Published:Updated:

‘வாரித் தந்த வள்ளலார்’

‘வாரித் தந்த வள்ளலார்’

பிரீமியம் ஸ்டோரி

வாரியார் ஸ்வாமிகளுக்கு, வள்ளலார் மீது உள்ள பக்தியை அளவிடவே முடியாது. அந்த பக்தியின் காரணமாக 1941 முதல் 1950 வரை ஒன்பது ஆண்டுகள் படாதபாடுபட்டு வடலூரில் சத்திய ஞான சபைத் திருப்பணியைச் செய்தார் வாரியார் ஸ்வாமிகள். அப்போது அவர் அனுபவித்த துயரங்கள் கணக்கில் அடங்காதவை. வள்ளலாரின் அருந்துணையோடு வாரியார் ஸ்வாமிகள் அவ்வளவு துயரங்களில் இருந்தும் கரையேறினார். அவ்வளவையும் அவர் பதிவு செய்தும் வைத்திருக்கிறார். அவற்றில் ஒன்றை வாரியார் ஸ்வாமிகள் வாக்கிலேயே கண்டு மகிழ்வோம்.

‘வாரித் தந்த வள்ளலார்’

‘‘வடலூர் திருப்பணி நடந்து வரும்போது ஒரு மாதம் ஆட்களுக்குச் சம்பளம் கொடுக்கப் பணமின்றி நான் அணிந்திருந்த அணிகலன்களை அடகு வைத்து 3500 ரூபாய் கடன் வாங்கிக் கொடுத்தேன். ‘கடவுள் நம்மை அணிகலனை அடகு வைக்குமாறு செய்து விட்டாரே!’ என்று எண்ணி உள்ளம் உலைந்தேன். ஒரு நாள் வடலூரில் வழிபாடு செய்து கொண்டிருந்தேன். அங்கு ஒரு தம்பதி வந்து வழிபாட்டில் கலந்து கொண்டார்கள். அருகிலிருந்தவர்கள், ‘இவர் தெம்மூர் ராஜமாணிக்கம் பிள்ளை. தனமும் மனமும் படைத்தவர்.’ என்று கூறினார்கள். நான் அவர்களைப் பார்த்து, ‘தெம்மூரில் ஒரு விரிவுரைக்கு ஏற்பாடு செய்யுங்கள்’ என்று கூறினேன். அவர்கள் அன்புடன் அதற்கு இசைந்தார்கள். அதுபடியே ஒருநாள் தெம்மூருக்கு விரிவுரை செய்யப் போயிருந்தேன்.

அன்று இரவு வள்ளலாரைப் பற்றி விரிவுரை செய்தேன். விரிவுரை முடிந்தது. பிள்ளை அவர்கள் 500 தருவார்கள். ஆயிரமாவது கேட்க வேண்டும் என்று நான் எண்ணிக் கொண்டிருந்தேன். பிள்ளையவர்களும் அவர் மனைவியாரும் ஒரு பெரிய வெள்ளித் தட்டில் 25 சாத்துக்குடி, ஆரஞ்சுப் பழங் கள், நிறைய வெற்றிலை- பாக்கு வைத்துக் கொண்டு வந்தார்கள்.

‘வாரித் தந்த வள்ளலார்’

இதைப் பார்த்தவுடன் நான் சிறிது அஞ்சினேன். சில சங்கங்களில் பெரிய பூமாலையாகச் சூட்டி, நிறைய பழங்களைத் தட்டில் வைத்துத் தருவார்கள். பழத்துக்கு அடியில் ரயில் செலவுக்காக 25 ரூபாய் மட்டுமே இருக்கும். இப்போது அவர்கள் நிறையப் பழங்களை வைத்துக் கொண்டு வந்திருக்கிறார்களே! பணம் குறைத்துத் தருவார்கள் என்று எண்ணினேன்.

தெம்மூர் ராஜமாணிக்கம் பிள்ளையும், அவர் மனைவியாரும் பழங்களுக்கு மேல் 100 ரூபாய் நோட்டுகளைக் கற்றையாக வைத்திருந்தார்கள். அதைக் கண்டு நான் அதிர்ச்சி அடைந்தேன். ரசீது போடும் பொருட்டு பணத்தை எண் ணிப் பார்த்தேன். நூறு ரூபாய் நோட்டுக்கள் 35 இருந்தன. நான் நகைகளை அடகு வைத்துக் கடன் வாங்கியிருந்த தொகை 3500. தெம்மூர் பிள்ளை நன்கொடை கொடுத்ததும் 3500. மூவாயிரமாகவோ நாலாயிரமாகவோ கொடுக்காமல் மூவாயிரத்தைந்நூறே கொடுக்குமாறு செய்த வள்ளலாரின் திருவருளின் திறத்தை நினைந்து வியந்தேன்’’ என்று சொல்லி இருக்கிறார் வாரியார் ஸ்வாமிகள்.

 - சிவநேசன், பண்ருட்டி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு