Published:Updated:

திரெளபதியின் கிருஷ்ண பக்தி

திரெளபதியின் கிருஷ்ண பக்தி
பிரீமியம் ஸ்டோரி
News
திரெளபதியின் கிருஷ்ண பக்தி

திரௌபதியின் கூந்தலில் உள்ள ஒவ்வொரு ரோமத்தில் இருந்தும் ‘கண்ணா... கண்ணா...’ எனும் சத்தம் வந்து கொண்டே இருந்தது.

எல்லாவித கவலைகள் இருந்தபோதிலும் கிருஷ்ணரின் மீது அதீத பக்தி கொண்டிருந்தாள் திரௌபதி. பாரதப் போர் நிகழ்ந்தது; பாண்டவர்கள் வெற்றி பெற்றனர்.

பாஞ்சாலி தனது சபதத்தின்படி கூந்தலை முடிந்துகொள்ள வேண்டிய தருணம் வந்தது. ஆனால், நெடுங்காலமாகத் தலையில் எண்ணெய் தடவாததாலும், வாசனாதி திரவியங்களைப் பூசிக் கொள்ளாததாலும் சிக்கு நிறைந்து காணப் பட்டது திரௌபதியின் கூந்தல்!

இதே வேளையில், தனது அரண்மனையில் ஆழ்ந்த யோசனையில் இருந்தார் பகவான் கிருஷ்ணர். அருகிலிருந்த பாமாவும் ருக்மிணியும் கவலை கொண்டனர். அவர்கள், ‘`பதினெட்டு நாட்களாகப் போர்க்களத்திலேயே இருந்தீர்கள். இப்போது, அரண்மனைக்குத் திரும்பிய பிறகும் என்ன யோசனை?’’ என்று கேட்டனர்.

மெள்ள புன்னகைத்த பகவான், ‘`என் அன்புச் சகோதரி திரௌபதியைப் பற்றிச் சிந்தித்துக் கொண்டிருந்தேன். அவள் என் மீது கொண்ட பக்தி அளப்பரியது. முன்பொரு முறை, நான் ஆற்றில் நீராடிக் கொண்டிருந்தபோது, நண்பர்கள் சிலர் விளையாட்டாகக் கருதி எனது கௌபீனத்தை பறித்து வைத்துக் கொண்டனர். நான் கரையேற முடியாமல் தவித்தேன். இதையறிந்த திரௌபதி தன் புடவைத் தலைப்பைக் கிழித்து என் மானம் காக்க உதவினாள்.

இதன் பலனாகவே... கௌரவ சபையில் அவள் துகிலுரியப்பட்டபோது, அவளின் மானத்தைக் காத்து அருள் புரிந்தேன். அன்பர்கள் பிரியத்துடன் எனக்குத் தருவதை, பன்மடங்காக திருப்பி அளிப்பதுதானே எனது கடமை!’’ என்றார்.

திரெளபதியின் கிருஷ்ண பக்தி

இதைக் கேட்ட பாமாவும் ருக்மிணியும் அவரிடம் கோபித்துக் கொண்டனர். ‘`அப்படியெனில், நாங்கள் உங்கள்மீது கொண்டிருக்கும் பக்தியை குறைத்து மதிப்பிடுகிறீர்கள். அப்படித்தானே?’’ என்றனர் கோபம் குறையாமல்.

இதற்குப் பதிலேதும் கூறாத பரந்தாமன், தேவியர் இருவரையும் அழைத்துக் கொண்டு பாண்டவர்களின் அரண்மனையை அடைந்தார்.

அங்கு, துச்சாதனனின் ரத்தம் தடவப்பட்ட- சிக்குகள் நிறைந்த தனது கூந்தலுடன் போராடிக் கொண்டிருந்தாள் திரௌபதி!

இதைக் கண்ட பாமாவும் ருக்மிணியும் அவளது கூந்தலைவ் சரிசெய்யும் பணியில் ஈடுபட்டனர்.

அப்போது, திரௌபதியின் கூந்தலில் உள்ள ஒவ்வொரு ரோமத்தில் இருந்தும் ‘கண்ணா... கண்ணா...’ எனும் சத்தம் வந்து கொண்டே இருந்தது.

இருவரும் அசந்து போனார்கள். ‘திரௌபதியின் உள்ளத்தில் மட்டுமல்ல, அவளின் ஒவ்வொரு ரோமமும் கண்ணனின் நாமம் சொல்கின்றனவே!’ என்று திரௌபதியின் கிருஷ்ணபக்தியை எண்ணி வியந்து நின்றனர்.

-ஆர்.கண்ணன், சென்னை-61

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz