Published:Updated:

பாலைவனத்தில் தண்ணீர் வந்த அதிசயம்...

குரு ராகவேந்திரர்
பிரீமியம் ஸ்டோரி
News
குரு ராகவேந்திரர்

ஒருமுறை சுவாமிகள் பண்டரிபுரத்தில் தரிசனம் முடித்துவிட்டுக் கிளம்பினார்.

குரு ராகவேந்திரர், பாதயாத்திரையாக புண்ணிய க்ஷேத்திரங்களுக்கெல்லாம் சென்று தரிசனம் செய்ததோடு அங்கு வாழும் மக்களுக்கு அருளாசியும் வழங்கிவந்தார்.

அவ்வாறு அவர் செல்லும் ஊர்களில் இருக்கும் பிரச்னைகளுக்கும் தீர்வு சொல்வார். அதற்காகப் பல அதிசயங்களையும் அற்புதங்களையும் நிகழ்த்தியுள்ளார்.

ஒருமுறை சுவாமிகள் பண்டரிபுரத்தில் தரிசனம் முடித்துவிட்டுக் கிளம்பினார். அவரோடு சீடர்கள் பலர் வந்தனர். சீடரின் மனைவி நிறைமாதக் கர்ப்பிணி. சீடருக்கு குருவைப் பிரிய மனமில்லை. அவரின் மனைவிக்கோ கணவனைப் பிரிய மனமில்லை. இருவரும் இணைந்தே சுவாமி களைப் பின்தொடர்ந்தனர். அப்போது ஒரு பாலைவனத்தைக் கடக்க வேண்டியிருந்தது. கடும் வெயில். சுவாமிகளைக் கட்டாயப்படுத்திப் பல்லக்கில் அமரவைத்தனர்.

பின்னால் நடந்து வந்த சீடரின் மனைவிக்குப் பிரசவ வலி எடுத்தது. வலி தாங்கமுடியாமல் அவள் கீழே படுத்துவிட்டாள். பல்லக்கில் இருந்த ராகவேந்திர சுவாமிக்கு இது மனக்கண்ணில் தோன்றவும் பல்லக்கை நிறுத்தச் சொன்னார்.

பாலைவனத்தில் தண்ணீர் வந்த 
அதிசயம்...

தன்னிடம் இருந்த மாற்று காஷாயத் துணியைக் காற்றில் பறக்கவிட்டார். அது சீடரின் மனைவி படுத்த இடத்துக்கு மேலே ஒரு கூடாரம் போல மாறியது. தன் கையிலிருந்த தண்டத்தைக் கொண்டு மணலில் பெரிய வட்டம் ஒன்றை வரைந்தார். அவர் வட்டத்தை முடித்ததுதான் தாமதம்... வட்டத்துக்குள் நீர் பெருகி அங்கே ஒரு குளமானது. சீடரின் மனைவிக்கு நல்ல முறையில் குழந்தை பிறந்தது. அனைவரும் மகிழ்ந்தனர்.

அப்போது சீடர் ஒருவர், ``சுவாமி! இப்போது இந்தப் பாலைவனத்தில் ஏற்பட்ட குளுமையானது தங்களின் கருணையே...'' என்று போற்றினார். அந்தத் தடாகம் இன்றும் , ‘தண்ட தீர்த்தம்’ என்று போற்றப்படுகிறது.

சுவாமிகளை நம்பி நம்மை ஒப்படைத்துவிட்டால் நம் வாழ்வில் இருக்கும் அனைத்து வெம்மையும் நீங்கிக் குளுமை பிறக்கும் என்பதற்கு இதைவிட நல்ல உதாரணம் ஏதும் வேண்டுமா என்ன?

ஓம் ஸ்ரீ ராகவேந்திராய நம:

எஸ்.புவனா, சென்னை-54