திருத்தலங்கள்
தொடர்கள்
Published:Updated:

மூலிகையால் உருவான கடற்கரை சிவலிங்கம்!

பரிகாரத் தலம்
பிரீமியம் ஸ்டோரி
News
பரிகாரத் தலம்

கல்யாண பரிகாரத் தலம்

`ல்லிலோடு கையிலேந்தி பல்கடையும் பலிதேர்ந்
தல்லல்வாழ்க்கை மேலதான ஆதரவென் னைகொலாம்
வில்லைவென்ற நுண்புருவ வேல்நெடுங் கண்ணியொடுந்
தொல்லையூழி யாகிநின்றாய் சோபுர மேயவனே…'


அது 7-ம் நூற்றாண்டு. தலயாத்திரை மேற்கொண்டிருந்த சீர்காழிச் சிவக்கொழுந்தாம் திருஞானசம்பந்தர், இந்தத் தலத்துக்கும் வந்தார்; ஐயன் ஈசனைக் கண்டார். உள்ளம் உருகப் பாடிக் களித்தார். `வில்லைக் காட்டிலும் வளைந்த அழகிய புருவமும், வேல்போன்ற விழிகளும் கொண்ட வேல்நெடுங்கண்ணி அம்மையுடன் ஊழிதோறும் நிலைத்திருக்கும் சோபுர நாதனே’ எனப் போற்றிப் பாடி மகிழ்ந்தார்.

ஊழிதோறும் நிலைத்திருக்கும் நாதனா?

ஆம், நான்கு யுகங்களாக இங்கு அருள்பாலிப் பவர் எங்கள் சோபுரநாதர் என்கிறார்கள் உள்ளூர் பக்தர்கள்!

கடலூரிலிருந்து சிதம்பரம் செல்லும் வழியில், ஆலப்பாக்கம் ரயிலடி எனும் ஊரிலிருந்து கிழக்கே சுமார் 2 கி.மீ தொலைவில் அமைந்துள்ளது, திருச்சோபுரம். வரலாற்று ஆய்வாளர்களின் கூற்றுப்படி கி.பி. 6-ம் நூற்றாண்டுக்குமுன் இந்த ஆலயம் நிர்மாணிக்கப்பட்டிருக்கலாம் என்று அறியமுடிகிறது. கோயிலில் உள்ள கல்வெட்டுகள் மற்றும் மீன் சின்னங்களைக் கொண்டு, இந்த ஆலயம் பாண்டியர்களால் கட்டப்பட்டு, மற்ற மன்னர்களாலும் திருப்பணி கண்டிருக்கலாம் என்கிறார்கள் ஆய்வாளர்கள்.

சோபுரநாதர்
சோபுரநாதர்
வேல்நெடுங்கண்ணி
வேல்நெடுங்கண்ணி


தியாகவல்லி உடையார்

ஆலயத்தின் கிழக்குப் பகுதியில் உள்ள தியாக வல்லி, ஆவுடையார் சந்நிதிகள் சோழர்களின் திருப்பணிக்குச் சான்றாகத் திகழ்கின்றன. ஆதியில் இவ்வூர் மங்களபுரி என்றும், இறைவன் மங்களபுரீஸ்வரர் என்றும் திருப்பெயர் கொண்டிருந்தார்களாம். பிற்காலத்திலேயே திருச்சோபுரம் எனும் பெயர் ஏற்பட்டதாம்.

கி.பி 11-ம் நூற்றாண்டில், இந்தப் பகுதியை ஆண்ட திரிபுவன சக்ரவர்த்தி ஒருவரின் மனைவியான தியாகவல்லி நாச்சியார் இந்தக் கோயிலுக்குத் திருப்பணி செய்துள்ளாள். அதையொட்டி இவ்வுர் தியாகவல்லி என்று பெயர்பெற்றது. பாண்டியர் காலத்துக் கல்வெட்டு ஒன்று `தியாகவல்லி உடையார் திருச்சோபுரமுடைய நாயனார்’ என்று இவ்வூர் ஈசனைக் குறிப்பிடுகிறது.

இறைவனுக்கு சோபுரநாதர், மங்களபுரீஸ்வரர் ஆகிய திருப்பெயர்கள் வழங்கப்படுவது போல், அம்பிகைக்கு சத்தியாயதாக்ஷி, வேல்நெடுங்கண்ணி, மங்கள நாயகி, சோபுர நாயகி ஆகிய திருப்பெயர்கள் உண்டு.

கல்யாண வரம் தரும் மஞ்சள் குங்குமம்!

கடற்கரை மணலில் மேற்கு நோக்கி மிக அற்புதமாக அமைந்திருக்கிறது அருள்மிகு சோபுரநாதர் ஆலயம். ஸ்தல விருட்சமாக செழித்து நிற்கிறது சரக்கொன்றை. தலத்தின் தீர்த்தங்கள் சூரியபுஷ்கரணி மற்றும் சாகர தீர்த்தம். வங்கக் கடலையே சாகர தீர்த்தம் என்கிறார்கள்.

விசாலமான பிராகாரங்கள், நந்தவனங்களோடு திகழ்கிறது ஆலயம். இரண்டாம் பிராகாரத்தில் நந்தி, கொடிமரத்தைத் தாண்டி முதல் பிராகாரத்தில் நுழைந்தால், தென்மேற்கு மூலையில் விநாயகர் அருள்கிறார். இந்தப் பிராகாரத்திலேயே தேவியருடன் அருளும் முருகன், கஜலட்சுமி, விசாலாட்சி உடனுறை விசுவநாதர், வீரட்டேஸ்வரர் ஆகியோரை தரிசிக்கலாம்.

ஆலயத் திருப்பணி மேற்கொண்ட திரிபுவனச் சக்ரவர்த்தி - தியாகவல்லியின் சிலைகளையும் கண்ணப்ப நாயனாரின் சிற்பத்தையும் இங்கே தரிசிக்கலாம். மேலும் நாயன்மார்கள், தொகையடியார்கள், பைரவர், நவகிரகங்கள் ஆகியோரையும் தரிசிக்க முடிகிறது.

முதல் பிராகாரத்திலிருந்து மூலவர் சந்நிதிக்குச் செல்லும் வழியில், மகாமண்டபத்துக்கு வடக்கில் அம்பிகை வேல்நெடுங்கண்ணி தெற்கு நோக்கி சந்நிதி கொண்டிருக்கிறாள். மேலிரு கரங்களில் ஜபமாலையும் கமலமும் ஏந்தியபடி, கீழிரு கரங்களால் அபய - வரத முத்திரைகள் காட்டி, கருணை ததும்ப அருள்புரிகிறாள் இந்த அன்னை.

``கல்யாணப் பரிகாரத் தலம் இது. திருமணத் தடையால் வருந்தும் அன்பர்கள், இங்கு வந்து சுவாமி அம்பாளுக்கு மஞ்சள் குங்குமம் வைத்து பூஜை செய்யவேண்டும். பிரசாதமாகத் தரப்படும் அந்த மஞ்சள் குங்குமத்தைத் தினமும் நெற்றியில் வைத்துவரவேண்டும். அந்த மஞ்சள் குங்குமம் தீர்ந்துபோவதற்குள் திருமணம் கூடிவரும் என்பது நம்பிக்கை’’ என்கிறார் ஆலயத்தின் குருக்கள் திருச்சோபுரநாதன்.

மங்களபுரி
மங்களபுரி


மணக்கோலம் காட்டிய மகேசன்!

அம்பாளை வழிபட்டுவிட்டு சுவாமியின் சந்நிதிக்குச் செல்கிறோம். மேற்கு நோக்கி அருள்கிறார் திருச்சோபுரநாதர். கடற் மண்ணால் ஆனவர், அகத்திய மாமுனியால் பிரதிஷ்டைச் செய்யப்பட்ட லிங்கத் திருமேனியர்.

திருக்கயிலையில் சிவ-பார்வதி திருக் கல்யாணம் நடந்தது அல்லவா? அப்போது தேவர்கள், முனிவர்கள் உட்பட அனைவரும் கயிலையில் திரள, வடபுலம் தாழ்ந்து; தென்புலம் உயர்ந்தது எனும் கதையை அறிவோம். பூமியைச் சமன் செய்ய அகத்தியரைத் தென் திசைக்குச் செல்லும்படி ஆணையிட்டார் சிவனார்.

அவ்வாறு தென்னகம் புறப்பட்ட அகத்தியருக்கு, அவர் விரும்பிய இடங்களில் எல்லாம் `மணக் கோலம் காட்டுவேன்' என்று திருவாக்கு தந்திருந்தது சிவப் பரம்பொருள். அவ்வகையில் அகத்தியர், சிவனாரின் மணக்கோலம் கண்ட தலங்களில் திருச்சோபுரமும் ஒன்று.

திருச்சோபுரத்தை அடைந்த அகத்தியர் சிவலிங்க வழிபாடு செய்ய சித்தம் கொண்டார். ஆனால் அவர் எவ்வளவு முயன்றும் கடற்கரை மண்ணால் லிங்கம் அமைக்க முடியவில்லை. ஆகவே இறைவனை தியானித்து வழிபட்டு, இந்தப் பகுதியிலுள்ள அரிய மூலிகைகளைச் சேகரித்து கடற்கரை மணலுடன் சேர்த்துப் பிசைந்து பாணலிங்கத்தை உருவாக்கி வழிபட்டார்.அந்தக் கணமே அவருக்குத் திருமணக்கோலம் காட்டிய அம்மையும் அப்பனும், அவர் அமைத்த லிங்கத் திருமேனியில் ஐக்கியமானார்கள்.

அகத்தியர், தான் அமைத்த லிங்க மூர்த்திக்கு மங்களபுரீஸ்வரர் என்று திருப்பெயர் சூட்டி வழிபட்டார். அத்துடன், ``யாம் பெற்ற இன்பத்தை இவ்வையகமும் பெறவேண்டும். ஆகவே, ஊழிதோறும் இங்கே நிலைத்திருக்கவேண்டும். இங்கு வந்து உம்மை வணங்கும் அடியார்களுக்கு அருளவேண்டும்’’ என்று வேண்டிக்கொண்டு விடைபெற்றார்.

இங்ஙனம் குறுமுனிவர் வழிபட்ட மகேசனை நாமும் மெய்யுருகித் தொழுதோம். இங்கு திருமணக் கோலத்தில் நின்ற நிலையிலும், தியாகவல்லி ஆவுடையாராக அமர்ந்த நிலையிலும், முதல் பிராகாரத்தில் பாணலிங்கப் பகுதியாக சயன நிலையிலுமாக மூன்று நிலைகளில் இறைவன் அருள்வது சிறப்பம்சம்! சுவாமியின் கருவறைக் கோஷ்டத்தில் துர்கை, பிரம்மன், சண்டிகேஸ்வரர் ஆகியோரை தரிசிக்கலாம்.

தட்சிணாமூர்த்தி
தட்சிணாமூர்த்தி


விசேஷ தட்சிணாமூர்த்தி!

திருச்சோபுரநாதர் ஆலயத்தில் அருளும் தட்சிணாமூர்த்தி விசேஷமானவர். இவரின் திருமேனியைத் தட்டினால் மரத்தைத் தட்டுவது போன்ற ஓசை எழுமாம்.

இசை ஆர்வம் உள்ளவர்கள், கல்வி-கலைகளில் மகத்தான வெற்றி பெற விரும்புவோர், இந்த தட்சிணாமூர்த்திக்கு வெள்ளை வஸ்திரம் சாத்தி வழிபடுவது சிறப்பு. முருகனும் விநாயகரும் இங்கே வாகனம் இல்லாமல் காட்சி தருகிறார்கள்!

திருக்கோயிலின் மகிமைகள் குறித்து கோயிலின் குருக்கள் திருச்சோபுரநாதன் நம்மிடம் பகிர்ந்து கொண்டார்: “அகத்தியர், கடற்கரை மணலில் மூலிகைச் சாற்றைப் பிழிந்து உருவாக்கிய லிங்கம் நம் ஸ்வாமி. ஆக, இவருக்குச் செய்யப்படும் அனைத்து அபிஷேக திரவியங்களும் மருந்தாகும். கல்யாணப் பரிகார தலமாகவும் திகழ்கிறது.

அகத்தியர் நான்கு யுகங்களும் எட்டு நாள்களும் வாழ்ந்ததாகப் புராணங்கள் கூறுகின்றன. எனவே அவரால் உருவாக்கிய இந்தச் சிவலிங்க மூர்த்தம் பல யுகங்கள் கடந்து அருள்செய்வது என்றே கூறலாம். சுவாமி, அம்பாள் சந்நிதிகளின் முன் உள்ள நந்திகள், வெளியே கொடுமரத்தின் அருகிலுள்ள நந்தி அனைவரையும் ஒரே இடத்தில் இருந்து தரிசிக்க முடியும் என்பது விசேஷ அம்சம். எனவே, இந்தக் கோயிலை தரிசிப்பது என்பது கயிலாயக் காட்சிக்குச் சமமாகும்’’ என்றார்.

நாயன்மார்கள்
நாயன்மார்கள்


தினமும் நான்கு கால பூஜைகள் நடைபெறுகின்றன இந்த ஆலயத்தில். புரட்டாசி 15 முதல் 25 தேதிக்குள்; மாசியில் 5 முதல் 10 தேதிக்குள் ஒரு நாள், அஸ்தமன நேரத்தில் சூரியக் கிரணங்கள் சுவாமியின் மீது விழுந்து பூஜிப்பது சிறப்பு.

ஐப்பசி அன்னா பிஷேகம் சிறப்பாக நடைபெறு கிறது. அன்று மூலவர் மீது சாத்தப்படும் அன்னம் மருத்துவக் குணம் கொண்டதாகத் திகழும். அந்த அன்னப் பிரசாதத்தை உண்டால், குழந்தை வரம் கிடைக்கும் என்பது நம்பிக்கை. பங்குனி உத்திரத் திருவிழாவும் இங்கே கோலாகலமாக நடைபெறுகிறது.

நீங்களும் ஒருமுறை திருச்சோபுரம் சென்று இவ்வூர் ஈசனை வணங்கி வழிபட்டு வாருங்கள்; உங்கள் வாழ்வில் நல்ல நல்ல திருப்பங்களை நிகழ்த்துவார் அந்தப் பெருமான்!

*****

மண்ணுக்குள் மூழ்கிய ஆலயம் மீண்டெழுந்த அற்புதம்!

ஒருமுறை வங்கக்கடல் பொங்கி எழுந்தது. திருச்சோபுர நாதர் ஆலயம் கடல்நீரில் மூழ்கியது. நாளடைவில் கடல்நீர் வற்றினாலும், கோயில் மண்ணுக்குள் புதையுண்டு போனதாம்.

ஆலயத்தை மண் மூடியிருந்த மேட்டை `கோயில் மேடு’ என்றே அழைத்து வந்தனர். அப்போது ஒருநாள். மதுரை ஆதீன திருமடத் தின் தம்பிரான் ஸ்ரீமத் இராமலிங்க சிவயோகி தம்பிரான் சுவாமிகள் நடுநாட்டு தலங்களை தரிசிக்கும் பொருட்டு இவ்வூருக்கு வந்தார்.

இப்பகுதி மக்களிடம் சோமநாதர் ஆலயம் எங்கு இருக்கிறது என்று விசாரித்தார். அவரை மணல்மேடு பகுதிக்கு அழைத்துச் சென்ற மக்கள், ‘இங்கு ஆலயம் எதுவும் இல்லை. ஆனால் இந்த இடம்தான் காலகாலமாக கோயில் மேடு என அழைக்கப்பட்டு வருகிறது’ என்று கூறினார்கள். மெய்சிலிர்த்த தம்பிரான் சுவாமிகள், அந்த ஆலயத்தின் வரலாற்றை மக்களுக்கு எடுத்துக் கூற ஆரம்பித்தார்

அப்போது வீசிய பலத்தக் காற்றில் மணல் மேட்டின் உச்சிப் பகுதி கரைந்து, ஆலயத்தின் ஸ்தூபி வெளியே தெரிய ஆரம்பித் தது. அதனைக் கண்ட மக்கள் மணலை அப்புறப் படுத்தி, ஆலயத்தைக் கண்டு ஆனந்தப் பரவசம் அடைந்தனர்.

பல ஆண்டுகளாக மணலுக்குள் மூழ்கிக் கிடந்த ஆலயத்தின் கருவறையை தரிசித்த மக்கள் பெரிதும் வியந்துபோனார்கள்.

காரணம், கருவறை தீபம் அப்போதும் அணையாமல் எரிந்துகொண்டிருந்தது. மட்டுமன்றி, சிறிது நேரத்துக்கு முன்புதான் பூஜை நடந்து முடிந்ததது போன்ற அறிகுறிகளும் தென்பட்டன!

அதன் பிறகு, மக்கள் ஒன்று கூடி ஆலயத் தைச் சீரமைத்து குடமுழுக்கு விழா நடத்திய துடன், நாள்தோறும் பூசைகள் நடத்தி வழிபடத் தொடங்கினர். `கல்யாணப் பரிகாரத் தலம் இது. இங்கு பிரசாதமாகத் தரப்படும் மஞ்சள் குங்குமத்தைத் தினமும் நெற்றியில் வைத்துவர வேண்டும். அந்த மஞ்சள் குங்குமம் தீர்வதற்குள் திருமணம் கூடிவரும் என்பது நம்பிக்கை!’