Published:Updated:

நெல்லை: திருநங்கைகள் கட்டிய அம்மன் கோயில்! - கும்பாபிஷேக விழாவில் குடும்பத்தினரும் பங்கேற்பு

அம்மன் கோயில் கும்பாபிஷேகம்
அம்மன் கோயில் கும்பாபிஷேகம்

ஆடு, மாடு வளர்ப்பது போன்ற தொழில்களில் ஈடுபட்டுப் பிறருக்கு முன் மாதிரியாகத் திகழும் நெல்லையைச் சேர்ந்த திருநங்கைகள், தங்கள் குடியிருப்பு பகுதியில் அம்மன் கோயில் கட்டி கும்பாபிஷேகம் நடத்தினார்கள்.

திருநங்கைகளிடம் ஆசி பெற்றுக் கொள்ளும் வழக்கம் சமூகத்தில் இருந்தபோதிலும், அவர்களுக்கு வேலை வழங்கத் தனியார் நிறுவனங்கள் முன்வருவதில்லை. மருத்துவம், காவல்துறை, வருவாய்த் துறை என அரசுத் துறைகளில் ஒரு சிலரால் மட்டுமே சேர முடிகிறது. பெரும்பாலான திருநங்கைகளுக்குக் குடியிருக்க வாடகை வீடு கிடைப்பதில் கூட சிக்கல் இருக்கிறது.

ஓராண்டிலேயே பாலின் தரத்தில் முதலிடம்... கோவில்பட்டி திருநங்கைகள் பால் பண்ணை சாதித்தது எப்படி?

இது தொடர்பாக நெல்லை மாவட்ட திருநங்கைகள், சில வருடங்களுக்கு முன்பு அப்போது ஆட்சியராக இருந்த கருணாகரனிடம் முறையிட்டனர். அவர்களின் கோரிக்கையின் ஏற்று, புறநகர் பகுதியான நரசிங்கநல்லூரில் 29 திருநங்கைகளுக்கு வீடுகளைக் கட்டிக் கொடுக்க அவர் ஏற்பாடு செய்தார்.

நரசிங்கநல்லூர் பகுதியில் கட்டப்பட்ட அந்த வீடுகளை அப்போதைய ஆட்சியர் கருணாகரன் திறந்து வைத்ததுடன், திருநங்கைகள் சுயமாகத் தொழில் செய்வதற்கு ஏதுவாக கறவை மாடுகள், ஆடு, கோழி உள்ளிட்டவற்றை வழங்கவும் ஏற்பாடு செய்து கொடுத்தார். அதைப் பயன்படுத்தி திருநங்கைகள் பலரும் தங்கள் வாழ்வை முன்னேற்றிக் கொண்டனர்.

திருநங்கைகள் கட்டிய அம்மன் கோயில்
திருநங்கைகள் கட்டிய அம்மன் கோயில்

அதன் பின்னர் ஆட்சியராக வந்த சந்தீப் நந்தூரியிடமும் சில திருநங்கைகள் வீடு கட்டிக் கொடுக்குமாறு கோரிக்கை விடுத்ததால், ஏற்கெனவே வீடுகள் கட்டப்பட்ட பகுதியில் மேலும் 31 வீடுகள் கட்ட நடவடிக்கை எடுக்கப்பட்டது. அத்துடன், திருநங்கைகள் காலனியில் இருப்பவர்கள் பாலியல் தொழிலைக் கைவிட்டு சுய தொழில் செய்வதற்கும் ஏற்பாடுகள் செய்து கொடுக்கப்பட்டன.

ஆடு, மாடு வளர்ப்பு மற்றும் கோயில் விழாக்கள், முக்கிய நிகழ்ச்சிகளின்போது கரகாட்டம் ஆடச் செல்வது போன்ற தொழில்களைச் செய்துவந்த திருநங்கைகள் தாங்கள் குடியிருக்கும் பகுதியில் வழிபாட்டுக்கு ஏற்ற வகையில் கோயில் கட்ட வேண்டும் என விரும்பினர்.

கும்பாபிஷேக விழாவில் பங்கேற்றோர்
கும்பாபிஷேக விழாவில் பங்கேற்றோர்

அதற்காகத் தாங்கள் சம்பாதிக்கும் பணத்தில் ஒரு பகுதியைக் கோயில் கட்டச் சேமித்து வந்தார்கள். கோயில் கட்டுவதற்காகச் சேமிக்கத் தொடங்கிய திருநங்கைகளுக்கு, சுற்றுப்புற கிராமங்களில் வசிக்கும் மக்களும் தங்களால் முடிந்த உதவிகளைச் செய்தார்கள்.

திருநங்கைகள் காலனியில் சுமார் 18 லட்சம் மதிப்பில் மாரியம்மன் கோயிலைக் கட்டி முடித்த திருநங்கைகள் அதற்கு இன்று ஆகம் விதிப்படி கும்பாபிஷேகம் நடத்தினார்கள். திருநங்கைகளின் குடும்பத்தினர், உறவினர்கள் அனைவரும் இந்த விழாவில் பங்கேற்றனர்.

கோயிலில் புனித நீர் ஊற்றப்பட்டபோது ...
கோயிலில் புனித நீர் ஊற்றப்பட்டபோது ...

அருகில் உள்ள கிராமங்களைச் சேர்ந்த மக்களும் கும்பாபிஷேக விழாவில் குடும்பத்துடன் கலந்துகொண்டார்கள். விழாவின்போது திருநங்கைகள் சிலருக்கு அம்மன் அருள் வந்து சாமியாடினார்கள்.

இந்த விழா பற்றிப் பேசிய திருநங்கைகள், “எங்கள் குடியிருப்பில் ஒரு வழிபாட்டு மையம் இருக்க வேண்டும் என விரும்பினோம். அதற்காக நாங்களே சிறுகச் சிறுக சேமித்தோம். அருகில் வசிக்கும் குடும்பங்களைச் சேர்ந்தவர்களும் எங்களுக்கு உதவியதால் குறுகிய காலத்திலேயே இந்தக் கோயிலைக் கட்டி கும்பாபிஷேகம் நடத்தி முடிக்க முடிந்தது” என்று மகிழ்ச்சியுடன் தெரிவித்தனர்.

அடுத்த கட்டுரைக்கு