Published:Updated:

``குரு என்பவர் யார்? குரு ஏன் நமக்கு அவசியம்?" - பட்டிமன்றப் பேச்சாளர் சிவக்குமார்

சிவக்குமார்
சிவக்குமார்

நம் மனதையும் உடம்பையும் சமநிலையில் வைத்துக்கொள்ள வேண்டுமென்றால், நம்முடைய தனித்த முயற்சியால் மட்டும் அது சாத்தியப்படாது. நமக்கு ஒரு குரு தேவைப்படுகிறார். பட்டிமன்றப் பேச்சாளர் சிவக்குமார், குருவின் தேவை பற்றியும் தன் குரு பற்றியும் நம்முடன் பகிர்ந்துகொள்கிறார்.

``நம் மனதை அத்துணை எளிதாக ஆன்மிகப் பாதையில் செலுத்த முடியுமா, முடியாது. ஆன்மிகப் பாதையில் ஏற்கெனவே சென்று பயிற்சி பெற்ற ஒரு குருவால்தான் இது நமக்குச் சாத்தியப்படும். மனம், உடம்பு, அறிவு ஆகிய மூன்றையும் சமநிலைப்படுத்தி நாம் ஆன்மிகப் பாதையில் சென்றிட நமக்கு குரு தேவை.

Meditation
Meditation

மற்றவர்களுக்கும் குருவுக்கும் உள்ள வித்தியாசம் என்ன? மற்றவர்கள் எல்லோரும் வெளியில் நம்மைப் பார்க்கச் சொல்கிறார்கள். `அவனைப் பார் வீடு வாங்கிவிட்டான், இதோ இவனைப் பார் கார் வாங்கிவிட்டான்' என்று நம்மை மற்றவர்களோடு ஒப்பிட்டு, லௌகீக விஷயங்களில் முன்னேறுவதற்காக நம்மை வெளியில் பார்க்கச் சொல்கிறார்கள். ஆனால், குரு நம்மை நம்முள் பார்க்கச் சொல்கிறார். நம்முள் நம்மைப் பார்த்த பின், நாம் யார் என்பதை நம்மை அறியச்செய்கிறார்.

`ஐயோ, உன் மனம் இப்படி இருக்கிறதே... உன் புத்தி இப்படி இருக்கிறதே... நீ இன்னும் பக்குவப்படாமல் இருக்கிறாயே' என்று கவலைகொள்கிறார்.

மற்றவர்களெல்லாம் நம்மிடம் எதைப் பார்க்கிறார்களோ, அதை குரு பார்ப்பதில்லை. மற்றவர்களெல்லாம் நம்மிடம் எதைப் பார்ப்பதில்லையோ அதை குரு பார்க்கிறார். மற்றவர்களெல்லாம் உங்களின் அறிவை, சம்பாத்தியத்தை, பணியின் தன்மையைப் பார்க்கிறார்கள். குருவுக்கு இவையெல்லாம் ஒரு முக்கியமான விஷயமே இல்லை. அவர் இவற்றையெல்லாம் ஒரு குப்பையாகத் தூக்கியெறிந்துவிட்டு, `இந்த ஜீவன் பிறந்து 30, 40, 50 ஆண்டுகள் ஆகிவிட்டன. இது தன்னை ஒழித்துக்கொள்ள என்ன வழி கைவசம் வைத்திருக்கிறது? எந்தப் பாதையில் இந்த ஜீவன் பயணிக்கிறது...' என இவற்றைத்தான் குரு பார்க்கிறார்.

Santhanantha Swamikal
Santhanantha Swamikal

நாம் மற்றவர்களுக்கு உதவுவதில் எந்த அளவு நம் மனதைத் தயார்படுத்தியிருக்கிறோம், `டிவைன் பவர்' என்று சொல்லும் இறைசக்தியை எந்த அளவு உணர்ந்திருக்கிறோம், இறைசக்திக்கு எவ்வளவு அருகில் இருக்கிறோம்... இவற்றையெல்லாம்தான் குரு பார்க்கிறார். இந்தப் பார்வை, உலகிலேயே குருவுக்கு மட்டும்தான் உண்டு.

சிவனுக்கு தட்சிணாமூர்த்தி என்று ஒரு ரூபத்தைத் தருகிறோம். பராசக்திக்கு தட்சிணாமூர்த்தி ரூபிணியே என்று ஒரு பெயரைக் கொடுக்கிறோம். முருகனுக்கு குரு என்று பெயர் வைக்கிறோம். `பரம குருவாய் சகல வடிவாய் இருக்கும் வடிவேலா' என்று முருகனை அழைக்கிறார் அருணகிரிநாதர். எல்லோருக்கும் குருவாக இருப்பவர் தட்சிணாமூர்த்தி. அந்தத் தட்சிணாமூர்த்தியின் இன்னொரு வடிவான சிவனுக்கு உபதேசம் செய்தவர் முருகன். ஆக முருகனை `பரம குரு' என்று அவர் அழைக்கிறார்.

`உன் ஆன்மா இறைப் பாதையை நோக்கி எந்தளவு சென்றுகொண்டிருக்கிறது' என்பதைப் பார்க்கக்கூடிய திறன் வாய்ந்தவர் குரு.

இதனால்தான் குருவை தெய்வத்துக்கு முந்தைய நிலையில் வைத்திருக்கிறார்கள். `மாதா பிதா குரு தெய்வம்' என்பார்கள். இவர்களில் மாதா, பிதா இருவரும் இந்த உலகியல்பூர்வமான விஷயங்களில் பற்று, பந்த பாசங்களை வைக்குமாறு செய்வார்கள். ஆனால், குரு மட்டுமே உங்களை அருளியலுடன் இறைவன்பால் எடுத்துச் செல்லக்கூடியவர். அதனால்தான் குருவை தெய்வத்தைவிட உயர்ந்தவராகச் சொல்கிறார்கள்.

முருகன்
முருகன்

மாதாவும் பிதாவும் உங்களை உலகியலுடன் கட்டிப்போடுவார்கள். குருவும் தெய்வமும் உங்களைக் கட்டுகளிலிருந்து பிரிப்பார்கள். பந்தபாசக் கட்டுகளிலிருந்து உங்களை விடுவிப்பார்கள். அதனால்தான் திருவள்ளுவர் கூறினார், `இந்தப் பற்றுகளிலிருந்தெல்லாம் உன்னை விடுவித்துக்கொள்ள வேண்டுமென்றால், மனதை அதனுடன் கட்டிப்போட்டுக்கொள்' என்று.

பற்றுக பற்றற்றான் பற்றினை அப்பற்றைப்

பற்றுக பற்று விடற்கு.

`பற்று' என்பதற்கு `பாசம்' என்று ஓர் அர்த்தமும் உண்டு. `கடவுளின் பாதம்' என்றும் ஓர் அர்த்தம் உண்டு. `இறைவனின் பாதத்தை நான் பற்றிக்கொண்டால், மற்ற பற்றுகளிலிருந்து நம்மை விடுவித்துக்கொள்ள முடியும்' என்பதைத்தான் இவ்வாறு அவர் கூறுகிறார்.

என் குரு, சிவானந்த குருவின் சீடர் சாந்தானந்த சுவாமிகள். இவரின் மனதில் உதித்ததுதான் `டெம்பிள் ஆஃப் ஆர்ட்' மற்றும் `அன்னலட்சுமி உணவகம்'. Eat as you like, pay as you want எனும் மந்திரச் சொல்லுடன் இவர்களின் அமைப்பு இயங்கிவருகிறது. இங்கு ஊதியம் பெறும் சம்பளதாரர்கள் எவரும் இல்லை. எல்லோரும் இவரின் சீடர்கள்தான். இவருடைய அமைப்புகள் இந்தியாவில் மட்டுமல்லாது சிங்கப்பூர், மலேசியா, ஆஸ்திரேலியா போன்ற நாடுகளிலும் பல இடங்களில் உள்ளன. சேவை மற்றும் கலையின் மூலமாக இறைவனை அடையலாம் என்பதை முன்னிறுத்திய சாந்தானந்தரே என் குரு.

Pooja Room
Pooja Room

நான் வணங்கும் தெய்வம் என்றால், லலிதா திரிபுரசுந்தரியைச் சொல்லுவேன். மற்றபடி அம்மன் வழிபாடுதான். என் பூஜை அறையில் திருக்கடையூர் அபிராமி அழகாக வீற்றிருப்பாள்!"

அடுத்த கட்டுரைக்கு