குருப்பெயர்ச்சி பலன்கள்

நி கழும் விகாரி வருடம், ஐப்பசி மாதம் 11-ம் தேதி திங்கட்கிழமை, (விடிந்தால் செவ்வாய்) 28/29.10.2019 சுக்ல பட்சம் பிரதமை திதி, கீழ்நோக்குள்ள விசாகம் நட்சத்திரம், அதிகாலை 3.40 மணிக்கு பூர்ண சுபகிரகமான வியாழன் எனும் குரு பகவான் ஸ்திர வீடான விருச்சிகத்திலிருந்து தன் சொந்த வீடான தனுசில் சென்று அமர்கிறார்.

. மேஷம் சமூக அவலங்களைத் தட்டிக்கேட்க தயங்காத நீங்கள், நாட்டுப்பற்றும் மொழிப்பற்றும் மிக்கவர்கள். கடந்த ஓராண்டுக் காலமாக உங்கள் ராசிக்கு 8-ம் வீட்டில் அமர்ந்து நிம்மதியற்ற நிலையைத் தந்த குரு பகவான், 29.10.2019 முதல் 13.11.2020 வரை 9-ம் வீட்டில் நுழைகிறார். உங்களின் பாக்யாதிபதியும் விரையாதிபதியுமாகிய குரு பகவான் 9-ம் வீட்டில் நுழைவதால் உங்கள் வாழ்க்கையில் பல திருப்பங்களும் யோகங்களும் அடுத்தடுத்து நடக்கும். பிரிந்திருந்த கணவன் மனைவி ஒன்று சேருவார்கள். குடும்பத்தில் கலகலப்பான சூழல் உருவாகும். குழந்தை பாக்கியம் சிலருக்குக் கிடைக்கும். வருமானம், வசதி, வாய்ப்புகள் கூடும். வேலைக்கு விண்ணப்பித்தவர்களுக்கு நல்ல நிறுவனத்திலிருந்து அழைப்பு வரும். வியாபாரத்தில் அதிரடி லாபம் உண்டு. புதிய பங்குதாரரைச் சேர்ப்பீர்கள். புது வாடிக்கையாளர்கள் அறிமுகமாவார்கள். உத்தியோகத்தில் இழந்த செல்வாக்கை மீண்டும் பெறுவீர்கள். அதிக சம்பளத்துடன் புது வேலையும் கிடைக்கும்.

இந்த குரு மாற்றம், வாடியிருந்த உங்களின் வாழ்வில் வசந்தத்தை உண்டாக்குவதாக இருக்கும்.

. ரிஷபம் யதார்த்தமான பேச்சால் எல்லோரையும் ஈர்க்கும் உங்களின் ராசிக்கு 7-ம் வீட்டில் அமர்ந்து ஓரளவு நிம்மதியைத்தந்த குரு பகவான், 29.10.2019 முதல் 13.11.2020 வரை 8-ம் வீட்டுக்குள் நுழைகிறார். குரு 8-ம் வீட்டில் அமர்ந்தாலும் முக்கியமான வீடுகளைப் பார்ப்பதால் மகிழ்ச்சி உண்டாகும். தள்ளிப்போன அயல்நாட்டுப் பயணம் கூடி வரும். செலவுகள் ஒருபக்கம் இருந்துகொண்டேயிருக்கும். ஆனாலும், அவற்றையெல்லாம் சமாளிக்கும் சக்தியும் கிடைக்கும். தங்க ஆபரணங்களை இரவல் தரவோ, வாங்கவோ வேண்டாம். வீடு, மனை வாங்க வங்கிக் கடனுதவி கிடைக்கும். புது வீட்டில் குடிபுகுவீர்கள். புண்ணிய தலங்களுக்குச் சென்றுவருவீர்கள். மகளுக்கு நல்ல வரன் அமையும். வியாபாரத்தில் கடந்த வருடத்தில் ஏற்பட்ட தவறுகள் நிகழாமல் பார்த்துக்கொள்வீர்கள். லாபம் அதிகரிக்கும். உத்தியோகத்தில் அதிக நேரம் உழைக்க வேண்டி வரும். மூத்த அதிகாரியின் ஆதரவு கிடைக்கும்.

இந்த குரு மாற்றம் வேலைச்சுமையைத் தந்தாலும் வெற்றியையும் தருவதாக அமையும்.

. மிதுனம் ‘வாய்மையே வெல்லும்’ என்பதை உணர்ந்த நீங்கள், கடந்த ஓராண்டுக் காலமாக உங்களின் ராசிக்கு 6-ம் வீட்டில் அமர்ந்து உங்களைப் பலவிதங்களிலும் சங்கடப்படுத்திய குரு பகவான், 29.10.2019 முதல் 13.11.2020 வரை 7-ம் வீட்டில் அமர்கிறார். தன் வீட்டில் ஆட்சி பெற்று அமர்ந்து உங்களுடைய ராசியைப் பார்ப்பதால் உங்களின் முகத்தில் இனி மகிழ்ச்சி ரேகைகள் மலரத் தொடங்கும். பிரிந்திருந்த கணவன் மனைவி ஒன்று சேருவீர்கள். அடுத்தடுத்த சுப நிகழ்ச்சிகளால் வீடு களைகட்டும். உங்களை எதிர்த்த உறவினர்களெல்லாம் வலியவந்து பேசுவார்கள். வருமானம் உயரும். வசதிகள் கூடும். வீடு, மனை வாங்குவீர்கள். வாகனத்தை மாற்றுவீர்கள். குழந்தை பாக்கியம் சிலருக்குக் கிடைக்கும். உங்களின் புகழ், கௌரவம் உயரும். ஷேர் மூலம் பணம் வரும். புதிதாக டி.வி, ஃபிரிட்ஜ் வாங்குவீர்கள். வியாபாரத்தில் இரட்டிப்பு லாபம் கிடைக்கும். மக்கள் நடமாட்டம் அதிகமுள்ள இடத்துக்குக் கடையை மாற்றுவீர்கள். உத்தியோகத்தில் பதவி உயர்வு, சம்பள உயர்வு கிடைக்கும்.

இந்த குரு மாற்றம் நீங்கள் தொட்டதையெல்லாம் துலங்கவைப்பதுடன் பணவரவைத் தருவதாகவும் அமையும்.

. கடகம் கற்பனை வானில் சிறகடித்துப் பறக்கும் உங்களின் ராசிக்கு 5-ம் வீட்டில் அமர்ந்து ஓரளவு நிம்மதியையும் மகிழ்ச்சியையும் கொடுத்த குரு பகவான், 29.10.2019 முதல் 13.11.2020 வரை 6-ம் வீட்டில் சென்று மறைகிறார். ஆரோக்கியத்தில் அக்கறை காட்டுவது நல்லது. முடிந்தவரை மற்றவர்கள் விவகாரத்தில் தலையிடாமல் இருங்கள். செலவுகள் கட்டுக்கடங்காமல் இருக்கும். ஆனால், பணம் பல வழிகளில் வரும். மாமனார், மாமியார், நாத்தனார் வகையிலும் விட்டுக்கொடுத்துப் போவது நல்லது. பிள்ளைகளின் திறமையைக் கண்டறிந்து அதற்கேற்ப அவர்களை ஊக்கப்படுத்துங்கள். புண்ணிய தலங்களுக்குச் சென்றுவருவீர்கள். மனை வாங்குவது, வீடு கட்டுவதற்கெல்லாம் வங்கிக் கடனுதவி கிடைக்கும். வியாபாரத்தில் கடுமையான போட்டிகள் நிலவும். வேலையாட்களும் உங்களைப் புரிந்துகொள்ள மாட்டார்கள். புதிய முதலீடுகளைத் தவிர்ப்பது நல்லது. உத்தியோகத்தில் உங்கள் உழைப்புக்கேற்ற ஊதியம் கிடைக்காது.

இந்த குரு மாற்றம், சகிப்புத் தன்மையாலும் சாதுர்யமான பேச்சாலும் ஓரளவு முன்னேற வைக்கும்.

. சிம்மம் தலைமைப் பண்பும் ஆளுமையும் மிக்க உங்களின் ராசிக்குக் கடந்த ஓராண்டுக் காலமாக 4-ம் வீட்டில் அமர்ந்து உங்களைப் பலவழிகளிலும் கஷ்டப்படுத்திய குரு பகவான், 29.10.2019 முதல் 13.11.2020 வரை 5-ம் வீட்டில் ஆட்சிபெற்று அமர்வதால் இனி விஸ்வரூபம் எடுப்பீர்கள். தொட்ட காரியங்கள் துலங்கும். தடைகளும் தடுமாற்றங்களும் நீங்கும். பிரிந்திருந்த கணவன் மனைவி ஒன்று சேருவீர்கள். கணவர் உங்களுக்கு முக்கியத்துவம் தருவார். உங்கள் ரசனைக்கேற்ப புது வீடு அமையும். குழந்தை பாக்கியம் சிலருக்குக் கிடைக்கும். மகளுக்குத் திருமணம் சிறப்பாக முடியும். மகனுக்கு நல்ல வேலை கிடைக்கும். இளமை கூடும். வழக்கு சாதகமாகும். புது முதலீடு செய்து தொழில் தொடங்குவீர்கள். வியாபாரத்தில் அதிரடியாக லாபம் கிடைக்கும். புகழ்பெற்ற நிறுவனத்துடன் ஒப்பந்தம் செய்வீர்கள். பங்குதாரரை மாற்றுவீர்கள். உத்தியோகத்தில் மறுக்கப்பட்ட உரிமைகள் கிடைக்கும். அதிகாரிகள் உங்களுக்கு முன்னுரிமை தருவார்கள். எதிர்பார்த்த சலுகைகளும் பதவி உயர்வும் கிடைக்கும்.

இந்த குரு மாற்றம் எதிர்பாராத திடீர் யோகங்களையும் செல்வச் செழிப்பையும் அள்ளித் தரும்.

. கன்னி பழைமையிலும் புதுமையை விரும்பும் உங்களின் ராசிக்கு 3-ம் வீட்டில் அமர்ந்துகொண்டு உங்களைப் பலவிதங்களிலும் முடக்கிப்போட்ட குரு பகவான், 29.10.2019 முதல் 13.11.2020 வரை உங்களின் ராசிக்கு 4-ம் இடத்தில் அமர்கிறார். உங்கள் சுக, சப்தமாதிபதியான குரு 4-ம் வீட்டில் அமர்வதால் கடந்த ஓராண்டைவிட இனி நல்லது நடக்கும். உங்களின் பலத்தைப் புரிந்துகொள்வீர்கள். பிள்ளைகளின் உயர்கல்வி, திருமண விஷயங்களில் அலைச்சல் அதிகமாக இருக்கும். பூர்வீகச் சொத்துப் பிரச்னையில் உங்கள் நேரத்தை வீணடிக்க வேண்டாம். வெளிநாடு செல்ல விசா கிடைக்கும். பங்குச் சந்தை மூலம் பணம் வரும். வேலைக்கு விண்ணப்பித்திருந்தவர்களுக்கு நல்ல வேலை கிடைக்கும். குரு 12-ம் வீட்டைப் பார்ப்பதால் புகழ்பெற்ற புண்ணிய தலங்களுக்குச் சென்று வருவீர்கள். வியாபாரத்தில் நெளிவு சுளிவுகளைக் கற்றுக்கொள்வீர்கள். பழைய பாக்கிகள் வசூலாகும். மருந்து, உணவு, ஸ்டேஷனரி வகைகளால் ஆதாயமடைவீர்கள். உத்தியோகத்தில் வேலைச்சுமை அதிகமாகும்.

இந்த குரு மாற்றம் வேலைச்சுமை, பணப்பற்றாக்குறையைத் தந்தாலும் ஓரளவு உங்கள் எதிர்பார்ப்புகளையும் நிறைவேற்றுவதாக அமையும்.

. துலாம் பிறர் உழைப்பில் வாழ விரும்பாத உங்கள் ராசிக்கு 2-ம் வீட்டில் அமர்ந்து ஓரளவு செல்வாக்கையும் செல்வச் செழிப்பையும் தந்த குரு பகவான், 29.10.2019 முதல் 13.11.2020 வரை ராசிக்கு 3-ம் வீட்டில் மறைகிறார். 3-ம் இடத்து குரு முடக்கிவிடுவாரோ என்றெல்லாம் கவலைப்பட வேண்டாம். குடும்பத்தில் மகிழ்ச்சி உண்டாகும். பணவரவு தொடரும். விலையுயர்ந்த ஆடை, ஆபரணங்கள் வாங்குவீர்கள். வெளிநாடு செல்ல விசா கிடைக்கும். ரசனைக்கேற்ப வீடு அமையும். கணவருக்கு நல்ல இடத்தில் வேலை கிடைக்கும். கணவன் மனைவிக்குள் அந்நியோன்யம் அதிகரிக்கும். மறைந்து கிடந்த திறமைகளை வெளிப்படுத்த நல்ல வாய்ப்புகள் கிடைக்கும். எதையும் திட்டமிட்டு செய்வது நல்லது. 3-ம் இடத்தில் அமரும் இந்த குருவால் திட்டமிடாத விஷயங்களில் அலைச்சல் ஏற்படும். வீண் வாக்குவாதங்களைத் தவிர்ப்பது நல்லது. கணவர் உங்களின் பெருந்தன்மையைப் புரிந்துகொள்வார். வியாபாரத்தில் புதிய வாடிக்கையாளர்கள் வருவார்கள். பங்குதாரர்களை மாற்றுவீர்கள். அனுபவமிக்க வேலையாட்களைப் பணியில் சேர்ப்பீர்கள். உத்தியோகத்தில் அலைச்சலும் வேலைச்சுமையும் இருந்தாலும் செல்வாக்கு கூடும். அதிகாரிகள் உங்களை நம்பி முக்கிய பொறுப்புகளை ஒப்படைப்பார்கள்.

இந்த குரு மாற்றம் அலைச்சலையும் செலவினங்களையும் தந்தாலும் வெற்றிப் பாதையில் பயணிக்க உதவும்.

. விருச்சிகம் எல்லோரையும் நெறிப்படுத்தும் உங்களுக்கு, கடந்த ஓராண்டுக் காலமாக உங்களுடைய ராசிக்குள்ளே அமர்ந்து பலவித பிரச்னைகளால் கசக்கிப் பிழிந்தெடுத்த குரு பகவான், 29.10.2019 முதல் 13.11.2020 வரை 2-ம் வீட்டில் நுழைக்கிறார். இனி சோர்வு, களைப்பு நீங்கும். அழகு, ஆரோக்கியம் கூடும். கடன் பிரச்னையிலிருந்து கொஞ்சம் கொஞ்சமாக மீள்வீர்கள். பணப்புழக்கம் அதிகரிக்கும். கணவன் மனைவியின் பிரிவு நீங்கும். குழந்தை பாக்கியம் சிலருக்குக் கிடைக்கும். மகளுக்கு நல்ல வரன் அமையும். வீடு, மனை வாங்க வங்கிக் கடனுதவி கிடைக்கும். வேலையில்லாமல் தவித்தவர்களுக்கு நல்ல வேலை கிடைக்கும். குரு 6-ம் வீட்டைப் பார்ப்பதால் வழக்குகள் சாதகமாகும். எதிர்பாராத வி.ஐ.பிக்களின் சந்திப்பு நிகழும். அயல்நாடு செல்வீர்கள். உறவினர்கள், நண்பர்களின் பாராமுகம் நீங்கும். சமூக அந்தஸ்து கூடும். வியாபாரம் தழைக்கும். வரவு உயரும். உத்தியோகத்தில் நெருக்கடி தந்த அதிகாரி மாறுவார். பதவி உயர்வு, சம்பள உயர்வெல்லாம் இனி தடையில்லாமல் வந்து சேரும்.

இந்த குரு மாற்றம், பதுங்கிக்கிடந்த உங்களைப் பிரபலப்படுத்துவதாகவும் வசதி வாய்ப்புகளைத் தருவதாகவும் அமையும்.

. தனுசு போராட்ட குணம்கொண்ட உங்களின் ராசிக்கு விரயஸ்தானத்தில் அமர்ந்து பலவிதங்களிலும் நிம்மதியற்ற போக்கைத் தந்த குரு பகவான், 29.10.2019 முதல் 13.11.2020 வரை உங்கள் ராசிக்குள் நுழைகிறார். ஜன்ம குரு என்பதால் உங்கள் ஆரோக்கியத்தில் அக்கறை காட்டுவது நல்லது. உங்களின் ராசிநாதன் சுகாதிபதியாகிய குரு பகவான் உங்களின் ராசிக்குள் ஆட்சிபெற்று அமர்வதால் கெடுபலன்கள் குறையும். வி.ஐ.பிக்கள் அறிமுகமாவார்கள். அரசியல் செல்வாக்கு கூடும். பிள்ளைகளால் மகிழ்ச்சி உண்டாகும். குழந்தை பாக்கியம் சிலருக்குக் கிடைக்கும். மகளுக்கும் மகனுக்கும் நல்ல வாழ்க்கை அமையும். கணவர் உங்களைப் புரிந்துகொள்வார். மன இறுக்கங்கள் விலகும். விலையுயர்ந்த ஆபரணங்கள் வாங்குவீர்கள். குரு, ஜன்ம குருவாக இருப்பதால் பணப்பற்றாக்குறை அவ்வப்போது ஏற்படும். வியாபாரத்தில் கடந்த ஆண்டைவிட இந்த ஆண்டில் லாபம் அதிகரிக்கும். பாக்கிகளும் வசூலாகும். உத்தியோகத்தில் சிலர் உங்கள்மீது வீண்பழி சுமத்துவார்கள். ஆனால், சூழ்ச்சிகளைத் தாண்டி அலுவலகத்தில் மதிப்பு கூடும். பதவி உயர்வும் உண்டு.

இந்த குரு மாற்றம், சற்றே நிம்மதியற்ற போக்கைத் தந்தாலும் ஓரளவு வளர்ச்சியையும் தருவதாக அமையும்.

. மகரம் ஒழுக்கம் உயர்வானது என்பதை உணர்ந்த உங்களின் லாப வீட்டில் அமர்ந்து பணவரவையும், செல்வாக்கையும், குடும்பத்தில் மகிழ்ச்சியையும், நிம்மதியையும் அள்ளிக்கொடுத்த குரு பகவான், 29.10.2019 முதல் 13.11.2020 வரை ராசிக்கு 12-ம் வீட்டில் நுழைக்கிறார். 12-ம் வீட்டில் குரு நுழைவதால் பயணங்கள் அதிகமாகும். செலவினங்களும் கூடிக்கொண்டே போகும். திட்டமிட்ட காரியங்கள் தள்ளிப்போய் முடியும். அடிக்கடி உணர்ச்சிவசப்படுவீர்கள். முன்கோபத்தைக் கட்டுப்படுத்துவது நல்லது. கணவரை சந்தேகக்கண்கொண்டு பார்க்க வேண்டாம். உறவினர்களால் தவிர்க்கமுடியாத செலவுகள் அதிகரிக்கும். நெருங்கிய உறவினர், தோழிகளின் சுப நிகழ்ச்சிகளை முன்னின்று நடத்துவீர்கள். குரு, 4-ம் வீட்டைப் பார்ப்பதால் புதிய வாகனம் வாங்குவீர்கள். சிலர் புது வீட்டில் குடி புகுவார்கள். புகழ்பெற்ற புண்ணிய தலங்களுக்குச் சென்று வருவீர்கள். வியாபாரத்தில் லாபம் குறையாது. ஆனால், வேலைச்சுமை அதிகமாகும். ஏற்றுமதி இறக்குமதி வகைகளால் ஆதாயமடைவீர்கள். உத்தியோகத்தில் சக ஊழியர்களின் ஒத்துழைப்பு குறையும். மூத்த அதிகாரிகள் உங்களின் கடின உழைப்பைப் புரிந்துகொள்வார்கள்.

இந்த குரு மாற்றம் செலவுகளையும் பயணங்களையும் தந்தாலும் மனநிறைவையும் தரக்கூடியதாக இருக்கும்.

. கும்பம் எல்லோரிடமும் ஆத்மார்த்தமாகப் பழகும் உங்களின் ராசிக்கு 10-ம் வீட்டில் அமர்ந்து உங்களுக்குப் பலவிதங்களிலும் அவமானங்களையும் தோல்விகளையும் கொடுத்த குரு பகவான், 29.10.2019 முதல் 13.11.2020 வரை லாப வீட்டில் நுழைகிறார். ஆழ்மனத்தில் இருந்த தாழ்வுமனப்பான்மை நீங்கும். பிரிந்திருந்த கணவன் மனைவி ஒன்று சேருவார்கள். குடும்பத்தில் நிம்மதி உண்டாகும். குழந்தை பாக்கியம் சிலருக்குக் கிடைக்கும். நெடுநாள் ஆசையான வீடு, மனை வாங்குவது, வீடு கட்டுவது போன்ற முயற்சிகளும் பலிதமாகும். புது வேலைக்கு முயற்சி செய்தவர்களுக்கு நல்ல பதில் வரும். அயல்நாட்டில் வேலை கிடைக்கவும் வாய்ப்பிருக்கிறது. சகோதரர்கள் ஆதரவாக இருப்பார்கள். எதிர்பார்த்த தொகை கைக்கு வரும். புதிய தொழில் தொடங்குவீர்கள். புது டிசைனில் நகை வாங்குவீர்கள். இளைய சகோதரருக்குத் திருமணம் முடியும். சொத்துப் பிரச்னை தீரும். வியாபாரத்தில் இழந்த செல்வாக்கையும் லாபத்தையும் பெறுவீர்கள். வாடிக்கையாளர்களின் எண்ணிக்கையும் அதிகமாகும். உத்தியோகத்தில் கடந்த ஓராண்டுக் காலமாக இருந்த நெருக்கடிகள் நீங்கி பதவி உயர்வு, சம்பள உயர்வு கிடைக்கும்.

இந்த குரு மாற்றம், ஒதுங்கி ஒடுங்கியிருந்த உங்களை வெளிச்சத்துக்குக் கொண்டுவருவதாக அமையும்.

. மீனம் எதிர்நீச்சல் போட்டு எதையும் சாதிக்கும் உங்களுக்கு, கடந்த ஓராண்டுக் காலமாக உங்களுடைய ராசிக்கு 9-ம் இடத்திலே அமர்ந்து பணவரவைத் தந்துகொண்டிருந்த குரு பகவான், 29.10.2019 முதல் 13.11.2020 வரை உங்களின் ராசிக்கு 10-ம் வீட்டுக்குள் நுழைகிறார். 10-ம் இடம் பதவியைக் கெடுக்குமே, அந்தஸ்தைக் குறைக்குமே என்றெல்லாம் கவலைப்பட வேண்டாம். குரு ஆட்சிபெற்று அமர்வதால் ஓரளவு நல்ல பலன்கள் உண்டாகும். 10-ம் வீட்டில் குரு அமர்வதால் வேலைச்சுமை அதிகமாகும். மற்றவர்களுக்கு ஜாமீன் கொடுக்க வேண்டாம். முக்கியமான விஷயங்களை நீங்களே நேரடியாகச் சென்று முடிப்பது நல்லது. கணவன் மனைவிக்குள் வீண் வாக்குவாதங்களைத் தவிர்ப்பது நல்லது. பிள்ளைகளின் கல்வி, திருமணத்துக்காக அதிகம் அலைய வேண்டி வரும். குருவின் பார்வை உங்களுடைய ராசிக்கு 2-ம் வீட்டின் மீது விழுவதால் பணவரவு குறையாது. வியாபாரத்தில் பெரிதாக முதலீடு செய்ய வேண்டாம். பழைய பாக்கிகளைப் போராடி வசூலிக்கவேண்டி வரும். பங்குதாரருடன் மோதல் வரும். உத்தியோகத்தில் அவமானங்களும், நெருக்கடிகளும், விரும்பத்தகாத இடமாற்றங்களும் இருக்கும். அதிகாரிகளை அனுசரித்துப்போவது நல்லது.

இந்த குரு மாற்றம், நீங்கள் சகிப்புத்தன்மையுடன் செயல்பட்டால் ஓரளவு நன்மையைத் தருவதாக அமையும்.

குருப்பெயர்ச்சி பலன்கள்

கே.பி.வித்யாதரன்