தஞ்சாவூரில் உள்ள கரந்தை எனும் பகுதியில் கோயில் கொண்டு, வேண்டுவோருக்கு வேண்டும் வரங்களைத் தந்தருள்கிறார் ஸ்ரீகிருஷ்ண ஸ்வாமி யாதவக் கண்ணன்.
கி.பி.1755-ல் யாதவர்களின் நாட்டாண்மையாக விளங்கிய பெரியண்ணா என்பவரின் முயற்சியால், தஞ்சாவூர் மராட்டிய மன்னர் பிரதாபசிம்ம மன்னனால் எழுப்பப்பட்ட அழகிய ஆலயம் இது!
பிள்ளை பாக்கியம் இன்றி தவித்து மருகும் பெண்களுக்கு, இங்கேயுள்ள யாதவக் கண்ணன், வரப்பிரசாதி. ஆலயத்தில் உள்ள தொட்டில் கிருஷ்ணனை, தம்பதிகள் மடியில் ஏந்தி, தாலாட்டி வழிபட... விரைவில் வீட்டில் தொட்டில் சத்தம் கேட்பது உறுதி எனச் சிலிர்ப்புடன் தெரிவிக்கின்றனர் பக்தர்கள்!
பெண்களுக்கு வளைகாப்பு வைபவம் நடைபெறும் நாளில், கரந்தை யாதவக் கிருஷ்ணன் ஆலயத்துக்கு வந்து, வளைகாப்பு சீர் வரிசைப் பொருட்களை சந்நிதியில் வைத்துப் பிரார்த்தனை செய்துவிட்டு, வளைகாப்பு விழாவை சீரும் சிறப்புமாக நடத்துவது, தஞ்சாவூர் மற்றும் அதனைச் சுற்றியுள்ள ஊர்க்காரர்களின் வழக்கம். இதனால், ஒருகுறையுமின்றி சுகப்பிரசவம் நடைபெறுவதுடன், குழந்தையும் ஆரோக்கியமாகப் பிறக்கும் என்பது இந்தப் பகுதி மக்களின் நம்பிக்கை. பிரசவம் நல்லபடியாக ஆன பின்பு, குழந்தையை துலாபாரத்தில் வைத்து, தாங்கள் வேண்டிக்கொண்டபடி எடைக்கு எடை நேர்த்திக்கடனைச் செலுத்தி, கிருஷ்ணனை வழிபட்டுச் செல்கின்றனர்.
மூலவர், ஸ்ரீசத்தியபாமா ஸ்ரீருக்மிணி சமேத ஸ்ரீவேணு கோபால ஸ்வாமியாக அருள்பாலிக்கிறார். உத்ஸவரின் திருநாமம் - ஸ்ரீயாதவக் கண்ணன். நர்த்தனக் கோலத்தில் அழகிய வடிவம் கொண்டு காட்சி தரும், யாதவக் கண்ணனைப் பார்த்தாலே, நம் பாவமெல்லாம் பறந்தோடிவிட்டது போன்ற உணர்வு! பிராகாரத்தில் திருப்பதி ஸ்ரீவேங்கடாசலபதியின் திருக்காட்சியையும் தரிசிக்கலாம்.
| 
