Published:Updated:

ஆதியும் அந்தமும் - புதிய தொடர்

ஆதியும் அந்தமும் - புதிய தொடர்
பிரீமியம் ஸ்டோரி
ஆதியும் அந்தமும் - புதிய தொடர்

மறை சொல்லும் மகிமைகள்

ஆதியும் அந்தமும் - புதிய தொடர்

மறை சொல்லும் மகிமைகள்

Published:Updated:
ஆதியும் அந்தமும் - புதிய தொடர்
பிரீமியம் ஸ்டோரி
ஆதியும் அந்தமும் - புதிய தொடர்
ஆதியும் அந்தமும் - புதிய தொடர்

தியும் அந்தமும். `ஆதி’ என்றால் ஆரம்பம்; `அந்தம்’ என்றால் முடிவு. நாம் நம் வாழ்க்கையில் எத்தனையோ செயல்களைச் செய்கிறோம்; பொருள்களை உருவாக்குகிறோம்; பலருடன் பழகுகிறோம். இவை எல்லாவற்றுக்கும் ஆரம்பமும் உண்டு முடிவும் உண்டு. நாம் படைத்த பொருள்களுக்கு மட்டுமே ஆதியும் அந்தமும் இருக்கும். வேதங்களும் சாஸ்திரங்களும் என்ன சொல்கின்றன தெரியுமா? உலகில் உற்பத்தியாகும் அனைத்துப் பொருள் களும் ஆதியும் அந்தமும் உடையவையே என்கின்றன.

ஒரு விதை... அதுதான் ஆதி. அதை மண்ணில் போடுகிறோம். மழை பொழிவதால் விதை முளைக்கிறது. இருக்கிற பொருள் துளிர்த்தது. அது ஆதி; முளைத்தது என்பது ஒரு மாறுபாடு.  விதை விதைத்தோம்; முளைத்தது. இது பரிணாமம். அத்துடன் நிற்கவில்லை. அது செடியாகி மரமாக வளர்ந்தது. வளர்ந்த பிறகு அரும்பு, மலர், காய் என்று மாற்றம் பெற்று பழமாகிறது. பழுத்த பிறகு அந்தத்தை - ஒரு முடிவைச் சந்திக்கிறது. இப்படியான தொடக்கமும் முடிவும் மனிதன் உட்பட சகல ஜீவராசிகளுக்கும் உண்டு.

ஆம்! உற்பத்தியாகும் பொருள்கள் எல்லாவற்றுக்கும் ஒரு ஆரம்பம் இருப்பதுபோன்று, முடிவும் உண்டு. இதையே ஆதிசங்கரர், `புனரபி ஜனனம்; புனரபி மரணம்’ என்கிறார். பிறந்தவன் இறந்துபோகிறான். இறப்பவன் மீண்டும் பிறப்பான். இப்படியாக பிறவிச் சுழல் தொடர்ந்து நடைபெற்றுக்கொண்டே இருக்கிறது.

தர்க்க சாஸ்திரம் என்ன சொல்கிறது தெரியுமோ? ‘ஷத்பாவ விஹாரா’ என்கிறது. அதாவது, மனிதர் உள்பட எந்த ஒரு ஜீவராசிக்கும் ஆறுவிதமான அவஸ்தைகள் உண்டு என்கிறது.

ஆதியும் அந்தமும் - புதிய தொடர்

ஒட்டுமொத்த விகடனுக்கும் ஒரே ஷார்ட்கட்!

அதேநேரம் `ஆதியும் இல்லை அந்தமும் இல்லை’ என்று சொல்லத் தக்க சில பதார்த்தங்களும் உண்டு. வேதம் எப்போது ஆரம்பித்தது என்று தெரியாது; அதற்கு முடிவு எப்போது என்பதும் தெரியாது. பகவான் எப்போது எப்படி இருந்தார் என்பதை நாம் சொல்ல முடியாது. பகவானுக்கு ஆதி இல்லை. பகவான் எப்போது நம் கண்ணுக்குப் புலப்படாமல் போனார்? எனவே அந்தமும் இல்லை.

கடவுளைப் பற்றிய நம் கோட்பாடு - `கடவுளுக்கு ஆதியும் இல்லை; அந்தமும் இல்லை; எங்கும் நீக்கமற நிறைந்திருப்பவன்’ என்பதுதான். ஆக, ஆதியும் அந்தமும் இல்லாதவன் நம்மைப் படைத்த கடவுள். ஒரு குயவன் பானை செய்கிறான். அதற்கு மண் என்ற பொருள் தேவைப்படுகிறது. அந்தப் பானை உடைந்துவிட்டாலும் அதைச் செய்வதற்குப் பயன்பட்ட மண் அப்படியேதான் இருக்கும். அதுபோலவே, சிருஷ்டி அழிந்தாலும் அதற்கான கர்த்தா நிரந்தரமானவர்.

இந்த லோகத்தை, செடிகொடிகளை - சகல ஜீவராசிகளை உற்பத்தி செய்து, எல்லாவற்றையும் வாழவைத்து, நிறைவில் அவை முடிவைச் சந்திக்கின்றன என்றால் அனைத்துக்கும் காரணம் இறையே!

ஆதியும் அந்தமும் - புதிய தொடர்

கடவுள் நம் கண்ணுக்குப் புலப்படமாட்டார். கடவுளை ஏற்றுக் கொள்ளாதவர்கள் `இயற்கை’ என்று சொல்வார்கள். கடவுள் என்று சொன்னா லும் இயற்கை என்று சொன்னாலும் இரண்டும் ஒன்றே. இயற்கை எப்போது ஆரம்பித்தது என்று யாருக்கும் தெரியாது. அதேபோல் கடவுள் எப்போது தோன்றினார் என்பதும் யாருக்கும் தெரியாது.

அதேநேரம், இயற்கைக்கு அழிவு இருக்கிறது. ஆனால், கடவுளுக்கு அழிவே கிடையாது. ஆதியும் அந்தமும் தெரியாத கடவுளைப் போலவே, கடவுள் சிருஷ்டி செய்த இந்தப் பிரபஞ்சத்துக்கும் ஆதியும் அந்தமும் இல்லை. ஆனால் பிரபஞ்சத்தின் அங்கமான கடவுள் படைத்த இந்த உலகுக்கு ஆதியும் உண்டு ஓர் அந்தமும் உண்டு.

ஆதியும் அந்தமும் இல்லாத ஒரு சக்தி - பராசக்தி நிரந்தரமாக உள்ளது. அந்தச் சக்திக்கு உருவம் கிடையாது; அளவும் தெரியாது; சொரூபமும் இல்லை. ஆனால், அதுவே சிருஷ்டிக்குக் காரணமாக இருக்கிறது. அந்தச் சக்தி நம் கண்களுக் குத் தெரிவதில்லை. அந்த சக்தியையே நாம் கடவுள் என்கிறோம். அந்தச் சக்தியை எந்தப் பெயர்கொண்டு அழைத்தாலும் பொருந்தும். பகவான் என்று சொல்லலாம், கடவுள் என்றும் சொல்லலாம்; இயற்கை என்றும் சொல்லலாம்!

இதிலிருந்து என்ன தெரிகிறது?

ஆதியும் அந்தமும் - புதிய தொடர்

பிரபஞ்சத்தின் அடையாளம்!

ஆதியும் அந்தமும் உடைய பொருள்கள், ஆதியை உடையவை ஆனால் அந்தம் குறித்து அறியமுடியாத பொருள்கள், ஆதியும் அந்தமும் இல்லாத பொருள்கள்... இப்படி, பலவிதமான விஷயங்களை உலகில் நாம் சந்திக்கிறோம்.

இப்போது நமக்கு என்ன வேண்டும்? சகல விதமான விஷயங்களையும் தெரிந்துகொள்கிற அறிவு வேண்டும். அந்த அறிவை எல்லோருக்கும் பகிர்ந்துகொடுக்க வேண்டும். வெறுமனே தியரியாக இருந்தால் போதாது. உறுப்பின் குறிக்கோள், உறுப்பினால் ஏற்படும் பயன், உறுப்பினால் நமக்கு ஏற்படக்கூடிய ஞானம், அதன் மூலம் நமக்குள் ஏற்படக்கூடிய நல்ல எண்ணங்கள், உள்ளத்தில் உயர்வு ஆகிய அனைத்தும் தேவை. இவற்றை அளிக்கும் பக்குவம் அல்லது கல்வி அல்லது நடைமுறைகள் ஆகியன இந்த லோகத்தில் பலவிதமாகத் திகழ்கின்றன.

ஆதியும் அந்தமும் - புதிய தொடர்

பிரபஞ்சத்துக்கு அடையாளமே பலவிதமான பொருள்களுடன் சேர்ந்திருத்தல்தான். எப்போதும் இந்தப் பிரபஞ்சத்தை ஒன்றாகப் பார்க்க முடியாது. பிரபஞ்சத்திலுள்ள விலங்குகளை - பறவைகளை - மனிதர்களை ஒரே குணம் கொண்டவையாக இயல்பு பெற்றவையாக பார்க்க முடியாது. ஒவ்வொன்றும் வெவ்வேறானவை. ஆனால், அனைத்திலும் இருக்கக் கூடிய சக்தி- ஆத்மா என்பது ஒன்றுதான்.

அந்தச் சக்தியைப் பற்றி அறிவதே, நமக்கான ஆத்ம லாபமாகும். இதுகுறித்து என்னென்ன படிப்பினைகள் அருளப்பட்டுள்ளன, அவை எந்தெந்த ஞானநூல்களில் உள்ளன என்பதையெல்லாம் அறியப் போகிறோம். இதன்பொருட்டு, ஒவ்வொரு சாஸ்திர கிரந்தமாக எடுத்து, அதை இயற்றியவர்களின் அபிப்பிராயம் என்ன, அவர்கள் அதை எப்படித் தெரிந்துகொண்டார்கள் என்பதையெல்லாம் பார்க்கப்போகிறோம்.  இதன் மூலம், நமக்கு இந்தப் பிரபஞ்சத்தைப் பற்றியும் அதை உண்டுபண்ணி இயக்கிக் கொண்டிருப்பவர் குறித்தும் ஓர் அறிவு கிடைக்கும். விளைவு - நம் வாழ்க்கை சந்தோஷமாகவும் நிறைவாகவும் இருக்கும்.

இதுபோன்ற விஷயங்களை எடுத்துச் சொல்ல இப்போது ஒரு சந்தர்ப்பம் கிடைத்திருக்கிறது.

இந்த உலகில் எத்தனையோ மதங்களும் அவற்றின் அடிப்படையிலான பல கோட்பாடுகளும் உருவாகியிருக்கலாம். எனினும், ஒவ்வொரு  மதத்தைச் சேர்ந்தவர்களும் தத்தமது மதமே சிறந்தது; அதன் கோட்பாடுகளே உயர்ந்தவை என்ற ரீதியிலான பார்வையையே கொண்டுள்ளார்கள்.

இந்தப் பிரபஞ்சத்தின் தோற்றத்துக்குக் காரணமான தத்துவம், எதற்காக இந்த உற்பத்தி, பிரபஞ்சத்தில் அழிவில்லாதவை எவை, நாம் அவசியம் அறிந்தாக விஷயங்கள் என்னென்ன  என்பதுபற்றி அவர்கள் சிந்திப்பது இல்லை. ஆனால், நம் சாஸ்திரங்கள் இந்த விஷயங்களைக் குறித்து விரிவாகச் சொல்கின்றன. அவற்றை அறிவதும் அறிந்ததை மற்றவர்களுக்கு எடுத்துச் சொல்வதும் நிகழ்கால அவசியம்.

அவ்வகையில், வெறும் கதைகளாக - வேடிக்கை நிகழ்வுகளாக அல்லாமல், உண்மை தத்துவங்களை உள்ளபடியே விவரிக்கும் நம்முடைய சாஸ்திர விளக்கங்களைப் பகிர்ந்துகொள்ளபோகிறேன். நம்மை வியப்பின் எல்லைக்கே அழைத்துச் செல்லும் ஞானப்பொக்கிஷங்கள் அவை!

- பிரபஞ்சம் விரியும்...

-மகாமகோபாத்யாய சேஷாத்ரிநாத சாஸ்திரிகள்

ஓவியம்: மாருதி

பேரின்பம்!

ஆதியும் அந்தமும் - புதிய தொடர்

செல்வந்தன் ஒருவன் தனது இறுதிக் காலம் நெருங்குவதை உணர்ந்துகொண்டான். சாவதற்குமுன், ஞானிகள் சொல்லும் பேரின்பநிலை என்ன என்பதை உணர்ந்துவிடவேண்டும் என்று  கருதினான். தனது இந்த எண்ணம் குறித்து, தன்னைச் சந்திக்க  வருபவர்களிடம்  எல்லாம் சொல்லி தீர்வு கேட்டான்.

“பேரின்ப நிலை  என்று  ஞானிகள்  கூறுவதைக்  கேட்டிருக்கிறோம். படித்திருக்கிறோம், ஆனால், அப்படியென்றால் என்ன  என்பது பற்றி எங்களுக்கு ஒன்றும் தெரியாது; அனுபவமில்லை” என்று  சொல்லிவிட்டார்கள், அவர்கள்.

ஒரு நாள் ஒரு துறவியை சந்தித்தான். அவர்  அவன் விருப்பத்தைக் கேட்ட பின்னர், “பக்கத்து ஊரில் ஒரு ஞானி இருக்கிறார். அவரிடம் விஷயத்தைச் சொல்’’ என்றார். செல்வந்தனும்  தன்னிடமிருந்த  பணம்,  நகை  ஆகியவற்றை  சிறு  மூட்டையாகக் கட்டிக் கொண்டு, அந்த  ஞானியின் இடத்துக்குச்  சென்று சந்தித்தான். தனது  செல்வத்தை  அவரது  திருவடிகளில் சமர்ப்பித்து, தனது விருப்பத்தைக்  கூறினான். அவர் சற்று நேரம் அவனை உற்று  நோக்கிவிட்டு, திடீரென்று அந்தப் பொன் மூட்டையைத்  தூக்கிக்கொண்டு ஓடலானார்.

“ஐயோ!  என்  ஐஸ்வர்யத்தைத்  தூக்கிக்கொண்டு  ஓடுகிறான்; அவனைப் பிடியுங்கள். அவன்  ஞானி அல்ல...  திருட்டுப் பயல்” என்று கத்தினான்!

சிலபேர் அவர்  பின்னால்  ஓடினார்கள். ஆனால் அவரைப் பிடிக்க முடியவில்லை. எல்லோரும்  களைத்துத்  திரும்பினார்கள்,  ஞானியின்  குடிலுக்கு.

அங்கே   பொன்  மூட்டை இருந்த  இடத்திலேயே  இருந்தது.  ஞானி முன்போல்  நின்ற  இடத்திலேயே  நின்றிருந்தார்.  அதைக் கண்டு  அவர்கள்  மகிழ்ச்சி  அடைந்தனர். ஞானி  சிரித்துக்கொண்டே, “உன்னிடம் உள்ளதைத் தொலைத்துவிட்டு, மீண்டும் அதை அடையும்போது எவ்வளவு ஆனந்தமாக இருக்கிறதோ, அதைப்போல பலமடங்கு  ஆனந்தம் அடைவதற்குப் பெயர்தான் பேரானந்தம்! 

நீங்கள்  எல்லாம்  உங்கள்  ஆன்மாவின்  மைய நிலையைத் தொலைத்துவிட்டீர்கள். அதைத் தேடிக் கண்டுபிடியுங்கள். அப்போது அந்த  ஆனந்தத்தை  உணர்வீர்கள்’’ என்றார்.

- ஆர்.சி.எஸ்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism