Published:Updated:

இதோ... எந்தன் தெய்வம்! - 23 - முன்னூர்

வி.ராம்ஜி

##~##

ட்சியங்களும் ஆசைகளும் யாருக்குத்தான் இல்லை? ஒவ்வொருவருக்கும் ஒவ்வொரு விதமான லட்சியம்- ஆசை. ஒருவருக்கு, இசையில் சிறந்து விளங்க வேண்டும் என்றும், இன்னொருவருக்கு இன்ஜினீயரிங் படிக்க வேண்டும் என்றும் ஆசை இருக்கும்; வேறு சிலருக்கு ஐ.ஏ.எஸ். படிக்க வேண்டும் என்பதோ ஐ.பி.எஸ். ஆகவேண்டும் என்பதோ விருப்பமாக இருக்கலாம்.

மிகப்பெரிய மருத்துவராகத் திகழ வேண்டும், மிகச்சிறந்த விஞ்ஞானியாக வளர வேண்டும், அற்புதமான ஓவியராக, எழுத்தாளராக மிளிர வேண்டும் என்றெல்லாம் ஆசைப்படுகிறவர்கள் உண்டு. ஆக, வாழ்க்கையில் ஏதேனும் ஒருவிதத்தில் தேர்ச்சி பெற்று, எப்படியாவது முன்னுக்கு வந்துவிடவேண்டும் எனும் லட்சியம் எல்லோருக்கும் இருக்கத்தான் செய்கிறது. 'திக்கற்றவர்க்குத் தெய்வமே கதி’ என்பார்கள். வாழ்வில் நமக்கென ஒரு திக்குத் திசை கிடைக்க வேண்டும், நமக்குப் பிடித்த துறையில் நுழைந்து, புகுந்து புறப்பட்டு, அதில் சாதிக்க வேண்டும் என ஏங்காத மனிதர்களே இல்லை.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

ஆடல்வல்லானும் அருளாளனுமான சிவனாரின் பாதங்களைக் கெட்டியாகப் பிடித்துக் கொண்டு செயல்பட்டால், வாழ்வில் ஏற்றம் நிச்சயம் என்கிறார்கள் பெரியோர். குறிப்பாக, 'முன்னூருக்கு வாருங்கள், முன்னுக்கு வருவீர்கள்’ என்று சொல்லி, முன்னூர் திருத்தலத்தைப் போற்றுகின்றனர், பக்தர்கள்.

''எங்க அம்மாவோட ஊர், முன்னூர். அவங்க பிறந்தது வளர்ந்தது எல்லாமே இங்கேதான். அதுக்குப் பிறகு திண்டிவனம், சென்னைன்னு நாங்க வந்துட்டோம். எனக்குக் கல்யாணமாகி இப்ப மேல்மருவத்தூர்ல இருக்கேன். ஆனாலும், அம்மாவின் ஊரை மறக்கவே முடியாது. லீவுல இங்கே வரும்போது, கோயில் மேட்டுலயும் குளத்துலயும்தான் விளையாடுவோம். அப்ப கோயில்மேடுங்கறது, வெறும் மேடும் பள்ளமுமாத்தான் இருந்துச்சு. அதுக்குப் பிறகுதான், திருப்பணிக் கமிட்டிக்காரங்க முயற்சியால், மெள்ள மெள்ள வழிபாடுகளும் பூஜைகளும் அதிகமாச்சு. இப்ப, சந்தர்ப்பம் கிடைக்கும்போதெல்லாம் இங்கே வர்றேன். இந்தக் கோயிலுக்கு வந்தாத்தான் நிம்மதி; ஸ்வாமியையும் அம்பாளையும் பார்த்தாத்தான் சந்தோஷம்!'' என்று பரவசத்துடன் சொல்கிறார் புனிதா.

இதோ... எந்தன் தெய்வம்! - 23 - முன்னூர்

திருப்பணிக் கமிட்டியில் உள்ள வேணுகோபால் இந்த ஊரைச் சேர்ந்தவர்தான். தற்போது சென்னையில், அரசுப்பணியில் உள்ளார்.

''வேலை நேரம் போக என் மற்ற நேரத்தையெல்லாம் எங்க ஊர் கோயிலுக்குன்னு ஒதுக்கிட்டேன். 'நீ இன்னிக்கி நல்லா இருக்கேன்னா, அதுக்கு ஸ்ரீஆடவல்லீஸ்வரர்தான் காரணம். நம்ம குடும்பத்துக்கு முன்னோர்களோட ஆசிர்வாதம் பரிபூரணமா கிடைச்சிருக்குன்னா, அதுக்கு செவ்வாய், வெள்ளின்னு பாக்காம, நல்ல நாள், பிரதோஷம்னு மட்டுமே இருக்காம, நினைக்கும் போதெல்லாம் ஸ்வாமிக்கு வில்வம் சார்த்தி, கோயில்ல விளக்கேத்தி வழிபட்டதுதான் நம்ம குடும்பத்துக்கு மிகப்பெரிய பலம் சேர்த்திருக்கு’னு அப்பா அடிக்கடி சொல்வார். யோசிச்சுப் பார்க்கும்போது, என் இந்த வாழ்க்கைக்கும் வசதிக்கும் சிவனார்தான் காரணம்னு தெளிவா உணர முடியுது'' என்கிறார் வேணுகோபால்.

திண்டிவனத்தில் இருந்து மரக் காணம் செல்லும் வழியில், ஆலங் குப்பத்தில் இருந்து சுமார் 3 கி.மீ. தொலைவில் உள்ள முன்னூர் தலத்தை, இப்படித்தான் ஒவ்வொருவரும் கொண்டாடுகின்றனர்.

இதோ... எந்தன் தெய்வம்! - 23 - முன்னூர்

''யம பயம் போக்கும் இந்தத் திருத் தலத்துக்கு வந்து, சிவனாரையும் உமையவளையும் வழிபட்டால் பித்ரு சாபம் நீங்கும். முன்னோர் ஆசி முழுவதுமாகக் கிடைக்கும். அப்படி, முன்னோர் ஆசிர்வாதம் இருந்ததாலதான் நான், வேணுகோபால் இன்னும் பலர்னு ஸ்ரீஆடவல்லீஸ்வரர் கோயில் திருப்பணியில எங்களால பங்கெடுத்துக்க முடிஞ்சுதுன்னு தோணுது. 'கோயிலுக்குப் போய் தரிசனம் பண்றதே புண்ணியம். ஆயிரமாயிரம் பேர் வந்து தரிசனம் பண்றதுக்கு வசதியா கோயில் புனரமைப்பிலயும், வழிபாடுகளும் பூஜைகளும் நடக்கற பணியிலும் இறங்கியிருக்கீங்கன்னா, அது அதைவிடப் பெரிய புண்ணியமாச்சே!’னு எங்களோட உறவுக்காரங்களும் நண்பர்களும் சொல்லும்போது, 'இந்த ஜென்மத்துல சிவனார் நமக்குத் தந்த பாக்கியம் இது’ன்னு என் உள்ளுணர்வு சொல்லுது!'' என்று உணர்ச்சி ததும்பச் சொல்கிறார் சென்னையைச் சேர்ந்த ரமேஷ்.

''தெற்குப் பார்த்த ஸ்வாமி இவர். அதனால, வியாழக் கிழமைகள்ல இங்கே வந்து, ஸ்ரீஆடவல்லீஸ்வரரையும் குரு ஸ்ரீதட்சிணாமூர்த்தியையும் வழிபடுறது ஞானத்தைத் தரும்னு சொல்லுவாங்க. என் சகோதரி பொண்ணு ரஞ்சனியை அப்படி அழைச்சுக்கிட்டு வந்து வேண்டிக்கிட்டதால, இன்னிக்கு அவ நல்லாப் படிச்சு, ஐ.டி. நிறுவனம் ஒண்ணுல கைநிறைய சம்பளத்தோட வேலை பார்க்கறா. அவளுக்கு இப்ப நிறைய வரன்கள் வந்துட்டிருக்கு. நல்ல வரன் அமைஞ்சு, சீரும் சிறப்புமா அவளுக்கொரு கல்யாணத்தை, அம்மையும் அப்பனுமா இருந்து அந்த ஸ்ரீஆடவல்லீஸ்வரரே நடத்திக் கொடுத்துடுவார்னு நம்பிக்கை இருக்கு. பாலபிஷேகம் பண்ணி, பால் பாயச நைவேத்தியம் செஞ்சு வேண்டிக்கிட்டி ருக்கோம். முன்னூருக்கு வந்தால் நிச்சயம் முன்னுக்கு வந்துடலாம்!'' என்று பூரிப்புடன் தெரிவிக்கிறார் புனிதா.

மன்னர்களுக்கும் மகான்களுக்கும் நல்லருள் புரிந்த தலம், இன்றைக்கு மக்கள் பலருக்கும் பல வரங்களை வாரி வழங்கி வருகிறது. அதனால்தான், 'ஸ்ரீஆடவல்லீஸ்வரர் எனக்குக் கண்கண்ட தெய்வம்’ என்றும், 'ஸ்ரீபெரியநாயகி அம்பாள், எனக்குத் தாய்க்கும் மேலானவள்’ என்றும் பெருமிதத்துடன் சொல்கிறார்கள் பக்தர்கள்.

இதோ... எந்தன் தெய்வம்! - 23 - முன்னூர்

''மாசி மகம், மகா சிவராத்திரி தினங்களில் இங்கு நடைபெறும் சிறப்பு பூஜைகளில் கலந்து கொண்டாலே, நம் பாவமெல்லாம் பறந்தோடி விடும்; பயமெல்லாம் விலகிவிடும். துயரங்கள் விலகி, வாழ்வில் முன்னுக்கு வந்துவிடலாம்'' என்கிறார் வேணுகோபால்.

ஸ்ரீஆடவல்லீஸ்வரருக்கு வஸ்திரம் சார்த்தி, வில்வம் அணிவித்து, சர்க்கரைப் பொங்கல் நைவேத்தியம் செய்து வழிபட்டால், இழந்த பதவி, சந்தோஷம், அமைதி என அனைத்தையும் திரும்பப் பெறலாம். தீராத நோயால் அவதிப்படும் கணவர் குணமாக வேண்டும் என்று ஸ்ரீபெரியநாயகி அம்பாளுக்குப் புடவை சார்த்தி, அரளிப்பூமாலை அணிவித்து, நெய் விளக்கேற்றி வழிபட்டால், கணவர் நோயிலிருந்து மீண்டுவிடுவார்; தாலி பாக்கியம் நிலைக்கும். கடன் சுமை அனைத்தும் குறைந்து, கவலை இல்லாத ஆனந்தமான  வாழ்க்கை அமையப் பெறலாம் என்று சிலிர்ப்புடன் தெரிவிக் கிறார்கள் பெண்கள்.

''கணவருக்குப் பிரச்னை, கணவன் மனைவி இடையே பிரச்னை, குழந்தை பாக்கியம் இல்லை, கடன் சுமையால் நிம்மதி இல்லை என்று எத்தனையோ பேர் இங்கு வந்து வழிபட்டு, பலன் பெற்றுச் சென்றிருக் கிறார்கள். இந்தத் தலத்தில் வாழ்ந்து வருவதே பூர்வ ஜென்மப் புண்ணியம்'' என்று கண்ணீர் மல்கச் சொல்கிறார் வக்கீல் முருகேசன்.

இதோ... எந்தன் தெய்வம்! - 23 - முன்னூர்

முந்நூற்றுமங்கலம் எனப்படும் முன்னூருக்கு ஒருமுறையேனும் வாருங்கள். கோயிலின் அழகிலும் ஸ்வாமியின் சாந்நித்தியத்திலும் திளைத் துப் போய்விடுவீர்கள். அடுத்தடுத்த நாட்களில், வாழ்வில் நடப்பவை யாவும் நம்பிக்கையும் மகிழ்ச்சியுமானதாகவே அமைவதை உணர்ந்து சிலிர்த்துப் போவீர்கள்.

முன்னூருக்கு வாருங்கள்... முன்னுக்கு வருவீர்கள் எனும் வாசகம், சத்திய வாக்கு!

- வேண்டுவோம்

படங்கள்: ரா.மூகாம்பிகை

எங்கே இருக்கிறது?

விழுப்புரம் மாவட்டத்தில் உள்ளது திண்டிவனம். இங்கிருந்து மரக்காணம் செல்லும் வழியில், சுமார் 19-வது கிலோ மீட்டரில் உள்ளது ஆலங்குப்பம் கிராமம். இந்த ஊரில் இருந்து கிளைபிரிந்து செல்லும் சாலையில், சுமார் 2 கி.மீ. தொலைவு பயணித்தால், முன்னூரை அடையலாம். திண்டிவனம் - முன்னூர் இடையே 22-ம் நம்பர் அரசு டவுன்பஸ் இயங்குகிறது. எனினும், பஸ் வசதி குறைவுதான். ஆலங்குப்பத்தில் இருந்து ஆட்டோவில் செல்லலாம்.