Published:Updated:

வானம் தொடுவோம்!

இளைஞர் சக்தி

வானம் தொடுவோம்!

இளைஞர் சக்தி

Published:Updated:
வானம் தொடுவோம்!
வானம் தொடுவோம்!
##~##

ஒட்டுமொத்த விகடனுக்கும் ஒரே ஷார்ட்கட்!

ங்காளம், ஒடிசா, அசாம் ஆகிய மாநிலங்களில் துர்கை வெகு சிறப்பாகப் பூஜிக்கப்படுகிறாள். ஒடிசாவில் உள்ள பூரி ஜகன்னாதர் கோயில் தேர் உத்ஸவம் முடிந்ததுமே துர்கா சிலைகள் செய்யும் பணி தொடங்கிவிடுகிறது.

முதலில், மூங்கிலால் ஒரு வடிவம் அமைத்துக்கொள்வார்கள். பின்னர் அதில் வைக்கோலைத் திணித்து, அதற்கு மேல் களிமண் பூசி, உருவம் கொடுப்பார்கள். தொடர்ந்து, அதன் மேல் விதம் விதமான வண்ணக் கலவைகளைப் பூசத் தொடங்குவார்கள். அது முடிந்ததும், நகாசு வேலைகள் ஒவ்வொன்றாக ஆரம்பமாகும். அதாவது, ஆடை அணிவிப்பார்கள்; ஆபரணங்களைச் சார்த்துவார்கள். இவை எல்லாம் முடிந்து, சிலையைப் பார்த்தால் நீண்ட கருவிழிகளும், அழகான கூந்தலும், அழகான ஆடை அலங்காரங்களுமாக நமக்குக் காட்சி தருவாள் துர்கை.

இந்தச் சிலைக்காக நடைபெறும் ஒவ்வொரு வேலையையும் கண்ணும் கருத்துமாகச் செய்து முடிப்பதைப் பார்த்தால், அதை உருவாக்குபவர்களுக்கு அதிலுள்ள அக்கறை தெரியவரும். துர்கா பூஜை முடிந்த பிறகு, கஷ்டப்பட்டுச் செய்த அத்தனை அழகான துர்கா சிலைகளும், கடலுக்குக் கொண்டு செல்லப்பட்டு, அங்கே கரைக்கப்பட்டுவிடும் - நமது பிள்ளையார் சிலைகள் போலவே! மறு வருடம், இதே நடைமுறையில் மீண்டும் துர்கை சிலைகள் உருவாக்கப்பட்டு, பூஜைக்கு வைக்கப்படும்.

இதிலிருந்து நாம் கற்றுக்கொள்வது என்ன? ஓர் ஐடியாவை வாடிக்கையாளரிடம் வெளிப்படுத்த, விற்பனையாளர் மேற்கொள்ளும் செயல்கள், துர்கை சிலை உருவாக்குவதைப் போலவே படிப்படியாக அமைத்துக்கொள்ளப்பட வேண்டும். எடுத்தவுடனே பொருளைப் பற்றி எல்லா விஷயத்தையும் ஒரே கொட்டாகக் கொட்டிவிடாமல், மெள்ள மெள்ள, படிப்படியாக, முறையாக எடுத்துச் சொல்ல வேண்டும். வாடிக்கையாளரும் நீங்கள் சொல்வதைப் புரிந்துகொள்ள வேண்டும்.  

அதற்கு என்ன வழி? அதுதான் துர்கை சிலை வழி!

இப்போது, ஒரு கதை:

சந்திரன், தான் விற்பனை செய்ய உள்ள பொருள் பற்றி ஒரு வாடிக்கையாளரிடம் விவரிக்க வேண்டும். ஆனால், எப்படி விவரிப்பது என்று தெரியாமல் தவித்தார். இதைப் பார்த்துவிட்டார், மூத்த ஊழியரான பிரபு. அவர் காரணம் கேட்க, வாடிக்கையாளரிடம் பொருள் பற்றிய புரிதலை எப்படி ஏற்படுத்துவது என்று யோசிப்பதாகச் சொன்னார் சந்திரன்.

துர்கா சிலை உருவாக்கும் நடைமுறை சந்திரனுக்குத் தெரிந்திருந்தால் இந்தப் பிரச்னை எழுந்திருக்காது என்று எண்ணிய பிரபு, அதுபற்றி அவரிடம் விளக்கிக் கூறினார்.

வானம் தொடுவோம்!

'சந்திரன்... துர்கா சிலையைப் பார்க்கும்போது, பூரணமான அதன் வடிவமே முதலில் நம் கண்களுக்குத் தெரிகிறது. ஆனால், அதற்கு முன்னால் என்னென்ன வேலைகள் செய்யப்படுகின்றன என்பது நமக்குத் தெரிவதில்லை, அல்லவா?' என்று கேட்டார் பிரபு.

சந்திரன் விழித்தார். பிரபுவே தொடர்ந்து விளக்கினார்.

'விவரங்களைத் தாறுமாறாகச் சொன்னால் வாடிக்கையாளர் குழம்பிப் போய்விடுவார். அவரால் பொருளைப் பற்றி எதுவும் சரியாகப் புரிந்துகொள்ள முடியாமல் போய்விடும். துர்கையின் அழகான முகத்தை மட்டும் வர்ணித்தால் போதுமா? அந்தச் சிலை உருவாக என்னென்ன பணிகள் மேற்கொள்ளப்பட்டன, அதன் பின்னணி விவரங்கள் என்னென்ன என்று படிப்படியாக விளக்குங்கள். அப்போதுதான் உங்கள் வாடிக்கையாளர் புரிந்துகொள்ள எளிதாக இருக்கும்!' என்றார்.

சந்திரனுக்குள் தெளிவு ஏற்பட்டது போல் இருக்க, பிரபு தொடர்ந்து அந்த வியாபார சூட்சுமத்தை விவரித்தார்.

'ஒரு பொருள் பற்றி வாடிக்கையாளரிடம் எடுத்துக் கூறும்போது, துர்கா சிலை உருவாகும் விதத்தை மனத்தில் வைத்துக்கொள்ளுங்கள். மூங்கில் வடிவமைப்பதில் இருந்து ஆரம்பித்து எங்கே முடிப்பது என்பதைத் தீர்மானம் செய்துகொள்ளுங்கள். அந்த சிலையை உருவாக்குகையில், வைக்கோல் திணிக்கிற இடம் வருகிறபோது நமது பொருள் சார்பாக என்ன தகவல் சொல்ல வேண்டும் என்பதைத் திட்டமிட்டுக் கொள்ளுங்கள். மண் வைத்துப் பூசும் இடம் வருகையில், உங்கள் கற்பனை என்ன என்பதை யோசித்துக்கொள்ளுங்கள். முதல் முறை வர்ணம் பூசுகிற கட்டம் வரும்போது எதைச் சொல்ல வேண்டும், இரண்டாவது முறை வர்ணம் பூசும் நிலை வரும்போது என்ன சொல்லலாம், உதாரணமாக சார்ட்டுகள், வரைபடங்கள், புகைப்படங்கள் எல்லாவற்றையும் எடுத்துக் காட்டி விவரிக்கலாமா என்பதை முடிவெடுங்கள்.

அதன்பிறகுதான் இருக்கிறது ஆடை, அணிகலன்கள் அணிவிக்கும் கட்டம்! அப்போது பொருளின் பாக்கிங், அதன் அழகு பற்றிச் சொல்ல வேண்டும். கடைசியில், எப்படி ஆரம்பித்து எப்படி முடித்தீர்கள் என்பதை ஒருமுறை மனதுக்குள் நினைத்துப் பாருங்கள். வாடிக்கையாளரின் அபிப்ராயத்தைக் கேட்டுக்கொள்ளுங்கள். விஷயம் முடிந்தது. அங்கிருந்து வெளியே வருகையில், துர்கை சிலையைக் கடலில் கரைப்பது போல எல்லாவற்றையும் சுத்தமாக மறந்துவிட்டு, அடுத்த வாடிக்கையாளரைச் சந்திக்க மனத்துக்குள் ஒத்திகை பார்த்துக்கொள்ளத் தொடங்குங்கள். வாடிக்கையாளரின் வாதம், அவர் தருகிற நேர்மறை அல்லது எதிர்மறை செய்தி ஆகியவற்றை மனத்தில் கொண்டு, அதற்காக உங்களை தயார் செய்துகொள்ளுங்கள். இந்த முறையால் மட்டுமே நீங்கள் தொடர்ந்து திருத்தங்கள் செய்து, ஒரு பொருளின் பயன்பாட்டை வாடிக்கையாளரிடம் திறமையாக எடுத்துச் சொல்ல முடியும்!'

நீளமான பிரபுவின் யோசனையை அப்படியே ஏற்றுக்கொண்டார் சந்திரன். அவர் இப்போதெல்லாம் எந்தப் பொருள் விற்பனை செய்வது என்றாலும், தவறாமல் கடைப்பிடிப்பது துர்கா பூஜைக்காக சிலை உருவாகும் முறையைத்தான்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism