காசியில் ஞாயிறு தரிசனம்!

சூரிய பகவான், சிவபெருமானை வழிபட்டு பேறு பெற்ற திருத் தலங்கள் ஏராளம். அவற்றுள் முதன்மையானது காசி. இங்கு, 12 திருநாமங்களுடன் 12 இடங்களில் சூரியன் எழுந்தருளி உள்ளார். இந்த ஆலயங்களின் மகிமை குறித்து காசி காண்டம் விவரிக்கிறது.

லோலார்க்கர்: பிரசித்திப் பெற்ற லோலார்க்க குண்டம் அருகில் உள்ளது இவரின் ஆலயம். இங்குள்ள குளத்தில் நீராடி லோலார்க்கரை வழிபடுவதால் மனச் சஞ்சலங்கள் நீங்கும்.

உத்திர அர்க்கர்: காசிக்கு வடக்கே ‘அலேம்புரா’ எனும் இடத்தில் உள்ள சூரிய தீர்த்தமே உத்திர அர்க்க குண்டம். இதன் அருகில் அருள்பவர் உத்திர அர்க்கர். ஆடு வழிபட்டு அருள்பெற்றதால் இதை வக்ரியா குண்டம் என்றும் சொல்வர் (வக்ரி-ஆடு).

ஸாம்பாதித்யர்: கண்ணனின் மகன் சாம்பன் வழிபட்ட சூரியன். இவரது ஆலயம், விஸ்வநாதர் கோயிலுக்கு மேற்கே உள்ளது.

திரௌபதி ஆதித்யர்: இவரது ஆலயம், விஸ்வநாதர் ஆலயத்துக்கு அருகில், அட்சய பீடத்தின் கீழ் உள்ளது. இவரின் அருளால் திரெளபதி அட்சயபாத்திரம் பெற்றதாகக் கூறுவர்.

மயூகாதித்யர்: இவர் ‘பஞ்ச கங்காகாட்’ அருகிலுள்ள மங்கள கௌரி கோயிலில் காட்சி தருகிறார். இவரின் தவத்துக்கு மகிழ்ந்த சிவபெருமானால் `மயூகன்' என்று பெயர் சூட்டப்பட்டாராம்.

கஷோல்கா ஆதித்யர்: கருடனும் அவரின் தாய் விநதையும் வழிபட்ட சூரியன் இவர். புகழ்பெற்ற திரிலோசனர், காமேஸ்வரர் ஆலயப் பிராகாரத்தில் எழுந்தருளி உள்ளார்.

அருணாதித்யர்: இவர் திரிலோசனர் ஆலயத்தில் அருள்கிறார். கருடனின் சகோதரன் அருணனுக்கு அருளி, அவரைத் தன் சாரதியாக ஏற்றுக்கொண்ட மூர்த்தி இவர். அருணோதய காலத்தில் இவரைத் தியானித்து வழிபடுவது சிறப்பு.

விருத்தாதித்யர்: மீர்காட் எனும் இடத்தில் எழுந்தருளியுள்ளார். வேதங்களில் தேர்ந்த `விருத்தன்’ என்பவர், இந்தச் சூரியனை வழிபட்டு குன்றாத இளமையைப் பெற்றாராம்.

கேசவாதித்யர்: இவர், வருணா சங்கமத்தில் உள்ள கேசவர் கோயிலில் எழுந்தருளியுள்ளார். கேசவனாகிய திருமாலின் அருளால் லிங்கம் அமைத்து வழிபட்டதால், இவருக்கு இந்தப் பெயர்.

விமலாதித்யர்: கதோலியாவுக்கு அருகே ஜங்கம்பாடியில் இவரை தரிசிக்கலாம். விமலன் என்ற பக்தரின் குஷ்டநோய் நீங்கிட அருள்பாலித்தவர். இவரைத் தரிசித்தால் பிணிகள் நீங்கும் என்பர்.

கங்காதித்யர்: பகீரதன், ஆகாய கங்கையை பூமிக்கு கொண்டு வந்தபோது, தானும் காசிக்கு வந்து கங்கைக் கரையில் தங்கிய சூரியன் இவர். காசியில் `லலிதா காட்' எனும் இடத்தில் கோயில் கொண்டுள்ளார்.

யம ஆதித்யர்: சூரிய தேவரின் புதல்வனான யம தர்மன் காசியில் தந்தையின் அருள்பெற்ற இடம் சங்கடா காட். ஆயுள் பலம் தருபவர் யம ஆதித்யர்.

காசிக்குச் செல்லும் அன்பர்கள் ஞாயிற்றுக் கிழமைகளில் இந்த 12 சூரியர்களையும் வழிபடுவது விசேஷம் என்கிறார்கள்.

- கே.தங்கம், சென்னை-4