Published:Updated:

வினைகள் தீர்க்கும் வேம்பு!

தாயுக்குத் தாயாக நம்மைக்காக்கும் வேப்பிலையை அம்மன் வழிபாட்டில் முதன்மைப் படுத்துவதுதான் நம் மரபு.

பிரீமியம் ஸ்டோரி

டி மாதத்தில் அம்மனைத் தொழுதுகொள்ள எது இருக்கிறதோ இல்லையோ வேப்பிலை கட்டாயம் இருக்க வேண்டும். வேப்பிலை இருந்தால் அன்னை நம் வீடுதேடி வந்து அருள்புரிவாள் என்பது நம்பிக்கை.

வேம்புக்கு இருக்கும் மருத்துவக் குணங்களை இன்று கண்டுபிடித்து உலகமெல்லாம் போற்று கிறது. ஆனால் அந்தக் காலத்திலேயே அதை தெய்வமாகக் கண்டு வழிபட்டவர்கள் தமிழர்கள். வேம்பின் மகிமையைச் சொல்லும் ஒரு கதை...

ஒரு கணவன் - மனைவி. மனைவிக்கு, `இருக்கும் செல்வம் போதும்' என்ற திருப்தி. கணவனுக்கோ மேலும் மேலும் செல்வம் வேண்டும் என்று பேராசை. அதனால் தொலைதூர நகரத்துக்குச் சென்று வணிகம் செய்து திரும்ப விரும்பினான். மனைவி தடுத்துப்பார்த்தாள். அவன் கேட்பதாய் இல்லை.

மனைவி தன் மாமியாரிடம் இதுகுறித்துச் சொல்லி வருத்தப்பட்டாள். கணவன் வணிகம் முடித்துவர ஓரிரு ஆண்டுகள் ஆகிவிடுமே என்று வருந்தினாள். மாமியார் ஓர் உபாயம் சொன்னார். “உன் புருஷனை ஊருக்குப் போகும்போது புளிய மர நிழலிலும் திரும்பி வரும்போது வேப்ப மர நிழலிலும் தங்க வேண்டும்” என்று சத்தியம் வாங்கிக் கொள் என்றாள்.

வினைகள் தீர்க்கும் வேம்பு!

அப்படியே சத்தியம் வாங்கிக்கொண்டு, கணவனை வழியனுப்பி வைத்தாள் மனைவி.போகும் வழியில், புளிய மரங்கள் இருக்கும் இடங்களில் ஓய்வெடுத்தான். இப்படி அவன் தங்கித் தங்கி ஊர் போய்ச் சேரும்போது அவனுக்கு உடல் நலம் குறைந்திருந்தது. மிகவும் பலவீனமாய் உணர்ந்தான்.

இந்த நிலையில் வணிகம் செய்வது சரிப்படுமா என்ற சந்தேகம் வர, ஊருக்குப் போவதே சரி என்று முடிவெடுத்துப் புறப்பட்டான். மனைவிக்குக் கொடுத்த வாக்கை மீறாமல், வரும்போது வேப்ப மரம் இருக்கும் இடங்களில் எல்லாம் தங்கி ஓய்வெடுத்தபடி வந்தான். என்ன ஆச்சர்யம், அவன் வீடு திரும்பும்போது பழைய ஆரோக்கியத்தை அடைந்திருந்தான். வீட்டுக்கு வந்து மனைவி யையும் பெற்றோரையும் கண்டு மகிழ்ந்தான். மனைவிக்கும் அளவில்லாத மகிழ்ச்சி.

‘புளிய மரக்காற்று நிறைய பட்டால் உடம்புக்கு ஆகாது. வேப்ப மரக்காற்று உடம்பில் பட்டால் நல்லது.’ இந்த ரகசியம் அந்தக் காலத்தில் நம்ம முன்னோருக்குத் தெரிந்திருந்தது.

வேப்ப மரம் மற்ற எல்லா மரங்களையும்விட மனிதர்களுக்குத் தேவையான அதிக அளவு ஆக்சிஜனை வெளியேற்றுகிறது என்கிறார்கள் தற்கால அறிஞர்கள். மேலும் வேப்ப இலை சிறந்த கிருமி நாசினி!

தாயுக்குத் தாயாக நம்மைக்காக்கும் வேப்பிலையை அம்மன் வழிபாட்டில் முதன்மைப் படுத்துவதுதான் நம் மரபு. ஆம், வேப்பிலையைப் போற்றுவதுடன், வேப்பிலைக்காரியையும் அனுதினமும் வழிபட்டு அல்லல்கள் நீங்கப் பெறுவோம்.

- எஸ்.வேணு, கோவை-2

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு