Published:Updated:

இரண்டு காசுகள்!

பக்தர்கள் பலரும் அவரிடம் சென்று தங்களுக்கு உபதேசம் செய்யும்படி வேண்டியதுண்டு

பிரீமியம் ஸ்டோரி

ந்தப் பூமியில் மனிதர்களை நெறிப்படுத்த, எத்தனையோ ஞானிகள் அவதரித்திருக்கிறார்கள். அப்படியான அவதார புருஷர்களில் அற்புதமானவர் ஷீர்டி ஸ்ரீசாயிபாபா.

பக்தர்கள் பலரும் அவரிடம் சென்று தங்களுக்கு உபதேசம் செய்யும்படி வேண்டியதுண்டு. ஆனால், சாயிநாதர் ஷீர்டியில் இருந்த 60 ஆண்டுகளில் தம் பக்தர்கள் எவருக்கும் எந்த மந்திரத்தையும் உபதேசித்ததில்லை. ஒருமுறை ஷீர்டிக்கு வந்த ராதாபாய் எனும் பக்தை பாபாவை தரிசித்தார். ஷீர்டிக்குள் நுழைந்த கணமே அவரின் மனம், பாபாவைக் குருநாதராக ஏற்றுக்கொண்டுவிட்டது.

ஆகவே, அவரிடம் எப்படியேனும் உபதேசம் பெறவேண்டும் என விரும்பினார். ஆனால் சாயியோ மறுத்துவிட்டார். ராதாபாய் அதன்பொருட்டு உண்ணாவிரதம் இருக்கத் தொடங்கினார். மூன்று நாள்கள் கழிந்தன. ராதாபாய் தண்ணீர்கூட குடிக்கவில்லை. பாபாவிடம் உபதேசம் பெற்றே தீர வேண்டும் என்பதில் வைராக்கியத்துடன் இருந்தார்.

இந்தத் தகவல் சாயிபாபாவுக்குத் தெரிய வந்தது. ஆனால் சாயி, ராதாபாயைக் கண்டுகொள்ளவே இல்லை. அப்போது ஒரு பக்தர் சாயிபாபாவிடம், ‘`அவள் உயிருக்கு ஏதாவது ஆகிவிட்டால், இந்த உலகம் உங்களைத்தான் தூற்றும். எனவே, கருணைகூர்ந்து அவருக்கு ஆசியாவது வழங்குங்கள்’’ என்றார். அதை ஏற்றுக்கொண்ட சாயிபாபா, ராதாபாயை துவாரகாமாயிக்கு வரவழைத்தார். அவருக்கு ஆசி வழங்கி அறிவுரை கூறினார்.

“அம்மா! உண்மையிலேயே நீங்கள் என் தாய். நான் உங்கள் குழந்தை. ஆனால், என்னிடம் உபதேசம் கேட்டு, தேவையில்லாமல் உங்களை நீங்களே கஷ்டப்படுத்திக்கொள்கிறீர்கள். என் சொந்தக் கதையை இன்று உங்களுக்காகச் சொல்கிறேன்; கவனமாகக் கேளுங்கள்...

எனக்கு ஒரு குருநாதர் இருந்தார். அவர் மிகுந்த அன்பு கொண்டவர். அவருக்கு நான் சீடராக இருந்து நீண்ட நாள்கள் சேவை செய்தேன். அவரிடம் உபதேசம் பெறவேண்டும் என்ற ஆசை எனக்கு ஏற்பட்டது. இப்போது நீங்கள் என்னிடம் உபதேசம் கேட்க எப்படி ஆசைப்படுகிறீர்களோ... அதுமாதிரிதான் நானும் அப்போது ஆசைப்பட்டேன். ஆனால், குருநாதர் எனக்கு எந்த உபதேசமும் சொல்லவில்லை. எந்த ஒரு மந்திரத்தையும் அவர் எனக்குக் கற்றுத்தரவில்லை.

ஒருநாள், அவர் ‘உபதேசம் பெறவேண்டும்’ என்ற என்னுடைய வைராக்கியத்தை - தீவிரத்தை அறிந்தார். உடனே என்னை அழைத்தார். மொட்டை அடிக்கச் செய்தார். பிறகு இரண்டு காசுகளை தட்சணையாகக் கேட்டார். காசு என்றால் இந்த இடத்தில் பணம் என்று அர்த்தம் இல்லை. நம்பிக்கை, பொறுமை எனும் இரண்டையும்தான் அவர் தட்சணையாகக் கேட்டார். இந்த இரண்டையும் நான் என் குருநாதருக்கு அளித்தேன். அதனால், குருநாதர் மிகவும் மகிழ்ச்சி அடைந்தார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பன்னிரண்டு ஆண்டுகள் நான் என் குருநாதருடன் இருந்தேன். ‘குருவுக்குப் பணிவிடை செய்வதைத் தவிர வேறு எந்த வேலையும் இல்லை’ என்ற நிலை ஏற்பட்டது. எனது ஒரே அடைக்கலம் குருதான் என்பது உறுதியானது. அதனால் என் மனம் முழுமையாக அவர்மீதே இருந்தது. இந்த உறுதியான நம்பிக்கை என்பது, நான் என் குருநாதருக்குக் கொடுத்த ஒரு பைசா தட்சணையாகும்.

இரண்டு காசுகள்!

மற்றொரு பைசா பொறுமை எனும் தட்சணையாகும். நான் என் குருவுக்கு மிக நீண்ட நாள்கள் எந்த எதிர்பார்ப்பும் இல்லாமல் பொறுமையாக சேவை செய்தேன். இந்தப் பொறுமையேப் பிறவிப் பெருங் கடலை நீந்தி முக்தி பெற உதவும்.

நம்பிக்கையும், பொறுமையும் இரட்டைப் பிறவிகள். ஒருவரை ஒருவர் நேசிக்கும் இரட்டைப் பிறவிகள் போல் நம்பிக்கையும், பொறுமையும் இருக்கவேண்டும். இதை நீங்கள் எப்போதும் மனதில் நிலைநிறுத்திக் கொள்ளவேண்டும்.

என் குருநாதர் என்னிடம் எதையும் எதிர்பார்க்கவில்லை. அதற்காக அவர் என்னைப் புறக்கணிக்கவுமில்லை. தாய் ஆமையானது, குட்டியைப் பிரிந்து நீண்ட தொலைவில் இருந்தாலும், தன் அன்பை எண்ணத்தால் வளர்த்துவிடும். என் குருநாதரும் என்னிடம் அப்படித்தான் இருந்தார்.

அவர் எனக்கு எந்த மந்திரமும், உபதேசமும் சொல்லித்தரவில்லை. அப்படியிருக்கும்போது, நான் எப்படி உங்களுக்கு உபதேசம் செய்ய முடியும். யாரிடமும் நீங்கள் உபதேசத்தை எதிர்பார்க்காதீர்கள். உங்கள் மனதில் என்னை நிலைநிறுத்துங்கள். உங்கள் எண்ணமும் செயலும் என்னையே குறிக்கோளாகக் கொண்டு இருக்க வேண்டும். அப்படி என்னை நீங்கள் நோக்கினால், நானும் உங்களை நோக்குவேன்.

குருவை மும்மூர்த்திகளின் அவதாரம் என்று மனதார நம்புங்கள். குருவே வழி நடத்துகிறார் என்று உறுதிகொள்ளுங்கள். அப்படி குருபக்தி உடையவர்களே, உண்மையில் உபதேசம் பெற்றதைப் போன்று ஆசீர்வதிக்கப்பட்டவர்கள் ஆவார்கள்” என்று சாயிபாபா கூறினார்.

அவர் தன் நீண்ட உரையை முடித்தபோது, அவரின் கண்கள் கருணை மழை பொழிவதாகத் தெரிந்தன ராதாபாய்க்கு; கசிந்துருகிக் கண்ணீர் உகுத்தார். அந்த நிமிடமே ஸ்ரீசாயிபாபாவின் அவதாரச் சிறப்பைப் புரிந்துகொண்டார்; உண்ணா விரதத்தையும் கைவிட்டார்!

- எஸ்.கோவிந்தராஜன், சென்னை-24

விரத பலன்!

ஏகாதசி - மனச் சாந்தி

பிரதோஷம் - பாவங்கள் நீங்கும்

பௌர்ணமி - ஐஸ்வர்யம் பெருகும்

சங்கடகர சதுர்ததி - தீய எண்ணம் விலகும்

அமாவாசை - குல அபிவிருத்தி

சஷ்டி - மகப்பேறு கிடைக்கும்

கார்த்திகை - கல்வி விருத்தி

- அ.ப.ஜெயபால்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு