Published:Updated:

கடவுள் எடுத்த புகைப்படம்!

கடவுள் எடுத்த புகைப்படம்!
பிரீமியம் ஸ்டோரி
News
கடவுள் எடுத்த புகைப்படம்!

கடவுள் எடுத்த புகைப்படம்!

`இறை வழிபாடு நல்லது’ - எத்தனையோ ஆன்மிகப் பெரியவர்கள் இதைத் திரும்பத் திரும்ப வலியுறுத்திச் சொன்னதற்குக் காரணம் இருக்கிறது. பக்தி ஒரு நம்பிக்கையை நமக்குள் விதைக்கும்; எப்பேர்ப்பட்ட இடர் வந்தாலும்  `உதவ இறைவன் இருக்கும்போது கவலை எதற்கு?’ என்கிற துணிச்சலைக் கொடுக்கும். இந்த யதார்த்தத்தை உணர்த்தும் கதை ஒன்று உண்டு.

அமெரிக்காவின் தெற்கு கரோலினாவிலிருக்கும் சிறிய ஊர் அது. அந்த ஊரில் ஒரு சிறுமி இருந்தாள். வீட்டிலிருந்து சற்றுத் தொலைவிலிருந்தது பள்ளிக் கூடம். அம்மாவிடமும் அப்பாவிடமும் கார் இருந்தது. ஆனாலும் அந்தக் குட்டிப் பெண்ணுக்கு நடந்தே பள்ளிக்குப் போய் வருவதுதான் பிடித்திருந்தது. அவளின் பெற்றோரும் அவள் விருப்பத்துக்குத் தடையேதும் சொல்லவில்லை.

கடவுள் எடுத்த புகைப்படம்!

ஒரு நாள் அந்தச் சிறுமி, அம்மாவுக்கு அன்பு முத்தம் ஒன்றைக் கொடுத்துவிட்டு பள்ளிக்குக் கிளம்பினாள். அன்றைக்குக் காலையிலேயே மழை மேகங்கள் சூழ்ந்திருந்தன. அம்மா, எவ்வளவோ சொல்லியும் கேட்காமல், ஒரு குடையை துணைக்கு எடுத்துக்கொண்டு அவள் நடந்தே பள்ளிக்குச் சென்றாள். அன்று மதியத்துக்கு மேல் தூறல் ஆரம்பித்தது. சற்று நேரத்திலேயே மழை பிடித்துக்கொண்டது. இடியும் மின்னலும் பெரியவர் களையே பயமுறுத்தும் அளவுக்கு இருந்தன.

 நேரமாக ஆக  கலங்கிப் போனார் அம்மா. பள்ளி விடும் நேரமும் நெருங்கியிருந்தது. வானத்தில் தொடர்ந்து மின்னல் வெட்டிக் கொண்டிருந்தது. அம்மாவுக்கு, மகள் புயலில் மாட்டிக்கொண்டுவிடுவாளோ என்கிற பயம். தன் காரில் ஏறினார். பள்ளியிலிருந்து மகள் வரும் பாதையை நோக்கி காரைச் செலுத்தினார். பாதி தூரத்தைத் தாண்டிய பிறகு, அவருடைய மகள் தனியாக நடந்து வருவது தெரிந்தது. அந்தச் சூழலிலும் அம்மாவுக்கு மகளின் செயலில் ஏதோ ஒரு வித்தியாசமும் தெரிந்தது.

 ஒரு கையில் குடை, மற்றொரு கையில் லஞ்ச் பேக். முதுகில் பாடப்புத்தகப் பை... அந்தச் சிறுமி யாரையும், எதைப் பற்றியும் கவலைப்படவில்லை. அவள் முகத்தில் பயம் துளிக்கூட இல்லை. ஒவ்வொரு முறை மின்னலடிக்கும்போதும் அவள் நின்றாள்; வானத்தைப் பார்த்துச் சிரித்தாள். மின்னலை அவள் எதிர்பார்த்துக் காத்திருந்து, அதற்கு சிரிப்பு சிக்னலை அனுப்பிக்கொண்டிருந்தாள்.

அம்மா காரிலிருந்து இறங்கி ஓடிச் சென்று மகளை வாரி அணைத்து காரில் ஏற்றிக்கொண்டார். காரைச் செலுத்தியபடியே அம்மா கேட்டார்...  ``கண்ணு, மின்னல் அடிச்சப்போ வானத்தைப் பார்த்து சிரிச்சியே ஏன்... உனக்கு பயமா இல்லியா?’’

``நான் ஏம்மா பயப்படணும். கடவுள் என்னை போட்டோ எடுத்துக்கிட்டு இருந்தாரு... ஒவ்வொரு தடவை ஃப்ளாஷ் அடிக்கும்போதும் நான் சிரிச்ச முகமா போட்டோவுக்கு போஸ் குடுத்துக்கிட்டு இருந்தேன்...’’

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

-  பாலு சத்யா

ஓவியம்: பிள்ளை

ஒரு துளி சிந்தனை:

`நீங்கள் நம்பித்தான் ஆக வேண்டும்.இல்லையென்றால், ஒன்றும் நடக்கவே நடக்காது.’ - ஆங்கில எழுத்தாளர் நெய்ல் கெய்மேன்.