Published:Updated:

வளையல் கேட்ட சமயபுரத்தாள்!

“எங்க ஊருக்கு வாம்மா... கை நிறைய போட்டுவிடுறேன்” என்று சொல்லவும் கலகலவென சிரித்த அந்தப் பெண், “நீ போட்டுவிட வேண்டாம்.

பிரீமியம் ஸ்டோரி
சுமார் 600 ஆண்டுகளுக்கு முன்பாக, கும்பகோணம் அருகே உள்ள திருநறையூர் கிராமத்தைச் சேர்ந்த வளையல் வியாபாரிகள், சமயபுரம் பங்குனித் திருவிழாவுக்கு வளையல் விற்கச் சென்றனர். விழாவும் முடிந்தது.

அன்று இரவு வியாபாரிகளில் மூத்தவர் ஒருவரின் கனவில் அன்னை இளம் பெண்ணாகத் தோன்றினாள். அந்த வியாபாரியிடம் கை நீட்டி, `‘எனக்கு வளையல் போட்டுவிட முடியுமா?” என்று கேட்டாள்.

“அதனால் என்ன கட்டாயம் போட்டு விடுகிறேன்” என்று சொன்ன வியாபாரி, அந்தப் பெண்ணுக்கு வளையல் போட்டுவிட ஆரம்பித்தார். ஆனால், சோதனையாகப் போடும் வளையல் எல்லாம் உடைந்தன. கைவசம் இருந்த எல்லா வளையல்களும் உடைந்துவிட்டன.

தன் வாழ்விலேயே இதுவரை இப்படி ஆனதில்லையே என்று வருந்திய வியாபாரி, “எங்க ஊருக்கு வாம்மா... கை நிறைய போட்டுவிடுறேன்” என்று சொல்லவும் கலகலவென சிரித்த அந்தப் பெண், “நீ போட்டுவிட வேண்டாம். நான் வேண்டுமானால் உன் ஊர்க்காரர்களுக்குப் போடுகிறேன்” என்று சொல்லி மறைந்துவிட்டாள். கனவு கலைந்து எழுந்துபார்த்தால், அவரைச் சுற்றி நிஜமாகவே வளையல்கள் உடைந்துகிடந்தன!

அதுமட்டுமல்லாமல், அவருக்கும் அவருடன் வந்த ஊர்க்காரர்கள் அனைவருக்கும் முத்துமுத்தாக அம்மன் போட்டிருந்தது. பெரியவர் கண்ணீர் விட்டு, “தாயே, இந்த எளிய மக்களோடு என்ன உனக்கு விளையாட்டு...” என்று முறையிட்டார். அப்போது கோயில் அர்ச்சகர் ஓடிவந்தார். கை நிறைய பொற் காசுகளைத் தந்து, ``அம்மா அசரீரியாக, உடைந்த வளையல்களுக்கு இந்தப் பொற்காசுகளைத் தரச்சொன்னாள். மேலும் அம்மை முத்துக்கள் போட்ட வர்கள் மீது திருநீறு பூச அது மறையும் என்றும் சொன்னாள்” என்றார்.

வளையல் கேட்ட சமயபுரத்தாள்!

இதைக் கேட்டவர்கள் சிலிர்த்தனர். அனைவர்மீதும் திருநீறு பூச அம்மை முத்துகளும் மறைந்தன. அனைவரும் அன்னையை மனதார வேண்டி நின்றபோது, அங்கே ஆகாயத்தில் அன்னை தோன்றினாள். அனைவரையும் ஆசீர்வதித்து, “உங்கள் விருப்பம்போலவே நான் ஆகாச மாரியம்மனாக ஆண்டில் 13 நாள்கள் உங்கள் ஊரில் வந்து தங்குவேன். மல்லிகை, முல்லை, மற்றும் முன்கை வளையல்கள் வேண்டி விரும்பி வருவேன். நீங்கள் செய்யும் பூஜைகளை ஏற்று மகிழ்வேன்” என்று கூறி மறைந்தாள்.

அதுமுதல் திருநறையூரில், வைகாசி அமாவாசையைத் தொடர்ந்து 13 நாள்கள் திருவிழா கொண்டாடுகிறார்கள். அந்த விழாவில் பக்தர்கள் ஏராளமாய்ச் சமர்ப்பிக்கும் மல்லிகை முல்லை, வளையல்களை ஏற்று வேண்டும் வரங்களைத் தந்து அருள்பாலிக்கிறாள், ஆகாச மாரியம்மன் இந்த அம்மனை வேண்டிக்கொண்டால் விரைவில் திருமணம் கைகூடும் என்றும் நம்பிக்கையோடு சொல்கிறார்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு