Published:Updated:

குரு பக்தி கரை சேர்க்கும்!

குரு பக்தி
பிரீமியம் ஸ்டோரி
News
குரு பக்தி

தன் நாமத்துக்கே அந்த மகிமை உண்டென்றால் தனக்கு எவ்வளவு மகிமை இருக்கும் என்று நினைத்தார்.

ஸ்ரீஆதிசங்கரர் அருளிய ஞானநூல்களில் ஒன்று பிரஸ்னோத்தர ரத்னமாலா. ‘பிரஸ்னோத்தர’ என்றால் `வினாவிடை’ என்று பொருள். இந்த நூலில், ஞானம் தொடர்பான கேள்விகளை எழுப்பி, அவற்றுக்கு அழகான பதில்களையும் வழங்கியிருக்கிறார், ஸ்ரீஆதிசங்கரர்.

அவற்றில் ஒரு கேள்வி `யார் குரு?’ என்பது.

இந்தக் கேள்விக்கு ஸ்ரீஆதிசங்கரர் தரும் பதில்: ‘உண்மையை உணர்ந்தவர். மாணவர்களின் நலனை எப்போதும் கருதுபவரே உண்மையான குரு’ என்பதுதான்.

ஆனால், வாழ்வில் அப்படிப் பட்ட தகுதிவாய்ந்த குருவைக் கண்டுபிடிப்பது மிகக் கடினம். எனினும் எவர் குருவாக வாய்க்கிறாரோ, அவரிடம் குருபக்தியோடு நடந்து கொள்ளும் சீடனுக்கு, மகா குருவிடம் பயின்ற ஞானமும் ஸித்தியும் ஏற்பட்டு விடும். இதற்கு உதாரணமாக ஸ்ரீராமகிருஷ்ண பரமஹம்சர் அருளிய கதை ஒன்றைச் சொல்லலாம்.

ஓர் ஊரின் ஆற்றங்கரையில் குருவும் சீடனும் இருந்தனர். அந்தக் குருவானவர் பெரிய ஞானி இல்லை, ஆனாலும் அந்தச் சீடன் தன் குருநாதர் மீது மிகுந்த பக்தி கொண்டவன். குருபாத சேவையில் தன் கவனம் முழுவதையும் வைத்தவன்.

ஒருநாள் சீடன் வேலை யின் பொருட்டு ஆற்றின் மறு கரைக்கு வர வேண்டிய திருந்தது. குருவிடம் அனுமதி பெற்று மறுகரையை அடைந்தான். வேலை முடிந்த கணம், அக்கரையிலிருந்து குரு அவன் பெயர் சொல்லி அழைக்கும் சத்தம் கேட்டது.

குரு பக்தி
குரு பக்தி



அவ்வளவுதான் சீடனுக்குக் குருவின் முன் சென்று நிற்கவேண்டும் என்ற உணர்வு வந்துவிட்டது. வேகமாக நடந்தான். ஆறு வழக்கத்தைவிட அதிகமாக ஓடிக்கொண்டிருக்கிறது.

ஆனால் சீடனுக்கு அதெல்லாம் பொருட்டா கவே இல்லை. தன் குருவின் பெயரைச் சொல்லிக்கொண்டு ஆற்றில் நடக்க ஆரம்பித்தான். சில விநாடிகளில் மறுகரையை அடைந்து குருவைப் பணிந்துகொண்டான்.

எப்படி சீடனால் தண்ணீரில் நடக்க முடிந்தது என்னும் சந்தேகம் குருவுக்கு ஏற்பட்டது. அவனிடம் கேட்டார். அதற்கு சீடன், `‘தங்கள் திருநாமத்தைச் சொல்லிக்கொண்டே நடந்தேன்’’ என்று பதில் சொன்னான்.

இதைக் கேட்ட குருவுக்கு வியப்பாகி விட்டது. தன் நாமத்துக்கு அவ்வளவு மகிமையா என்று வியந்ததோடு, அகங்காரமும் கொண்டார்.

தன் நாமத்துக்கே அந்த மகிமை உண்டென்றால் தனக்கு எவ்வளவு மகிமை இருக்கும் என்று நினைத்தார். நேரே நதியை அடைந்து பெருமையாக அதில் கால் வைத்தார். அடுத்த கணம் நீருக்குள் விழுந்து மூழ்கினார்.

உண்மையில் சீடனுக்கு வாய்த்த ஸித்தி அவர் நாமத்தால் கூடியதல்ல. அது அவனின் குருபக்தி என்னும் பண்பினால் உண்டானது.

நம்பிக்கையோடு நாம் செய்யும் எந்த செயலும் நமக்கு நம்பமுடியாத பலன்களை வழங்கும். சந்தேகம் இல்லாத பக்தியும் நாம ஜபமுமே பக்தர் களைக் காக்கும் பாதுகாப்பு என்றால் அது மிகையில்லை.