மாசி மாதத்தில் நதி, ஏரி, குளம் என எதுவாக இருந்தாலும் குறைந்தபட்சம் பசுவின் முழங்கால் நனையும் அளவுக்கு நீர் இருந்தால் கூடப் போதும்.
மாதங்களில் சந்திர மாதங்கள், சூரிய மாதங்கள் என்று இரண்டு உண்டு. இதில் சூரியனை அடிப்படையாகக் கொண்டவையே நாம் கடைப் பிடிக்கும் சித்திரை, வைகாசி முதலிய பன்னிரண்டு மாதங்கள்.
சந்திரமாதங்கள் சந்திரனின் சுக்லபட்ச பிரதமை யில் தொடங்கி அடுத்த அமாவாசை வரை உள்ள மாதமாகும். அவ்வாறு தை அமாவாசைக்கு அடுத்துவரும் பிரதமையில் தொடங்கும் மாதம் மாக மாதம். வரும் 12.2.2021 அன்று மாக மாதமும் 13.2.2021 அன்று மாசி மாதமும் பிறக்கின்றன.
இந்த ஆண்டு மாக மாதம் பிறக்கும் நாளிலேயே சூரிய பகவான் கும்ப ராசியில் பிரவேசிக்கிறார் என்பதால் கும்ப சங்கராந்தியும் அன்றே கடைப் பிடிக்கப்படும். ஒவ்வொரு சங்கராந்தியுமே புண்ணிய பலன்கள் தருவதுதான். அதிலும் கும்ப சங்கராந்தி மிகுந்த முக்கியத்துவம் வாய்ந்தது. அன்று நீர் நிலைகளில் நீராடினால் நம் பாவங்கள் தொலைவதோடு மன நலமும் மேம்படும் என்கிறார்கள் பெரியோர்கள்.
குறிப்பாக தன லாபம் வேண்டுபவர்கள் கட்டாயம் அந்த நாளில் புண்ணிய காலத்தில் இறை வனை வணங்கி நீராட வேண்டும்.
மாசி மாதத்தில்தான் நதி தீரங்களைக் கொண்டாடும் மகாமகம், கும்பமேளா ஆகிய உற்சவங்கள் கொண்டாடப்படும். சிவனுக்கு உகந்த சிவராத்திரியும் மாசி மகமும் கொண்டாடப் படும் மாதம் இது. எனவே இந்த மாதம் முழுவதுமே நீர் நிலைகள் அனைத்துமே புண்ணிய நதிகளாக விளங்கும் என்பது நம்பிக்கை.
பொதுவாக நீர் நிலைகளில் நீராடும்போது மூன்றுமுறை முங்கிக் குளிக்க வேண்டும் என்பது ஐதிகம். முதல்முறை மூழ்கும்போது பாவம் கரையும்; இரண்டாம்முறை - புண்ணிய பலம் பெருகும்; மூன்றாம் முழுக்கால் இறையருளும் கிடைக்கும் என்பது நம்பிக்கை.
மாசி மாதத்தில்... நதி, ஏரி, குளம் என எதுவாக இருந்தாலும் குறைந்தபட்சம் பசுவின் முழங்கால் நனையும் அளவுக்கு நீர் இருந்தால் கூடப் போதும். அந்த நீர் நிலையில் குளித்தாலே புண்ணியப் பலன்கள் கிடைக்கும் என்கிறது சாஸ்திரம்!
-கே.விசாலாக்ஷி, மதுரை-2