Published:Updated:

பாதை இனிது... பயணமும் இனிது..! - 37

பாதை இனிது... பயணமும் இனிது..! - 37
பிரீமியம் ஸ்டோரி
பாதை இனிது... பயணமும் இனிது..! - 37

சாமானியரும் சாதனையாளரும்!சுவாமி ஓங்காராநந்தர், ஓவியம்: அனந்த பத்மநாபன்

பாதை இனிது... பயணமும் இனிது..! - 37

சாமானியரும் சாதனையாளரும்!சுவாமி ஓங்காராநந்தர், ஓவியம்: அனந்த பத்மநாபன்

Published:Updated:
பாதை இனிது... பயணமும் இனிது..! - 37
பிரீமியம் ஸ்டோரி
பாதை இனிது... பயணமும் இனிது..! - 37

வாழ்வின் பல்வேறு பரிமாணங்களைக் கொண்டு ஒருவரைப் பெரியவர் என்றும், சிறியவர் என்றும் பிரிப்பது உலக வழக்கம்.

பெரிய தன்மை என்பது, உடலின் வயதை மட்டும் வைத்துக் கணக்கிடப்படுவதல்ல. அறிவின் முதிர்ச்சி, மனதின் மலர்ச்சி ஆகியவற்றால் வாழ்க்கையில் ஒருவர் செய்த செயற்கரிய செயல்களை வைத்தே ஒருவரை சமூகம் பெரியவர் என்று போற்றுகிறது. அறிவிலே தெளிவும், நெஞ்சிலே உறுதியும் உடையவர்களால்தான் செயற்கரிய செயல்களைச் செய்ய முடியும். உலகில் எத்தனையோ கோடி மக்கள் பிறந்து வாழ்ந்த சுவடு தெரியாமல் இறந்துகொண்டிருக்க, சிலரது சாதனைகள் மட்டும் கால வெள்ளத்தில் அழியாத கல்வெட்டுகளாய்ப் பதிந்திருக்கின்றன. உலக நன்மையின் பொருட்டு உழைத்த அத்தகைய சாதனையாளர்களை உலகம் என்றென்றும் நன்றியோடு நினைவுகூர்கிறது.

சாமானிய மனிதருக்கும் சாதனையாளருக்கும் உள்ள வேற்று மையை திருவள்ளுவர் ‘பெருமை’ என்னும் அதிகாரத்தில் படம் பிடித்துக் காட்டியுள்ளார். சாதனையாளரைத் தனித்துக் காட்டுவது, அவரது உள்ளத்தில் கிளர்ந்தெழும் ஊக்கமே ஆகும். அந்த ஊக்கம் எத்தனை இடையூறுகள் வந்தாலும் தளராது; எத்தகைய துயரங் களைக் கண்டும் அஞ்சாது.

உச்சிமீது வானிடிந்து வீழுகின்ற போதினும்
அச்சமில்லை அச்சமில்லை அச்சமென்ப தில்லையே

- என்று மகாகவி பாரதியார் முழங்கியதைப் போன்று அஞ்சா நெஞ்சர்களாய், குறைவற்ற ஊக்கம் உடையவர்களாய் அவர்கள் புதுமை படைப்பார்கள். தணியாத ஊக்கமே உள்ளத்தில் நெருப் பாகக் கனன்று, சாதனையாளர்களின் இருண்ட பாதையில் ஒளி யைப் பாய்ச்சுகிறது.

ஒளிஒருவற்கு உள்ள வெறுக்கை இளிஒருவற்கு
அஃதிறந்து வாழ்தும் எனல். (திருக்குறள்: 971)


‘ஊக்க மிகுதியே ஒருவனுக்கு ஒளியாகும். அந்த ஊக்கம் இல்லாமலேயே உயிர் வாழலாம் என்று எண்ணுவதே ஒருவனுக்கு இழுக்கு’ என்கிறார் திருவள்ளுவர். உலகில் எல்லா மனிதர்களும் ஒரே மாதிரிதான் பிறக்கிறார்கள். சாதனையாளர்களுக்கும் அதே இருபத்து நான்கு மணி நேரம்தான். அவர்களுக்குத் தனியாகக் கொம்பு எதுவும் முளைத்துவிடுவதில்லை.

பாதை இனிது... பயணமும் இனிது..! - 37

பிறப்பு என்பது எல்லோருக்கும் பொதுவாக இருந்தாலும், ஒவ்வொருவரையும் வேறுபடுத்திக் காட்டுவது அவரவர் செய்யும் செயல்களே! ஒரு குறிப்பிட்ட செயலை ஒவ்வொருவரும் ஒவ்வொரு மாதிரி செய்வதைக் காணலாம். இறை வழிபாட்டை, தியானத்தைக்கூட இயந்திரத்தனமாகச் செய்பவர்களும் உண்டு. இயந்திரத்தோடு வேலை செய்தாலும், இசைவோடு அதில் ஆழ்ந்து செயலாற்றுபவர்களும் உண்டு.

செயலைக் குறித்த மனோபாவம், செயலை நேசிக்கும் விதம், செயலில் ஆழ்ந்து தனது கவனத்தைக் குவிக்கின்ற முனைப்பு ஆகியவை செயல்திறனை வளர்க்க உதவுகின்றன.

பிறப்பொக்கும் எல்லா வுயிர்க்கும் சிறப்பொவ்வா
செய்தொழில் வேற்றுமை யான். (திருக்குறள்: 972)


எல்லா உயிர்க்கும் பிறப்பு ஒரு தன்மையதே ஆயினும், செயல்களிலும், செயலாற்றும் முறைகளிலும் உள்ள வேறுபாடுகளால் அவர்களது சிறப்பியல்கள் ஒத்திருப்பதில்லை.
செயலை நேசித்தல், செயலைக் கற்றுக் கொள்ளுதல், கற்றவற்றை நடைமுறைப் படுத்துதல், செயலில் தனது கவனத்தைக் குவித்தல், செயலை விரிவுபடுத்துதல் என இந்த ஐந்து அம்சங்களும் ஒருவரது செயல்திறனை வேறுபடுத்திக் காட்டுகின்றன. செயற்கரிய செய்ய வேண்டும் என்று முடிவுசெய்து களத்தில் இறங்குவதே ஒருவரை மேன்மையடையச் செய்யும். மேன்மை என்பது கல்வி, குலம், செல்வம், பின்புலம் ஆகியவற்றால் மட்டும் வருவதல்ல.

மேலிருந்தும் மேலல்லார் மேலல்லர் கீழிருந்தும்
கீழல்லார் கீழல் லவர். (திருக்குறள்: 973)


மேல்நிலையில் இருந்தாலும் மேன்மைப் பண்பு இல்லாதவர் மேலானவர் அல்லர், கீழ்நிலையில் இருந்தாலும் இழிகுணம் இல்லாதவர் கீழ்மக்கள் அல்லர் என்பது திருவள்ளுவர் வாக்கு. பெருமை எனப்படும் உயர்ந்த பண்புடையவர்களே, செயற்கரிய செயல்களைச் செய்து முடிப்பார்கள்.

- பயணிப்போம்

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism