Published:Updated:

பிள்ளை வரம் தருவார் ராஜேந்திர பிள்ளையார்!

Vikatan Correspondent

கணபதியே சரணம்!

பிள்ளை வரம் தருவார் ராஜேந்திர பிள்ளையார்!
பிள்ளை வரம் தருவார் ராஜேந்திர பிள்ளையார்!

ராஜேந்திரசோழன், சிவனாருக்கும் அவரின் மைந்தன் முருகப்பெருமானுக்கும் கோயில் கட்டும் பணியில் ஈடுபட்டார். அப்போது அந்தப் பணியில் அடிக்கடி இடையூறுகள் ஏற்பட்ட வண்ணம் இருந்தன. விநாயகப் பெருமானை துதிக்காமல், கோயில் வேலையில் இறங்கியது தவறு என வருந்திய மன்னன், வராக நதிக்கரையில் விநாயகருக்கு கோயில் கட்டி வழிபட்டான் என்கிறது ஸ்தல வரலாறு. இவருக்கு ராஜேந்திர விநாயகர் என்றே திருநாமம் அமைந்தது என்கின்றனர் பக்தர்கள். தேனி மாவட்டம் பெரியகுளத்தில் உள்ளது இந்த ஆலயம்.  

அதுமட்டுமா? ராஜேந்திர சோழனுக்கு அத்தனை பேரும் புகழும் இருந்தும் குழந்தை பாக்கியம் மட்டும் இல்லாமல் இருந்தது. ஒருமுறை, 'நீ பிரதிஷ்டை செய்த விநாயகரை வழிபடு. பிள்ளை வரம் நிச்சயம்’ என அசரீரி கேட்க, மறுநாள், அதன்படியே வேண்டினார் மன்னர். பிள்ளை பாக்கியமும் கிடைக்கப் பெற்றார். எனவே இந்தப் பிள்ளையாருக்கு, குழந்தை வரம் தரும் விநாயகர் எனும் திருநாமமும் அமைந்ததாகச் சொல்வர்.

பிள்ளை வரம் தருவார் ராஜேந்திர பிள்ளையார்!

மாதந்தோறும் சதுர்த்தியில், இவருக்கு அருகம்புல் மாலை சார்த்தி, கொழுக்கட்டை அல்லது கரும்பு அல்லது பழங்கள் சமர்ப்பித்து வழிபட்டால், திருமணத் தடைகள் அகலும். பிள்ளைச் செல்வம் கிடைக்கும். இந்த வழியே பயணிப்பவர்கள், பிள்ளையாருக்கு சிதறுகாய் உடைத்து வேண்டிச் சென்றால், வழித்துணைக்கு பிள்ளையார் வருவார் என்பது ஐதீகம்!

கிழக்குப் பார்த்தபடி அருள்கிறார் ஸ்ரீராஜேந்திர விநாயகர். நாக கன்னியர், நவக்கிரகங்கள் சந்நிதியும் இங்கு உண்டு. சனி கிரகத்தின் பாதிப்புக்கு ஆளானோர், சங்கடஹர சதுர்த்தி நாளிலும் விநாயக சதுர்த்தி வைபவத்தின் போதும் இங்கு வந்து வேண்டிக் கொண்டால், சங்கடங்கள் யாவும் அகலும். சந்தோஷம் பிறக்கும் எனப் பூரிப்புடன் சொல்கிறார்கள் பக்தர்கள்!  

- ம.மாரிமுத்து  

படங்கள்: வீ.சக்தி அருணகிரி