Published:Updated:

ராஜ்ஜியம் பிறந்தது!

ராஜ்ஜியம் பிறந்தது
பிரீமியம் ஸ்டோரி
News
ராஜ்ஜியம் பிறந்தது

வித்யாரண்யருக்கு என்ன செய்வதென்று தெரியவில்லை. மிகவும் கலங்கினார். அப்போது அவருக்கு ஓர் உபாயம் தோன்றிற்று.

ஆதிசங்கரர், வேதாந்த தேசிகர் போன்ற மகான்கள் எல்லாம் மகாலட்சுமியைப் பிரார்த்தித்து செல்வம் வர்ஷிக்கச் செய்த சம்பவங்களை நாம் அறிவோம். அதேபோன்று ஒரு சம்பவம் வித்யாரண்யர் என்னும் அத்வைத ஞானியின் வாழ்விலும் நடந்தது.

வித்யாரண்யர் பரம ஏழையாக இருந்தார். தன் குடும்பத்தின் வறுமையைப் போக்க மகாலட்சுமித் தாயாரை எண்ணித் தவமிருக்க ஆரம்பித்தார். கடுமையான அவரின் தவத்தில் மகிழ்ந்த தாயார் காட்சி கொடுத்து அருளினார். பின்பு, “வித்யாரண்யரே தங்களுக்கு இந்த ஜன்மத்தில் செல்வம் அருளும் விதி இல்லை என்பதால் அடுத்த ஜன்மாவில் பெரும் செல்வம் அருள்கிறேன்” என்று ஆசீர்வதித்தார்.

வித்யாரண்யருக்கு என்ன செய்வதென்று தெரியவில்லை. மிகவும் கலங்கினார். அப்போது அவருக்கு ஓர் உபாயம் தோன்றிற்று. ஒருவர் சந்நியாசம் பெற்றுக்கொண்டால் அது மறுபிறவி எடுத்ததாகவே அர்த்தம். வித்யாரண்யர் உடனடியாக சந்நியாசம் பெற்றுக்கொண்டுவிட்டார்.

ராஜ்ஜியம் பிறந்தது
ராஜ்ஜியம் பிறந்தது

இப்போது அன்னையை தியானித்து, “தாயே நான் சந்நியாசம் பெற்றுக்கொண்டுவிட்டேன். அதனால் மறுபிறவி எடுத்ததாகவே கொள்ள வேண்டும். அதனால் இப்போதே செல்வத்தை அருளச் செய்” என்று வேண்டினார். அடுத்த கணம் வைரமும், வைடூரியமும், தங்கமும், மணிகளுமாய் வானிலிருந்து பெருமழை போலப் பெய்யத் தொடங்கின. அவரைச் சுற்றி மாபெரும் செல்வம் சிதறிக்கிடந்தது.

பெரும் செல்வத்தைக் கண்டதும் மகிழ்ச்சி வருவதற்கு பதிலாக துக்கம் கொண்டார் வித்யாரண்யர். இவ்வளவு செல்வங்களையும் அனுபவிக்க தான் தற்போது இல்லறத்தில் இல்லையே.

மேலும், துறவி என்பவர் செல்வத்தை நாடாதவனாக அல்லவா இருக்க வேண்டும் என்று நினைத்தார். ஆனால் அடுத்த கணம் அவர் துக்கத்தைத் துறந்தார்.

ராஜ்ஜியம் பிறந்தது
ராஜ்ஜியம் பிறந்தது

தாயாரின் செயல்கள் அனைத்தும் காரணமில்லாமல் இருக்காது என்று நினைத்தார். தான் துறவறம் பெற்றதும் செல்வ மழை பொழிந்ததும் ஏதோ ஒரு அரும் செயலுக்காகத்தான் என்பதைப் புரிந்துகொண்டார்.

அப்போது அந்நியர் படையெடுப்பால் நம் தேசத்தில் பல ஆலயங்களும் சிதைக்கப்பட்டன. அவற்றைப் புனருத்தாரணம் செய்யவும் அந்நியரைத் தோற்கடிக்கவும் வேண்டிய கட்டாயம் ஏற்பட்டது. வித்யாரண்யருக்கு விஷயம் விளங்கிவிட்டது.

வித்யாரண்யர் ஆட்டிடையர்களான ‘ஹரிஹரர் - புக்கர்’ எனும் இருவரைத் தேர்ந்தெடுத்தார். அவர்கள் வசம் பெரும் செல்வத்தைத் தந்து பெரும் சாம்ராஜ்ஜியம் அமைக்கப் பணித்தார். அவரே அவர்களுக்கான ராஜ்ஜியத்தை ஏற்படுத்திப் பட்டாபிஷேகமும் செய்வித்தார்.

இருவரும் வித்யாரண்யரின் கட்டளையை ஏற்று விஜயநகரப் பேரரசை உருவாக்கி, தென் நாடு முழுவதும் ஆலயத் திருப்பணிகள் செய்து நம் பாரம்பர்யத்தை நிலை நிறுத்தினர்.

- எஸ். சக்திதரன், சென்னை-37