Published:Updated:

சிந்தனை விருந்து! - உண்மையை சந்தேகப்படாதீர்கள்!

சிந்தனை விருந்து!
பிரீமியம் ஸ்டோரி
சிந்தனை விருந்து!

தென்கச்சி சுவாமிநாதன், ஓவியம்: சேகர்

சிந்தனை விருந்து! - உண்மையை சந்தேகப்படாதீர்கள்!

தென்கச்சி சுவாமிநாதன், ஓவியம்: சேகர்

Published:Updated:
சிந்தனை விருந்து!
பிரீமியம் ஸ்டோரி
சிந்தனை விருந்து!
நள்ளிரவு... அந்த சோளக் கொல்லையில் திடீரென ஏதோ சலசலப்பு! சத்தம் கேட்டு ஓடி வந்தான் காவல் காரன். அங்கு மாடு ஒன்று மேய்ந்து கொண்டிருந்தது.
விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

‘மாட்டை எப்படியாவது பிடித்துவிட வேண்டும்’ என்ற முடிவுடன் வேகமாகத் தாவி, மாட்டின் வாலைக் கெட்டியாகப் பிடித்துக்கொண்டான். மறுகணம், மாடு மேலெழும்பி பறக்க ஆரம்பித்தது!

அப்போதுதான் தெரிந்தது... அது, சிவபெருமானின் நந்தி என்று. நந்தி, கயிலாயத்தை நோக்கிப் பறக்க, இவனும் அதன் வாலைப் பிடித்துத் தொங்கியபடி பறந்தான். இருவரும் கயிலாயத்தை அடைந்தனர்.அங்கு சிவனாரை கண்டதும், ‘`இறைவா, இது நியாயமா? உங்கள் நந்தி என் சோளக் கொல்லையை நாசம் செய்துவிட்டது’’ என்று முறையிட்டான்.

‘’கவலை வேண்டாம். இழப்பை ஈடுகட்ட இதோ... பை நிறைய தங்கக் காசுகள்!’’ என்று ஒரு பையைக் கொடுத்தார் இறைவன். அவரை வணங்கி, பணிவுடன் பையைப் பெற்றுக் கொண்டவன், நந்தியின் உதவியுடன் பூமிக்கு வந்து சேர்ந்தான்.

வீட்டை அடைந்ததும், ‘இது, உண்மையிலேயே தங்கக் காசுதானா?’ என்று அவனுக்குச் சந்தேகம் எழுந்தது. உடனே ஒரு காசை மட்டும் எடுத்துக் கொண்டு நண்பனின் நகைக் கடைக்குச் சென்றான். தங்கக் காசை நண்பனிடம் தந்து, ‘’இது தங்கம்தானா... உரசிப் பார்த்துச் சொல்!’’ என்றான். நண்பனும் உரசிப் பார்த்தான்.

‘அட! விலை மதிப்பு இல்லா தங்கமாயிற்றே. இது, இவனுக்கு எப்படிக் கிடைத்தது?’ என்று யோசித்த நண்பன், ‘இது வெறும் பித்தளைதான்! உன்னை ஏமாற்றியவர் யார்?’ என்று கேட்டான். இவனும் நடந்ததை விவரித்தான்.

அன்றிரவு! மீண்டும் நந்தி வந்தது. ‘பித்தளை யைக் கொடுத்து ஏமாற்றுவது உனக்கு அழகா?’ என்று இறைவனைக் கேட்க வேண்டும் என முடிவு செய்தவன், நந்தியின் வாலைப் பிடித்தான். நந்தி உயரே எழும்பியது. நம்ம ஆசாமி, அதன் வாலைப் பிடித்தபடி தொங்கிக் கொண்டிருந்தான். அப்போது, எவரோ இவன் காலைப் பிடித்து இழுப்பதாக உணர்ந்தான். மெள்ள குனிந்து பார்த்தான்.

அட... ‘பித்தளை’ என்று பொய் சொன்ன நண்பன்! ஆசை யாரை விட்டது. நந்தி பறந்து கொண்டிருக்க அதன் வாலைப் பிடித்தபடி இவன், இவனது காலைப் பிடித்தபடி நண்பன்!

நண்பன் கேட்டான் ‘’ஆமாம்... உனக்கு எவ்வளவு தங்கக் காசுகள் கொடுத்தார்கள்?’’

சிந்தனை விருந்து! - உண்மையை சந்தேகப்படாதீர்கள்!

உடனே, நந்தியின் வாலைப் பிடித்துத் தொங்கிக் கொண்டிருந்த நம்ம ஆசாமி, உற்சாகத்துடன் இரண்டு கைகளையும் விரித்து, ‘இவ்வளவு!’ என்றான். அவ்வளவுதான்... இரண்டு பேரும் பூமியில் இருந்த அதே சோளக் கொல்லையில் வந்து விழுந்தனர்.

இந்தக் கதை சொல்லும் நீதி என்ன?

வாலைப் பிடித்தவன், உண்மையைச் சந்தேகப் பட்டான். காலைப் பிடித்தவன், பேராசைப் பட்டான். உண்மையைச் சந்தேகப்படுகிறவர்களுக்கும் பேராசைப் படுகிறவர்களுக்கும் இதுவே கதி என்கிறது ஆன்மிகம். உண்மையை சந்தேகப்பட்டால், ‘பொத்’தென்று விழ நேரிடும், உஷார்!

10.03.2009 இதழிலிருந்து...