கேள்வி - பதில்: விபூதி அணியும்போது சிவநாமம் சொன்னால் போதுமா?

? சிவ தீட்சை பெறுவதன் சிறப்பென்ன?, நெற்றியில் திருநீறு அணியும்போது, சிவ நாமம் சொன்னால் போதுமா அல்லது அதற்கென பிரத்யேக மந்திரம் உண்டா?

- கே.கண்ணன், மேலூர்

. சிவதீட்சை என்பது, மனிதராகப் பிறந்த அனைவரும் கண்டிப்பாகப் பெற்றுச் சிவனை அடைந்து ஆனந்தம் அடைவதற்கு உரிய வழியாகும். பல மடங்கள், மக்களுக்குச் சிறந்த முறையில் தீட்சை அளித்து, நல்வழியில் அழைத்துச் செல்லும் பணியை மிகச் சிறப்பாக செய்து வருகின்றன.

ஆசார்யரிடம் தீட்சை பெற்றுக் கொண்ட வர்கள், விபூதி தரிக்கும்போது, ஒவ்வோர் இடத்திலும் அதற்கு உரிய மந்திரங்களைச் சொல்லி வைத்துக்கொள்வதே வழக்கம். இதுபற்றி குருவை அணுகி அறிந்துகொள்வதே சரியானது.

. பொதுவாக தீட்சை பெறாதவர்கள் திருநீறு தரிக்கும்போது, ‘சிவசிவ’ என்று கூறியபடி, பரமனை நினைத்து வணங்கி திருநீறு அணிய லாம். தீட்சை பெற்றவர்கள், பஞ்சப்ரம்ம ஷடங்க மந்திரங்களை தீட்சையின் வாயிலாகப் பெற்று, குருவின் வழிகாட்டுதலுடன் அவற்றைக் கூறியபடி, அனைத்து ஐஸ்வர்யங்களின் இருப்பிடமான பஸ்மதாரணத்தை மேற்கொள்ளலாம். ‘பஸ்மதாரண விதி’ என்றே பல ஆகமச் சார்பு நூல்களில், ஆசார்யர்கள் பலரும் இதுகுறித்து மிகச் சிறந்த முறையில் விளக்கி உள்ளார்கள்.

. ? வீட்டில் தெய்வப் படங்களுக்கு, விளக்குக்கு அணிவிக்கப்படும் மலர்கள், சரங்கள் வாடிப் போய்விட்டால், அவற்றை உடனடியாக அகற்றிவிட வேண்டுமா?

நான் தினமும் காலை பூஜையின்போது பழைய மலர்களை அகற்றிவிட்டுப் புது மலர்கள் சூட்டுகிறேன். இது சரியா?

- எம்.கீர்த்தனாவள்ளி, கோவை-2

. தினமும் காலையில் நீராடி உடலையும் உள்ளத்தையும் தூய்மை செய்துகொண்ட பிறகே ஸ்வாமிக்குப் புஷ்பங்கள் சாத்த வேண்டும். மாலை வேளையிலும் மலர்களைச் சாத்தவேண்டும் என்றால், நீராடி நம்மைத் தூய்மைப்படுத்திக் கொண்டு அணிவிப்பதே சிறந்தது.

. ஆக, மாலையில் புதிய புஷ்பங்கள் சமர்ப்பிக்கும்போது பழையவற்றை அகற்றலாம். அப்படி முடியாவிட்டால், மறுநாள் காலையில் புதிய மலர்களைச் சூட்டுமுன் பழையவற்றை அகற்றலாம். அதில் தவறு இல்லை.

தூய்மைதான் முக்கியம். கடவுளுக்குச் சமர்ப்பிக்கப்படும் மலர்கள், நம்முடைய முன் வினைகளைப் போக்கக்கூடியவை. எனவே, எவ்வளவு மலர்கள் வேண்டுமானாலும் ஸ்வாமிக்குச் சமர்ப்பிக்கலாம்.

. ? ருத்திராட்சம் மருத்துவக் குணம் கொண்டதா? `ருத்திராட்சத்தைத் தீண்டும் நீர் தீர்த்தமாகிறது; பிணிகளைத் தீர்க்கும் வல்லமையைப் பெறுகிறது...’ எனப் போன்ற தகவல்கள் சமூக வலைத்தளங்களில் வருகின்றன, அவை சரியானவைதானா?

- வீ.வேல்முருகன், பாளையங்கோட்டை

. ருத்திராட்சம் பற்றி தாங்கள் கேள்விப்பட்டது மிகைப்படுத்தப்பட்ட ஒன்று. பிணிகளைத் தலைதூக்காமல் செய்வதும், இன்னும் பிற விஷயங்களைக் கட்டுக்குள் வைப்பதும் நமது உணவு முறையே. எனவே இந்த விஷயங் களுக்காக ருத்திராட்சத்தைத் தேடி அலைய வேண்டாம்.

தாவர இனம் அனைத்திலும் மருத்துவக் குணம் ஒளிந்திருப்பதாக ஆயுர்வேதம் கூறும். படைப்புகள் அத்தனையும் நன்மை - தீமைகளின் கலவை (குண தோஷ மிச்ரம்) என்பது ஆயுர்வேதத்தின் கணிப்பு.

. எப்போதும், தனித்த நிலையில் ஒரு மூலிகை முழுப் பயனை அளிக்காது. அதிலுள்ள நஞ்சை அகற்றவும் குறிப்பிட்ட அந்த மூலிகையின் குணத்தைப் பெருக்கவும் மற்றொரு மூலிகையின் சேர்க்கை தேவை.

கட்டுப்பாடான உணவு மற்றும் நல்ல சிந்தனை இருந்தால் நோயாளியாக மாற மாட்டோம். ஆகவே, குறிப்பிட்ட ஒரு பொருளின் மிகைப்படுத்தப்பட்ட பெருமை களை அப்படியே எடுத்துக் கொள்ளவேண்டாம்.

. ? வீட்டில் சிறு சிறு பிரச்னைகள். எனவே, ஜாதகம் பார்க்க சென்றோம். ஜாதக விளக்கம் சொன்னவர்கள், உரிய பரிகாரங்களையும் எடுத்துச் சொன்னார்கள். சில பரிகாரங்களைச் செய்தோம். பொருளாதாரச் சூழல் காரணமாக சிலவற்றைச் செய்ய முடியவில்லை.

இதுகுறித்து, நீங்கள் வழிகாட்ட வேண்டும்.

- எல்.லட்சுமணன், காரைக்குடி

. `யதா விபவ விஸ்தரம்’ என்கின்றன சாஸ்திரங்கள். நாம், நமது பொருளாதார சக்திக்கு ஏற்ப பூஜைகள் செய்யலாம். எந்தக் காரணத்தை முன்னிட்டும் கடன் வாங்கிச் செய்வது கூடாது.

நீங்கள், உங்களின் குலதெய்வந்தை வணங்கி வழிபட்டு, குறைகளைச் சொல்லி முறையிடுங்கள். குலதெய்வம் உங்களது நிலைமையைப் புரிந்துகொள்ளும். மேலும், தினமும் கோயிலுக்குச் சென்று வழிபடுங்கள். ஆலயங்கள், நந்தவனங்கள், மாட்டுத் தொழுவம், நீர்நிலைகள் ஆகியவற்றை முடிந்த போதெல்லாம் சுத்தம் செய்யுங்கள். இவற்றின் மூலம் உங்களுடைய பூர்வ ஜன்ம வினைகளால் ஏற்படக் கூடிய தோஷங்கள் நீங்கிவிடும்; தெய்வப் பலம் கைகூடும். கவலைவேண்டாம்.

- பதில்கள் தொடரும்...

. வா சகர்களே... ஆன்மிகம் தொடர்பான அனைத்துக் கேள்விகளுக்கும் பதில் தருகிறார்,

சென்னை `காளிகாம்பாள் கோயில்' சிவஶ்ரீசண்முக சிவாசார்யர்.

கேள்விகள் அனுப்பவேண்டிய முகவரி: கேள்வி-பதில், சக்தி விகடன் 757, அண்ணாசாலை, சென்னை-600 002

கேள்வி - பதில்: விபூதி அணியும்போது சிவநாமம் சொன்னால் போதுமா?

ஷண்முக சிவாசார்யர்