Published:Updated:

கடவுள் அறிவோம்! - 5

ஆலமர்ச் செல்வனே போற்றி!தி.தெய்வநாயகம், ஓவியம்: பத்மவாசன்

கடவுள் அறிவோம்! - 5

நம் சிந்தையை மகிழ்விக்கும் சிவ வடிவங்களில் குறிப்பிடத்தக்கது, ஸ்ரீதட்சிணாமூர்த்தி திருவடிவம். இறைவன் ஞானத்தின் திருவுருவாக விளங்கி, அதை போதிக்கும் குருவாக அருட்கோலம் காட்டும்போது, ஸ்ரீதட்சிணாமூர்த்தி என்று அழைக்கப்படுகிறார்.

‘தட்சிணம்’ என்றால், தெற்கு எனப் பொருள். கூட்டை விட்டுப் பிரிந்து வடக்கு நோக்கி வரும் ஆத்மாக்களை ஆட்கொண்டு அருள, எம்பெருமான் தெற்கு நோக்கி அருள்வதால், இவரை ‘தென்முகக் கடவுள்’ எனச் சிறப்பிப்பர். ஆலமரத்தடியில் இருந்து போதிப்பதால் ஆலமர்ச் செல்வர், ஆலமர்க் கடவுள் என்றும் போற்றப்படுகிறார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

ஆதிசக்தி இவரிடம் ஆகமங்களைக் கேட்டு, உலகுக்கு உபதேசித்தாள்.  மேலும், சனகாதி முனிவர்கள், கெளதமர் முதலான பஞ்ச ரிஷிகள், சுகர், தும்புரு, நாரதர், திருமூலர், பதஞ்சலி ஆகியோரும் இவரிடம் ஞான உபதேசம் பெற்றனர். இவர், தாம் ஏற்கும் கோலத்துக்கு ஏற்ப ஸ்ரீயோக தட்சிணாமூர்த்தி, ஸ்ரீவீணாதர தட்சிணாமூர்த்தி, ஸ்ரீமேதா தட்சிணமூர்த்தி, ஸ்ரீஆசீன தட்சிணாமூர்த்தி, ஸ்ரீவர தட்சிணாமூர்த்தி, ஸ்ரீயோகபட்ட அபிராம தட்சிணாமூர்த்தி, ஸ்ரீஞான தட்சிணாமூர்த்தி, ஸ்ரீசக்தி தட்சிணாமூர்த்தி ஆகிய சிறப்புப் பெயர்களுடன் அருள்கிறார். இங்கே படத்தில் நீங்கள் தரிசிப்பது, சுருட்டப்பள்ளி தலத்தில் அருளும் ஸ்ரீசக்தி தட்சிணாமூர்த்தி. சென்னையில் இருந்து திருப்பதி செல்லும் வழியில் உள்ள ஊத்துக்கோட்டை எனும் ஊரில் இருந்து சுமார் 1 கி.மீ. தொலைவில் அமைந்திருக்கிறது சுருட்டப் பள்ளி. ஸ்வாமியின் அருகில் நின்று அவரைத் தழுவிக்கொண்டிருக்கும் அன்னையை, ‘சாந்தி’ என்று அழைக்கின்றனர். சகல பிரச்னைகளும் நீங்கி மன அமைதி பெற, சுருட்டப்பள்ளிக்கு வந்து இவரை வழிபட்டுச் செல்கிறார்கள்.

கடவுள் அறிவோம்! - 5

ஸ்ரீதட்சிணாமூர்த்தியை வழிபட்டு வரம்பெறும் வகையில், ‘ஸ்ரீதட்சிணாமூர்த்தி நவரத்ன மாலிகா’ எனும் மிக அற்புதமான ஸ்தோத்திரத்தை அருளியிருக்கிறார் நவநாத சித்தர். அந்த 9 ஸ்தோத்திரப் பாடல்களில் ஒன்று இங்கே உங்களுக்காக...

மூலேவடஸ்ய முனிபுங்கவ ஸேவ்யமானம்
முத்ராவிஸேஷ முகுளீக்ருத பாணிபத்மம்
மந்தஸ்மிதம் மதுரவேஷமுதாரமாத்யம்
தேஜஸ்ததஸ்து ஹ்ருதிமே தருணேந்து சூடம்

கருத்து: ‘ஆல மரத்தடியில் சிறந்த முனிவர்களால் வணங்கப்படுகிறவரும், ஞான முத்திரையுடன், தாமரை போன்று சிவந்த கரங்களைக் கொண்டவரும், மிகக் கம்பீரமானவரும், எல்லோருக்கும் முதல்வரும், அர்த்த சந்திரனைத் தலையில் தரித்தவரும், தேஜோரூபியானவருமான ஸ்ரீதட்சிணாமூர்த்தியை வணங்குகிறேன்.’

இதைப் படிப்பதால் சகல வித்தைகளும் கிடைக்கும். வலிப்பு, மறதி, வயிற்று வலி, இருதய நோய், ஜுரம் முதலான நோய்கள் நீங்கும். ஜாதகத்தில் குரு, சூரியன் முதலான கிரகங்களால் ஏற்படும் தோஷங்கள் விலகி நன்மை உண்டாகும்.

- இன்னும் அறிவோம்...