திருத்தலங்கள்
தொடர்கள்
Published:Updated:

திருத்தொண்டர்! - 11 - ‘இந்த சிவமே எனக்குத் துணை!’

திருத்தொண்டர்
பிரீமியம் ஸ்டோரி
News
திருத்தொண்டர்

தினமும் சிவ தரிசனம் செய்து பழக்கப்பட்டவருக்குக் குடியேறிய ஊரில் சிவாலயம் ஏதும் இல்லையே என்கிற குறை வாட்டியது.

க்தியும் அர்ப்பணிப்புமே ஆன்மிகத்தின் இரு கண்கள். கோயில்களுக்குச் சென்று வேண்டுதல்கள் வைத்துத் திரும்பும் சாதாரண பக்தர்களுக்கு அருள்பாலிக்கும் இறைவன், சரணடைந்து அர்ப்பணிப்போடு பணி செய்யும் பக்குவம் பெற்றவர்களை ஆட்கொள்கிறான்.

கண்ணப்பன் சிவலிங்கத்தைக் கண்டதும் பக்திகொண்டான். பெருவனத்தில் கூரை அமைத்தான். வாயில் நீர் எடுத்துவந்து அபிஷேகித்தான். வேட்டையாடிய மாமிசத் தையே நிவேதித்தான். காட்டு மலர்கள் கொண்டு பூஜித்தான். இவையெல்லாம், கண்ட கணத்தில் கொண்ட பக்தியாலும் காதலாலும் விளைந்தவை. தரிசித்ததால் மட்டுமே தன்னிகரில்லா பக்தி பிறந்துவிடுமா என்ன... அவன் ஆட்கொள்ள வேண்டும் அல்லவா? சிவன் ஆட்கொண்டார்; திருவிளையாடல் நிகழ்த்தினார்; இந்த உலகில் நீங்காத புகழை கண்ணப்பனுக்குத் தந்தார்.

திரிபுரசுந்தரேஸ்வரர் சிவாலயம்
திரிபுரசுந்தரேஸ்வரர் சிவாலயம்
DIXITH


நாயன்மார்களுக்கு ஈடான பக்தியாளர்களை இன்று காண முடியாது. ஆனால், தம் வாழ்வை சிவத்தோடு இணைத்துக்கொண்டு சேவை செய்துவரும் அடியார்கள் அநேகர். அப்படி ஓர் அடியாரைக் காணும் பாக்கியம் கிடைத்தது.

திருச்சியிலிருந்து 15 நிமிடப் பயணத்தில் இருக்கிறது குண்டூர். அங்குதான் வசிக்கிறார் மணிவண்ணன். சொந்த ஊர் திருவாரூர். ஆரூரானின் திருவடிகளிலிருந்து புறப்பட்டு, திருச்சி வந்து சேரவேண்டிய காலத்தின் நிர்ப்பந்தம். அப்பா மீனாட்சி சுந்தரம்பிள்ளை. ஆரூரானின் சந்நிதியில் பாரி நாயனம் வாசிக்கும் பணி. மணிவண்ணனின் 20 வயதிலேயே தந்தை இறந்துபோகக் குடும்பத்தைத் தூக்கிச் சுமக்க வேண்டிய கட்டாயம் ஏற்பட்டது. தாயோடு திருச்சிக்கு இடம் பெயர்ந்தார்.

தினமும் சிவ தரிசனம் செய்து பழக்கப்பட்டவருக்குக் குடியேறிய ஊரில் சிவாலயம் ஏதும் இல்லையே என்கிற குறை வாட்டியது. இப்போதும் சரி அப்போதும் சரி பிரதோஷம் என்றால் சிவன் சந்நிதிதான். வேறு எங்கும் செல்லும் வழக்கமே கிடையாது. நண்பர்கள், உறவினர்கள் என யார் திருமணம், சுபகாரியம், கேளிக்கை என எதற்கு அழைத்தாலும், அன்று பிரதோஷ மாக இருந்தால் ஆரம்பத்திலேயே மறுத்து விடுவார். அப்படிப்பட்டவருக்கு சிவ தரிசனம் இல்லாத சில நாள்களே யுகம்போல கழிந்தன. ஒரு சனிபிரதோஷ நாளில் அருகில் ஏதேனும் சிவாலயம் உள்ளதா அல்லது திருச்சிக்குத்தான் போகவேண்டுமா என்று விசாரித்தார்.

அவரின் கண்களில் தெரிந்த கலக்கத்தைக் கண்ட அந்த ஊரைச் சேர்ந்த சுந்தரம் குருக்கள், `உனக்குச் சிவன்தானே வேண்டும். வா நான் காட்டுகிறேன்' என்று கூறி இவர் கையைப் பிடித்து அழைத்துச் சென்றார். சிவனை தரிசிக்கப்போகும் ஆனந்த அவசரத்திலும் சிவனுக்கு அபிஷேகிக்கக் கொஞ்சம் பாலையும் ஓரிரு பழங்களையும் எடுத்துக்கொண்டு அவரைப் பின்தொடர்ந்தார் மணிவண்ணன்.

ஈஸ்வரன் திடல்
ஈஸ்வரன் திடல்
DIXITH
மணிவண்ணன்
மணிவண்ணன்
DIXITH


சுந்தரம் குருக்கள் கொண்டு நிறுத்திய இடம் ஒரு வெட்டவெளியாக இருந்தது. அந்த இடத் துக்கு ஈஸ்வரன் திடல் என்று பெயர். கொஞ்சம் தள்ளி அந்த நிலத்தைச் சுற்றி வயல்கள். தீவு போன்ற அந்த நிலத்தின் நடுவில் ஒரு பெரிய வேப்ப மரம். அதன் கீழே நோக்கினால்...

சிவபெருமான் நிலத்தில் புதைந்திருக்கிறார். பாதி லிங்கம் மட்டுமே வெளியே தெரிகிறது. அவருக்கு முன்பாக நந்தி தேவர். அவரும் மண்ணில் புதைந்த நிலையில் பாதி மட்டுமே தெரிந்தார். மணிவண்ணன் கண்களில் கண்ணீர் பெருகியது. ஓடிச் சென்று சிவனைத் தழுவிக் கொண்டார். லிங்கத்தைச் சுற்றியிருந்த மண்ணைத் தோண்ட ஆரம்பித்தார். அருகில் நிலத்தில் வேலை செய்துகொண்டிருந்தவர்கள் உதவிக்கு வந்தனர். சிவனையும் நந்தியையும் மண்ணிலிருந்து முற்றிலும் வெளியே எடுத்து வைத்தனர். கொண்டு வந்திருந்த பாலால் அபிஷேகித்து, கிடைத்த மலர்களைச் சாத்தி நிவேதித்து வழிபாடு செய்தார். இனி இவரே தனக்குத் துணை என்று முடிசெய்துகொண்டார்.

2006 - ம் ஆண்டு தொடங்கியது இந்த பந்தம். தினமும் வந்து அபிஷேகிக்க ஆரம்பித்தார். சிவனுக்கு திரிபுரசுந்தரேஸ்வரர் என்பது திருநாமம். சில ஆண்டுகள் கழித்து சிவனுக்கு ஒரு சிறு கூரை அமைத்தார். பின்பு அந்தக் கூரையின் கீழ் அம்பிகை, விநாயகர், சண்டிகேஸ் வரர் மற்றும் முருகப்பெருமானை பிரதிஷ்டை செய்தார். இன்றும் அஸ்பெஸ்டாஸ் கூரையின் கீழ்தான் இந்த ஆலயம் உள்ளது.

ஆலயத்துக்குச் செல்ல நல்ல பாதைகூட இல்லை. வயல் வழிகளில்தான் செல்ல வேண்டும். சிவனடியார்களைத் தவிர பெரும்பாலானவர்கள் வாகனம் வந்து செல்லும் வசதியுள்ள ஆலயங்களுக்குத்தானே செல்கிறார் கள். அதனால் இந்தக் கோயிலுக்கு வருமானம் என்று எதுவும் இல்லை.

இந்த நிலையில் எப்படி சமாளிக்கிறார்? மணிவண்ணனிடமே கேட்டோம். சிரித்துக் கொண்டே, ``நம் கையில் என்ன இருக்கிறது... எல்லாம் சிவன் செயல்'' என்று முடித்துக் கொள்ளப் பார்த்தார். தொடர்ந்து அவரிடம் வற்புறுத்திக் கேட்கவும், சங்கோஜத்தோடு பேச ஆரம்பித்தார்.

``திருவளர்ச்சிப்பட்டியில் இருக்கும் சத்ரு சம்ஹார மூர்த்தி சுவாமி கோயில்லையும் வேலைபார்க்கிறேன். அங்கே மாதம் 7,000 கிடைக்கிறது. அதுபோதுமே குடும்பம் நடத்த'' என்று சொல்லிச் சிரித்தார்.

``என்ன 7000 போதுமா...'' என்று கேட்டோம்.

``ஆம்! அதுகூட இல்லாமல் இருந்த காலம் உண்டு. அதனால் அது பெரிய விஷயம்தான். அந்தக் கோயிலில் நான் சேர்ந்ததே ஈசனின் கருணைதான். எனக்கு சித்தர் வழிபாட்டில் ஆர்வம் அதிகம். அதனால்தான் சத்ரு சம்ஹார மூர்த்தி சுவாமி கோயிலுக்குப் போய் வந்து கொண்டிருந்தேன். அங்கே போவேன். வணங்கு வேன். வருவேன். அவ்வளவுதான்.

அப்படியிருக்கும்போதுதான் இந்தக் கோயி லில் பூஜை செய்ய ஆரம்பித்தேன். பொருளா தாரத் தேவைகள் அதிகம் இருந்த காலம். அப்போ ஒருநாள் சத்ரு சம்ஹாரமூர்த்தி கோயிலில் இருந்து போன் வந்தது. `நீங்க வந்து வேலை செய்யமுடியுமா'ன்னு கேட்டாங்க.

உண்மையில் எனக்கு அங்கு யாரையும் தெரியாது. அப்படியிருக்க, எந்த குருநாதனின் பாதங்களைச் சரணடைந்தேனோ அந்த குருநாதனின் கோயிலிலேயே சேவை செய்ய வாய்ப்பு கிடைத்தால், அது அற்புதம்தானே...

மேலும் எனக்கு ஜோதிடம் தெரியும். அதில் பக்தர்கள் தரும் காணிக்கை கொஞ்சம் கிடைக் கும். நான் யாரையும் எதுவும் கேட்க மாட்டேன். 5 ரூபாய் கொடுத்தாலும் வாங்கிக் கொள்வேன். 50 ரூபாய் கொடுத்தாலும் வாங்கிக்கொள்வேன். ஆனால், நான் சொல்லும் பரிகாரங்கள் அனைத்தும் திருமுறைகளின் அடிப்படை யிலேயே இருக்கும்.

என்னைக் கேட்டால் திருமுறைகளில் இல்லாத விஷயங்களே இல்லை. அது கற்பக விருட்சம். எனவே திருமுறைகளில் இருக்கும் பரிகாரத் தலங்களையே சொல்வேன். அங்கு சென்று செய்ய வேண்டிய பரிகாரமும் பதிகங் களைப் பாராயணம் செய்வதுதான். அதைச் செய்தாலே துயர் நீங்கி விடும். பலரும் தங்களின் வேண்டுதல் நிறைவேறியதாகச் சொல்லும்போது மனம் மகிழ்ச்சியடையும்.

திரிபுர சுந்தரேஸ்வரர்
திரிபுர சுந்தரேஸ்வரர்
DIXITH
நந்தி
நந்தி
DIXITH


சர்ப்ப தோஷம், ராகு கேது பரிகாரம்னா ஜோதிடர்கள் எல்லாம் `காளஹஸ்திக்குப் போ'ன்னு சொல்லுவாங்க. நான் இங்கே அருகில் இருக்கிற காமரசவல்லி தலத்துக்குப் போ என்று சொல்லுவேன். பாடல் பெற்ற தலம். கார்க்கோடகன் பூஜை செய்த தலம். எனவே அங்கே சென்று வழிபடுவது சிறப்பு. இப்படிப் பல கோயில்கள் திருச்சியைச் சுற்றி இருக்கு. அவற்றைச் சொல்வேன். பிரதானம் திருமுறை பாராயணம்தான். அதனாலேயே திருமுறை பாராயணத்தின்மீது பெரிய பிரியம் உண்டானது.

தொடர்ந்து, `உமையொருபாகன் அடியார் திருக்கூட்டம்' என்று ஓர் அமைப்பைத் தொடங்கி முற்றோதுதல்கள் நடத்தத் தொடங்கினோம். 8 கோயில்களில் முக்கியமான நாள்களில் முற்றோதுதல்களை நடத்திக்கிட்டு இருக்கோம். இறையருளால் இதுவரை 420 முற்றோதுதல்கள் செய்திருக்கோம்.

பொது இடங்களில் ஆர்வமாக இதைச் செய்வோம். காரணம் அதைப் பார்த்துப் பலரும் திருமுறைகளைப் படிக்க வரணும் என்பது விருப்பம். வீடுகளிலும் இதுபோன்ற முற்றோதல்களை நடத்தவேண்டும். அது பெரிய ஆசீர்வாதமாக இருக்கும். அதற்காகவே சிவபெருமான், அம்பிகை மாணிக்கவாசகர் என உற்சவ மூர்த்திகள் செய்து வைத்திருக்கிறேன். இப்போ சிலர் ஆர்வமாகக் கேட்கிறார்கள். நாங்களும் முற்றோதுதல்கள் செய்து கொடுத்துக் கொண்டு வருகிறோம்'' என்றார்.

அவரின் குடும்பம் பற்றிக்கேட்டோம்.

``இரண்டு பையன்கள். மூத்தவன் டிப்ளமோ படிக்கிறான். இரண்டாவது பையன் எட்டாவது. இரண்டு பேருக்குமே பக்தி அதிகம். இவர்களைப் போலவே நானும் படிக்கும் காலத்துலேயே பக்தியா இருப்பேன். திருநீறு அணியாமல் இருக்கவே மாட்டேன். அதை எல்லாம் சொல்லி சொல்லி வளர்க்கிறேன்.

ஏன்னா, இளம் வயதில் மனம் சிவத்திடம் சென்றால்தான் வாழ்நாள் முழுவதும் பக்தியும் ஈடுபாடும் இருக்கும். மனைவி பெயர் சரவணி. இருப்பதை வைத்துக் குடும்பம் நடத்துபவள். ஒருநாளும் இல்லை என்று குறைபட்டுக்கொண்டதே இல்லை. ஒரு நிறைவான வாழ்க்கையை இறைவன் வழங்கியிருக்கிறான். அதுதான் நம்மை இன்னும் அதிக உத்வேகத்தோடு சிவப்பணி செய்ய வைக்கிறது'' என்றார்.

பேசிக்கொண்டிருக்கும் போதே வயல்வெளியில் சில அடியார் கள் நடந்துவந்தனர். உடனே நம்மிடம் விடை பெற்றுக் கொண்டு அவர்களுக் காக தீபாராதனை காட்டச் சென்றார் மணிவண்ணன்.

``சுவாமியோட திருமேனியைப் பார்த்தாலே நிச்சயம் 1,500 வருடங்கள் பழைமையானது என்பது தெரியுது. இப்படிப்பட்ட சாந்நித்தியம் நிறைந்த மூர்த்தி இப்படிக் கூரைக்குக் கீழ் இருக்கிறாரே என்பதுதான் ஒரே வருத்தம். இங்கு பெரிய கோயில் எழும்ப வேண்டும். நல்ல பாதை அமை யணும். தினமும் சுவாமிக்கு திருமுறைகள் பாட வழிபாடு நடக்கணும். இறைவன் அதற்கு அருள்வார் என்ற நம்பிக்கை உள்ளது ஐயா'' என்று சொன் னார் மணிவண்ணன்.

`நாடகத்தால் உன்னடியார்
போல்நடித்து நான்நடுவே
வீடகத்தே புகுந்திடுவான்
மிகப்பெரிதும் விரைகின்றேன்
ஆடகச்சீர் மணிக்குன்றே
இடையறா அன்புனக்கென்
ஊடகத்தே நின்றுருகத்
தந்தருள் எம் உடையானே.'


என்று பாடிக் கண்ணீர் மல்க, விடைகொடுத்தார்.

ஏனோ மனமும் வயிறும் நிறைந்துபோக மாணிக்க வாசகரை எண்ணிக் கொண் டோம். கோயிலைக் கட்ட வேண்டும் என்கிறார் இவர். மிகப் பொருத்தமாக மாணிக்க வாசகர் பாடலையும் பாடு கிறார். அவரும் ஈசனுக்குக் கோயில் அமைத்தவராயிற்றே!

அவருக்காகத்தானே ஈசன் நரியைப் பரியாக்கியும், மண் சுமந்தும், பிரம்படி வாங்கியும் அருளாடல் நடத்தினான். இவர் பொருட்டும் அற்புதம் நிகழ்த்துவான்; திருக்கோயில் எழும்பிட அருள்புரிவான் எனும் சிந்தையோடு, வணங்கி விடை பெற்றோம்.

- தொண்டர்கள் வருவார்கள்...

*****

கிருஷ்ண தரிசனம் - கட்டுகள் அவிழும்!

கண்ணனது லீலைகளே முக்திக்கான சாலைகள். இடைப்பெண்ணான யசோதையின் கையால் கட்டுண்ட பகவானுக்கு, இடையிலே தழும்பு உண்டாயிற்றாம். எனவேதான், தாமோதரன் என்று பெயர் பெற்றான்.

`எத்திறம் உரலினோடு இணைந்திருந்தேங்கிய எளிவே' என்று உருகி உருகி, ஆறு மாத காலத்துக்குக் கண் விழிக்காமல் மயங்கிக்கிடந்தாராம் நம்மாழ்வார்.

பரம்பொருள் ஓர் அபலைப் பெண் கையாலே கட்டுப்பட்டுக் கிடந்தான். அவன் உரலிலே கட்டுண்டு கிடந்தான் என்று நினைத்தாலே, நமது சம்சாரக் கட்டு தானாக அவிழும் என்கிறார் பரமாச்சார்யரான நம்பிள்ளை.

- சி.துளசி, கோவை