Published:Updated:

இறைவனின் திருவிளையாடல்!’

ஆலயத் திருப்பணிக்கு உதவி செய்தால் தீராத வினைகள் எல்லாம் தீரும்தானே

பிரீமியம் ஸ்டோரி

ழைத் தொழிலாளி ஒருவன் தனது ஜாதகத் துடன் ஜோதிடரிடம் சென்றான். ஜாதகத்தைப் பார்த்த ஜோதிடர், ‘இன்றிரவு இவன் இறக்கப் போகிறான். இவனுக்கு என்ன பலன் சொல்வது’ என்று குழம்பினார்.

‘‘என்ன சாமி, எனக்கு ஏதாவது விடிவு காலம் உண்டுங்களா?’’

‘‘இன்றிரவு உனக்கு ஒரு திருப்பம் ஏற்படும்!’’

`‘ரொம்ப சந்தோஷம். அது என்னங்க திருப்பம்?’’

‘‘சூரிய அஸ்தமனத்துக்குப் பிறகு கிரகங் களைக் கணிக்கக்கூடாது. நீ காலையில் வா, சொல்கிறேன்’’ என்றார் ஜோதிடர். ‘காலையில் அவன் வந்தால்தானே’ என்ற நினைப்பு ஜோதிடருக்கு.

தட்சணை கொடுத்துவிட்டுக் கிளம்பினான் தொழிலாளி. காட்டுப்பாதையில் அவன் சென்று கொண்டிருக்கும்போது, திடீரென்று மழை பெய்தது. ஒதுங்க இடம் தேடினான். பக்கத்தில் சிதிலமடைந்த ஒரு சிவன் கோயில் இருந்தது. அங்கு சென்று தங்கினான். சிவபெருமான் இருளில் மூழ்கி இருந்தார். ‘என்னிடம் பணம் இருந்தால், இந்தக் கோயிலின் பழுதுகளை நீக்கி சிவபெருமானுக்கு தினமும் பூஜைகள் நடக்க ஏற்பாடு செய்வேன். ஜோதிடரும் சொன்னாரே... விடிவு காலம் பொறக்கட்டும். கோயிலைக் கட்டுவோம்’ என்று நினைத்துக்கொண்டான், அந்தத் தொழிலாளி.

மேலும், ‘கோயில் எப்படி அமையவேண்டும், எப்படி கும்பாபிஷேகம் நடத்துவது, கோயிலுக்கு எப்படிப் பாதை அமைப்பது...’ என்று அந்த இரவு முழுவதும் மனதுக்குள்ளேயே எல்லாவற்றையும் நிறைவேற்றினான். அப்போது, கருநாகம் ஒன்று சீறிக்கொண்டு வந்தது. எனவே, மண்டபத்தைவிட்டு அவசரம் அவசரமாக வெளியேறினான். சரியாக அந்த நேரம் பார்த்து மண்டபம் இடிந்து விழுந்தது. வெளியே நின்று இந்தக் காட்சியைப் பார்த்த அவன் விதிர்விதிர்த்துவிட்டான். விடியற்காலையில் மழை ஓய்ந்ததும் வீட்டுக்குச் சென்றான். பின்பு, ஜோதிடரைப் பார்க்கச் சென்றான். அவனைப் பார்த்த ஜோதிடர் அதிர்ந்தார். ‘‘நேற்று ராத்திரி நீ எங்கே இருந்தாய்’’ என்று கேட்டார்.

இறைவனின் திருவிளையாடல்!’

நடந்த சம்பவங்களைக் கூறினான் தொழிலாளி. அப்போதுதான், ‘மனதுக்குள் கோயில் கட்டி, கும்பாபிஷேகம் செய்த பலனால், அவனுக்கு இறைவன் அருள்புரிந்திருக்கிறார்... அன்று சிவராத்திரி தினம்... கருநாகம் வந்தபோது அங்கிருந்து அவன் வெளியேறியதும் மண்டபம் இடிந்தது, இறைவனின் திருவிளையாடல்’ என்று ஜோதிடர் உணர்ந்து வியந்தார். ஆலயத்தைச் சீரமைக்க எண்ணம் கொண்டதற்கே இப்படியான பலன் என்றால், ஆலயத் திருப்பணிக்கு உதவி செய்தால் தீராத வினைகள் எல்லாம் தீரும்தானே!

(17.2.2007 இதழிலிருந்து)

-டி.ஆர்.பரிமளம், திருச்சி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு