வாகனப் பராமரிப்புச் செலவுகள் குறையும். `வாடகை கொடுத்தே சம்பளம் மொத்தமும் அழிகிறதே’ என்று அவ்வப்போது ஆதங்கப்பட்டுக் கொண்டிருந்தீர்களே... இனி, சொந்தமாக இடம் வாங்கும் யோகம் உண்டாகும். சிலர் பழுதாகிக் கிடந்த வாகனத்தை மாற்றி புதுசு வாங்குவீர்கள். பிள்ளைகளின் பிடிவாதம் குணம் தளரும். உங்கள் அறிவுரையை இனி ஏற்றுக்கொள்வார்கள். குலதெய்வக் கோயிலுக்குச் செய்ய வேண்டிய நேர்த்திக்கடனை நிறைவேற்று வீர்கள். சிலருக்கு, பெரிய நோய் இருப்பது போன்ற பிரம்மை விலகும். வேலைக்கு விண்ணப்பித்துக் காத்திருந்தவர்களுக்கு நல்ல நிறுவனத்திலிருந்து அழைப்பு வரும். மனைவிவழி உறவினர்கள் மதிப்பார்கள்.

நீண்டகாலமாக தள்ளிப் போய்க்கொண்டிருந்த வழக்கில் தீர்ப்பு உங்களுக்குச் சாதகமாகும். அதிக வட்டிக்கு வாங்கிய கடனை கொஞ்சம், கொஞ்சமாக தந்து முடிப்பீர்கள். நட்பு வட்டத்தால் பலன் அடைவீர்கள். கடந்த காலத்தில் ஏற்பட்ட இழப்புகள், ஏமாற்றங்கள், அறியாமல் செய்த தவறுகளெல்லாம் மீண்டும் நிகழ்ந்துவிடக்கூடாது என்பதில் உறுதியாக இருப்பீர்கள். எப்போதும் உங்களை க் குறை கூறிக்கொண்டிருந்த உறவுகள் இனி உங்களைப் புரிந்துகொள்வார்கள்.

குருபகவானின் நட்சத்திர சஞ்சாரம்...

14.4.22 முதல் 29.4.22 வரையிலும் உங்களின் தன பூர்வப் புண்யாதிபதியான குரு, தனது நட்சத்திரத்திரமான பூரட்டாதியில் 4-ம் பாதத்தில் செல்வதால், சிலருக்குக் குழந்தை பாக்கியம் கிடைக்கும். எதிர்பார்த்த பணம் கைக்கு வரும். தள்ளிப்போன திருமணம் கூடி வரும். வீடு, மனை வாங்குவீர்கள். பேச்சில் இருந்த தடுமாற்றம் நீங்கும். ஷேர் மூலம் பணம் வரும். புண்ணிய ஸ்தலங்களுக்குச் சென்று நேர்த்திக்கடனை முடிப்பீர்கள். அரசுக் காரியங்கள் விரைந்து முடியும்.

30.4.22 முதல் 24.2.23 வரையிலும் தைரிய சுகாதிபதியான சனிபகவானின் உத்திரட்டாதி நட்சத்திரத்தில் குருபகவான் செல்வதால் பழுதான வாகனத்தை மாற்றி புதுசு வாங்குவீர்கள். வீடு கட்ட வங்கிக் கடன் கிடைக்கும். இளைய சகோதர வகையில் இருந்த மனத்தாங்கல் நீங்கும். பழைய கடனில் ஒரு பகுதியை பைசல் செய்ய வழி கிடைக்கும். திடீர்ப் பயணங்கள் அதிகரிக்கும். ஆலயத்தைப் புதுப்பிக்க உதவுவீர்கள். 8.8.22 முதல் 16.11.22 வரை உத்திரட்டாதி நட்சத்திரத்திலேயே குருபகவான் வக்ரத்தில் செல்வதால், வேலைச்சுமையும் அதனால் பதற்றமும் அதிகரிக்கும். அதேநேரம் எதிர்பாராத சில காரியங்கள் எளிதில் முடிவடையும். வீட்டுப் பராமரிப்புப் பணிகள் அதிகரிக்கும். தாயாருக்கு மூட்டு வலி, எலும்புத் தேய்மானம் வரக்கூடும்.

24.2.23 முதல் 22.4.23 வரை குருபகவான் உங்கள் அஷ்டம லாபாதிபதியான புதனின் ரேவதி நட்சத்திரத்தில் செல்வதால், கொஞ்சம் அலைச்சல் இருக்கும். யாருக்கும் ஜாமீன் கையெழுத்திட வேண்டாம். ஒரு சொத்தைக் காப்பாற்ற மற்றொரு சொத்தை விற்க வேண்டி வரும். மூத்த சகோதரர் உதவுவார். தூக்கம் குறையும். அயல்நாட்டுப் பயணம் அமையும்.

வியாபாரத்தில் போட்டியாளர்களுக்கு மத்தியில் ஈடுகொடுக்க முடியாமல் திணறினீர்களே... இனி, உங்களின் அணுகுமுறையை மாற்றி அவர்களுக் கெல்லாம் பதிலடி கொடுப்பீர்கள். வருமானம் உயரும். வெகுநாட்களுக்குப் பிறகு பழைய வாடிக்கையாளர்கள் தேடி வருவார்கள். அடிக்கடி விடுப்பில் சென்ற வேலையாட்கள் இனி பொறுப்பாக நடந்துகொள்வார்கள். அரிசி, எண்ணெய், மருந்து, ரசாயன வகைகள், ஏற்றுமதி-இறக்குமதி வகைகளால் லாபம் அடைவீர்கள். கூட்டுத் தொழிலில், பங்குதாரர்களுடனான கருத்து வேறுபாடுகள் மறையும்.

உத்தியோகத்தில் உங்களைக் குறை சொல்லிக்கொண்டிருந்த உயரதிகாரி வலிய வந்து பேசுவார். வேலைச்சுமை குறையும். சக ஊழியர்களுடன் இருந்து வந்த பனிப்போர் நீங்கும். உங்களைவிட தகுதி குறைந்தவர்களுக்கு எல்லாம் பதவி உயர்வு கிடைத்து, நீங்கள் மனம் வாடினீர்களே... இனி அந்த நிலை மாறும். நீங்கள் எதிர்பார்த்தபடி பதவி உயர்வு வாய்க்கும்.

மொத்தத்தில் இந்தக் குருப்பெயர்ச்சி ஏமாற்றங்களில் இருந்து உங்களை விடுபட வைப்பதுடன், நினைத்ததை நிறைவேற்றும் வல்லமையைத் தருவதாக அமையும்.