Published:Updated:

துங்கா நதி தீரத்தில்... - 18

குரு தரிசனம்!பாரதி காவலர் டாக்டர் கே.ராமமூர்த்தி, ஓவியம்: ஸ்யாம்

துங்கா நதி தீரத்தில்... - 18

குரு தரிசனம்!பாரதி காவலர் டாக்டர் கே.ராமமூர்த்தி, ஓவியம்: ஸ்யாம்

Published:Updated:

ஸ்ரீசச்சிதானந்த சிவ அபிநவ நரஸிம்ம பாரதி ஸ்வாமிகளிடத்தில், குருவின் கிருபையினால் அனைத்துவிதமான ஸித்திகளும் தானாகவே ஏற்பட்டிருந்தன என்பதையும், அனைத்து ஜீவன்களிடத்தும் அவர் சமபாவத்துடனே அன்பும் கருணையும் காட்டினார் என்பதையும் பார்த்தோம். பலவிதமான நோய்களால் பாதிக்கப்படுகிறவர்களும், லோகாயத பிரச்னைகளால் துன்பப்படுபவர்களும் ஸ்வாமிகளிடத்தில் வந்து பிரார்த்திப்பது உண்டு. ஸ்வாமிகளும் ஸ்ரீசாரதாம்பிகையின்பேரில் பாரத்தைப் போட்டுவிட்டு, விபூதியோ தீர்த்தமோ அபிமந்த்ரணம் செய்துகொடுத்து, அவரவர்களுடைய துன்பங்களை நீக்கி, அவர்களின் விருப்பங்களை நிறைவேற்றிக் கொடுத்திருக்கிறார்கள். ஸ்வாமிகளின் அனுக்கிரஹத்தினால் பயன் அடைந்த அன்பர்களின் எண்ணிக்கை கணக்கிலடங்காதது.

அப்படித்தான், ஸ்வாமிகள் ஓரிடத்தில் முகாம் அமைத்திருந்தபோது, நாகர்கோவிலுக்குப் பக்கத்தில் உள்ள ஆச்ராமம் என்ற கிராமத்தைச் சேர்ந்த சுப்ரமண்ய சாஸ்திரி என்பவர், ஸ்வாமி களைத் தரிசிக்க வந்திருந்தார். அவருக்குப் பேசும் திறனற்ற, காது கேளாத ஒரு மகன் இருந்தான். அவர் தன்னுடைய மனக்குறையை ஸ்வாமிகளிடம் சொல்லிப் பிரார்த்தித்துக் கொண்டார். ஸ்வாமிகளும் அவருடைய பிள்ளையிடம் கருணை கொண்டவராக ஒரு மந்திரத்தை உபதேசித்து, அதைத் தீர்த்தத்தில் அபிமந்த்ரணம் செய்து, பிள்ளைக்குக் கொடுக்குமாறு செய்தார். ஸ்வாமிகளின் அனுக்கிரஹத்தினால் அந்தப் பிள்ளை பேசும் திறனையும் கேட்கும் திறனையும் பெற்று, உபநயனமும் செய்விக்கப் பெற்றான்.

துங்கா நதி தீரத்தில்... - 18

ஒட்டுமொத்த விகடனுக்கும் ஒரே ஷார்ட்கட்!

ஸ்வாமிகள் மிகுந்த ஞாபகசக்தி கொண்டவர். சிறு வயதில் அவர் வித்தியாப்பியாசம் செய்து கொண்டிருந்தபோது, சுப்ரமண்ய தீக்ஷிதர் என்பவரும் உடன் இருந்தார். அப்போதே அவருக்கு மூன்று அல்லது நான்கு வயதில் மகள் ஒருத்தி இருந்தாள். சுமார் 30 வருஷ காலம் கழித்து, ஸ்வாமிகள் தமது யாத்திரையின்போது முகாமிட்டிருந்த ஓர் ஊரில், பக்தர்களுக்கு தீர்த்தப் பிரசாதம் கொடுத்துக்கொண்டிருந்த நேரத்தில், சுமங்கலிப் பெண் ஒருத்தி வரிசையில் வந்து, தீர்த்தம் வாங்க கையை நீட்டினாள். அந்தப் பெண்மணியைப் பார்த்ததுமே ஸ்வாமிகள், ''நீ தீக்ஷிதர் பெண்தானே?'' என்று கேட்டார். அந்த அளவுக்கு ஸ்வாமிகளின் ஞாபகசக்தி அபாரமாக இருந்தது.

ஞாபகசக்தியைப் போலவே ஸ்வாமிகளின் ஞானதிருஷ்டியும் மிகப் பிரசித்தம். ஒருமுறை ஸ்வாமிகளை தரிசிக்க வந்த ஒருவர், தனக்குப் பஞ்சாக்ஷர மந்த்ரோபதேசம் அருளவேண்டும் என்று கேட்டார். அதற்கு ஸ்வாமிகள், ''இப்போது உங்கள் மனைவி கர்ப்பம் தரித்திருப்பதுபோல் தெரிகிறது. எனவே, உங்கள் மனைவி பிரசவித்த பிறகு வாருங்கள்'' என்று சொல்லி அனுப்பிவிட்டார். மந்த்ரோபதேசம் செய்யுமாறு கேட்டவர், ஸ்வாமிகளின் வார்த்தைகளில் இருந்த உண்மையை உணர்ந்து, திகைத்துப் போனார். அதேபோல், ஒருமுறை ஒரு பெண் தீர்த்தப் பிரசாதத்துக்காகக் கை நீட்டியபோது, ஸ்வாமிகள் 'மறுநாள் வா! தருகிறேன்' என்று சொல்லி அனுப்பிவிட்டார்கள். காரணம், அந்தப் பெண் தீர்த்தப் பிரசாதத்துக்காகக் கை நீட்டிய அந்த வேளையில், ஊரில் அவளுடைய கணவன் இறந்துவிட்டிருந்தான்.

துங்கா நதி தீரத்தில்... - 18

இப்படித்தான் ஸ்வாமிகள் ஓர் ஊருக்குச் சென்றிருந்தபோது, ஊர் மக்கள் எல்லோரும் ஸ்வாமிகளிடம் வந்து, ''ஊர் மிகவும் வறட்சி ஆகிவிட்டது. ஸ்வாமிகள்தான் அனுக்கிரஹம் செய்ய வேண்டும்'' என்று பிரார்த்தித்துக் கொண்டார்கள். ஸ்வாமிகளும் அந்தக் கிராமத்தில் இருந்த சிவன் கோயிலுக்குச் சென்று பிரார்த்தித்துக்கொண்டு, ''அம்பிகைக்குத் தினமும் வடையும் பாயசமும் நைவேத்தியம் செய்யுங்கள்'' என்று கூறினார். ஊர் மக்களும் அப்படியே செய்ய, விரைவிலேயே அந்தக் கிராமம் செழிப்படைந்தது.

ஸ்வாமிகள் ஜனங்களின் லோகாயத விஷயங்களுக்கு எவ்வளவு முக்கியத்துவம் கொடுத்தாரோ, அதைவிடவும் பலமடங்கு முக்கியத்துவத்தை தர்ம சாஸ்திரங்களையும் நம்முடைய சம்பிரதாயங்களையும் கடைப் பிடிப்பதற்கும் கொடுத்து வந்தார்.

அக்காலத்தில், பிரயாகையில் மிகவும் பிரசித்தமான பிரமுகராக இருந்த மதன்மோகன் மாளவியா என்பவர், காசியில் ஹிந்து சர்வகலாசாலை ஒன்றை ஏற்படுத்தவேண்டும் என்று நினைத்தார். அதற்கு ஸ்ரீஸ்வாமிகள் நேரில் வந்து அனுக்கிரஹம் செய்யவேண்டும் என்று பிரார்த்தித்துக்கொள்ளவேண்டி, தம்முடைய பிரதிநிதியாக தத்தாத்ரேய கிருஷ்ண தாமலே என்ற அன்பரை ஸ்வாமிகளிடம் அனுப்பி வைத்தார். ஆனால், அதற்கான கால அவகாசம் இல்லாததால், ஸ்வாமிகள் சர்வ மங்களங்களும் பொருந்திய தம்முடைய குருநாதரின் பாதுகைகளை அவரிடம் கொடுத்து, ''பூமிபூஜை செய்யும்போது இந்தப் பாதுகைகளை வைத்து பூஜித்து, பணியைத் தொடங்குங்கள். நினைத்த காரியம் ஸித்தியாகும்'' என்று அனுக்கிரகம் செய்து அனுப்பினார்.

துங்கா நதி தீரத்தில்... - 18

ஸ்வாமிகள் சொல்லியபடியே செய்ய, காசியில் ஹிந்து சர்வகலாசாலை நல்லமுறையில் ஏற்படுத்தப்பட்டது. அதன் பின்னர், ஸ்வாமிகள் காலடிக்கு யாத்திரை மேற்கொண்டு, சோழவந்தானில் முகாம் இட்டிருந்தபோது, அவரை நேரில் வந்து தரிசித்த மதன்மோகன் மாளவியா, ஸ்வாமிகளுக்குத் தம்முடைய நன்றிகளைத் தெரிவித்துக்கொண்டதுடன், ஸ்வாமிகள் கொடுத்து அனுப்பிய பாதுகை களையும் திருப்பிக் கொடுத்தார்.

ஸ்வாமிகளைப் பொறுத்தவரை, அவருடைய குருநாதரின் பாதுகைகள் மிகுந்த முக்கியத்துவம் வாய்ந்தவை. தினசரி அனுஷ்டானங்களையும் இதர பணிகளையும் தொடங்குவதற்கு முன்னதாக, அவர் அந்தப் பாதுகைகளை எடுத்துக் கண்களில் ஒற்றிக்கொண்டு, அவற்றில் படிந்திருக்கும் தூசிகளைத் தமது வஸ்திரத்தால் துடைத்துவிட்டு, தம்முடைய தலையிலும், இதயத்திலும் சிறிது நேரம் வைத்திருந்துவிட்டு, புஷ்பங்களாலும் வாசனை திரவியங்களாலும் அலங்காரம் செய்து சேவிப்பார்கள். அதன் பிறகுதான், இதர காரியங்களைப் பார்ப்பார்கள். தாம் எந்தக் காரியம் செய்வதாக இருந்தாலும், குருநாதரிடம் அனுமதி பெறாமல் செய்வது கிடையாது. அதேபோல், அந்தக் காரியத்தைச் செய்துமுடித்ததும், குருநாதருக்கே சமர்ப்பணம் செய்வார்கள். கஷ்ட நிவர்த்தி வேண்டி வருபவர்களுக்குக்கூட, தம்முடைய குருநாதரின் பாதுகைகளில் விபூதியை அர்ப்பணம் செய்து கொடுப்பார்கள். எந்த ஒரு சந்தர்ப்பத்திலும் தம்முடைய குருநாதரின் அனுக்கிரஹம் இன்றி, தம்மிடம் வேறு சக்தி இருப்பதாக அவர் நினைத்ததும் இல்லை; செயல்பட்டதும் இல்லை. அவருடைய அந்த குருபக்திதான், அவருடைய குருநாதரான ஸ்ரீநரஸிம்ம பாரதி ஸ்வாமிகளின் விருப்பத்தை நிறைவேற்றுவதற்கு மிகவும் அனுகூலமாக இருந்தது என்றே சொல்லலாம்.

அப்படி ஸ்வாமிகளின் குருநாதர் கொண்டிருந்த விருப்பம்தான் என்ன?

அதை ஸ்வாமிகளால் எந்த ஒரு தடங்கலும் இல்லாமல் நிறைவேற்ற முடிந்ததா?

- தொடரும்...

தொகுப்பு: க.புவனேஸ்வரி

படங்கள்: ஜெ.வேங்கடராஜ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism